#لعنة الطريق ١-٢
#الجزء الاول
بدأت احداث القصه الصيف اللى فات لما شريف جوزى اتنقل شغله الى الغردقه و دخل على فرحان
باركيلى يا ياسمين
الف مبروك يا شريف بس على ايه ؟؟
انا اترقيت و بقيت السيد المدير العام
صحيح ؟؟ الف مبروك يا حبيبى انت تستاهلها و الله
بس فى حاجه كدا مش عارف هتزعلك و الا هاتفرحك ؟؟
حاجه ايه دى ؟
الشغل بقا فى الغردقه مش هنا
الله انا كان نفسي اروح الغردقه من زمان
صحيح يعنى مزعلتيش إن إحنا هنمشي من هنا و هاتسيبي اهلك و اصحابك
طبعا هزعل بس اكيد مش هسيبك و كمان الفون و النت قرب المسافات فخلاص مبقتش مشكله كبيره
طيب تمام عايزك تجهزى نفسك فى خلال اسبوع من دلوقتى
يعنى احنا هناخد ايه معانا عشان ابقى فاهمه بس
بصى هى الشقه هناك مجهزه... تلفزيون و غساله و تلاجه و سراير و انتريه و كل شئ حتى ادوات المطبخ ...يعنى انتى بس هتحضرى هدومنا و هدوم ياسر و شويه المتعلقات الشخصيه الخاصه بينا بس
تمام قشطه
و فعلا فى خلال اسبوع كنت مجهزه كل حاجه و رحت زرت ابويا و امى و اخواتى و سلمت عليهم
نسيت اقولكم انى عندى ولد وحيد اسمه ياسر و عمره خمس سنين و احنا ساكنين فى بيت العيله ...جوزى له شقه متشطبه سوبر لوكس فى بيت أهله
شريف اتفق معايا إن إحنا هنقفل الشقه و هنغطى العفش عشان التراب لاننا مش هنيجى الا كل سنه مره
انا بقى فى خلال الأسبوع دا كنت فضيت التلاجه و الديب فريزر و غسلتهم و جبت ملايات غطيت بيها الانتريه و قفلت الشبابيك كويس ووضبطت المطبخ و نضفته و قفلته
و حضرت هدومى انا و شريف و ياسر فى شنطتين كبار و منستش لعب ياسر اللى بيحبها 😍 جبتها معانا
نزلنا سلمنا على حمايا و حماتى و قعدنا معاهم شويه و حماتى كانت زعلانه أن شريف هيمشي
لكن شريف قعد يهزر معاها و قالها عشان تبقوا تيجوا تصيفوا معانا
حمايا حضن شريف و قاله ربنا يوفقك يا ابنى و حماتى اخدت ياسر فى حضنها و قعدت تبوس فيه و تقوله هتوحشنى يا واد يا ياسر ... متتاخرش على خلى بابا يجيبك لى
حاضر يا تيته ...تعالى معانا يا تيته
اجى فين يا ياسر ...انت هتبقى فين و ستك فين انت بس خلى بالك من نفسك و عايزاك متغلبش ماما و تسمع كلامها
كل يوم هكلمك فى التليفون و هعرف من ماما شربت اللبن و الا لا
حاضر يا تيته
حماتى اخدتنى فى حضنها و سلمت على و قالت لى خلى بالك من نفسك و من شريف و من ياسر
قلت لها حاضر يا ماما
و متغبوش على يا بنتى عاوزه اتطمن عليكم دايما
حاضر يا ماما عنيا هتصل بيكى كل يوم
طيب يا بنتى الله يرضى عليكى
و يخليكى لينا يا ست الحبايب
ودعنا حماتى و حمايا و شريف نقل الشنط للعربيه
اول ما ركبنا العربيه قلت لشريف ها يا سيادة المدير هتعرف تودينا الغردقه و الا هتوهنا ؟؟؟
قال عيب عليكى اومال الgps دا موجود ليه ؟؟
طيب ربنا يستر
توكلنا على الله
احنا كنا مسافرين الساعه عشره مساء كدا و شريف قالى أن الطريق هياخد له حوالى ٧ ساعات و أن فى استراحات فى الطريق
مشينا شويه بالعربيه و قعدنا نتكلم انا و شريف و قلت له احنا بقا هنوصل على الصبح تقريبا اول ما نوصل هنحط الشنط و هروح البحر انا اسمع أن مية البحر الاحمر تحفه
هتروحى البحر ازاى انتى هتكونى تعبانه من الطريق ...بصى يا ستى احنا نريح لنا كام ساعه كدا و بعدين نبقى ننزل الميه سوا
لااااا مش هيكون عندى صبر انا لازم اروح على طول
ماشي يا ستى هوصلك و اروح الشركه استلم بس و ابقى ارجعلك على طول أن شاء الله
طب ركز فى الطريق لتوهنا 😂
متخافيش انا عارف كل حاجه
مشينا ساعتين و الجبال بدأت تظهر حوالينا جبال هايله اول مره اشوف جبال اصلا
سالت شريف هو انت مش قلت إن فى استراحات على الطريق احنا ماشين بقالنا كتير و مشفتش و لا استراحه
طب اصبرى بس اكيد هنقابل استراحه دلوقتى
فات كمان ساعه و برده مشفناش اى استراحه
قلت له أنت متأكد أننا ماشين فى الطريق الصح ؟؟
قال استنى هشوف كدا على النت ....ايه دا دا مفيش شبكه هنا
يا خبر طب هنعمل ايه دلوقتى ممكن نكون توهنا و ماشيين فى طريق غلط اصلا
طب بس اصبرى على انا هكمل و خلاص و اكيد هنلاقى حاجه تدلنا أن كنا ماشيين صح و الا لأ
طب بسرعه شويه الدنيا ضالمه اوى و مفيش غيرنا على الطريق و انا ابتديت اخاف
حاضر حاضر يا ستى انا بجرى اهو
طب حاسب حاسب ....😳😲😲
فجاه لقينا واحده ظهرت قدام العربيه لابسه اسود فى اسود و شعرها طويل و مغطى وشها
شريف مقدرش يتفادها و خبطها لدرجه انها طارت بعيد عن العربيه بحوالى ١٠ متر
اقف اقف يا شريف ....احنا خبطنا واحده
ايه اللى جاب الست دى هنا فى المكان دا دلوقتى ؟؟
انزل يا شريف نشوفها
لا احنا نمشي احسن انا حاسس ان فى حاجه مش طبيعيه
ازاى يعنى ؟ هنسيبها مرميه على الطريق ما يمكن نقدر ننقذها انزل يلا نور كشافات العربيه و انا هنور الموبيل و ننزل نشوفها
طب و ياسر ؟؟؟
ياسر نام هنسيبه هنا و ننزل نشوفها
نزلت من العربيه انا و شريف و اعصابنا سايبه و رجلينا مش شايلانا
شريف بص على العربيه من قدام لاقاها اتطبقت و عليها دم كتير
قربنا من الست لقيناها ست فى التلاتينات وشها شاحب اوى شعرها طويل عينيها مبرقه و وشها متفرقة دم
شريف قرب منها و حط ايده عليها و قالى برعب دى ماتت يا ياسمين
ايه ماتت ماتت ازاى يا خبر هنعمل ايه ؟؟؟
مش هنعمل حاجه احنا نمشي و نسيبها و لا من شاف و لا من درى
ازاى يا شريف نسيبها
اومال عاوزه ايه ناخدها معانا و نروح فى داهيه يلا يلا احنا بس نشدها بعيد عن الطريق عشان مفيش عربيه تدوس عليها
لا انا مش هلمسها انا خايفه يا شريف
طب استنى انا هشدها ...
و فعلا شريف شدها فى جنب و انا جريت ركبت العربيه و حصلنى شريف
شريف حاول يدور العربيه مكنتش راضيه تدور و انا كنت هموت من الخوف و قلت له حاول حاول يا شريف انا عاوزه امشي من هنا......،،،، لغايه ما الحمد لله العربيه دارت
مشينا بالعربيه و ببص على الست ملقتهاش 🥺🥺🥺
ايه دا راحت فين ؟
شريف.. شريف الست اختفت
ملناش دعوه يا ياسمين ...متبصيش وراكى
يا ترى الست دى حكايتها ايه و ايه جابها هنا فى الوقت المتاخر ده ؟؟ و اختفت راحت فين ؟؟
دا اللى هنعرفه فى الجزء الجاى 😉
يتبع .........😊
#د.جيهان عادل.
#لعنة الطريق
#الجزء الثانى
ايه دا هى راحت فين ؟
شريف.. شريف الست اختفت
ملناش دعوه يا ياسمين ...متبصيش وراكى
بعد كدا فضلنا ماشيين بأقصى سرعه لغايه ما لقينا يافطه فيها الاتجاه الصحيح و اللى عرفناه بعد كدا أن الطريق اللى كنا ماشيين فيه ده طريق فرعى مفيش عربيات كتير بتمشي عليه .بعدها لقينا بنزينه و كافيه شريف وقف جاب لنا منها شوية حاجات و شويه سندوتشات و مون العربيه
طبعا الحكايه دى خلتنا نتأخر شويه و بدل ما نوصل فى سبع ساعات وصلنا فى عشره
طول الطريق بعد اللى حصل فضلنا ساكتين انا و شريف محدش فينا نطق زى ما يكون اللى حصل ده عمل لنا صدمه و خلى كل واحد مننا مش قادر يتكلم
حاولت انام و غمضت عنيا فعلا و لكن مقدرتش كل ما احاول اروح فى النوم اشوف الست ووشها متغرق دم و اتضايق من شريف أنه سابها و مشي ... اكيد لما بصيت عليها تانى و ملقتهاش كانت قامت و مشيت ...اكيد الست مصابه مش ميته ....الله يسامحك يا شريف كان ممكن ناخدها معانا فى العربيه و نوديها على اول مستشفى
وصلنا الشقه و دخلنا شنطنا و انا و شريف ساكتين خالص
ياسر صحى و قالى احنا وصلنا يا ماما ؟؟٠
قلت له ايوه يا ياسر
إحنا هنروح البحر دلوقتى ؟؟؟
لأ يا ياسر احنا تعبانين دلوقتى هنستريح شويه و بعدين نروح
شريف نطق اخيرا و قالى تعالى يا ياسمين افرجك الشقه
دى اوضة النوم ......و دى اوضه ياسر..... دا الريسبشن....
