#أمل
#الجزء الأول
الحقنى يا سعادة البيه ..... ابوس ايدك بنتى مش لاقياها
اهدى يا ست و قوليلى بنتك دى متغيبه من امتى و عندها كام سنه ؟
بنتى عندها ٨ سنين كانت رايحه الدرس الساعه ١٢ الضهر يعنى بعد المدرسه على طول .. جت حطت شنطتها و غيرت هدومها و اخدت شنطة الدرس و مشيت و من ساعتها مرجعتش ابوس ايدك دورولى على بنتى
اهدى يا ماما طب مروحتيش تشوفيها يمكن بتلعب مع حد من أصحابها ؟
رحت يا بيه رحت و ملقتهاش راحت الدرس اصلا و لا حد من العيال اللى بتلعب معاهم فى الشارع شافوها
طيب يا ستى احنا مش هنقدر نعملك محضر الا بعد مرور ٢٤ ساعه على تغيب البنت القانون بيقول كدا
قانون ....؟؟ قانون ايه يا بيه يعنى تكون البنت اتخطفت و احنا ندننا قاعدين ٢٤ ساعه منعرفش راحت فين و لا جت منين ؟ اى قانون دا عديم الرحمه ؟؟؟ اللى يخليكوا متطلعوش تدوروا معايا على بنتى ..... بنتى وحيدتى ......بنتى اليتيمه اللى ابوها سابهالى و هى يدوب سنتين ....بنتى اللى بشقى عليها و اشتغل فى البيوت عشان اربيها و اعلمها و اشوفها احسن واحده فى الدنيا ... بنتى اللى مليش غيرها .... بعد دا كله تقولى ٢٤ ساعه
يا ستى و الله انا مقدر موقفك جدا و البنت صعبانه على بس القانون بيحكمنى و مقدرش اعملك اى حاجه قبل ما تمر ال٢٤ ساعه اللى قلت لكى عليهم .... يمكن بنتك عند حد من قرايبها يمكن بتلعب هنا و الا هنا
صرخت الام لا اااا انا دورت عند كل اللى يعرفونا قبل ما اجى بقيت أجرى زى المجنونه فى الشوارع ...بقيت اخبط على البيوت ....هو انت متخيل يا بيه انى جيت هنا على طول اول ما لقتها مجتش... انا بقالى ٤ ساعات بدور عليها و مش لاقياها و انت عارف البلد كلها اد ايه لفيتها شارع شارع و بيت بيت مش لاقياها مش لاقياها خالص
ان شاء الله هترجع لك يا ستى بس انتى تعاليلى بكرا الساعه ١٢ الضهر و انا اعملك محضر و ابعت عساكر تدور لك عليها
و النبى يا بيه خرج معايا حد دلوقتى يدور معايا انتوا برده لكم طرقكم فى التدوير ارجوك يا سعادة البيه ابوس رجلك
و الله يا ستى ما اقدر .... روحى بس حاولى تدورى عليها تانى يمكن هنا و الا هنا و بكرا لو ملقتيهاش لا قدر الله تعالى اعملك المحضر
كتر خيرك يا سعادة البيه
جريت الام على بره و راحت تلف تانى على بنتها و تنادى عليها يا اااامل. ..... يا اااااامل ردى على يا بنتى ردى على يا نور عينى ...... انتى فين يا ضنايا
و الناس اتلمت و وقفت يسألوا ايه اللى حصل يا ست
امل بنتى يا اخويا مفيش حد شاف امل بنتى
كانت رايحه الدرس عند الاستاذ علام زى كل يوم ...بنت صغيره فى تالته ابتدائى لابسه فستان احمر و عامله شعرها ضفيره و لابسه شبشب بمبى ....ابوها سابهالى حتة لحمه حمرا و مات فى حادثه قطر
معنديش غيرها و مريضه عندها ثقب فى القلب.
