ادم و مليكه الجزء السادس _ روايات رومانسيه

#ادم و مليكه _روايات رومانسيه

#الجزء_السادس

اول ما شفته حسيت بشعور مقدرش اوصفه....روحى اتردت لى ...انا فعلا مكنتش اقدر اكمل حياتى من غيره 

لقيت نفسي اترميت فى حضنه معرفش ازاى و كأنى برمى على كتفه عذاب سنين مشفتوش فيها 

هو كمان كانت عنيه بتعيط من الفرح و هو واخدنى فى حضنه و مش مصدق انى بين اديه 

اخدته و رحت لوالدى علشان يكلمه و يطلب ايدى منه 

قصص رعب روايات جميلة روايات رومانسية روايات اون لاين روايات كاملة كتب وروايات

اول ما ادم اتكلم مع بابا 

بابا بص له و قاله انت ازاى جاى تتجوز بنتى و احنا لا نعرفك ولا تعرفنا و لا حتى انت من بلدنا ؟؟ 

انا بحب مليكه يا عمى ...هو ده كل اللى اعرفه 

و هو الحب هيفتح بيت يا استاذ ؟؟؟ هتقدم ايه لبنتى تقدر تقولى ؟؟

هقدم لها قلبى 

دا كلام فارغ و شغل افلام ...انت انسان غير مسؤل بالمره ...ازاى تسمح لنفسك تيجى من غير اهلك و من غير اى شئ و تقول عاوز اتجوز ...هما اهلك مش علموك أن فى اصول لطلب بنات الناس ؟ 

عارف يا عمى ...بس صدقنى حبى لمليكه هو اللى حركنى مفكرتش فى اى شئ تانى 

انا اسف طلبك مرفوض ....

و خرج ادم من بيتنا و قلبى خرج معاه ...كنت واقفه مذهوله من كلام بابا ...

انا اول مره اشوفه بيفكر بالطريقه دى 

بابا دايما تفكيره متفتح و الفلوس دى اخر حاجه يفكر فيها 

ليه كدا يا بابا ؟؟؟

اسكتى يا مليكه انا عارف مصلحتك 

لا بابا ...انت متعرفش مصلحتى..مصلحتى مع اللى يحبنى ...اللى حبه دخل قلبى 

انتى صغيره يا مليكه و بكرا تفهمى انا عملت كدا ليه 

لا مش هفهم ...عمرى ما هفهم و عمرى ما هسامحك انك فرقت بينى و بين اكتر حد حبيته فى حياتى 

حبتيه باماره ايه ؟؟؟ قوليلى كدا على سبب معين خلاكى تحبى الشخص ده 

الحب ملوش سبب يا بابا ...الحب اللى يكون بسبب بيزول بزوال السبب 

أما حبى لادم ملوش اى سبب منطقى ...لو شفته بعيني او دخلت جوه قلبي هتعرف انا بحبه ازاى 

انتى غلط و تفكيرك غلط يا مليكه ...بقى تسيبي خطيبك اللى احسن من الشخص ده مليون مره و تحبى ده ؟؟

مش بايدى

و انا مش هسيبك تضيعى مستقبلك عشان شخص لا نعرف أصله و لا فصله 

تمام يا بابا ...و انا كمان مش هتجوز اى حد غير ادم ...انا كمان حره فى نفسي و لو عاوزنى اعنس خلاص دا أمر يرجع لك 

انتهى الموقف على كدا و قعدت فتره كبيره زعلانه من بابا 

ادم رجع بلده و قعدنا سنه مفيش بينا غير مكالمات و خطابات و بس 

كان ادم بيكتب لى فيها احلى كلام 

لما بابا شافنى مصممه و مفيش فايده طلب أن آدم يجي بس يجيب أهله كمان معاه علشان يتأكد أنهم موافقين على الزواج بيا 

لما قلت لادم طار من الفرحه و قالى 

دا اجمل خبر سمعته فى حياته 

راح لابوه و امه و قالهم أنه عاوز يسافر تونس و ياخدهم معاه علشان يخطبوا له بنت تونسيه 

