#الخطيئة
#الجزء_الرابع
قصص رعب روايات جميلة روايات رومانسية روايات اون لاين روايات كاملة كتب وروايات
اوعدكم أن الاوضه دى هتبقى حاجه مؤقته كدا لحد ما اشتغل و اقف على رجلى ...بعدها هنجيب شقه واسعه و احلى من اللى كنا قاعدين فيها كمان
هزيت راسي و انا زعلانه على الوضع اللى وصلناله بس امى معذوره و مش قدامها تعمل غير كدا ...الله يسامحك يا بابا 😔
و اشتغلت امى من اول يوم فى العماره
افتكر انها اول حاجه بدأت بيها هو السلم اللى كان من الواضح أنه متمسحش بقاله فتره
و بدأت تكنس من الدور الاخير و فاكره انى انا و اخواتى كنا خايفين انها تسيبنا فى الاوضه لوحدنا و قعدنا نعيط
خلاص متزعلوش هاخدكم معايا بس متعملوش دوشه
امى اخدتنا و اخدت المقشه و كانت أول مره فى حياتى اركب اسانسير انا و اخواتى
اول ما امى قفلت بابه و ضغطت على زرار الدور الاخير قلبنا اتسحب ووقع فى رجلينا
امى اخدتنا فى حضنها و بقت تطبطب علينا و تقولنا منا قلت لكم خليكم تحت مسمعتوش الكلام
امى بدأت تنضيف من الدور الاخير و بدأت بعض الشقق يفتحوا الباب و يتعرفوا عليها
و هى كانت بتقول لهم انى انا البوابه الجديده
كنت بحس بخجلها الشديد كل ما شقه من الشقق يتفتح بابها و يسألها انتى مين بس كانت بتحاول تخفى خجلها ده بابتسامتها الحلوه
امى نزلت الاتناشر دور و احنا نزلنا معاها
بعد كدا جابت الجردل و المساحه و طلبت مننا أننا نفضل فى الاوضه لكننا رفضنا برده
و طلعنا معاها مره تانيه
امى كانت تخبط على الشقق اللى جنب السلم عشان تملى منهم ميه تمسح بيها
و لاول مره فى حياتنا نمد ايدنا لحد لما بعض من السكان بقوا يشوفونا مع امنا فيدونا ثمره فاكهه او حاجه حلوه
امى بعد ما خلصت مسيح السلم اخدتنا و دخلت الاوضه و احنا كأطفال كنا فرحانين بالحاجات اللى معانا و عمالين نتخانق مع بعض عليها
امى كان باين على ملامحها التعب و الزعل فى نفس الوقت
اسكتوا متتخانقوش ...دى اول و اخر مره تطلعوا معايا و انا بمسح السلم و اول و اخر مره تمدوا ايدكم لحد انتوا فاهمين ؟؟؟
مش عايزه واحده فيكم تاخد حاجه خلى عندكم عزة نفس و كرامه
طبعا احنا مكناش فاهمين الكلام اوى بس الخلاصه أننا منخدش حاجه من حد
و فعلا دى كانت اخر مره نطلع مع امنا و بقينا معظم الوقت قاعدين جوه الاوضه و لما نزهق نطلع نقعد قدام الباب شويه
بعد كدا ابتدينا ناخد على المكان و بقينا نلعب قدام العماره مع بعض
امى كانت بتشتغل ليل نهار علشان توفر لنا عيشه كريمه
كانت ساعات تطلع تنضف شقق السكان و تروح تجيب لهم الطلبات
كنت اشوفها اخر الليل و هى ماسكه رجليها و بتدهنها بالمراهم من الالم اللى حساه
و مرت الايام و امى بتعمل كل حاجه حلوه عشانا و بتحاول معانا أننا نبقى احسن ناس فى الدنيا
اه نسيت اقولكم أن ابويا بعت لامى ورقه طلاقها على عنوانا الجديد اللى كانت سايباه لجارتنا بدل ما يجى يشوف لحمه حصل فيه ايه
