#عنبر_خمسه
#الجزء_العشرون_و_الاخير
مكتوب فى المذكرات رحلة سامر لأفريقيا مع ساره و مغامراته اللى لا تعد و لا تحصى
و بعدها رجوعه هو و ساره و دخول اعتدال مره تانيه فى حياته
و ابتدى يحكى ازاى اعتدال كانت متغاظه من ساره و عاوزه تتخلص منها بأى طريقه .البدايه أنها حاولت تجننها أو توحيلها انها بتعمل حاجات غريبه و تقولها جوزك بيشتكى منك
طبعا ساره كانت بتنكر الكلام ده و سامر اتفاجأ بخطة اعتدال فى تدمير ساره و استعانت بعبداللطيف بأنه يكتبلها على حبوب هلوسه مقابل فلوس كتيراوى اعتدال دفعتهاله
و لما سامر واجه اعتدال قالت له أن ده فى مصلحته ..كون ساره مختله دا يديله الحق يكون وصى عليها بعد موت ابوها و ساعتها كل حاجه هتكون تحت ايده
سامر قالها طب و ابوها ده هيموت امتى ؟ دا صحته زى البومب
اعتدال قالت له انها هتتصرف
سامر بيقول أنه ساعتها مفهمش اعتدال هتعمل ايه و لو انى اشك فى كدا لانه كمل كلامه و قالها
ياسلام لو فعلا ساره تورث ابوها و احط ايدى على أمواله و بعد كدا أطلقها و اتجوزك انتى يا حبيبتى
اعتدال صدقت سامر و نفذت خطتها و حطت لزوجها نوع معين من أنواع السموم كانت جايباه من الخارج و فضلت تحط له اجزاء قليله اوى فى الاكل على مدار سنه بحالها لحد ما السم اثر فيه و مات
اول لقاء لسامر باعتدال بعد موت زوجها كان محضر نفسه كويس و كان مجهز أنه يستدرجها و تعترف على نفسها أن هى اللى عملت كدا و دا عشان يساومها تبعد عنه و تسيب له أموال ساره كلها
وبالفعل سامر سجل لها و احتفظ بنسخة التسجيل مع المذكرات تحسبا لأى غدر من اعتدال
لكن للاسف اعتدال كانت اسرع منه و مسبتلوش فرصه و قتلته
الصبح شقشق و انا بقرا المذكرات ....
قمت اخدت دش سريع و نزلت رحت لساره وريتها اللى فى المذكرات و اخدتها و طلعنا على قسم الشرطه
دخلنا على رئيس المباحث ايمن باشا و حكيناله كل حاجه
الظابط قعد يسمع لنا لحد ما خلصنا و بص لنا و قال القضيه دى ممكن متحبسهومش يوم واحد
ازاى حضرتك ؟؟
اولا مذكرات سامر مش دليل أنهم ارتكبوا الجريمه دا شخص متعدد العلاقات و ممكن يكون اى حد قتله
ثانيا حتى اعتراف اعتدال بقتل زوجها مش هيتاخد بيه لانه بدون اذن النيابه ...اى محامى يقدر يطلعها فى ثانيه
ثالثا د.عبداللطيف اللى قولتوا عليه ملوش اى دور واضح فى القضيه مفيش دليل عليه و لا على اللى اسمه شعبان ده
طب و بعدين يا فندم ؟؟ حياتى انا و ساره فى خطر ...اعتدال و عبداللطيف عمرهم ما هيسبونا
الحل يا دكتور انك تسجل لهم اعتراف بس يكون باذن من النيابه غير كدا مش هينفع
و انا هسجل لهم ازاى ؟؟ دا لو شافونى هيقتلونى
انت لازم تلاعبهم
ازاى حضرتك ؟؟
الاول انا هطلع اذن بالتسجيل و مراقبة تليفوناتهم التلاته و انت بقا تتصل على اعتدال الاول و تقولها أن مذكرات سامر معاك و الاعتراف اللى بصوتها و انك عاوز منها مليون جنيه و تذكر لها انك هتاخد الفلوس و مش هتشوف وشك تانى و انك مستعد تسلم ساره للدكتور فى مقابل أنه ميقتلوش
طبعا اعتدال هتوافق و هتتصل فورا بعبداللطيف علشان تفهمه أن انت اتصلت بيه يوافق على عرضك و فى نفس الوقت يكونوا بيدبروا لقتلك
نعم ؟؟؟ قتلى ؟؟
متخافش احنا هنكون مراقبين كل حاجه و هنسجل كل حاجه
ربنا يستر سعادتك
و نفذنا الخطه ووافق الدكتور انى اروح اسلمه ساره فى المستشفى و اقدم على اجازه بعدها اطلع على المطار اقابل اعتدال هناك اسلمها المذكرات و التسجيل و تسلمنى الفلوس..
