عنبر خمسه الجزء الثانى عشر

#عنبر_خمسه
#الجزء_الثانى_عشر
‏ساره ابتسمت و قالت لى انت بتفكرنى ببابا كان حنين اوى
‏اعتبرينى ابوكى يا ستى أو اقولك اعتبرينى اخوكى ...طبعا اخوكى الصغير
‏ضحكت ساره
‏مدام ضحكنى بقا يبقى لازم تاكلى
‏ساره هزت راسها بالموافقه و بدأت تاكل
‏عرفت ساعتها انى كسبت اول جوله و الحمد لله و خلتها تثق فيا ..
ساره خلصت اكل و كنت شايف أن فستانها قديم و متقطع
قلت لها ايه رايك انا جايب لك فستان و شويه حاجات على ذوقى كدا يارب يعجبك ممكن تدخلى تاخدى دش و تغيري هدومك و بعد كدا نتكلم سوا
ساره هزت دماغها بالموافقه
قمت جبت لها اللبس و شاورت لها على الحمام
طبعا انا طول الوقت قافل تليفونى علشان محدش يتصل عليا ..بس كنت عاوز اطمن حصل ايه فى المستشفى
و كنت محضر البديل ...جبت خط جديد و حطيته فى التليفون و اتصلت على شعبان علشان اشوف ايه اللى حصل
الو
الوووو مين معايا ؟
انا دكتور احمد يا شعبان
شعبان بعد ما كان صوته يجيب اخر الشارع لقيته بيوطى صوته و بيقول
استنى يا اعتدال هخرج بره عشان اعرف اكلمك شعبان خرج و قالى
الحق يا دكتور الدنيا مقلوبه هنا على اللى اسمها ساره دى و المدير مبهدل الدنيا و اتصل بالبوليس و اتصل على كل الدكاتره جابهم الا سيادتك كلمك لقى تليفونك مقفول
و هو عاوز منى ايه ؟ انا فى اجازه انهارده و بكرا
يا دكتور دا مش ساكت و عمال يزعق و جاب كل اللى كانوا فى النبطشبه امبارح من تمرجيه و ممرضين و عمال و عامل معاهم تحقيق جامد اوى
طب و انت أما سالك قلت له ايه ؟
قلت له انى كان عندى مغص و كنت فى اوضة الغفير
كويس اوى
طب ما تفتح تليفونك يا دكتور احسن يشكوا فيك و تلاقيهم طبين عليك فى البيت
ما يطبوا انا مش فى البيت اصلا و بعدين انا عندى اجازه  يعنى ملوش حاجه عندى
ربنا يسترها يا دكتور شكل الحكايه دى مش هتعدى على خير ...الشرطه دلوقتى فى اوضه ساره و بيقولوا أن الباب اتفتح بطريقه عاديه بالمفتاح يعنى مفيش اثار عنف على الباب ...و بكدا هما متأكدين أن اللى عمل كدا من جوه المستشفى
و ماله ...انا مليش دعوه انا سايب الحاله دى من اسبوع يعنى معرفش عنها حاجه ..بقولك ايه يا شعبان أثبت كدا و متخليش اى حاجه تظهر عليك و بلغنى بأى جديد اول باول على النمره دى
حاضر يا دكتور
قفلت السكه مع شعبان و لقيت ساره خارجه من الحمام زى القمر المنور بس الفستان ظهر علامات كانت على اديها و رقبتها مكنتش واخد بالى منها
علامات كدا أشبه بالحروق ...دا غير طبعا اثار الجروح اللى كانت فى جسمها
ساره خرجت من الحمام و هى مكسوفه و قعدت بحذر
الله الفستان عليكى تحفه
ساره اتكسفت و قالت متشكره
شوفى جبت لك ايه كمان
ساره رفعت راسها لقت فى ايدى باروكه شعر طويل ناعم
اول ما شافتها عينها لمعت و فرحت اوى
اتفضلى جربيها
ساره اخدت الباروكه و حطيتها على دماغها و رجعت زى ما كنت بشوفها فى الصور بالظبط
المرايه اهى ...بصى شوفى نفسك كدا
ساره بصت فى المرايه و مبقتش مصدقه نفسها بقت تحسس على شعر الباروكه و فرحانه اوى
انا هروح اعمل نسكافيه اعملك معايا ؟؟؟
ياريت ...متشكره اوى يا دكتور
العفو على ايه ؟ هو انا لسه عملت حاجه ؟
عملت النسكافيه و قعدت انا و ساره اكلمها عن نفسي و عن والدتى و عن دراستى و هى دا كله ساكته بتهز دماغها و بس
الوقت مر معاها مش عارف ازاى لقيت نفسي فجأه قرب المغرب
ياااا دى الساعه بقت خمسه و احنا لسه مأكلناش
بس انا مش جعانه
بس انا جعت من كتر الرغى 😂
انا هطلب بيتزا ...تحبى اطلب لك بيتزا أية ؟؟
لا مش جعانه صدقنى
بصى انا بحب بيتزا الفراخ هجيب لك معايا
اتصلت على محل البيتزا و جاب لنا الاكل
اكلنا و كله تمام
انا قاصد الفتره دى كلها انى متكلمش معاها على اى شئ يخصها علشان تثق فيا اكتر و تطمن لى
تحبى تدخلى تنامى شويه ؟؟
لا انا نايمه بقالى كتير مش جايلى نوم دلوقتى
طب تحبى ندردش فى موضوع معين ؟؟
اتكلم انت مش فى دماغى حاجه
طب بقولك ايه ؟؟ انا دكتور على أدى كدا سافرت المانيا و اتعلمت هناك حاجه كدا ياما الافلام ضحكت عليها و اتعاملت معاها بأنها زى الدجل
حاجة ايه دى ؟؟
التنويم المغناطيسي
يعنى ايه تنويم مغناطيسي ؟