و دا الحمام .....و دا المطبخ فيه كل الاجهزه و الادوات
اقعدوا تفطروا بقا.... انا هدخل اخد دش ....حاسس ان جسمى كله تراب طلعيلى من فضلك غيار يا ياسمين و حضريلى بدله و كرفته و قميص
هزيت راسي كدا و دخلت افتح الشنط و اجيب هدوم شريف .
شريف اخد دش و خرج لبس بدلته و انا فى الوقت ده حاولت افطر مقدرتش و لقيت ياسر نام على كنبة الانتريه تانى شيلته دخلته و قعدت جنبه
شريف دخل على و قالى انا رايح الشركه شويه و مش هتاخر أن شاء الله عاوزه حاجه اجيبها لكى و انا جاى ؟؟/
قلت له ايوه عاوزه اتسوق و املى التلاجه
قال طيب لما اجى ننزل سوا نروح نتسوق و نجيب اللى انتى عاوزاه
ماشي يا شريف
طب فطرتى و الا لا ؟؟
لأ مش قادره اكل ....ليه يا شريف ما اخدناش الست معانا؟؟ الست ممتتش دى قامت و اتحركت من المكان اللى انت حطيتها فيه
ياسمين انا عاوزك تنسي موضوع الست ده خالص و متجليش سيرته نهائى...... متفكريش فيه
هزيت راسي و انا طبعا مش عاجبني الكلام
خرج شريف و انا غمضت عنيا لحظات لقيتها واقفه قدامى وشها متغرق دم و بتبص لى و تبرق لى و انا خايفه اوى شكلها مرعب جدا
فتحت عينى و انا هموت من الخوف و قعدت اقنع نفسي ان اعصابى بايظه من اللى حصل و من قلة النوم
قمت دخلت الهدوم فى الدولاب و دخلت المطبخ اشوف الحاجات اللى فيه و اشوف لو ناقص اى حاجه عشان اشتريها من السوق و انا جايه
سمعت خرفشه جايه من ناحية باب الشقه ... معرفش اترعبت ليه و خرجت اشوف ايه الصوت ده
فى نفس اللحظه دى تليفونى رن لقيت نفسي اتخضيت جدا انا اعصابى فعلا تعبانه
الو ايوا يا ماما ....
ايوا يا بنتى ...وصلتوا بالسلامه؟؟
ايوا وصلنا من شويه
طب مش انا موصياكى اول ما توصلى ترنى على و تطمنينى
معلش يا ماما نسيت و الله حقك على
لا ابدا يا حبيبتى انا بس كنت عايزه اتطمن عليكم ....و ياسر كويس ؟؟؟
ايوه الحمد لله بس هو نايم دلوقتى
و الشقه حلوه ؟؟؟
مش بطاله ...مش زى شقتى طبعا
اكيد بس اهى حاجه تقضى الغرض و خلاص
صح يا ماما
هو انتى مالك يا ياسمين حاسه ان صوتك متغير كدا
لا ابدا يا ماما مفيش حاجه بس انا تعبانه من السفر بس
طيب يا بنتى هسيبك تستريحى شويه حمدالله على سلامتك 🤲
الله يسلمك يا ماما ...مع السلامه
قفلت السكه و دخلت نمت جنب ياسر مقمتش الا على صوت شريف بيصحينى
ياسمين ...انا جيت
ايه دا ...هى الساعه كام دلوقتى
الساعه ١٢ الضهر
انت متاخرتش يعنى ؟
مش انا قلت لك انى هروح استلم و اجى على طول ...يلا بقا ننزل نشترى الحاجات اللى عاوزاها و بعد ما نجيبها لو عايزه تروحى على البحر اوديكى
لا مش مهم بحر انهارده انا تعبانه شويه
زى ما تحبى يا ياسمين ...يلا قومى ياسر و البسي عشان نمشي
نزلنا السوق و اشتريت شويه حاجات كدا للمطبخ و جبت شويه طلبات و خضار لزوم الاكل و شويه عصائر و البان و جبن و طبعا شاى و قهوه و سكر و كدا
روحنا البيت و احنا هلكنين دخلت حضرت غدا سريع شويه مكرونه و قليت جنبها استربس حار و شويه سلطه
بعدها عملت كوبايتين شاى و قعدت انا و شريف نشربهم فى البلكونه
شريف كان كلامه قليل معايا و بيحاول ميحطش عينه فى عينى زى ما يكون عارف أنه غلط فى اللى عمله بس مش عاوز يتكلم عليه
الدنيا ليلت ...شطبت المطبخ و دخلت الحمام عشان ادخل انام بعد كدا
اول ما دخلت الحمام لقيت باب الحمام اتهبد مره واحده انا اتخضيت بس قولت اكيد الهوى اصل الشقه بحرى و الهوا جميل فى الشقه كلها
وقفت قدام الحوض اغسل وشى و اسنانى و لسه برفع راسي شفتها ...🥺😲😲 شفتها ورايا واقفه تبص لى فى المرايا ....
بحركه لا اراديه لفيت بسرعه ملقتش اى حاجه صررررخت جامد
شريف جه على صوتى فى ايه يا ياسمين بتصرخى ليه
الست الست اللى دوستها يا شريف كانت واقفه ورايا دلوقتى😲😬😲😲
معقوله ياسمين شافتها و الا بيتهيالها ؟؟ دا اللى هنعرفه فى الجزء الجديد 😉
يتبع ..........😊
#د.جيهان عادل .
#لعنة الطريق ٣-٤
#الجزء الثالث
وقفت قدام الحوض اغسل وشى و اسنانى و لسه برفع راسي شفتها ...🥺😲😲 شفتها ورايا واقفه تبص لى فى المرايا ....
بحركه لا اراديه لفيت بسرعه ملقتش اى حاجه صررررخت جامد
شريف جه على صوتى فى ايه يا ياسمين بتصرخى ليه
الست الست اللى دوستها يا شريف كانت واقفه ورايا دلوقتى😲😬😲😲
يووووو ست ايه بس ؟؟ و ايه هيجبها هنا اهدى يا ياسمين مفيش حاجه من ده انتى بس اعصابك تعبانه و منمتيش كويس
و الله يا شريف شفتها
خلاص يلا اطلعى من الحمام و تعالى نامى شويه هتصحى زى الفل
شريف خرج من الحمام و انا واقفه مذهوله و متأكده من اللى شوفته ببص على أرضية الحمام لقيت نقطة دم
صرخت و قلت اهوووو انا مش بيتهيالى اهوووو تعالى يا شريف
شريف جه جرى و قالى فى ايه تانى
اهو نقطه دم من دمها اللى كان بيسيل منها عشان اقولك انها كانت هنا و انت مش مصدقنى
شريف وطى على الأرض و مسح نقطة الدم بصباعه لاقاها ناشفه .....ضحك و قالى انتى هتجننينى صح ؟؟؟ يا بنتى النقطه دى ناشفه يعنى وارد جدا تكون لحد كان ساكن قبلنا هنا فى الشقه ....بكرا يا ستى هشوف لك واحده تيجى تمسح لك الشقه و تنضفهالك كويس
فعلا نقطة الدم كانت ناشفه ...بقيت مكسوفه اوى من شريف و حاسه انى ابتديت اضغط على أعصابه
انا اسفه يا شريف
لا ابدا يا حبيبتى تعالى يلا نامى الله يهديكى يارب
دخلت نمت فى حضن شريف و قعدت فتره لغاية ما رحت فى النوم
تانى يوم شريف قام لبس و انا حضرت له الفطار فطر و قالى أنه هيشوف لى الست اللى قالى عليها و يبعتها لى انهارده
و فعلا بعد ساعتين لقيته بيتصل بى و بيقولى أنه بعت لى واحده اسمها ام سعد زمايله بيجبوها تساعد زوجاتهم فى البيت و أنه اخد تليفونها و كلمها ووصف لها العنوان و هى عرفته لأنها كانت بتيجى عند مدام الاستاذ فوزى اللى ساكنه قدامنا تساعدها فى التنضيف .
و فعلا معداش نص ساعه و لقيت جرس الباب بيرن
مين ؟؟؟
انا ام سعد يا مدام
فتحت الباب لقيت بنت شابه فى أواخر العشرينات لابسه جلابيه سمرا منقوش عليها رسومات ملونه ...البنت سمرا دمها خفيف تقاطيع وشها جميله اول ما شافتنى قالت
صباح الخير يا مدام ...انا اللى باعتنى الاستاذ شريف
تعالى يا ام سعد ادخلى
دخلت عليكى بالصلاة على النبى يا مدام .
