#الخطيئة
#الجزء_الثالث
قصص رعب روايات جميلة روايات رومانسية روايات اون لاين روايات كاملة كتب وروايات
خلاص بكرا تعاليلى من النجمه و انا اوديكى للراجل و لو المصلحه مقضيتش هجيب لك اوضه من تحت الارض متقلقيش خالص
خلاص يا حج متشكره اوى
امى رجعت لنا و كان الوقت متأخر اوى و قعدت طول الليل تدعى و تعيط ...لحد ما النهار طلع .
تانى يوم امى راحت للسمسار و أخدها و راح لصاحب العماره
سلام عليكم يا حج اكرم
و عليكم السلام يا عباس
انا جبت لك طلبك اللى كنت موصينى عليه
اى طلب ؟ مش واخد بالى
مش كنت عاوز حد يشتغل بواب على عمارتك ؟؟
ايوه ...لقيت لى حد ؟؟
ايوه الست ام اروى
الست ام اروى دى ؟؟؟؟
ايوه يا حج
بس دى مش باين عليها انها اشتغلت الشغلانه دى قبل كدا ....انتى اشتغلتى بوابه قبل كدا يا ست ؟؟
لا يا حج
تبقى متنفعش يا عباس ...مش اى حد يشتغل الشغلانه دى و انت عارف...و بعدين الشقق كتير و عاوزه راجل صحته حلوه يشوف طلبات الناس
معلش يا حج ...طب جربنى اسبوع واحد و لو جت لك منى اى شكوى همشي انا محتاجه الشغل ده جدا ..... أنا معايا تلات بنات و محتاجه لهم مصاريف
و جوزك فين يا ست ؟؟
جوزى الله يسامحه سابنا لكلاب السكك تنهش فينا و مسألش عن بناته و لا كأنه خلف.
بس الشغلانه دى أجرها رمزى لأن اجرتك بيتخصم منها اجره الاوضه اللى هتقعدى فيها و معظم اجرتك بتبقى من السكان و انتى و شطارتك بقا
و انا موافقه يا حج
طيب تعالى اوريلك الاوضه و الشغل هيكون ازاى
الراجل اخد امى ووراها العماره أو البرج زى ما بيقولوا
البرج مكون من اتناشر دور و الدور فيه اربع شقق يعنى المجموع ٤٨ شقه ...بعد كدا اخدها على اوضه تحت السلم و فتح القفل بتاعها قدامها ..
و دى الاوضه اللى هتقعدوا فيها
بس دى اوضه صغيره اوى يا حج و مفيهاش شباك
و الله دى اللى متوفره و كان قاعد فيها الجدع اللى قبلك لولا جاله سفريه السعوديه ....هى الاوضه صغيره اه بس فيها ميزه انها مفروشه يعنى مش هتحتاجى تجيبي حاجات كتير معاكى
خلاص يا حج انا موافقه هروح اجيب عيالى و اجى
طبعا انتى عارفه هتعملى ايه ؟؟ السلم لازم يتمسح أسبوعيا و لازم مدخل العماره يتمسح يوميا و هديكى رقم تليفونى لو حصل اى حاجه ترنى عليا على طول
حاضر يا حج
مش عاوز حد يشتكى منك ...و لو كنتى كويسه معاهم هينغنغوكى السكان عندنا هنا ناس كبيره اوى و حالتهم كويسه بس اهم حاجه الامانه و اللى تشوفيه متطلعيش تقوليه بره يعنى تبقى طرشه و خرصه و عاميه
حاضر
و جت امى صحتنا من النوم و لمت هدومنا فى شنطتين و اخدت شويه اطباق و معالق
و قبل ما نمشي من الشقه امى خبطت على جارتنا ام حسين اللى ساكنه قدامنا و سلمت عليها و هى بتعيط انها هتسيب المكان غصب عنها و أديت لها عنوانها الجديد عشان لو حد سأل عليها
معرفش امى كانت تقصد حد مين ده ؟؟ بس بيتهيالى امى كانت مش عايزه تقطع الخيط الوحيد بينا و بين ابونا و كان عندها امل أنه يسال علينا خاصة أنها لسه مراته و مطلقتش منه
امى اخدتنا فى أيدها وراحت لصاحب الشقه
سلام عليكم ...اتفضل يا حج المفتاح اهو
خلصتى نقل حاجتك يا ام اروى ؟
لا انا مخدتش الا شويه الهدوم و الطباق اللى انت شايفهم دول
الله ..طب و بقيه عفشك ؟؟
بقية عفشي بيعه و خد اجرتك و لو مكفاش سامحنى فى الباقى
و ليه كدا يا ام اروى
انا مبحبش اكل حق حد يا حج
منا قلت لك مسامحك
و لول ...دا حقك و انت اولى بيه
متزعليش منى يا ام اروى انا عارف انك بنت اصل بس غصب عنى يا اختى
لا حقك يا حج ...ميزعلش من الحق الا ولاد الحرام
يعنى مسامحانى ؟؟
المسامح ربنا يا حج....سلام عليكم
امى سابت الراجل و هو مذهول و خجلان من نفسه أنه طردها بالطريقه دى ..
امى مكنتش هتاكل عليه فلوسه و هو عارف كدا بس مصبرش ...فى ناس لما زوج الواحده يسيبها سواء بالطلاق أو الموت بيعتبروا أن الست دى جربه أو هتكون عاله ..ناس كتير بتنفر منها ..ناس كتير بتطمع فيها و تفتكر انها مدام اتطلقت أو مش معاها راجل بقت لقمه سهله.
و رحنا على الاوضه
و طبعا فى فرق كبير بين الشقه اللى كنا قاعدين فيها اللى كانت تلات اوض و صاله واسعه و تلات بلكونات و بين الاوضه اللى مساحتها حوالى ٢ متر فى ٣ متر ...ملهاش اى منفذ و لا حتى شباك صغير
فيها سرير قديم و تربيزه و بوتاجاز مسطح وحوض فى قلب الاوضه
أما الحمام فكان عباره عن قاعده بلدى فى جنب من جوانب الاوضه مقفول عليه بستاره من المشمع .
اول ما دخلنا الاوضه جالى ذهول ...بقا بعد شقتنا هنسكن هنا ؟؟
امى لمحت فى عينى اللى بفكر فيه و اخدتنى انا و اخواتى فى حضنها و قالت لنا
انا عارفه أن المكان هنا مش زى بيتنا بس هنعمل ايه ممعييش ادفع أجره الشقه و مش ممكن اروح أمد ايدى لابوكم لكن اوعدكم أن الاوضه دى هتبقى حاجه مؤقته كدا لحد ما اشتغل و اقف على رجلى ...بعدها هنجيب شقه واسعه و احلى من اللى كنا قاعدين فيها كمان
هزيت راسي و انا زعلانه على الوضع اللى وصلناله بس امى معذوره و مش قدامها تعمل غير كدا ...الله يسامحك يا بابا 😔
قصص رعب روايات جميلة روايات رومانسية روايات اون لاين روايات كاملة كتب وروايات
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ربنا يجبر بخاطر كل موجوع ويعين كل واحد على شيلته
ردحذف