بصى هو علاج بيساعد المريض على التحكم بشكل أفضل في حالة الوعي عنده، وبيساهم في علاج بعض المشاكل الصحية زى الاكتئاب والالم وغيرها. ايه رايك اجربه عليكى ؟
لا لا مش عاوزه
ليه ؟ خايفه من ايه ؟
اللى شفته فى الافلام أنه بيخلى الواحد بيفقد السيطره على نفسه و المنوم المغناطيسي بيتحكم فيه
طب ايه رايك أن الكلام ده غلط خالص بالعكس بقا دا التنويم يعتبر اداه بتخليكى أكثر سيطره و بتساعدك على توجيه الإنتباه و الخيال و قوة الاراده و بالتالى بتأثر بطريقه ايجابيه على افكارك و مشاعرك و جسمك و سلوكياتك

انا خايفه
متخافيش جربى هترتاحى جدا انا عارف انك شخصيه مغامره
و عرفت ازاى ؟؟
انا اعرف عنك حاجات كتير اوى ..
طيب انا موافقه بس الجلسه دى اد ايه ؟؟
هى ساعه واحده بس...و متخافيش هتكونى واعيه لكل حاجه بس جسمك هيكون أكثر استرخاء علشان تستجيبي بشكل أكبر
تمام
استنى لحظه هقرب الكرسي
هاتى ايدك
اخدت أيدها و كأنى بسلم عليها و رفعتها شويه لحد منطقة صدرى كدا و مسكتها بايدى الشمال
حطيت ايدى ورا رأسها و قلت لها بصى فى عنيا اوى
و خليت أيدها الشمال تضغط على كف ايدى الشمال
قلت لها انتى دلوقتى مجهده اوى بعد مشوار طويل ...انتى تعبانه و حاسه بالاجهاد الشديد
رمشت بعينها
قلت لها ممتاز انتى فعلا مجهده و باين عليكى نزلت راسها بايدى الموجوده ورى دماغها و بعدها شلت ايدى التانيه و غمضت بيها عيونها
و قلت لها انتى كده نمتى ...انتى فى حاله استرخاء تاااام ...كل حته فى جسمك مسترخيه تماما ....كل مكان مسترخى بس ثابته مش هتقعى
احكيلى يا ساتو
احكيلك على ايه ؟؟
عن ذكرى حلوه فى حياتك
لما نجحت فى الاعداديه و بابا اخدنى و رحنا فرنسا ...كانت اسعد ايام حياتى و عشان كدا قررت اتخصص فى اللغه الفرنسيه و كان نفسي اسافر تانى فرنسا
و مسافرتيش ليه ؟؟
منا اتجوزت
و هو الجواز يمنع سفرك لفرنسا ؟؟
لا اصلى سافرت معاه افريقيا
كنتى بتحبيه ؟؟
ايوه ...كان حنين زى بابا
يعنى حنيته هى اللى شدتك ناحيته ؟
ايوه ...وو...
و ايه يا ساتو ؟؟
كان مهتم اوى بماما
يعنى ايه مش فاهم ؟؟
يعنى كان دايما يبص لها بإعجاب و شفتهم كذا مره بيتوشوشوا سوا لما بابا كان بيسيب المكان
طب و ده خلاكى تحبيه ؟؟
كنت عاوزه أبعده
و بعد ؟؟؟؟
نجحت انى أبعده فتره بس ...
انتى حبتيه ؟؟
لا ..عادى يعنى
و عشان كدا قتلتيه ؟؟
انا مقتلتوش
ازاى مقتلتوش فهمينى
انا ..... ‏
#دجيهان_عادل
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...