اللى خدها ده خدها ليه ... حرام عليه يحرق قلبى عليها
طب يا ام امل ممعكيش صوره ليها
ايوا معايا صوره اهى... صورتها اللى كنت مصورهالها و هى داخله المدرسه كنت واخداها عشان اعمل بيها محضر فى القسم لكن البيه اللى هناك مرضيش يعملى محضر الا بعد ٢٤ ساعه بيقولى القانون لا يسمح ... اعمل ايه يا ناس و اروح لمين؟
طب هو انتى ضربتيها و الا حاجه يمكن مستخبيه منك فى مكان كدا و الا كدا أو تكون خايفه منك
انا اضربها ..... انا لو قلت لك انها الهوا اللى بتنفسه مش هتصدقنى ... لو قلت لك انها نور عنيا اللى بشوف بيها مش هتصدقنى .... طب يمكن هى زعلت منى عشان طلبت منى سندوتش همبورجر زى اللى شافته مع واحده صاحبتها و جت قالت لى و قلت لها حاضر يا امل لما يجى معايا فلوس هجيب لك.... و الا يمكن زعلت من المريله القديمه اللى لابساها بقالها تلات سنين و كل يوم تيجى تعيطلى و تقولى نفسي فى مريله جديده زى اصحابى طب يمكن زعلت عشان مجبتلهاش شنطه جديده و جزمه جديده بدل المتقطعه اللى فى رجلها دى ؟....يمكن دا اللى زعلها و خلاها تمشى ....طب ترجع و انا هبيع هدومى و اجيب لها اللى هى عاوزاه ترجع و انا اشحت من على الابواب و مش هخلى حاجه فى نفسها .... انا عاوزه بنتى هاتولى بنتى ابوس اديكم ....
طب يمكن راحت لحد من قرايبكم يا ستى
احنا ملناش قرايب هنا ... انا و ابوها من الصعيد و ملناش اى حد هنا خالص
اخوات جوزى الله يسامحهم كلوا حقه فى أرض أبوه و لما مات و رحت أطالب بحق بنتى قالوا ملهاش حاجه عندنا و انا يتيمه الام و الاب مليش غير اخت واحده متجوزه هناك فى الصعيد
احنا هندور معاكى يا ام امل متقلقيش ... يلا يا جماعه كل اللى عنده كشاف يجيبه و يجى معانا ندور فى الزراعات اللى حوالين البلد
و جزء مننا يروح يدور جوه البلد يمكن بتلعب مع حد من العيال و الوقت سرقها
و جزء تانى يروح يدور حوالين المدرسه كدا يمكن تكون هناك
يا ترى امل هترجع لامها و الا لأ 😒...دا اللى هنعرفه فى الجزء الجاى .
يتبع ........ 😊
#د.جيهان عادل
#امل
#الجزء الثانى
احنا هندور معاكى يا ام امل متقلقيش ... يلا يا جماعه كل اللى عنده كشاف يجيبه و يجى معانا ندور فى الزراعات اللى حوالين البلد
و جزء مننا يروح يدور جوه البلد يمكن بتلعب مع حد من العيال و الوقت سرقها
و جزء تانى يروح يدور حوالين المدرسه كدا يمكن تكون هناك
هنا جه شاب صغير حوالى ٢٢ سنه ماسك سيجاره فى ايده و لابس خاتم فى صباعه الصغير ،تحت عنيه اسود و لابس تيشرت اسود و بنطلون ترينج اصفر ، شعره أمرت و منكوش ....جرى على ام امل و قالها
خير يا ام امل بتعيطى ليه ؟؟
الحقنى يا حماده امل ضاعت مرجعتش البيت من الضهر
طب ما يمكن رجعت البيت و انتى هنا بتدورى عليها و الا انتى مشيتى من هنا و هى جت من هنا
يمكن يمكن يا حماده يا رب .... يارب اروح الاقيها واقفالى قدام البيت
طب تعالى نروح نشوفها و باقى الرجاله يدوروا فى كل حته فى البلد
ام امل رجعت بسرعه مع حماده جارها و عندها امل انها ممكن تلاقى بنتها رجعت البيت
لكن للاسف ملقتهاش...😔
حماده قالها متقلقيش يا ام امل انا هقلب لك عليها الدنيا مش هنام انهارده الا و هى فى حضنك.