استريحى يا ام سعد من المشوار
يريح قلبك بزيارة الحبيب النبى يارب
امين يا رب تسلمى يا حبيبتى
ها هنبدا منين يا مدام و عايزانى اعملك ايه بالظبط ؟؟
بصى هى الشقه نضيفه بس عاوزاكى تمسحيها و تنضفبها كويس و تغسليلى الحيطان و فى سجاده كبيره و مشايتين عايزين يتغسلوا بعد كدا تدخلى على المطبخ و الحمام تغسليلى السيراميك كله و تخليه زى الفل
حاضر حاضر يا مدام عنيا ليكى
و فعلا البنت كانت نشيطه و خفيفه و سريعه اوى و كانت بتنضف بضمير بس كان فيها عيب واحد انها مبتفصلش كلام ....طول ما اهى شغاله عماله تتكلم حكت لى على قصه حياتها و ازاى اتجوزت جوزها و ازاى طلع مش كويس و بيشرب مخدرات و أنه مبيصرفش عليها و على ابنه سعد ....و انها طلعت تشتغل بعد ما غضبت و راحت لاخوها و مرات اخوها مطقتهاش و بدأت تضايق فيها بالكلام ...هى بقا قالت انا لازم اشتغل و اصرف على ابنى
و راحت مأجره اوضه قعدت فيها و بتودى ابنها الحضانه أو عند حد من الجيران و قعدت ترغى ترغى و انا اسمعها و اهز راسي شوية و ابتسم لها شويه
لغايه ما خلصت بعد العصر
بس صراحه خلت الشقه زى الفل
سالتها عاوزه كام يا ام سعد ...
قالت جيبي اللى تجبيه يا مدام انتى و تقديرك
قلت لا قولى انتى ادرى بمجهودك
طيب عشان خاطرك بس هاتى ٣٠٠ جنيه عشان تبقى فاتحه خير ما بينا
٣٠٠ جنيه ؟؟؟ لأ يا ستى خدى ٣٥٠ جنيه أهم صراحه انتى تعبتى اوى انهارده
ام سعد فرحت اوى و قعدت تدعيلى و قالت انا مستعده اجيلك في اى وقت تعوزينى فيه دا رقمى اهو و انا تحت امرك
مشيت ام سعد و البيت بيشع نضافه و ريحته بقت جميله
قعدت كدا على الانتريه و الواد ياسر جنبى و انا بستمتع بنسمة الهوا اللى جايه من البلكونه
فجأه شميت ريحة شياط جامده اوى خارجه من المطبخ
جريت على المطبخ لقيت البوتجاز مولع و النار واصله للسقف و كان فيه قماشه ام سعد كانت بتمسح بيها التراب لقيتها مولعه و زى ما يكون حد دالق عليها بنزين و عماله تطلع دخان اسود ريحته وحشه
جريت على أنبوبة البوتجاز قفلتها بسرعه و جبت غطا حله كبيره و غطيت بيه على النار عشان امنع عنها الأكسجين و تطفى.....و الحمد لله قدرت اطفيها
طلعت من المطبخ و انا مخضوضه من المنظر اللى شفته و لقيت شريف بيتصل
الو ...ايوا يا شريف
ايوا يا ياسمين ام سعد خلصت ؟؟
ايوه خلصت و لسه ماشيه من شويه
و ايه رايك فى شغلها؟؟
شغلها كويس بس لكاكه اوى ...اه و فى حاجه كمان اكتشفتها بعد ما خرجت
حاجة ايه ؟؟
انها مهمله كانت هتولع فينا ....
تولع فيكم ازاى ؟؟
دخلت لقيتها ناسيه النار و النار واصله للسقف قفلت الانبوبه بسرعه و طفيت النار
طب الحمد لله على سلامتكم ...يعنى معدناش نجيبها تانى؟؟
لا هى الصراحه شاطره و خفيفه ...وبعد كدا هبقى اخد بالى و امشي وراها اشوفها ناسيه حاجه و الا لأ
ماشي يا ياسمين خلى بالك من نفسك و من ياسر ...اه صحيح انتى طبختى لنا ايه انهارده ؟ انا جاى فى السكه و عصافير بطنى بتزقزق
لا انا مطبختش انت هتاخدنا كدا زى الشاطر نروح نجيب سمك و نروح نأكله على البحر
البحر ؟؟؟؟ هو انتى لسه منستيش البحر 😂
انسي ازاى يعنى ؟؟ يلا انا هلبس و البس ياسر عقبال ما تيجى.
قفلت مع شريف و بعد ١٠ دقائق لقيت ام سعد بترن على
الو ...ايوا يا مدام
ايوا يا ام سعد
البيه لسه مكلمنى و بيقولى انى نسيت النار والعه
ايوه يا ام سعد و الشقه كانت هتولع لولا ستر ربنا
و الله يا مدام ماولعت اى نار و لا ايدى جت على ولاعه من الأساس ....طب هولع ليه طيب ؟؟؟ طب يمكن اسم النبى حارسه ابنك الصغير ؟؟
ابنى هيولع الأربع عيون و يحط عليهم القماشه اللى كنتى بتنضفى بيها ليه يا ام سعد ؟؟؟ بصى خلاص الموضوع انتهى بس ابقى خدى بالك بعد كدا
والله و حيات ربنا اللى اغلى من الكل انا ما لمست الولاعه و لا اعرف هى فين اصلا
خلاص خلاص يا ام سعد حصل خير
قفلت السكه و انا محتاره الست بتحلف و فعلا مفيش حاجه كانت تستدعى انها تولع البوتجاز
قلت اسال ياسر يمكن هو فعلا سهانا و دخل ولعه و انا واقفه اتكلم معاها
ياسر تعالى أما اقولك
نعم يا ماما
هو انت اللى ولعت البوتجاز
لأ يا ماما
طب مشوفتش مين ولعه؟؟
ايوه شفت ....
مين يا ياسر ؟؟؟
الست يا ماما اللى بتمشي وراكى ووشها مليان دم
ست ...ست مين ؟؟؟؟؟؟؟؟؟؟؟؟؟
يا ترى ايه الحكايه دى ؟؟ دا اللى هنعرفه فى الجزء الجاى 😉
يتبع .........😊
#د.جيهان عادل.
#لعنة_الطريق
#الجزء الرابع
ياسر تعالى أما اقولك
نعم يا ماما
هو انت اللى ولعت البوتجاز
لأ يا ماما
طب مشوفتش مين ولعه؟؟
ايوه شفت ....
مين يا ياسر ؟؟؟
الست يا ماما اللى بتمشي وراكى ووشها مليان دم
ست ...ست مين ؟؟؟؟؟؟؟؟؟؟؟؟؟
هنا دخل شريف و قالى ها ...لبستوا ؟
لأ يا شريف تعالى شوف ياسر بيقول ايه ....🥺
فى ايه ؟؟كلام ايه يا ياسر ؟؟
استنى يا شريف ....يا ياسر انت شوفت اللى ولع النار
ياسر هز رأسه بالموافقه
طيب قول لبابا شكلها ايه
شكلها وحش ووشها متغرق دم
شفت شفت يا شريف ..... زى ما قلت لك
يا ستى الواد بيألف هو اكيد سمعك و انتى بتتكلمى و بيقول زى ما قلتى
يا شريف صدقنى طب ....
بسسسسس هتنزلوا و الا لأ ؟؟؟؟؟
اه طبعا هننزل ثوانى و نكون لابسين
دخلت لبست و لبست ابنى و انا شاكة أن كلام ياسر يكون غير صحيح و أن شريف عنده حق لان لو ياسر شاف منظر زى ده كان على الأقل خاف أو قال و مكنش سكت
خرجنا مع ياسر و رحنا جبنا سمك مع السلطات و الطحينه و الذى منه 😋 و رحنا قعدنا على البحر نسيت الدنيا و الهوا كان تحفه و ياسر نزل الميه و كان فرحان اوى
روحنا الشقه و اول ما دخلت افتكرتها تانى و حسيت بضيق ...بس محبتش أبين عشان شريف ميزعقليش
دخلت حميت ياسر و دخلته سريره و قلت له تصبح على خير يا ياسر
قالى تصبحى على خير يا ماما ....تصبحى على خير يا لورا
بصيت له كدا و قلت له لورا مين يا ياسر ؟؟
لورا صاحبتى يا ماما
هى فين دى 🥺؟
اهى يا ماما واقفه عند باب الاوضه
طب قولى شكلها ايه لورا دى ؟؟
شكلها بنت كبيره زيك يا ماما بس هى صعبانه على عشان متعوره ووشها فيه دم كتير ...و انا قلت لها تعالى امسح لك الدم دا وهى مرضيتش و قالت ماما بس هى اللى هتمسح لى الدم ....و النبى يا ماما امسحيلها الدم عشان تكون حلوة و شكلها حلو
انا سمعت الكلام ده و جالى صدمه معرفتش ارد على ياسر
غطيته و قمت من جنبه
روحت على اوضتى طلعت الاسكتش بتاعى و القلم الرصاص و رسمت البنت اللى شفتها على الطريق و انا الحمد لله بعرف ارسم حلو جدا لانى خريجه فنون جميله
قعدت فتره ارسم فى الصوره علشان افتكر كل تفاصيل وشها لانى طبعا بصيت عليها لمدة ثوانى بس
لكن انا فاكره شكلها كويس اوى ....وشها كان شاحب لكن ملامحه جميله و لولا منظر الدم المرعب اللى على وشها كان هيكون شكلها فى منتهى الجمال
بعد ما خلصت رسم دخلت اوضتى انام...قعدت افكر فى كلام ياسر و غمضت عينى و رحت فى النوم حلمت بيها واقفه فى وسط طريق بتصرخ و كان تحت رجليها حاجه كدا زى القار أو الزفت اللى بيرصفوا بيه الطرق و فجاه لقيت القار دا بيعلى و هى بتغطس فيه و بتصرخ و لقيتها لمحتنى و انا واقفه ...راحت مدت أيدها ليا زى ما يكون بتستنجد بى ...انا ساعاتها خفت اوى و حسيت انها عاوزه توقعنى معاها لقيت نفسي بجرى و أجرى علشان اهرب منها
و صحيت من النوم و انا بنهج زى ما يكون كنت بجرى بصحيح ...