و فعلا روحت قابلته بعد يومين و معايا ساره
اول ما دخلت بيها ضحك لى ضحكه صفرا و قال اخيرا ...الدكتور العبقرى اللى جاب التايهه و كشف اللغز الخطير اتفضل و حن علينا و رجع لنا
انت بتتريق عليا و الا ايه يا دكتور ؟؟
لا ابدا بالعكس دا انا فخور بيك ...انت كدا مهمتك انتهت و اظن انت رايح المطار تقابل اعتدال هناك صح ؟؟
ايوه
طب انا هريحك و اجيب لك اعتدال لحد عندك
رن الدكتور الجرس لقيت اعتدال دخلت و معاها شعبان وواحد كمان
فين المذكرات يا دكتور ؟؟
هو انتى فاكرانى اهبل مجبتهومش معايا طبعا
مش مهم
هو ايه اللى مش مهم ؟؟
مش مهم تجيبهم لانك خلاص هتموت
ايه دا ؟ دا مش اتفاقنا
نطق عبداللطيف و قال
هو انا مقلتلكش ؟؟؟؟ مش المريضه النفسيه اللى انت بتعالجها قامت عليك خنقتك بملايه السرير و موتتك زى ما موتت جوزها ؟
بس ساره مقتلتش جوزها ...انتوا التلاته اللى قتلتوه و تهمتوها فيه
برافو عليك مش بقولك نبيه ؟ ايوه احنا اللى قتلناه و هنقتلك و نقتلها هى كمان و مش هناخد فيكم نص ساعه سجن
اه يا مجرمين ...يا اولاد الكلب
هنا هجم عليا شعبان و خبطنى على راسي بعصايه غليظه زى بتاعه الفتوات بتوع زمان
محستش بنفسي ...الدنيا اسودت و فقدت الوعى
قمت لقيت نفسي مربوط انا و ساره فى عنبر خمسه و لقيتها تقريبا مخدرينها
قعدت احاول افك نفسي و انادى على ساره من بعيد
مفيش دقيقه و لقيت شعبان داخل عليا و ملايه سرير فى ايده
و الله هنوحشنا يا دكتور
بس يا قذر اخرس
ها ها ها ...مش عاوز حاجه قبل ما تموت و يتم التمثيل بجثتك ؟؟؟
عاوز اقتلك
للاسف مش هتلحق ....اه صحيح كنت عاوز تعرف مين اللى كان بيغتصب الست ساره بتاعتك ؟؟؟؟ حذر فزر ....اكيد عرفت دلوقتى ههههههههه ههههههههه ههههههههه
اه يا حيوان يا قذر
بتشتمنى و انا اللى هخلصك من الدنيا و بلاويها؟؟؟ ....يا خساره
شعبان لف الملايه و برمها بقت تشبه الحبل و لسه بيقرب عليا عشان يخنقنى لحقنى ايمن باشا رئيس المباحث
و قبض على شعبان و عبداللطيف و اعتدال
عسكرى من العساكر فكنى و قمت بسرعه افوق ساره كنت خايف للمجرمين دول يكونوا قتلوها
اتحاكم التلاته بتهم القتل و الشروع فى قتلى انا و ساره و اخدوا حكم بالاعدام شنقا
اما ساره فتعافت تماما بعد ما عالجتها و سلمتها الالماظ بتاعها و استلمت ميراثها من زوجها و ابوها
و فات على الموضوع ده سنتين دلوقتى و انهارده فرحى على اجمل و ارق ساره فى الكون مفيش مبروك ؟
تمت .
انا عاوزه اقول ان السبب فى حكايه ساره دى و حكايات كتير بنعيشها الطمع ...الطمع ممكن يؤدى إلى ابشع الجرايم زى ما شفنا
و زمان كانوا بيعلمونا جمله الطمع يقل ما جمع
محدش هياخد حاجه معاه ...كلنا هنروح فى كفن من غير جيوب ...معاك مليون معاك عشره ممعكش شئ كلنا هنتساوى فى النهايه و هنروح لربنا بعملنا و بس مش هناخد اى شئ تانى
ارجو أن القصه تكون نالت اعجابكم و اذا عجبتكم القصه ارجو الدعاء لوالدى رحمة الله عليه بالرحمه و سائر موتى المسلمين
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب
جميله جدا شابوه ليكي والله 👏👏👏
ردحذفالله جميلة اوى ونهاية عادلة 👌👏😍
ردحذف