لو تقدرى تستريحى شويه استريحى شكلك تعبانه اوى
استريح ايه بس.. استريح و بنتى معرفش عنها حاجه و لا أعرف راحت فين و لا جت منين
طب بلغتى البوليس ؟
رحت بس البيه اللى هناك مرضيش يعملى محضر.. بيقولى بعد ٢٤ ساعه
معلش يا ام امل هو دا القانون فى بلدنا و ان شاء الله نلاقيها و منحتاجش و لا محضر و لا خلافه
يارب يارب يا حماده من بقك لباب السما يارب
حماده خرج مع ام امل و قعدوا يدوروا على أمل طول الليل و لكن مفيش فايده 😔
كل ما الوقت يمر كأن سكاكين فى قلبها بتقطع فيه و احساس انها مش هتشوف بنتها تانى هيموتها
تانى يوم لما جت الساعه ١٢ ام امل جريت على القسم و دخلت على الصول اللى قاعد و قالت له
يا سعادة البيه انا اللى جيت لك امبارح فاكرنى ؟؟
انا اللى بنتى تاهت من امبارح و مش لاقياها
انتى لسه ملقتيهاش يا ست ؟
ايوا يا اخويا ملقتهاش بالله عليك ساعدنى ... الله يرضى عليك غيتنى ربنا يغيتك
طب اقعدى استريحى يا ستى ... هفتح لك محضر
شالله تسلم يا اخويا ..و بعدها هتنزلوا تدوروا معايا صح ؟
اسمك ايه يا ست
اسمى فاطمه السيد عبدالعزيز
طب هاتى بطاقتك
انه فى يوم ٢٣ /١١/ ٢٠١٧ الموافق الاتنين فى تمام الساعه الثانيه عشر مساءا قد حضرت السيده / فاطمه السيد عبدالعزيز الى القسم التابع لقريه المناشى قليوبيه صاحبه بطاقه الرقم القومى ٢٩٠١١٢٦١٣٠٠٠٥٦ المنيا قرية المطاهره
بلغت السيده عن فقد ابنتها ...
اسم بنتك ايه يا ست فاطمه و عندها كام سنه و تاهت ازاى ؟؟
اسمها امل سليمان احمد و عندها ٨ سنين و كانت رايحه الدرس امبارح زى دلوقتى و من ساعتها مرجعتش
طيب استنى
كتب الصول كل المعلومات دى فى المحضر و سألها
و كانت لابسه ايه يا ستى ؟؟
كانت لابسه فستان احمر و شبشب بمبى
و الدرس دا مكانه فين يا ست فاطمه ؟؟
الدرس فى اخر البلد يا اخويا
الصول رمى القلم من ايده و قالها و كنتى بتسبيها تروح اخر البلد لوحدها و هى صغيره كدا ازاى يا ست انتى؟؟
منا كنت بشتغل يا بيه عشان اصرف عليها انا بروح البيوت امسح سلم اروق شقه اطبخ لواحده بتشتغل اساعد ست كبيره انى اشتريلها الخضار
طيب يا ست فاطمه مين أصحاب بنتك اللى بتلعب معاهم
بنتى غلبانه يا بيه و مريضه مكنتش بتقدر تلعب زى العيال دا انا كنت حاجزالها فى معهد القلب بعد خمس شهور عشان يعملولها العمليه اللى الدكتور قالى عليها
عنوانك الحالى اللى ساكنه فيه دلوقتى يا ست فاطمه ؟
انا ساكنه فى شارع المنوفى نمره عشره بيت الحج عربى
معاكى صوره ليها يا ست ؟
ايوا يا اخويا اخى اتفضل
طيب يا ست انا كتبت لك المحضر و ان شاء الله هندور لك على بنتك و هنلاقيها
يعنى كدا خلصنا يا بيه و هتبعت معايا عساكر يدوروا عليها
عساكر ايه اللى هبعتهم معاكى يا ستى ... المحضر اتكتب و بعد كدا المباحث هتشوف شغلها و لو حصل اى جديد هنبعت لك
طب يا بيه و بنتى مش هعرف عنها حاجه ؟؟
يا ستى متوجعيش دماغى و سبينا نشوف شغلنا
حاضر ... حاضر يا بيه
خرجت فاطمه من القسم و هى هتموت كانت فاكره أن الشرطه هتخرج تدور معاها على بنتها
رجعت بيتها و قعدت تعيط و تنادى على أمل
حماده و امه جم خبطوا عليها و دخلوا
سالها حماده عملتى ايه يا ام امل ؟ بلغتى؟؟
ايوا بلغت و البيه اللى هناك قالى هندور
ردت ام حماده متقلقيش يا ام امل ان شاء الله هنلاقيها مدام المباحث هيدورولك عليها يبقى باذن الله هيلاقوها
يا رب ... يارب يا ام حماده يا رب
تانى يوم فاطمه لقت الباب بيخبط فتحت لقت عسكرى ..اول ما شافته فرحت و قالت له لقيتوا بنتى ؟؟؟ لقيتوا بنتى يا اخويا ؟
معرفش يا ست بس البيه الظابط عايزك
فاطمه لبست جلابيتها السمرا و جريت مع العسكرى على أمل تسمع اى حاجه عن بنتها
الظابط اول ما شافها داخله ملهوفه قالها اقعدى استريحى يا ستى
يريحك قلبك يا باشا ... ها لقيتوا بنتى ؟؟
احنا عملنا تحرياتنا و عرفنا أن بنتك مشيت مع شاب و ركبت معاه توكتك و خرجوا بره البلد و لما دورنا على اى كاميرات فى المنطقه لقينا كاميرا السوبر ماركت اللى على اول الشارع و لما قمنا بتفريغ الكاميرا شاهدنا البنت فعلا بصحبه شاب و بيركبها توكتوك و جبناكى دلوقتى نوريكى الفديو يمكن تتعرفى على الشاب دا
صحيح صحيح يا بيه يا رب يا رب أعرفه و اوصل لبنتى يا رب
اهى الكاميرا جايبه بنتك من و هى خارجه من البيت عندك
ايوا دى بنتى .... يا حبيبتى يا بنتى يا قلب امك يا حبيبتى
اهدى يا ستى من فضلك عشان نعرف نشوف شغلنا
حاضر حاضر يا بيه
هنا هى بتقابل واحد اهو تقدرى تقوليلنا دا مين ؟؟/ هل تعرفى الشخص دا ؟؟؟
ايه دا ؟؟؟؟؟؟؟ مش ممكن ؟؟؟🥺😳😳😳
ايوا اعرفه دا .........