و لقيت شريف قلق وقالى مالك يا ياسمين ؟؟
مفيش يا شريف كابوس وحش اوى
طب أهدى و نامى و اقرى ايه الكرسي
حاضر يا شريف
تانى يوم صحيت من النوم و اخدت الاسكتش حطيته على التربيزه فى الصاله ....
لقيت ياسر مسك الصوره و قال لورا اهى يا ماما
انا برقت يبقى صحيح ياسر بيشوفها .....انا مش هقول لشريف تانى لانه مش هيصدقنى
شريف صحى و قمت عملت له فطار فطر و نزل و طلب منى اعمله صنيه مكرونه بالبشاميل و فراخ مشويه و قالى أنه هيجيب حلويات معاه و هو جاى علشان استاذ فوزى و حرمه اللى ساكنين قدامنا هيجوا يسلموا علينا
قلت له حاضر يا شريف هجهز كل حاجه زى ما انت عاوز
شريف نزل و انا ابتديت اجهز فى الاكل...طلعت اللحمه و الفراخ تفك و حضرت حاجات البشاميل و عملت العصاج و ظبطت الدنيا على ميعاد شريف ...طبعا كل ده و حكاية لورا مش مفارقه دماغى
قبل ما يجى شريف قلت اكلم حماتى اتطمن عليهم و اطمنهم علينا و على ياسر
الووو.... ازيك يا ماما
الله يسلمك يا ياسمين ازيك انتى يا حبيبتى و ازاى ياسر و شريف
كلنا بخير و الله ...و ازاى عمى
عمك مغلبنى من ساعة ما مشيتوا عمال يقولى ياسر وحشنى يا حاجه ...يا ريت شريف كان سابهولنا
معلش يا ماما و الله انتوا كمان وحشنا اوى...احنا برده لسه متعودناش على الشقه هنا و بغلب على ما اعرف انام
ربنا معاكم يا بنتى و يصلح حالكم يا رب
تسلميلى يا حبيبتى سلميلى على عمى اوى
طب ما تاخدى تكلميه اهو جنبى ..تعالى يا حج كلم ياسمين
الو ...ازيك يا بنتى و ازاى ياسر
الحمد لله يا عمى و انت عامل ايه و صحتك عامله ايه
انا الحمد لله بومب بس الواد ياسر وحشنى اوى ...هو جنبك أكلمه
ايوه خد اهو هيكلمك
الو يا جدو
الو يا ياسر ازيك يا حبيبي
كويس يا جدو
ها عامل ايه و لاقيت أصحاب تلعب معاهم زى اصحابك اللى هنا و الا لسه ؟
ايوه يا جدو بلعب مع لورا
الله .....لورا دى جارتكم و الا معاك فى الحضانه ؟
لا يا جدو لورا اللى سالم موتها
ههههههههه موت مين يا ياسر و سالم مين ؟؟ انت شكلك متغدتش صح ؟
ايوه لسه
شفت بقا ...قول لماما تجيب لك اكل و تأكلك
حاضر يا جدو
اخدت السماعه من ياسر و كلمته لجده شغلت بالى جدا و قفلت معاهم و جبت ياسر قعدته جنبى و سألته
ياسر هى لورا قالت لك ايه على سالم
قالت لى أنه موتها
مقلتش لك موتها ازاى يا ياسر ؟؟؟
اه قالت يا ماما بس طلبت منى مقلش لحد
طيب يا ياسر انا عاوزاك تقولها لما تشوفها انى عاوزه اكلمها
حاضر يا ماما هقولها
هى لورا موجوده معانا دلوقتى؟؟؟
لا هى مشيت يا ماما و بتيجى بالليل لما باجى انام
بتيجى تعملك ايه يا ياسر ؟؟
بتيجى تقعد جنب سريري و تغنيلى اغنيه و صوتها جميل اوى يا ماما
طب و انت مش خفت منها ؟؟
لا يا ماما هى طيبه و مش بتعملى حاجه غلبانه يا ماما و سالم موتها
طيب خلاص يا ياسر عاوزاك لما تشوفها تانى تقولها انى عاوزه اكلمها
يا ترى لورا هترضى تكلمها ؟و يا ترى ياسمين عاوزه تكلمها ليه ؟؟دا اللى هنعرفه فى الجزء الجاى 😉
يتبع .......😊
د.جيهان عادل
#لعنة_الطريق
#الجزء الخامس
طب و انت مش خفت منها ؟؟
لا يا ماما هى طيبه و مش بتعملى حاجه غلبانه يا ماما و سالم موتها
طيب خلاص يا ياسر عاوزاك لما تشوفها تانى تقولها انى عاوزه اكلمها.
حاضر يا ماما
بعد شويه دخل شريف و معاه لفة حلويات و جاتوه و قالى
الحقينى بالغدا انا جعان جدا
الغدا جاهز حالا هحطه على السفره
شريف دخل اخد دش و غير هدومه و قعدنا نتغدى
تسلم ايدك يا ياسمين الاكل تحفه
تسلم يا شريف ...صحيح عجبك ؟؟
طبعا انتى بتعملى اجمد صنيه مكرونه بالبشاميل فى مصر
ههههههههه يا شيخ ...طب و ايه رايك فى الفراخ
حلوه جدا و الله تسلم ايدك يا قمر
ايه انت خلصت اكل و الا ايه؟؟
اه خلصت الحمد لله
بس انت مكلتش كويس شكل المكرونه المرة ادى مش عاجباك
لا و الله ابدا دا تحفه انا كلت كتير و الله
طب خلاص هقوم اعملك كوباية شاى فى الخمسينه تعدل مزاجك
لا يا ياسمين ممكن تعمليلى فنجان قهوه ؟؟
حاضر عنيا ليك
عملت القهوه لشريف و قعدت جنبه
هو الاستاذ فوزى و مراته هيجوا امتى ؟؟
هو قالى هنيجى بعد العشا متقلقيش زمانهم جايين
لأ انا مش قلقانه يشرفوا فى اى وقت .
هو انت تعرف الاستاذ فوزى دا ؟؟
هو زميلنا هنا فى الشركه ...انا معرفوش اوى يعنى بس هما هنا من زمان ...و لقيته حالى امبارح و قالى أنهم حابين يجوا يزورنا و أن زوجاتنا تتعرف على بعض و انا طبعا رحبت بيه و قلت له اتفضل
اممممم....... تمام
بعد شويه لقيت جرس الباب بيرن
شريف قام فتح و لقينا الاستاذ فوزى و مراته جايين و جايبين معاهم هديه🎁
ليه تاعبين نفسكم كدا ؟؟؟
لا ابدا و لا تعب و لا حاجه نورتوا الغردقه كلها
منوره بيكم و الله..... اهلا و سهلا اتفضلوا
دخلت اجيب الجاتوه و الحاجه الساقعه و قعدنا نتكلم انا و هناء ..حبيتها اوى دمها خفيف و عشريه
هناء قالت لى ابقى تعالى اقعدى معايا يا ياسمين انا طول النهار قاعده لوحدى و كمان عشان ياسر يلعب مع اولادى
حاضر يا هناء أن شاء الله هاجى اقعد معاكم بكره شويه
تشرفى و تنورى يا. حبيبتى
نقوم احنا بقا
ما بدرى يا استاذ فوزى
لا بدرى ايه دا احنا قاعدين بقالنا ساعه ...أن شاء الله ننتظركم تيجوا تزورنا
ان شاء الله
فوزى و هناء مشيوا و كنت مبسوطه اوى بمعرفتهم اخيرا هلاقى حد اتكلم معاه
دخلت شطبت المطبخ و روحت عشان اشوف ياسر فى اوضته لقيته قاعد زعلان
فى ايه يا ياسر زعلان ليه ؟؟
لورا يا ماما خوفتنى و زعلت منى و مشيت
خوفتك ازاى و زعلت منك ليه ؟؟
لما قلت لها انا هروح لطنط هناء و العب مع اولادها و هيبقى ليا أصحاب جداد
لقيتها برقت لى و صرخت فى وشي و قالت لى لأ.....
و راحت ماشيه و سيبانى
انت بتقول ايه يا ياسر
و الله يا ماما دا اللى حصل
بص اكيد انت فهمت غلط ...مش انت بتقول لورا لطيفه اكيد هى مش قصدها نام دلوقتى و هتصحى الصبح كويس .
