#عنبر_خمسه
#الجزء_العاشر
شعبان سابنى و انا محتار اكتر و اكتر مين دول اللى مش هيسبونى اعالجها ؟ اكيد دول اللى شفتهم فى التسجيل ؟ يا ترى دول شغالين لحساب مين ؟؟؟
انا لازم اكلم دكتور عبداللطيف و اشوف الموضوع ده ..
دكتور عبداللطيف !!! انا شغلت التسجيل كله مشفتوش راح لساره 🙄
طب يمكن بص عليها من بره و الكاميرا مجبتوش ؟؟
معقول يكون هو ؟؟ طب ايه اللى يخليه يعمل كدا ؟؟ و لمصلحة مين ؟؟
انا لازم اتصل بوالدة ساره
كويس انى اخدت نمرتها قبل ما امشي المره اللى فاتت
لو مدير المستشفى له دخل فى تدهور حالة ساره يبقى لازم والدتها تعرف علشان تخرجها من هنا بسرعه
النمره اهى انا مسجلها والدة ساره
الو ...سلام عليكم
عليكم السلام يا دكتور ...طمنى ساره عامله ايه ؟؟
ساره مش كويسه يا حاجه
ليه بتقول كدا يا دكتور ؟
انا شايف انى فى حد له مصلحه يخليها بالوضع اللى هى فيه ده
وضع ايه يا دكتور ؟ وضح كلامك من فضلك
ساره لما ابتديت اتعامل معاها كانت واعيه جدا لكل اللى بيحصل حواليها و عرفت والدها من الصور و اتعاملت كويس اوى بس ...
بس ايه يا دكتور ؟؟ ساره حصل لها ايه
بس مش عارف زى ما يكون حد إداها حبوب هلوسه رجعت لحالتها كأنى معملتش اى حاجه
انت بتقول ايه ؟؟ و مين مصلحته يعمل كدا ؟؟؟ يا حبيبتى يا بنتى ...احنا لازم نقول لدكتور عبداللطيف على اللى بيحصل ده اكيد حد من قرايب جوزها هو اللى عاوز يجننها كدا
لا معلش انا مش عاوز حضرتك تقولى لدكتور عبداللطيف
و ليه بقا ؟؟ دا دكتور العيله و يعرف حالة ساره من الالف للياء و لو عرف أن فى حد بيلعب فى ادويتها اكيد هيتصرف
هو مينفعش حضرتك تنقلى ساره من عندنا ؟؟؟
انت عارف يا دكتور أن ساره داخله المستشفى فى جريمة قتل فأنا معرفش بقا ينفع اقدم طلب بخروجها و الا لا ؟؟
خلاص انا هحاول اخد بالى منها كويس بس مش عاوز حضرتك تكلمى المدير
و ليه بقا ؟ انت شاكك فى حاجه ؟؟
لا انا مش متأكد بس اى شئ جايز ...لازم نسكت لحد ما نعرف الحقيقه
تمام يا دكتور ..ابقى طمنى لو حصل حاجه تاني
حاضر ...مع السلامه
قفلت مع والدة ساره و قررت انى احاول احميها و اراقبها طول الوقت.
رحت مكتبى و ندهت شعبان و نبهت عليه محدش يدخل لساره و لا يدخلها اكل غيره
بس يا دكتور انا مش طول الوقت فى المستشفى
الوقت اللى هتكون اجازه فيه انا اللى هدخل لها الاكل و الدوا يا شعبان
مفتاح عنبر خمسه مع مين يا شعبان ؟؟
المفاتيح كلها بتتعلق فى اوضه الممرضات و كل مفتاح عليه رقمه زى ما حضرتك عارف
طيب انا مش عاوز مفتاح اوضة ساره يكون فى اوضة الممرضات يا شعبان ...عايزه معاك او معايا بس
بس دا غلط يا دكتور لو الحكايه دى اتعرفت هنتحول للتحقيق
محدش هيعرف حاجه ...انت حط اى مفتاح تانى مكان المفتاح الاصلى
حاضر ...ربنا يسترها
هيسترها أن شاء الله عشان احنا عاوزين نعمل خير
مر يومين و انا بلاحظ ساره من الكاميرا و شعبان كان بيدخلها الاكل و الدوا زى ما قلت له و كانت حالتها هاديه جدا
اليومين دول مكنش عندى شغل فى المستشفى لأن احنا نظامنا بيكون نبطشيات لمده ٢٤ ساعه تلات مرات فى الأسبوع يعنى بنشتغل يوم بليله و نريح يومين.
