هاله الجزء الرابع و الاخير

#هاله_قصه_حقيقيه

#الجزء_الرابع_و_الاخير

اول ما سمعنى بقوله كدا نزل فيا ضرب بايديه و برجليه و قلع حزامه و نزل على ضهرى ...و تلطيش بالاقلام على وشى و شد شعرى و جرجرنى على الأرض خرجنى بره الشقه  و قفل الباب😔

 ‏الجيران اتلموا و قومونى و انا سايحه فى دمى من فوق و من تحت ...و اخدونى ودونى المستشفى وفقدت الجنين ووقتها صممت على الطلاق أو انى ابلغ عنه زى الدكتور ما قال 😢

ابويا طبعا رفض و قالى عيشي و خلاص انا ما صدقت خلصت منك ...و مش ناقص الناس تقول دا بنته معمرتش و اطلقت

بس انا صممت و لاول مره فى حياتى اقف قدامه و اصمم على رايى و قلت له 

كفايه كدا ...انا معرفش سر كرهك ليا ...طول عمرك بتعاملنى وحش و بتفضل اخواتى الولاد عليا و بالرغم من كدا كنت بعاملك لله و عمرى ما عصيت لك أمر 

و حتى لما جبت لى الشخص ده معترضتش و لا حتى اخدت رايى زى الشرع ما بيقول لكن انا اسفه يا بابا مش هقدر اسمع كلامك المره دى 

لو مسمعتيش كلامى يبقى انتى لا بنتى و لا اعرفها انا مش هخسر صاحبى عشانك 

و بحذرك لو مرجعتيش بيت جوزك ملكيش مكان عندى مره تانيه 

و مين قالك انى عاوزه ارجع عندك ....انا هتطلق و ده قرارى الاخير ...قول لصاحبك الكلام ده و الا هحبس له ابنه 

بقى كدا يا هاله ؟؟؟ يا زين ما ربيتى يا منال 

الله يرحمها يا بابا عيشتها طول عمرها فى ذل و قهر و انا نويت مكررش غلطتها مره تانيه

واطلقت وصممت اعيش مع جدى وجدتى وقررت اشتغل 

دورت كتير على شغل لحد ما  اشتغلت فى مستشفى خيرى فى قسم التحاليل لانى خريجة علوم زى ما قلت لكم .

كنت سعيده جدا انى استقليت بحياتى و عرفت اخد قرار مهم زى ده ....يمكن من كتر الذل اللى شفته و شافته امى خلانى اكره اعيد التجربه دى مره تانيه ...

و فى يوم شفت طفل حوالى ٣سنوات  شقى جدا ومسبب مشاكل للكل و الممرضات و العمال بيشتكوا منه أنه عفريت 

لما سألت مين ده ؟ قالولى أن باباه دكتور ودى الايام إللى بيكون معاه لانه يتيم الأم وعايش مع جدته  و جدته دى ست كبيره و الدكتور بيحاول يخف الحمل عنها بأنه يجيبه معاه المستشفى .

الولد صعب عليا جدا و ناديت عليه 

تعالى يا حبيبي اسمك ايه ؟؟

أسمى شادى 

الله اسمك حلو اوى يا شادى ...تيجى نلعب سوا ؟؟

نلعب ايه ؟؟؟

نلعب استغمايه انت تتخبى و انا ادور عليك 

الولد فرح اوى و بقا يلعب معايا و كان كل ما يجى المستشفى يسال عليا و اول ما يشوفني يحضنى اوى 

كنت بحس أن قلبى بيحضنه قبل دراعى ...معرفش يمكن بيفكرنى بابنى اللى مات ...هو برده مسكين من غير ام ...و انا اكتر حد يعرف قيمة الام كويس اوى و عشان كدا تعاطفت معاه جدا لانه محروم من نعمه كبيره 

وفى فترة صغيرة كان الطفل ده سبب ان الدكتور ده يتقدم لى .

باباه لما شاف الولد متعلق بيا اوى و سلوكه اتعدل كتير عن الاول لقيته داخل عليا و بيقولى 

ممكن اتكلم معاكى كلمتين يا مدام هاله ؟؟

اتفضل يا دكتور 

بصى انا مبحبش اللف و الدوران ...شادى ابنى يتيم زى ما انتى عارفه و سبحان الله انتى اكتر واحده اتعلق بيها و حبها جدا و سمع كلامها و فعلا اتغير على ايدك

و انا كمان بحبه اوى و الله يا دكتور

طيب أنا سألت عنك و عرفت انك مش متزوجه ...عندك مانع انى اتقدم لك و أطلب ايدك 

ايدى انا ؟؟؟؟ انا ...ازاى ؟ حضرتك دكتور و ممكن تتجوز دكتوره زيك 

و انتى تقلى ايه عن الدكتوره ؟؟ انا ارتحت لك و ابنى كمان بيحبك هعوز ايه اكتر من كدا ؟؟

بس انا يا دكتور مريت بتجربه صعبه اوى و صراحه مكنتش عاوزه ادخل فى تجربه تانيه 

صدقينى يا هاله انا هعوضك عن كل اللى حصلك انا هبقى جوزك و ابوكى و اخوكى انا هبقى سندك و اوعدك انى عمرى ما هزعلك ابدا و لا هتندمى على موافقتك عليا

طب ممكن تسيب لى فرصه افكر 

فكرت كتير اوى و عملت استخاره و شورت جدى و جدتى و هما شجعونى

ووافقت وده كان عوض ربنا ليا على كل الايام الصعبة إللى شفتها

اجمل وارق كلام بسمعه واحن قلب شفته ، بيجيب لى الحاجه قبل ما اطلبها ، بيعاملنى كأنى بنته ساعات الاقيه داخل عليا بشيكولاته و لبان و يبوسنى و يقولى خدى يا حبيبتى دى ليكى وشك حلو عليا .

و بيغير عليا جدا وبيحب يشوفنى مبسوطة...كان دايما يقولى ربنا يقدرنى انى اسعدك 

 سافرنا مدن كتير ورزقنا ربنا بولدين كمان مفرقتش بينهم و بين شادى ابدا.

 ‏ 

والله ساعات بعيط خجل من كرم وعطاء ربنا 

اللهم دمها نعمة واحفظها من الزوال

وانهرده عيد جوازنا ال١٧ بدعيله من كل قلبى ربنا يحفظه لينا ويبارك لنا فى عمره 

وربنا يجبر خاطر كل مكسور ويفرح كل حزين.

رسالتي لكل حزين و لكل بائس خلى أملك فى ربك كبير ...قادر ربنا يغير حالك فى دقيقه واحده ...اوعى تيأس من رحمة ربنا 

ادعى ربنا و اعمل اللى عليك ...مترضاش بالذل و القهر خوفا من كلام الناس ...اعمل اللى يريحك و يمليه عليك ضميرك و تأكد أن الله لا يغير ما بقوم حتى يغيروا ما بأنفسهم.

تمت

ارجو أن تكون القصه نالت اعجابكم و اذا عجبتكم القصه ارجو الدعاء لوالدى رحمة الله عليه و سائر موتى المسلمين

 ‏#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...