حاضر يا ماما بس انا مش عاوز اروح عند طنط هناء عشان لورا متزعلش منى
لا مش هتزعل و لا حاجه و نام بقى بطل رغى
خرجت من اوضة ياسر و انا قلقانه جدا من الكلام اللى سمعته و طبعا حاولت مبينش له قلقى و قلت انا لازم اقول لشريف
دخلت لقيت شريف قاعد على السرير و بيخلص شويه اوراق
دخلت قعدت جنبه و قلت له انا عاوزه اقولك على حاجه
رفع نضارته من على عينه و قالى قولى
حكيت له على كل حاجه ياسر قالهالى
شريف بصلى كدا و قال و انتى بتصدقى برده ... دا خيال طفل
و الله كنت عارفه انك هتقول كدا و عشان كدا مكنتش عاوزه احكيلك
شريف قفل الاوراق اللى قدامه و حاطها على الكومدينو و حط عليها النضاره و قالى تصبحى على خير
و انت من أهله يا شريف
حاولت انام بعدها معرفتش ابدا و فضلت صاحيه لغاية ما الفجر اذن
قلت اقوم اتوضا و اصلى
دخلت الحمام لقيت الباب اتهبد مره تانيه و نور الحمام اتطفى جريت على الباب افتحه لقيته مبيفتحش قعدت انادى يا شريف يا شريف
فجاه لقيت النور نور تانى ببص على البانيو و الحوض لقيت الدم طالع منهم و عمال ينزل على الأرض و يفور
الدم بقا مالى البانيو و الحوض و ابتدى يزيد لدرجه انه نزل على ارضيه الحمام و ابتدى يوصل لى انا شفت المنظر و قعدت اصرخ اصرخ لغايه ما اغمى على
بعد شويه فقت و انا نايمه على سريري و شريف عمال يفوق فى ....
ياسمين ياسمين ...
انا فين ؟؟
انتى هنا فى اوضتك
هو ايه اللى حصل ؟؟
انا مش عارف انا لقيتك فجاه صرختى قمت اشوف فى ايه لقيتك واقعه فى أرضية الحمام مغمى عليكى
اه ..الحمام ...الدم ...الدم مالى المكان
دم ايه اللى مالى المكان ؟
الدم اللى فى الحمام
مفيش اى دم فى الحمام ....لاااا انتى حالتك بقت صعبه اوى ...هو انتى منمتيش ؟؟
لأ معرفتش انام
طب يلا نامى و انا هلبس و اروح الشغل و لما اجى هاخدك و نروح البحر شويه
هزيت راسي كدا و حطيت دماغى على المخده و حاولت انام
طبعا كلكم عايزين تعرفوا ايه اللى حصل لياسمين بعد كدا . دا اللى هتعرفوا فى الجزء الجاى 😉
يتبع ........😊
د.جيهان عادل🥰
#لعنة_الطريق
#الجزء السادس
بعد ما شريف مشي حاولت انام و فعلا نمت محستش بأى حاجه زى ما يكون اغمى على
صحيت من النوم على الساعه ٢ الضهر لقيت ياسر بيلعب فى الصاله
سألته انت صحيت من امتى ؟؟؟
قالى صحيت لما بابا كان ماشي و هو عمل لى سندوتشات و قالى متزعجش ماما عشان تعبانه و اقعد العب هنا فى الصاله لغايه ما ماما تصحى
حبيبى يا سورا ...تعالى هات بوسه لماما
قمت عملت لى كوبايه قهوه عظيمه لأن كان عندى صداع رهيب فى دماغى .
و أكلت سندوتش جبنه و مطبختش طبعا لان شريف هيعزمنا بره 😂
بس دخلت عملت كيكايه حلوه كدا عشان أخدها معايا و انا رايحه لهناء جارتى
بعد العصر ناديت ياسر و قلت له تعالى يلا عشان نروح لطنط هناء
لا يا ماما انا هقعد هنا
يا ياسر مينفعش ..بص هنقعد عشر دقايق و نيجى على طول
يا ماما و النبى انا هقعد اتفرج على الكرتون و انتى روحى و تعالى بسرعه
طيب يا ياسر زى ما تحب
لبست الاسدال بتاعى و اخدت الكيكايه و رحت خبطت على الباب
هو بابهم مقابل لباب شقتى بالظبط ....الدور فيه شقتين و العماره كلها خمس ادوار و احنا ساكنين فى الدور التانى
هناء فتحت الباب و رحبت بى و سالتنى عن ياسر قلت لها أنه بيتفرج على التلفزيون
هناء جابت لى حاجه ساقعه و انا مكنتش راضيه اشربها عشان متأخرش على ياسر و قلت لها معلش و الله يا هناء انا بس عشان وعدتك اجيلك لولا كدا مكنش ينفع اسيب ياسر و اجى
قعدت تتحايل و تقولى بس دى اول مره تدخلى بيتى و أنه مينفعش امشي الا اما اشرب حاجه
طيب يا ستى هشرب عشان متزعليش اهو .... احنا هنبقى نجيلك تانى انا و شريف و ياسر أن شاء الله
طبعا تنورونى بس كنا عاوزين ترعى مع بعض شويه ...انا زى ما انتى شايفه كدا معنديش أصحاب هنا فى العماره لأن كل واحد فى حاله و ما صدقت حد يجى يسكن قدامى عشان نونس بعض...نروح نتسوق سوا نروح البحر سوا
ان شاء الله يا حبيبتى هنبقى اخوات و هنونس بعض و نروح فى كل حته مع بعض بس سامحينى المره دى و بعد كدا هعوضهالك.
ماشي يا ياسمين ...انا مش هأخرك على ياسر ابقى سلميلى عليه
يوصل أن شاء الله يا حبيبتى
سبتها و دخلت لقيت ياسر قاعد بيلعب و فرحان
قلت له انا متأخرتش عليك اهو ...صح؟؟
قالى عادى يا ماما انا مكنتش لوحدى لورا جت تلعب معايا و صالحتنى عشان انا مروحتش معاكى لطنط هناء
لورا ؟؟؟ هى جت لك تانى ؟؟؟
طب و قلت لها انى عاوزه اكلمها
ايوه يا ماما و هى قالت لى خليها تدور على الصندوق و هى هتفهم كل حاجه
صندوق ايه يا ياسر ؟؟؟
معرفش يا ماما هى قالت لى كدا
كلمه ياسر خلتنى اسرح ... يا ترى صندوق ايه دا ؟؟؟ و فين الاقيه ؟؟؟
قمت وقفت و دخلت على اوضتى و بدأت ادور و ادور
فتحت الكومدينو و دورت تحته و دورت تحت التسريحه و فى ادراجها...دورت تحت السرير و دورت جوه الدولاب و فى ادراج الدولاب و فوقه مفيش اى حاجه موجوده
خرجت على الصاله بقيت اشيل شلت الانتريه و اشوف تحتها ملقتش برده حاجه
دخلت على المطبخ و بقيت افتح كل علب المطبخ و الإدراج برده مش لاقيه اى حاجه
دخلت على اوضه ياسر و بقيت افتش تحت السرير و فى الدولاب و فى التسريحه و برده ملقتش اى حاجه
تعبت من كتر التدوير ...و قلت فى نفسي مفيش اى صندوق هنا انا قلبت الشقه حته حته و برده ملقتش اى حاجه
المهم .....
بعد شويه شريف اتصل على و قال إنه جاى فى السكه و انى اجهز نفسي انا و ياسر علشان مش هيطلع احنا هننزله اول ما يوصل تحت العماره
و فعلا جهزنا و نزلنا لشريف و سألنا تحبوا تأكلوا ايه؟؟
ياسر قالوا بيتزا يا بابا
طب و انتى يا ياسمين ؟
بيتزا زى ياسر
طب تمام هنروح تجيب بيتزا و نروح نقعد على البحر
رحنا جبنا البيتزا و قعدنا شويه على البحر و روحنا و احنا فى منتهى السعاده ...فعلا القعده قدام الميه بتروق الواحد و تصفى اى شعور سلبى عنده و تنسيه الدنيا 😍
روحت البيت و ياسر كان هلكان من كتر اللعب دخلت حميته و غير هدومه و نيمته
دخلت عشان انام و قلت لشريف احنا عاوزين نقدم لياسر فى حضانه هنا
قالى الموضوع ده فى دماغى من ساعة ما وصلنا و بدور له على حضانه محترمه متقلقيش أن شاء الله قريب هنوديه
طفينا النور و حاولت انام افتكرت حكاية الصندوق ...و انى دورت فى كل مكان ملقتوش
طب يا ترى فى مكان تانى فى الشقه انا مأخدتش بالى منه ؟؟🤔
لا انا مسبتش خرم ابره مدورتش فيه ...حتى البلكونه دورت فيها كله كله الا ال.......
الحمام !!!! بس هو الحمام فيه ايه يتدور فيه ؟ مفيش فيه حاجه غير الحته اللى تحت الحوض اللى بيتحط فيها المنظفات و دى انا فتحتها كذا مره و مفيهاش اى حاجه
اكيد الصندوق ده مش موجود فى الشقه هنا
طب يا ترى ممكن الاقيه فين ؟؟؟؟
بقيت محتاره و مش قادره انام من كتر التفكير ...قلت اقوم اروح الحمام اخد دش سخن كدا يمكن يساعدنى على النوم ...
دخلت فعلا و مليت البانيو بالميه السخنه و دخلت جواه و غمضت عنيا
فتحت عينى و كأن حد جاب فكره كدا فى دماغى كنت بشوفها فى الافلام الاجنبيه
السيفون !!!!! بتاع الحمام ....كنت بشوف فى الافلام أنهم بيخبوا فيه المخدرات و الالماظ و كدا 😂
قمت لبست و روحت على السيفون و فتحت الغطا و فعلا لقيت صندوق ارابيسك صغير محطوط فى اكياس كتير اوى عشان الميه متوصلوش
لما لقيته فرحت اوى و حسيت انى أخيرا هعرف احل اللغز ده
اخدت الصندوق و طلعت جرى على الصاله ...طلعته من الأكياس و فتحته و لقيت ........