يا ترى مين دا اللى عرفته فاطمه و اللى خطف بنتها ؟؟
دا اللى هنعرفه فى الجزء الجاى
ارجو التعليق بملصقات كتير علشان القصه توصل لأكبر عدد ممكن من الناس
يتبع ............ 😊
#د.جيهان عادل .
#أمل( ٣-٤ )
#الجزء الثالث
اهدى يا ستى من فضلك عشان نعرف نشوف شغلنا
حاضر حاضر يا بيه
هنا هى بتقابل واحد اهو تقدرى تقوليلنا دا مين ؟؟/ هل تعرفى الشخص دا ؟؟؟
ايه دا ؟؟؟؟؟؟؟ مش ممكن ؟؟؟🥺😳😳😳
ايوا اعرفه دا .........
دا تامر ابن الحج عربى صاحب البيت .... بس يا بيه بنتى مركبتش معاه بخاطرها شوف بيشد أيدها ازاى .... اه يا حبيبتى يا بنتى ...يا ترى عملك فيكى ايه الندل دا
أهدى يا فاطمه و قوليلى اى حاجه تعرفيها عن تامر دا
يا بيه تامر دا واد صايع كان مغلب أبوه و امه و سيجارة البانجو دايما فى ايده و كان على طول اسمع خناقاته مع أمه و كان ساعات يمد ايده عليها عشان ياخد منها فلوس
امه كانت لسه بتحكيلى عنه و انه مكنش كدا زمان و أنه أول ما دخل الصنايع اتحول و بقا بلطجى و انها خبت على أبوه حاجات كتير كان بيعملها عشان أبوه ميطردوش
لغايه ما اخر مره أبوه عرف أن الواد سرق امه كانت عاينه ٤٠٠ جنيه فى الدولاب و قعدت تدور عليهم و بالصدفه جوزها كان قاعد ... و عرف ساعتها أن ابنه سرقهم
جه يا باشا اتخانق معاه خناقه كبيره اوى اوى كل الشارع كان واقف يتفرج عليهم ...و الصراحة الواد دا قليل الادب اوى و مبيكبرش حد .. الناس كلها فضلت تقوله عيب يا تامر دا ابوك ميصحش كدا و هو و لا هو هنا ...و بقى يشتم فى أبوه و امه و كان عايز يضربهم
لولا رجالة الشارع اتلموا عليه و مسكوه و كانوا هيضربوه
ساعتها طلع مطوه من جنبه و قعد يهوش بيها الناس و قلع قميصه و فضل يشتم و يسب...طبعا الناس كلها بعدت عنه لأنه قليل الادب ملوش كبير
الواد خد بعضه و مشي و من ساعتها مشوفنهوش
و اهو رجع اهو عشان ياخد بنتى منك لله يا تامر.... منك للحاكم العادل ....
و الخناقه اللى بتتكلمى عليها دى من امتى يا فاطمه ؟؟
الخناقه دى يا بيه كانت اللهم صلى على النبى من حوالى اسبوعين كدا....... لأ حوالى ١٧ يوم بالظبط لان الكلام دا كان حاصل يوم خميس ...ايوا انا فاكره لانى كنت لسه قابضه حساب الاسبوع من الست اللى بشتغل عندها و كان معايا الفلوس و نزلت بعد الخناقه اطيب خاطر ام تامر و اعرض عليها فلوس من اللى معايا .... ما هو الناس لبعضها برده يا باشا ..