امه و أبوه بصوا لبعض و سكتوا 

مالك يا ماما ؟؟ مالك يا بابا ؟؟

تونسية ايه اللي عاوز تتجوزها دى ؟؟ ليه من قلة البنات المصريه ؟؟؟ و بعدين سها بنت اختى مالها ؟؟ البت بتحبك و متعشمه فيك 

يا ماما سها اختى ...مش قادر احس انها غير كدا ابدا 

و التونسيه هى اللى حاسس انها مراتك ؟؟

ايوه يا ماما ...التونسيه خطفت قلبى 

يا لهوووووى ....خطفت مين يا ابن المخطوفه ....على جثتى تتجوزها 

ليه يا ماما ؟؟ 

اهو كدا يا ابن انيسه ...زى ما قلت لك كدا ...لو اتجوزتها متقولش لك ام عايشه على ضهر الدنيا 

طب خدى هنا نتكلم 

لا مش هتكلم معاك تانى 

و انت يا بابا رايك ايه ؟؟ عاجبك اللى بتعمله ماما ده ؟؟ 

يا ابنى امك معذوره ...هى خايفه لتقعد هناك فى تونس و معدتش تشوفك مره تانيه و بعدين هى متعرفش البنت اللى انت عاوز تتجوزها دى ظروفها ايه ؟

و الله يا بابا لو ماما كلمتها هتحبها اوى 

و مين يا ابنى يقدر يقنع انيسه انها تكلمها 

انت يا بابا 

انا ؟؟؟ لا يا ابنى و انا مالى هو الواحد مستغنى عن عمره ...انت متعرفش امك فى شرها بتبقى عامله ازاى ؟

لا عارف يا بابا و عارف أن محدش هيقدر يقنعها غيرك 

مش لما اقتنع انا الأول يا ابنى 

و اذا قلت لك أن هى دى اللى هتسعدنى يا بابا هتقول ايه ؟؟

هقول لا اله الا الله ...هدخل لامك بس لو جرالى حاجه هيبقى ذنبى فى رقبتك انا بقولك اهو 

و دخل ابو ادم يقنع انيسه مراته بيا و هى تصوت و تقول ابدا ....انت يا راجل عاوز بت غريبه تاخد ابنك و تمشي ؟ مش يمكن حراميه أعضاء و عاوزين ياخدوه يدبحوه و ياخدوا أعضائه

يا ستى بطلى تتفرجى على خلف الأسوار اللى بتتفرجى عليها دى ...الواد بيقول أن البنت بنت ناس و جميله و محترمه ...طب اقولك هخليه يتصل لك بيها و تكلميها و اكيد هتعرفى من صوتها هى كويسه و الا لا 

يا ريت اكلمها و انا اقولها تبعد عن ابنى 

لا لا عيب بقا ...انتى هتصغرى ابنك و الا ايه ؟؟؟ ابنك مهندس اد الدنيا عيب كدا بقا 

و فعلا ادم خلانى اكلم والدته و دخلت قلبها من اول دقيقه و بقت على اخر المكالمه تقولى نفسي اشوفك يا ملوكه 

قلت لها على راسي يا امى تشرفينى ,تعالى بس تونس و انا هفسحك فى أماكن جميله جدا و اعملك اكلات تونسيه حلوه جدا

يا ريت يا حبيبتى ...انا نفسي اشوف تونس من زمان ...انا هخلى ادم يحجزلنا و اجيلك على عينى ...اجيبلك ايه معايا من مصر و انا جايه ؟؟ 

هاتيلى ادم معاكى يا ماما 

حبيبتى يا بنتى ...تصدقى انى حبيتك على حبك لابنى 

و قدرت اقنع امه بيا على اخر المكالمه و اكلت بعقلها حلاوه زى ما بتقولوا ... و زاد اقتناعها بيا اكتر اول ما شافتنى فى المطار.

قصص رعب روايات جميلة روايات رومانسية روايات اون لاين روايات كاملة كتب وروايات

يتبع 

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ..
قصص رعب روايات جميلة روايات رومانسية روايات اون لاين روايات كاملة كتب وروايات