طبعا كلكم عايزين تعرفوا انا لقيت ايه 🤗🤔🤔 دا بقا هتعرفوه فى الجزء الجاى
د.جيهان عادل 😊
#لعنة_الطريق
#الجزء_السابع
قمت لبست و روحت على السيفون و فتحت الغطا و فعلا لقيت صندوق ارابيسك صغير محطوط فى اكياس كتير اوى عشان الميه متوصلوش
لما لقيته فرحت اوى و حسيت انى أخيرا هعرف احل اللغز ده
اخدت الصندوق و طلعت جرى على الصاله ...طلعته من الأكياس و فتحته و لقيت نوته صغيره و صور كتير محطوطه فى ظرف و مربوطه بشريط بمبى
فتحت الشريط و طلعت الصور من الظرف لقيت صور للورا....و لأول مره اشوفها على طبيعتها من غير المنظر البشع اللى بشوفه بيها
بنت جميله طويله شعرها اسود ناعم عيونها واسعه و لونها بنى و عمرها فى اواخر العشرينات
ابتديت ادقق فى الصور لقيت صور ليها على البلاج و صور ليها هنا فى الشقه على نفس العفش صور ليها هى و شاب و دى بقا صور كتير اوى وفى اماكن مختلفه على البحر و فى كافيهات و فى حدائق وواضح من الصور أن فى علاقه حب بينها و بين الشاب ده ...نظره الحب باينه فى عنيها فى كل صوره من الصور دى
قعدت اتفرج على باقى الصور و لقيت صورتين اول ما شفتهم برقت ....🥺 ايه دا دى صورتها هى و الشاب ده مع هناء جارتى و جوزها الاستاذ فوزى ....و دى صوره تانيه لهناء و لورا و الشاب فى شقه هناء
ايه دا ؟؟؟؟يعنى هناء تعرف لورا ؟ طب الشاب ده ايه علاقته بهناء ...لأنه واخد راحته اوى فى الصوره و حاطط ايد على كتف هناء و الايد التانيه على كتف لورا
لا لا لا .....كدا الحكايه بقت غريبه و مريبه
قلت اكيد النوته دى فيها حاجه هتدلنى اكتر عن الحكايه
سبت الصور من ايدى و فتحت النوته
النوته مكنتش مذكرات اد ما هى خواطر أو زى ما تقولوا مواقف سواء سعيده أو حزينه حصلت للورا.
اول خاطرة كانت بتاريخ ٢٢/ ٥ /٢٠١٧ لورا كاتبه فيها عدت إلى وطنى مره اخرى بعد سنوات كثيره و انتقلت إلى سكنى الجديد ...أشعر ببعض الراحه بعد التجربه القاسيه التى مررت بها ..لن انسي زوجى و لكن يجب أن أعيش.
بعدها بيومين خاطرة تانيه
تعرفت اليوم على جارتى هناء شخصيه لطيفه ..أحضرت لى كيك الشيكولاته المفضل لدى ..يبدو أننا سنصبح اصدقاء
خاطره تانيه بتاريخ ١٠ يونيه تعرفت اليوم على سالم اخو هناء ياله من شاب لطيف حديثه عذب 😍
خاطره تانيه بعدها باسبوع سالم طلب اليوم رقم تليفونى و حدثنى منذ قليل و طلب منى الخروج سويا على البحر ووجدت نفسي اوافق لا اعرف لماذا و لكن لعلها فرصه جديده للحياه
خاطره تانيه بعدها بيومين اليوم خرجت مع سالم ....اليوم شعرت و لأول مره منذ سنتين بالحياة و اننى مازلت انسانه طبيعيه ينبض قلبها بالحب و الفرحه ...ايدخل الحب قلبى من جديد ؟؟ هل سيمنحنى قلبى فرصه اخرى للحياه ؟؟
و توالت الخواطر اللى كانت بتوصف اد ايه هى حبت و اتعلقت بسالم و كانت دايما بتوصف فيها أنه ملاك مش بشر
خاطره أخرى بتاريخ ٢٤يوليو ملاكى الحارس سالم يخاف على... ينصحنى دائما و يتحدث عن شراكه بينى وبينه ...هل سيطلب منى الزواج ؟؟
خاطره بتاريخ ٣٠ اغسطس اليوم اكتشفت انى حامل ...ماذا سأفعل؟؟ لابد من المواجهه 😔
خاطره بتاريخ ١١ سبتمبر اليوم أخبرت سالم ...ظهر عليه علامات التوتر و طلب منى اجهاض الجنين و انا رفضت بشده ..فأنا انتظر هذا الطفل منذ أعوام كثيره
خاطره بتاريخ ٢٨ سبتمبر أخبرت اليوم هناء بحملى بابن أخيها و لم تبدى اى تعاطف معى صمتت و فقط ...عندما سألتها لماذا لا تتكلمى ؟؟ اخبرتنى أن هذا الأمر ليس من شؤونها.... صدمتنى اجابتها
خاطره بتاريخ ٥ اكتوبر احاول الاتصال بسالم فى اليوم عشرين مره و لكنه لا يرد على اتصالى ...لا اريد الزواج منه اريد نقودى و ارثى عن زوجى أخذه منى بحجه عمل مشروع ....لا اريد مشاريع سأرحل بعيدا بابنى أو بنتى
خاطره بتاريخ ٢٥ اكتوبر اليوم عرفت من طبيبه امراض النسا انى حامل فى بنت .....يا الله كم اتمنى رؤيتها و ضمها بين يدى ...لا اريد شئ من الدنيا سواها
خاطره بتاريخ ١ نوفمبر اعصابى توترت بسبب عدم رده على و عدم رد اخته و زوجها على و محاولة ملاحقته المستمرة ...
خاطره بتاريخ ٥ نوفمبر أحضرت اليوم خط تليفون جديد و اتصلت على سالم و أخبرته بأن يحضر لى نقودى و لا أريد اى شئ اخر و الا سافضحه فى كل مكان و سأذهب للشرطه .........اضطرب و وعدنى بأن يحضر إلى بعد غد لنذهب إلى القاهره و يحضر لى نقودى و يمضى إلى حال سبيله
خاطره اخيره بتاريخ ٧ نوفمبر اليوم حلمت بحلم رهييييب أشعر أن شيئا ما سيحدث .....حلمت بسالم يخرج ابنتى من بطنى و يقتلها ....لكن لا مناص من ذهابى معه لعلها هواجس و حديث نفس فقط ...لابد أن أذهب معه لاحضر نقودى و ارحل سأعود إلى فرنسا مره اخرى
قريت كل النوته و فهمت منها أن سالم ده اكيد عمل فيها حاجه ...انا لازم اعرف بقية الحكايه
قمت حطيت الصور و النوته فى الدولاب و دخلت سريري عشان انام
قمت الصبح و دماغى مشغوله اوى هبدأ منين ؟؟
شريف شافنى سرحانه و قالى :
مالك يا سمسم سرحانه فى ايه ؟؟
مفيش يا شريف ....بقولك ايه هو احنا هنروح نرد زيارة الاستاذ فوزى و هناء امتى ؟؟
انتى مستعجله ليه على زيارتهم ما هم كانوا هنا اول امبارح و انتى رحتى لها امبارح ؟
لا مش مستعجله و لا حاجه بس انت عارف انا مبحبش يكون على حاجه لحد و انت شوفت جابوا ايه و هما جايين و انا الصراحه عايزه ارد لهم الهديه
طيب يا ستى ...و عايزه تردى الهديه بايه ؟؟
بص انا مفيش حاجه معينه فى دماغى لكن يمكن لما انزل السوق الاقى حاجه مناسبه
طب خلاص بكرا نروح نشوف هديه مناسبه و نبقى نزورهم يوم الجمعه
و ليه مننزلش انهارده ؟
لأ انهارده عندى شغل و هتأخر ..دا انا كنت لسه هقولك متعمليش حسابى على الغدا لانى هتغدى فى الشركه
ماشي يا شريف و انا بقا مش هطبخ...هقضيها بأى حاجه كدا انا و ياسر
زى ما تحبى يا سمسم ...عايزه منى حاجه تانى ؟؟
لأ عايزه سلامتك يا حبيبي ...مع السلامه
قفلت الباب ورا شريف و قلت هى هناء هتكون بداية الخيط اللى هعرف بيه كل حاجه 🤨
طبعا عايزين تعرفوا انا عملت ايه معاها لما رحت لها ...و طبعا هقولكم استنونى فى الجزء الجاى 😉😉
يتبع .....