طيب يا فاطمه هى امل تعرف تامر دا كويس ؟؟
ايوا تعرفه يا باشا طبعا ما هو كان ساكن تحتنا ..كان ساعات يغلس عليها و ساعات يلاعبها و هى نازله معايا و يقولها تعالى يا عروستى ...و انا أقوله اتجدعن يلا و اجوزهالك و اضحك ... مكنتش اعرف يا بيه أنه ممكن فى يوم يعمل فيها كدا ابدا ...منه لله.. منه لله
طيب يا ست فاطمه انتى روحى دلوقتى و مش عايزك تجيبي سيره نهائى باللى شفتيه دلوقتى ...دا طبعا لمصلحة بنتك
حاضر حاضر يا باشا بس انتوا هتمسكوه ازاى..دا بعد ما اتخانق مع أهله غار فى داهيه حتى امه متعرفش هو راح فين ؟
دا شغلنا احنا بقا ملكيش دعوه بس اهم شيئ متتكلميش مع حد و تجيبي سيرته و لو حد سالك احنا استدعيناكى ليه قولى كنا بنسالك عن شويه معلومات عن امل عشان نستكمل التحقيق
حاضر ...حاضر يا باشا.. ربنا ينصرك يا رب و يخليلك ولادك و ميوركش فيهم حاجه وحشه ابدا
طب اتفضلى دلوقتى يا فاطمه مع السلامه
الله يسلمك يا رب
فاطمه روحت و دماغها بقت تودى و تجيب و عماله تدعى ربنا أن الواد دا ميكونش عمل فى بنتها حاجه وحشه و تقول لروحها يا رب الحكومه تلاقيه بسرعه عشان ميكونش لحق يعمل فى البت حاجه يا رب يا رب
فاطمه دخلت شقتها و النار فى قلبها هاين عليها تنزل لام تامر تسألها متعرفش اى حاجه عن ابنها او عن صحابه
بس البيه الظابط قالى اوعى تجيبي سيره يا رب صبرنى
فاطمه قامت اتوضت و صلت كتير اوى و بقت تدعى من كل قلبها انها تشوف بنتها تانى و أنه ما يحرقش قلبها على بنتها
فاطمه قعدت على الحال ده لغايه الفجر ما ادن... راحت مصليه الفجر و قعدت تستغفر
بصت لقت الباب على الساعه سبعه كدا بيخبط
فتحت لقت عسكرى جاي لها و بيقولها البيه الظابط عايزك
فاطمه فرحت اوى و طارت مع العسكرى على القسم
الظابط اول ما شافها قالها احنا مبنامش بسبب موضوع بنتك يا ست فاطمه
ان شالله تسلم يا سعاده البيه ربنا يخليك لينا
طيب احنا عرفنا مكان الواد و بعتنا نجيبه و هو على وصول دلوقتى انا قلت اناديكى عشان الواد لو قالنا على مكانها نروح سوا كلنا نجيبها
ربنا يخليك يا محمد بيه و يسعدك يا رب ..جميلك دا على راسي من فوق .. عمرى ما أنساه ابدا
جميل ايه بس دا شغلنا يا ستى
بعد شويه عربيه الشرطه جت و نزل منها تامر و اتنين مخبرين ماسكينه من درعاته و هو شبه الفار اللى ممسوك فى مصيده
( تامر ولد رفيع عنده حوالى ٢٠ سنه اسمراني سنانه صفرا اوى و تحت عنيه اسود و كان لابس فانله بيضا مرسوم عليها علم الزمالك و بنطلون ترينج كحلى و شبشب حمام فى رجله )
اول ما فاطمه شفته انهارت بالعياط و بقت تقوله
وديت بنتى فين يا تامر ..؟؟؟؟؟ وديت امل فين ؟؟؟
الواد بصلها كدا و كأنه معملش حاجه و قالها امل مين ؟؟
امل ايه ؟؟؟ معرفش انا
و كان واضح عليه أنه مش فى وعيه خالص
فاطمه بقت تشده من هدومه و تصرخ زى المجنونه ....مش عارف امل مين ؟؟؟؟؟ امل اللى اخدتها و حرقت قلبى عليها .... امل اليتيمه اللى مليش غيرها فى الدنيا ...... امل المريضه الغلبانه .... عرفتها ؟؟ عرفتها يا تامر ؟.....منك لله ...منك لله
العساكر بقوا يشدوا فاطمه عشان تبعد عن تامر و هى كان فيها قوه سبحان الله مكنش حد قادر عليها
المخبرين دخلوا تامر للبيه الظابط عشان يحقق معاه و يعرف ودا البت فين ؟
عايزين تعرفوا ايه اللى حصل فى التحقيق مع تامر استنونى الجزء الجاى 😉😉
يتبع .......😊
#د.جيهان عادل .