أما عن المدرسه فكنا انا و اخواتى شايفين امنا اد ايه بتتعب عشانا و علشان كدا كنا بنحاول ننجح و بمجموع كبير عشان نفرحها
يوم ما نجحت فى الابتدائيه امى عملت فرح و بقت توزع حاجه ساقعه على العماره كلها ...بقت تزغرط لحد ما نفسها اتقطع
امى كانت فرحانه بيا و باخواتى و كانت دايما تدعى أن ربنا يعوض صبرها خير فينا
و فى يوم من ذات الايام كنت قاعده بذاكر و كنت ساعتها فى أولى إعدادى فى نهايه السنه
و لقيت امى داخله عليا و هى فرحانه
تعالى يا سها ..تعالى يا نها ...و انتى يا اروى
خير يا ماما
انا عاملالكم مفاجاه حلوه اوى
مفاجاه ايه دى يا ماما ؟؟
لا مش هقولكم لازم تيجوا تشوفوا المفاجاه بنفسكم البسوا هدومكم يلا عشان هنخرج
و خرجنا مع امنا و احنا مش عارفين رايحين على فين
ركبنا مواصله صغيره و نزلنا مكان غريب قدام عماره شكلها حلو و طلعنا مع امى الدور التالت فى العماره دى
و لقيت امى مطلعه مفتاح و بتفتح الباب استغربت اوى
تعالوا يا اولاد ادخلوا
ايه دا يا ماما ؟ شقة مين دى ؟؟
دى شقتنا الجديده
معقول ؟ دى كمان مفروشه وواسعه اوى و حلوه
انا بقالى سنين بحوش فى تمن العفش اللى انتوا شايفينه ده و جيت دورت على شقه كبيره وواسعه علشان تفرحوا بيها و أجرتها و فرشتها
الله يا ماما دى احلى مفاجاه فى الدنيا ...ربنا يخليكى لينا
تعالوا بقا لما افرجكم على الشقه
دى اوضتك يا اروى فيها سرير و دولاب و مكتب عشان تذاكرى
ايه دا ؟؟؟
دا كمبيوتر و متوصله نت كمان عشان تبقى تجيبي الدروس من على النت و تذاكرى
معقوله ربنا يخليكى يا ماما يا حبيبتى
تعالى يا سها انتى و نها ...دى اوضتكم فيها سريرين و مكتب و دولاب
اشمعنى اروى لها اوضه لوحدها و عندها كمبيوتر كمان ؟
اروى الكبيره و لما تنجحوا انتوا كمان فى الابتدائيه هجيب لكم كمبيوتر زيها
تعالوا بقا لما افرجكم على اوضتى
الله يا ماما دى حلوه اوى شبه اوضتك القديمه اللى بعتيها بس دى احلى كمان
عاوزاكوا بقا تذاكروا و تشرفونى و متشمتوش فيا حد
حاضر يا ماما
و نقلنا فى الشقه الجديده و كنا فى منتهى السعاده و كانت امى تروح شغلها و تفضل طول النهار تشتغل علشان كان نفسها تجهزنا جهاز محترم ...كانت دايما تقول نفسي اخرجكم عرايس حلوين مستورين محدش يتكلم عليكم كلمه هجيب لكم احسن جهاز بس انتوا شدوا حيلكم معايا فى الدراسه و خليكم شاطرين ...عاوزاكم تاخدوا أعلى الشهادات ..
كل ده كان جميل و أمنا كانت معوضانا عن وجود الاب لكن للاسف ضيعت امل امى فيا و خذلتها و كسرت ضهرها
الحكايه بدأت لما خلصت تانيه إعدادى و كنت واقفه فى البلكونه و لقيت شاب واقف فى العماره اللى قصدانا و بيشاورلى...
قصص رعب روايات جميلة روايات رومانسية روايات اون لاين روايات كاملة كتب وروايات
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
جميل اوى انها حاربت لحد مااخدت شقة متفانية اوى الست دى 🌹
ردحذف