د.جيهان عادل 😊
#لعنة_الطريق
#الجزء_الثامن
قفلت الباب ورا شريف و قلت هى هناء هتكون بداية الخيط اللى هعرف بيه كل حاجه 🤨
تانى يوم خرجت انا و شريف رحنا نجيب الهديه
عجبنى فازه كريستال شكلها تحفه و اشتريت كمان إطار صور .....شريف فسحنا و اتغدينا بره و روحنا
انا بقا اتصلت على هناء و قلت لها إن إحنا هنزورهم كلنا الجمعه و هى رحبت اوى و قالت تشرفوا يا حبيبتى و تنوروا
ياسر لما سمعنى بقول لهناء كدا قالى لأ يا ماما انا مش جاى معاكم
ليه يا ياسر ؟
لورا هتزعل منى و مش هتكلمنى
لأ يا ياسر لورا مش هتزعل ....بالعكس دى هتفرح جدا
ياسر هز دماغه و سكت
عدى اليوم عادى كان اليوم ده الأربع
و لما دخلت عشان انام قعدت شويه افكر ازاى اخليهم يعترفوا باللى عملوه فى لورا و هل هناء عندها علم و الا لأ
قعدت حوالى ساعه افكر و مش قادره انام لغايه ما خلاص دخلت فى النوم و لقيت لورا ظهرت قدامى كأنها حقيقه و قالت لى انا بشكرك يا ياسمين
قلت لها بس انا مش عارفه هروح لهناء اقولها ايه و مش عارفه اخليها تعترف ازاى
ردت لورا و قالت لى
هناء عارفه كل حاجه ....منها لله هى و اخوها
طيب عايزه اسالك انتى ليه ظهرتى لنا على الطريق اشمعنا احنا ؟؟
انا ظهرت لكم عشان عرفت انكم هتسكنوا مكانى هنا
طب و ليه فى الحتة دى بالذات ؟
علشان الحتة دى اللى اتقتلت فيها و دفنى سالم الندل انا و بنته
قتلك ازاى ؟؟
انتى شفتى المذكرات بتاعتى و عرفتى أنه كان واخدنى علشان يجيب لى فلوسى
صحيح هو كان واخد منك كام ؟
كان واخد منى مليون جنيه
يااااا مليون جنيه ....دا كتير اوى ...كملى
المليون جنيه دول يا ياسمين كانوا ميراثى من زوجى رامى الله يرحمه 😔...قعدت معاه خمس سنين و مخلفناش هو كان عنده مشاكل صحيه بس انا كنت بحبه اوى و مقدرتش اسيبه و كنا عايشين سوا فى فرنسا
بعد كدا حالته ساءت جدا و فى الاخر توفى الله يرحمه 😔
قعدت شهور زعلانه و حالتى النفسيه وحشه جداا و فى الاخر قررت انى انزل بلدى و ابدا حياتى من جديد
قلت اشوف شقه صغيره لغايه ما اتمالك حالى و ارجع لطبيعتى و للاسف السمسار اختار لى الشقه دى و جيت سكنت فيها و جت هناء اتعرفت على و انا صراحه كنت وحيده و ما صدقت لقيت حد اتكلم معاه
حكيت لها على كل ظروفى و أن معايا فلوس ورثى من جوزى بس للاسف انا مليش خبره فى عمل اى مشروع
لقيت عنيها لمعت و قالت لى متقلقيش انا عندى اللى يشغلهم لكى اخويا سالم امين جدا و شاطر اوى التراب فى ايده بيتحول دهب
و فعلا لقيتها بتتصل بى فى يوم و تقولى تعالى ..دخلت لقيت شاب شكله جميل لابس لبس جميل ابن ناس يعنى و عرفتنى عليه
و ابتدوا بعد كدا فى خطتهم و بدأ يرسم على دور الحب لغايه ما سلمته كل حاجه املكها حتى نفسي 😔
و مكنتش واخده اى خوانه و لا كان يجى على خيالى أنه ممكن يعمل فى كدا
لغاية ما حملت منه و طلب منى انزل الجنين وانا كنت شايفه أنه بيطلب منى حاجه مستحيله دا انا كنت بتمنى يكون عندى طفل كنت بحلم باليوم ده
و لما ملقتش منه اى رد كويس
لجأت لهناء و قلت لها سكتت و متكلمتش و قالت إنها ملهاش دعوه
بعدها هددته و هو طبعا اخدنى على اد عقلى على ما ينفذ خطته
و يوم ما كنت رايحه معاه رحت لهناء و هى كانت عارفه أن اخوها متفق معايا أننا هنروح القاهره سوا و سجلت لها كل كلامها اللى يدل على أنها كانت عارفه كل حاجه
و سجلت لاخوها و هو بيقولى يلا عشان اخدك و نروح نجيب لك فلوسك
قلت له طيب ثوانى هروح الشقه نسيت حاجه هجيبها و اجى و رحت خبيت التسجيل ده فى الشقه
و فين التسجيل ده يا لورا
التسجيل و كل الكلام اللى حكيته لكى ده و قصتى كامله موجوده على كارت ميمورى مخبياه فى النوته
نوته ايه يا لورا انا فتحتها و ملقتش اى كروت
لأ الكارت مخبياه فى جلده النوته و مغلفاه و حاطاها جواها دورى بس و هتلاقيه
طب احنا لو رحنا المكان اللى شفناكى فيه هنعرف مكانك ازاى ؟
هتعرفى يا ياسمين لأن الاستاذ و هو بيدفنى بطاقته وقعت هناك و طبعا اكيد خاف يرجع للمكان
بالتوفيق يا ياسمين انا عاوزاكى تجبيلى حقى و حق بنتى اللى مشفتش النور و كان كل ذنبها أن ابوها ندل
حاضر يا لورا ربنا يوفقنى و اعرف اساعدك
قمت من النوم ...جريت على الدولاب و طلعت النوته و دورت فيها كويس و لاقيت كارت الميمورى حطيته فى موبيلى و سمعت كل حاجه زى ما لورا قالت لى
و قعدت افكر ازاى استخدم الكارت ده و المعلومات اللى عرفتها عشان اخلى هناء و اخوها يعترفوا لى
و جت لى الفكره ....
استنيت لما جه ميعاد زيارتنا لهناء و جبت صوره من الصور اللى لاقتها و اللى فيها لورا و سالم و هناء و حطيتها فى الإطار اللى اشتريته و حطيته فى كيس الهدايا مع الفازه الكريستال و اخدتهم و رحنا انا و ياسر و شريف
اول ما دخلنا هناء رحبت بينا و قعدنا شويه و اخدتها على جنب و اديتها الهديه
ليه مكلفه نفسك كدا يا ياسمين
و لا كلفه و لا حاجه هو انا هيجيلى اعز منك بس افتحى كدا و قوليلى رايك فى الهديه
الله فازه تحفه يا ياسمين ....و ايه دا 🥺😲😲😲
انتى جبتى الصوره دى منين ؟؟؟
لقيتها عندى فى درج من ادراج الكومدينو قلت اعملها لكى مفاجاه و احطها لكى فى إطار
اول ما شافت الصوره لقيت وشها اتغير و قالت تسلم ايدك يا حبيبتى و سكتت خالص
انا بقا قلت لها مين اللى معاكى فى الصوره دول ؟
قالت دا اخويا وواحده صاحبتى
قلت ااااه
طب و ايه جاب الصوره دي عندى فى الشقه؟؟
اصل صاحبتى دى كانت ساكنه فى شقتك
لا و الله ....طب و عزلت ليه بقا ؟؟
معرفش فى يوم كدا لقيناها قامت لمت هدومها و مشيت من غير ما تودعنا حتى
ازاى كدا ...الله اعلم بظروف الناس بقا
بقولك ايه يا هناء انا طالعلى قرشين كدا ميراثى من اهلى و نفسي اشغلهم فى حاجه و عماله اقول لشريف و هو مطنش و مش فاضيلى ..مش عارفة لنا كدا فكره مشروع حلوه ....انا بفكر اعمل بيوتى سنتر ايه رايك ؟؟
لا بيوتى سنتر ايه بس ...مش هيمشي المشروع ده هنا ...طب بقولك انتى معاكى كام يعنى ؟
بصى انا معايا حوالى ٤٥٠ الف و معايا شويه دهب يعملولهم حوالى ٥٠ الف او زياده شويه
يعنى نقول خمسميه الف ....انا بقا هقولك تعملى ايه ؟؟
يا ترى هيحصل ايه بعد كدا ؟؟؟
دا اللى هنعرفه فى الجزء الجاى 😉😉
يتبع ......
د.جيهان عادل😊
#لعنة_الطريق
#الجزء_التاسع و الاخير
بقولك ايه يا هناء انا طالعلى قرشين كدا ميراثى من اهلى و نفسي اشغلهم فى حاجه و عماله اقول لشريف و هو مطنش و مش فاضيلى ..مش عارفة لنا كدا فكره مشروع حلوه ....انا بفكر اعمل بيوتى سنتر ايه رايك ؟؟
لا بيوتى سنتر ايه بس ...مش هيمشي المشروع ده هنا ...طب بقولك انتى معاكى كام يعنى ؟
بصى انا معايا حوالى ٤٥٠ الف و معايا شويه دهب يعملولهم حوالى ٥٠ الف او زياده شويه
يعنى نقول خمسميه الف ....انا بقا هقولك تعملى ايه ؟؟
انا لى اخ ..اللى شفتيه فى الصوره دا أمين جدا و التراب فى ايده بيبقى دهب بيشتغل فى الاستيراد و التصدير هيشغل لك فلوسك و فى خلال شهور هتضاعف مره و مرتين كمان
يااااا معقوله طب يا ريت يا هناء تبقى عملتى فى أكبر جميله فى حياتى
طيب يا حبيبتى انا هتصلك بيه و اشوفه فاضى امتى و يجى يقعد معانا و يفهمك على كل حاجه بالورقه و القلم
طيب ياريت...... انا مش عارفه اشكرك ازاي و الله
بس عايزه اقولك على حاجه مش عاوزه شريف جوزى يعرف شئ عن الموضوع ده لانه مش مشجع حكايه المشاريع دى و عمال يقولى اعمليهم ودايع باسم ياسر و خلاص و انا صراحه نفسي اعمل مشروع مش احطهم فى بنك
لأ متخافيش دا انا اللى كنت لسه هقولك متقوليش لجوزك الا اما نستقر على حاجه أو لما سالم يوافق يعنى
طيب خلاص تمام كدا اتفقنا.