#أمل
#الجزء الرابع و الاخير
العساكر بقوا يشدوا فاطمه عشان تبعد عن تامر و هى كان فيها قوه سبحان الله مكنش حد قادر عليها
المخبرين دخلوا تامر للبيه الظابط عشان يحقق معاه و يعرف ودا البت فين ؟
تعالى يلا
حاضر يا باشا
افتح محضر يا ابنى ( أنه فى يوم ........الخ)
وديت البت فين ؟؟
بت مين و لامؤاخذه ؟؟
هتستهبل يا روح امك البت اللى خطفتها اول امبارح
يا باشا انا مخطفتش حد و لا اعرف حاجه عن الكلام اللى بتقوله سعاتك
ولااااا .. اتعدل كدا و تعالى معايا دغرى احسن و رحمة امى هعلقك
يا باشا و الله ما اعرف حاجه عن الكلام اللى بتقوله دا
كنت فين اول امبارح الساعه ١٢ الضهر ؟؟
كنت فى المكان اللى جبتونى منه دلوقتى مخرجتش منه من ساعة ما اتخانقت مع ابويا و انا قاعد هناك معتبتش البلد هنا غير دلوقتى
يا ابن الكدابه اومال مين ياض اللى فى الفديو دا ...اتفرج كدا ..... مش انت دا يا روح امك
انا ...انا يا بيه
ااااايوه ...انت ايه بقا قولى بقا على كل حاجه عشان اقدر اساعدك
انا فعلا نزلت البلد كنت عايز اروح اصالح ابويا و امى لكن لما وصلت على باب الشارع نفسي مسكها الكبر و صعبت على نفسي و خفت ابويا يعمل فيها عنتر قدام الناس و يطردنى فلفيت و رجعت تانى و رحت الموقف
ياض انت بتكدب ليه ؟؟ استنى بقا لما اوريك باقى الفديو
مش انت دا ياض ؟؟ و مش دى البت ؟؟ و انت اهو بتركبها التوكتوك و تركب معاها ؟؟
اااه صحيح .... انا ركبتها معايا بس كنت رايح الموقف ووصلتها لآخر البلد عشان قالت لى أن عندها درس عند الاستاذ علام ... صعبت على و قلت بدل ما تمشي دا كله اخدها فى طريقى
ها....و بعدين ؟؟
بعدين نزلتها قدام الدرس يا باشا و كملت بالتوكتوك
امممممم 🤔 و انت عايزنى اصدقك بقا؟؟
الظابط ضرب الجرس دخل العسكرى
هات لى يا ابنى سواق التوكتوك اللى بره
حاضر يا فندم
دخل شاب فى التلاتين من عمره ابيض و قصير
سلام عليكم يا باشا
اسمك و سنك و مهنتك؟؟؟
أسمى حامد ابراهيم انس و سنى تلاتين سنه مهنتى سواق توكتوك زى ما حضرتك عارف
تعرف الشخص دا يا حامد ؟؟
ايوا يا باشا دا تامر ابن الحج عربى
اخر مره ركب معاك كانت امتى ؟؟
اخر مره كانت اول امبارح يا باشا
هنا رد تامر بسرعه و قاله زى ما يكون عايز يلقنه اللى يقوله
مش انا ركبت معاك يا حامد و انت وصلتنى للموقف و انا ركبت و مشيت
حامد ارتبك كدا و قال ايوه انا ركبتك من شارعكم لغاية الموقف
و كان معاه مين يا حامد ؟؟
حامد بص لتامر كدا عايز يعرف من تعابير وشه يقول ايه لقى تامر بيشاورله بصباعه من تحت لتحت كدا و بيعمله بصباعه( لوحده )
حامد رد ...كان لوحده يا باشا
امممم يعنى ركب من الشارع بتاعهم لوحده لغايه ما انت وصلته الموقف ؟صح؟؟؟