انا فى اليومين دول حاولت اجمع كل المعلومات اللى اتنشرت عن الجريمه اللى عملتها ساره فى الجرايد ...حاولت اعرف اى حاجه ذكرها قريب لزوجها زى بعض التصريحات اللى بنسمعها فى الحالات دى اللى بتقول احنا مش هنسيب حق ابننا و الكلام ده
بس الغريب بقا انى ملقتش اى حاجه من الكلام ده و الأغرب إن كان مكتوب أن الزوج وحيد ملوش قرايب الا من بعيد جدا
و طبعا اتواصلت برده مع دكتور ماجد و حكيت له على اللى شفته و الراجل استاء جدا من اللى قلته
لما رجعت المستشفى من و انا على الباب لقيت البواب بيقولى المدير عاوز حضرتك يا دكتور
عاوزنى انا ؟؟
ايوه هو موصينى اول ما توصل اخليك تروح له على طول
استغربت اوى عاوزنى فى ايه انا بقالى يومين مجتش و لا قربت لساره
دخلت أكلمه لقيت الراجل متضايق و متنرفز
ايه يا دكتور الكلام اللى رحت قلته لوالدة ساره ده ؟؟
كلام ايه يا دكتور ؟؟
هو مين اللى من مصلحته ساره تفضل كدا ؟؟ و كمان شاكك فيا ؟؟
انا مقلتش كدا حضرتك
بقولك ايه نظرية المؤامرة اللى انت متبنيها دى كلام فارغ ...انا مش عاوز أذيك و احولك للتحقيق أو اكتب تقرير مش كويس عنك انت لسه اسمك مكتوب بالقلم الرصاص يعنى سهل اوى اطيرك
و انا عملت ايه بس ؟
ملكش دعوه بحالة ساره مره تانيه ...متقربش للحاله دى انا بقولك اهو
طب فهمنى حضرتك انا عملت ايه ؟
كل تصرفاتك غلط يا دكتور من اول العلاج اللى كتبته لحد ما رحت تتصل بالست و تقولها أن فى مؤامره على بنتها و توحيلها انى انا اللى ليا مصلحه فى كدا
يا فندم انا و الله ما قلت كدا
خلاص ...الموضوع خلص و انت من دلوقتى ملكش دعوه بساره نهائى قدامك المستشفى كبيره و فيها مئات الحالات ورينا شطارتك بقا
حاضر يا دكتور
اتفضل يلا على مكتبك
حاضر
خرجت من عند المدير و أنا متأكد أنه فعلا له دور فى أن ساره تفضل بالشكل ده و الا ليه مصمم انى ابعد عن الحاله
كلام شعبان صحيح و فعلا مش هيسبونى اساعدها 😔
خلاص انا مليش دعوه بيها الموضوع ده هيجيب لى وجع دماغ ...إذا كان امها نفسها قلبها مش عليها وراحت جرى قالت لعبداللطيف على كل حاجه بالرغم انى محذرها ...خلاص مليش دعوه انا هتعامل
زى اى دكتور بالمستشفى .
مر اسبوع و انا بعيد خالص عن ساره و مبقاش ليا دعوه بيها نهائى
كنت اروح شغلى زى اى طبيب بالمستشفى و اروح على بيتى
و فى يوم كنت بدور على مرجع مهم عشان حاله قابلتها و كنت عاوز أتأكد من حاجه
و انا بدور وقع فى ايدى البوم صور ساره
يااا دا انا نسيته خالص ...انا وعدت مدام اعتدال انى هرجعه لها
ابقى ابعتهولها بعدين ...يا ترى ساره عامله ايه دلوقتى ؟؟؟ يا ترى لسه بيدوها حبوب الهلوسه دى ؟؟
انا زعلان اوى انى مقدرتش اساعدها...بس ما باليد حيله
بس انا ممكن اتطمن عليها برده
هفتح الكاميرا ابص عليها و اقفل على طول
شوف نايمه زى الملاك ازاى ؟؟؟ دى حاطه قطع الصور جنبها على المخده
انا متأكد انها عاقله
هقفل و اروح انام الوقت اتاخر اوى
ايه دا ؟؟؟ مين اللى داخل عندها ده ؟؟؟
دا واحد مغطى وشه زى الحراميه
ايه دا ؟؟؟ دا بيقرب منها ..هو عاوز منها ايه ؟؟؟
دا ...دا ...بيعتدى عليها
ساره فاقت و ابتدت تصررررخ
دا بيغتصبها
سااااااااره 😳😳
#دجيهان_عادل
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ياساتر يارب ربنا يكفينا شر كل زى شر
ردحذفروعة💜💜💜💜💜💜💜💜💜💜💜💜💜💜💜💜
ردحذفوالله مامتها ليها دخل كبير ...دي ممكن تكون هي اللي قتلت جوزها اصلا..
ردحذفأيوة صح
حذفبس برضو قصيرة قوي
ردحذف