روحت شقتى بعد ما نفذت أول خطوة فى خطتى
شريف سالنى انتوا كنتوا عمالين تتكلموا فى ايه دا كله ؟؟
مفيش يا شريف كلام ستات عادى
طب مالك كدا ..انا بسال سؤال عادى يعنى
مر يومين و لقيت هناء جايه تخبط على الباب و بتقولى انها كلمت اخوها و هو قالها أنه عنده شغل كتير اليومين دول و مش مستعد يدخل شراكات تانيه مع حد و انها قعدت تتحايل عليه و تترجى فيه أنه يوافق لغايه ما فى الاخر وافق بس بيقولها أن مبلغ الخمسميه الف دول هيكونوا حاجه قليله اوى و انها اقنعته أنه يحاول يشوفلى مشروع صغير كدا على اد الفلوس
قلت لها ربنا يخليكى يا حبيبتى طب هقابله امتى ؟؟
قالت هو مش فاضى بس بعد ما اتحايلت عليه قالى هيجى بعد بكرا
قلت تمام و انا مستنياه
و دخلت احضر فى دماغى الجزء التانى من الخطه بس لازم لورا تساعدنى ...
ناديت على ياسر .....
نعم يا ماما
هو انت لسه بتشوف لورا ؟
ايوه يا ماما بشوفها كل يوم و هى مزعلتش منى لما رحنا لطنط هناء
طيب يا ياسر انا عاوزه اكلمها قولها ماما عايزاكى
حاضر يا ماما
فى الليله دى نمت و زى ما توقعت لقيت لورا ظهرت لى زى ما تكون حقيقه
قلت لها انا هقابل سالم بعد بكره و يمكن احتاج مساعدتك
محتاجه مساعدتى فى ايه يا ياسمين ؟
محتاجه انك تظهرى لنا لو ناديت عليكى يا لورا
طب و ليه عايزانى اظهرلكم ؟؟؟
انا خايفه من هناء و سالم ليعملوا فى زى ما عملوا فيكى لما اواجههم و ظهورك هيلهيهم عنى
حاضر يا ياسمين .
تانى يوم قمت نسخت كارت الميمورى على اللاب بتاع شريف و على فلاشه تانيه و على كارت الميمورى بتاعى علشان أأمن نفسي و كتبت رساله فيها كل حاجه جمعتها عن الموضوع . ورجعت النوته و الصور فى السيفون علشان لو حصل اى حاجه و دخلوا الشقه ميلاقوش حاجه و لحسن حظى دا كان أول يوم لياسر فى الحضانه و كان شريف هيوديه و يجيبه فكده راح من على قلبى هم ياسر
جه الميعاد اللى سالم و هناء حددوه...و قبل ما ادخل الشقه عندهم بعت لشريف رساله قلت له فيها دور فى السيفون و مسحت الرساله من على موبيلى .
دخلت على هناء و سالم و رحبوا بى
و قعد سالم يشرح لى عن مشاريع وهميه كدا ...
رحت بصيت له بصه كدا فيها تحدى و قلت له بقولك ايه ما تجيب م الآخر كدا و تقول انك عاوزين تنصبوا على
اول ما قلت كدا لقيتهم الاتنين تنحوا
و هو رد ايه اللى بتقوليه دا يا فندم عيب كدا ميصحش
بقولك ايه بلا فندم بلا بتاع انا عارفه كل حاجه عملتوها فى لورا
ردت هناء احنا مش عارفين انتى بتتكلمى على ايه ؟
بقولكوا ايه تعالوا نتكلم على المكشوف كدا و نيجى لبعض دوغرى ...انا عارفه انكم نصبتم على لورا و خدتوا منها مليون جنيه و كمان اخوكى موتها و دفنها فى الطريق
طبعا اول ما قلت لهم كدا هاجوا الاتنين و بدأو يثوروا عليا
ايه اللى بتقوليه دا ؟ ... انتى بتخرفى تقولى ايه يا ست انتى ؟
رديت عليهم بكل هدوء و برود اهدوا كدا و اتكلموا معايا بالراحه انا مش عاوزه اضركم و لا حاجه ...انا قصدى خير
انتى مجنونه يا ست انتى ... كل الكلام اللى بتقوليه ده محض خيال...... خيالك المريض هو اللى صور لك كدا
طب و لو قلت لكم انى معايا الدليل على كل كلمه قولتها
دليل..... دليل ايه دا ؟؟
هوريكم الدليل بس خلى بالكم انا مأمنه نفسي كويس و لو فكرتوا تغدروا بى مش هتلحقوا
طب ورينا اللى بتقولى عليه
هوريهولكم بس نتفق الاول
نتفق على ايه ؟
سالم اخد من لورا مليون جنيه ....و الكلام ده من سنتين يعنى المليون زمانهم بقوا اتنين انا عاوزه النص...يعنى عاوزه مليون جنيه
انتى مجنونه يا ست انتى مليون جنيه ايه و كلام ايه اللى بتتكلمى فيه
طب اهدوا كدا بس و اسمعوا..... شغلت الحكايه اللى بتحكيها لورا بصوتها و شكها أنهم ممكن يعملوا فيها حاجه بس هى مضطره انها تروح مع سالم عشان تاخد فلوسها و تسافر هى و بنتها لفرنسا
اول ما سالم و هناء سمعوا التسجيل جالهم حاله ذعر ووشهم اصفر جدا و اضطربوا و فضلوا ساكتين لغايه ما التسجيل خلص
اول ما التسجيل خلص ضغطت على برنامج تسجيل كنت منزلاه على التليفون ...
و قلت لهم ايه رايكم هتدونى المليون جنيه و الا ايه ؟؟
ضحك سالم و قالى بافتراض أن كلامك صح ايه يثبت انى قتلتها ...كل التسجيل اللى سمعتيه لنا دا مجرد اوهام كانت فى دماغ الست لورا بتاعتك و لا له أى أساس من الصحه و مناخدش فيه يوم حبس و أعلى ما فى خيلك اركبيه و روحى بلغى زى ما انتى عاوزه
قمت وقفت وضحكت و قلت له.....و الله ؟؟؟ طب لو قلت لك انى عارفه مكان الجثه و عندى دليل تانى انك أنت اللى دفنتها هناك
هنا لقيت هناء خافت و بدأت تسحب ناعم معايا
طب اقعدى بس يا ياسمين نتكلم
لا ما هو اخوكى هو اللى عاوز كدا انا مكنتش عايزه اضركم بس هو بقى مش هامه
دليل ايه اللى معاكى و المكان ده فين ؟
لو قلت لك على المكان هتجيلى فى الدوغرى و نتفق
قال طب قولى
قلت له أنت دافنها تحت شجره فى الطريق الفرعى المؤدى للقاهره عند الكيلو ٥٦ ....ها كلامى صح و الا لأ
هنا سالم وشه ضرب الوان و قام وقف و حاول يتهجم على و اخته منعته و قال انتى عرفتى كل الكلام ده منين ؟؟ ايوه قتلتها و هقتلك انتى كمان زيها و هدفنك فى نفس المكان ....
هناء روحى هاتيلى حبل و لزق ....هنربطك هنا و نخدرك و ناخدك على نفس المكان عارفاه طبعا عارفاه
و زى ما توقعت و قلت للورا حصل ....رحت ناديت يا لورااااا....يا لورااااا
سالم و هناء ضحكوا .......ايوه نادى عليها ما انتى هتروحيلها دلوقتى
فجاه لورا ظهرت لهم بشكلها البشع ووشها المليان دم
سالم و هناء صرخوا و هى بصت لهم و قالت منكم لله ...قتلتونى انا و بنتى و سرقتوا فلوسي ..منكم لأحكم الحاكمين.
هناء و سالم كانوا فى منتهى الرعب قعدوا مكانهم و مقدروش يتحركوا
انا بقا فتحت الباب و جريت قعدت أجرى أجرى قابلت شريف فى وشي ركبت معاه بسرعه
مالك يا ياسمين
أجرى يا شريف أجرى على القسم بسرعه
و حكيت لشريف كل حاجه فى السكه و طبعا زعل منى انى مقولتش له كل ده عرضت حياتى للخطر بس انا اعتذرت له و قلت له إنك مكنتش مصدقنى عشان كدا خبيت عليك
رحنا القسم و بلغنا و سمعت الظابط التسجيل و طلع إذن من النيابه بالقبض على سالم و هناء
و فعلا راحوا البيت لقوهم مكانهم لورا كانت واقفه و هما خايفين اول ما حست بالشرطه اختفت
بعد كدا النيابه أمرت بإخراج الجثه من المكان اللى قولت لهم عليه و فعلا لقوها مقتوله و كانت حامل فى بنت و لقوا بطاقة سالم واقعه جنب الجثه
هناء و سالم اخدوا جزائهم و لورا جت لى فى الحلم تشكرنى و تقولى ريحتى روحى انا و بنتى ربنا يسعدك 😊🥰🥰🥰
تمت .
ارجو ان القصه تكون عجبتكم ....و ارجو أن تدعو لأبى رحمه الله و لسائر موتى المسلمين
د.جيهان عادل
حلوه جدا والله بس كنت قاعده علي اعصابي وانا بقراها بس حلوه جدااااااااا 👏👏👏👏👏
ردحذفربنا يرحم والديكي وامواتنا واموات المسلمين 🙏🏻