ايوه هو فى حاجه و لامؤاخذه
اه فى .... فى جريمه خطف بنت و الكاميرا جايباكوا يا اولاد الكلب و انتوا بتخطفوها
نخطف مين يا سعادة البيه و الله مالى دعوه بحاجه و لا اعرف حاجه
طب اتكلم و الا هتلبس قضيه معاه دلوقتى حالا
هتكلم .... هتكلم يا باشا
انا فعلا ركبت تامر و معاه بنت صغيره بس انا كنت فاكرها قريبته و عهد الله و بعد ما مشينا شويه ركب معانا جدع تانى كدا و البت كانت عارفاه برده ...و سمعت البت و هى بتقوله تامر هيودينى الدرس يا حماده ...رد و قالها منا عارف و هاجى معاكم انا كمان
و وصلتهم للموقف يا بيه ركبوا من هناك و تامر ادانى خمسين جنيه و قالى مش عاوز حد من أهلى يعرف انى جيت البلد و طبعا انا متكلمتش لان دا شيئ ميخصنيش
الظابط بص لتامر كدا نظرة ان خلاص مبقاش لك عين تنكر ... و قاله احكيلى بقا يا سي تامر على كل حاجه احسن انزلك التخشيبه تحت و اقولهم بس انك خاطف عيله شوف بقا هيعملوا فيك ايه
هتكلم...هتكلم يا باشا بس انا مكنتش فى الحوار دا لوحدى انا كان معايا حماده الديب جارنا
حلو اوى. ... احكيلى بقا من الاول
انا بعد ما اتخانقت مع ابويا رحت لواحد صاحبى قعدت عنده فى الجيزه .. صراحه الجدع قعدنى عنده بس انا مصاريفى كتير و محبتش اتقل عليه كتر خيره أنه فتح لى بيته
و فى يوم و انا قاعد ع القهوه سمعت ناس بتتكلم عن مقبره فرعونيه و كلام كتير كدا مفهمتوش ..بس اللى عرفته منهم أنهم محتاجين دم عيل أو عيله صغيره لسه مبلغوش عشان معرفش يقدموه قربان للجن . و أنهم كانوا نازلين لواحد فى الجيزه بيتاجر فى العيال و لما وصلوا له لقوا البوليس قبض عليه و هما مش عارفين يعملوا ايه دلوقتى ؟؟!!
اول ما سمعت الحوار نطت فى دماغى البت امل اللى ساكنه فوقينا عيله غلبانه فى نفسها كدا غير أن ملهمش حد ... يعنى مقطوعه من شجرة
رحت داخل فى الحوار و قلت لهم طلبكم عندى بس هتدفعوا كام ؟؟
الاول قالوا خمس الاف جنيه و انا قعدت افاصل معاهم و اقولهم أن معايا ناس و كدا ووصلت المبلغ لعشر آلاف جنيه ... ادونى ٢٠٠٠ عربون و الباقى بعد تسليمى للبنت
طبعا انا مكدبتش خبر و اتصلت على حماده و عرفته الحوار و قلت له لك تلات بكاوى بعد ما ننفذ العمليه
قالى آمين يا ابا بس انت عاوز منى ايه بالظبط ؟؟
قلت له تعرف لى البت بتخرج امتى و بترجع امتى ؟ و هل امها بتبقى معاها و الا لا ؟
حماده بقا يراقب البت و يتصل يقولى على كل خطوه البت بتخطيها لغايه ما لقينا البت كل يوم بتروح اخر البلد لوحدها
اتفقت انا و حماده انى اقف استناها على باب الشارع و احاول اضحك عليها بأى حاجه و هو هيستنانى فى مكان بعيد شويه
و فعلا ناديت ع البت بعد ما حماده شافها خارجه من البيت و اتصل على ...
امل ... تعالى يا عروستى أما اقولك
عايز ايه يا تامر
انتى رايحه فين؟
ما انت شايف معايا كتب الدرس هكون رايحه فين يعنى
يا بت بطلى اللماضه اللى انتى فيها دى ... تعالى خدى شيكولاته اهى
الله انا كان نفسي فيها من زمان اوى
طب تعالى يلا اوصلك الدرس انا رايح يمة هناك
لا يا اخويا ماما هتضربنى
يا بت تعالى متخافيش مش احسن ما تمشي دا كله على رجلك و تتعبى و شدتها من أيدها دخلتها التوكتوك و قلت لها انى هجيب لها حلويات كتير فى السكه
البت كانت غلبانه و فرحت اوى بالحاجه و بعد كام شارع قابلت حماده و هى تعرفه كويس طبعا
خدناها و ع الموقف و اول ما وصلنا شممتها منديل فيه بنج كنت جايبه من الصيدليه و شيلتها على كتفى و روحت سلمتها للناس اللى كنت متفق معاهم و اخدت باقى فلوسي ....اديت لحمادة ٣٠٠٠ و قلت له اعرف لى بقا اخبار ام البت و خليك معاها خطوه بخطوه و لو تقدر تتوهها توهها ...و فعلا حماده بقا كل شويه عند ام امل عشان يعرف اى اخبار و هل الحكومه عرفت اى حاجه و الا لأ
لغاية ما جيتوا قبضتوا على يا باشا
و الناس اللى بعت لهم البنت دول تعرف مكانهم ؟؟؟
لا انا معرفش بالظبط بس هما فى بلد فى أول الصعيد تبع سوهاج كدا ... بس معايا رقمهم و الراجل اللى كان متفق معايا اسمه خضر
هات الرقم
تامر أدى الظابط الرقم و عمل اتصالاته و عرف صاحب الخط و عنوانه
و حصل اتصالات بالقسم التابع له الناس دى علشان السرعه بس و فعلا انتقلت قوه الى البيت المذكور ووجدوا حفره بعمق ٢٠ متر داخل أحد غرف المنزل
و لما قبضوا على الناس وواجهوهم بالادله اعترفوا أنهم فعلا اشتروا البنت عشان يقدموها قربان للجن عشان يفتح لهم المقبره و أنهم كانوا طمعانين فى الفلوس الكتير اللى هتجيلهم من ورا الموضوع ده
و لما المباحث سالوهم عن مكان البنت..قالوا ان الشيخ اللى معاهم اخدها تحت فى الحفره و قعد يعزم عليها بكلام مش مفهوم و جاب منديل كبير لونه احمر غطى بيه عنيها و خرج سكينه كبيره حاده جدا و سمى باسم واحد من الجن و فصل رقبتها عن جسمها فى حركه واحده
الدم بقى ينزل على الرصد الموجود تحت فى الحفره لغاية ما اتفتح
بعد كدا شاور لنا الشيخ اننا نشيل جسم و دماغ البنت و نطلع ندفنها فى اى حته
و الاثار اللى لقتوها فين ؟؟؟
لا الشيخ منع أن حد يمد ايده على الحاجه و قالنا لازم نصور الحاجه الاول و هى فى مكانها كدا و نبعت الصور دى بره علشان يقدروا المساخيط دى من الاسره الكام و يقدروا هيدفعوا كام
طب و البنت جثتها فين ؟؟
البنت دفناها فى نص الليل فى المقابر بتاعتنا من غير ما حد ياخد باله
الظابط كمل تحقيقه مع خضر و اخواته و الشيخ اللى كانوا جايبينه و النيابه وجهت لهم تهمه القتل العمد و الخطف و تجارة الآثار .و أدت لكل واحد منهم ١٥ يوم على ذمة التحقيق
طبعا محمد بيه كان متابع التحقيقات بالتليفون و عرف أن البنت ماتت بالفعل و كان صعب عليه اوى ازاى يبلغ والدتها الخبر 😔
محمد بيه استدعى فاطمه .... و كانت زى كل مره عندها امل أنه يكون لقى بنتها ... لكن نظرة الحزن اللى كانت مرسومه على وشه خلتها عرفت اول ما شافته.. و قالت
بنتى ماتت صح ؟؟ بنتى ماتت يا محمد بيه صح ؟؟؟
يا فاطمه انتى ست مؤمنه بالله و هى دلوقتى فى مكان احسن عند ربنا
فاطمه قعدت تصرخ تصرخ و تلطم على وشها و تقطع فى هدومها و تقول بنتى بنتى لأ حرااام حرااااام
منك لله يا تامر انت و حماده ينحرق قلب امهاتكم عليكم زى ما حرقتوا قلبى على بنتى .....يا بنتى ..يا بنتى
و قعدت تصرخ لغاية ما اغمى عليها وودوها المستشفى
حماده و تامر اخدوا ٤ ايام على ذمة التحقيق مع التجديد و نزلوا جلسه لمحاكمتهم بتهمة الخطف و القتل العمد مع سبق الاصرار و الترصد ...
أما فاطمه جالها حاله نفسيه بقت تمشي فى الشوارع تنادى على بنتها ...و لما حد يقولها بنتك ماتت مكنتش تصدق و كانت تقول بنتى عايشه بنتى فى الدرس و جايه بنتى عايشه ...بنتى عايشه ....😢😢
تمت
ارجو ان القصه تكون عجبتكم رغم النهايه الحزينه و لا تنسوا أبى رحمة الله عليه من صالح دعائكم و سائر موتى المسلمين .
#د.جيهان عادل 😊
تعليقات
إرسال تعليق