#تيتى
#الجزء_الحادى_عشر
انتظرت تيتى تهامى على احر من الجمر إلى أن لمحته خارجا من المحل
عاد اليها وهو يرسم على وجهه نظرة حزن
عملت ايه يا تهامى؟
معملتش ..الراجل متربس و بيقول ملكيش عنده اى حاجه ...و بيقولك روحى اشتكيه لو عندك شهود
شهود ايه بس ؟ دى كانت حكايه بينى و بينه بس
متعرفهاش الا البت فايزه بحكم انها معايا فى كل خطوه
و الله انا معرفش ...بس الراجل مستحلف لك و بيقول لو شافك مره تانيه هيخلى رجالته يموتوكى .... هو انتى صحيح كنتى هتموتيه ؟
ايوه صحيح بس انا محستش بنفسي إلا و ايدى ماسكه فى رقبته و لو شفته تانى هقتله بصحيح
لا لا أهدى بقا مينفعش الكلام ده ...شويه كدا و اصالحكم على بعض
و لا عايزه اصالحه و لا اشوف وشه ..انا عاوزه فلوسي و بس
لا دى تنسيها خالص ...ابو سريع عمره ما هيطلعلك جنيه من جيبه و يديهولك خاصه بعد اللى عملتيه فيه
منه لله ...دا انا ضحيت بكل حاجه عشان الفلوس دى ...دا انا خسرت نفسي و شرفى عشان خاطر عمليه ابنى و أنه يرجع يشوف تانى
معلش يا تيتى انا هشوفلك شغل احسن من ده بكتير ...شغل الشقق و خاصةمع الاجانب بيكسب دهب
لا متشكره كفايه لحد كدا انا معنتش اشتغل لحساب حد و لا عنت آآمن لحد
انتى بتقولى ايه ؟؟ حتى انا ؟ لا كدا ازعل منك
ما انت كنت شغال معايا و مفهمنى أن محدش يقدر يقرب لى و عند أول موقف معرفتش تجيب لى حقى
و هو انتى كنتى مرسيانى على الحوار ؟ و الا عملتى كدا من ورايا ؟
خلاص يا تهامى انا تعبانه و عاوزه اروح
طيب انا هسيبك دلوقتى ..بس لسه الكلام مخلصش
عادت تيتى إلى حجرتها و الالم يعتصر قلبها ...سألها كريم
جبتى الفلوس يا ماما عشان العمليه ؟
لأ لسه يا كريم ...معلش الفلوس طلعت أقل و انا مخدتش بالى ...لسه هشتغل شويه كمان عشان اجمع باقى حق العمليه
معلش يا ماما انتى بتتعبى اوى عشانى
يا حبيبي أن مكنتش اتعب عشانك هتعب عشان مين ؟
ألقت تيتى جسدها على السرير ...حاولت البكاء بصمت حتى لا يشعر كريم بها
فى اليوم التالى ظلت تيتى على سريرها لم تفارقه ...لم تأكل شئ منذ الليله الماضيه ...لا تفعل شئ سوا انها تدخن لفائف التبغ
فى المساء دق باب تيتى
ادخل
دلفت إلى داخل غرفة تيتى صديقه تيتى فى العمل و المسكن
ايه يا بنتى الدخان دا كله ؟ شربتى السجائر دى كلها ؟ كويس إن ابنك قاعد بره ... قومى كدا يلا ... ايه هتدنك طول النهار نايمه ؟
مليش نفس اقوم يا برقوقه ....انتى عرفتى اللى حصل ؟
ايوه عرفت دا محدش له سيره فى النادى الا السيره دى
انا مش عارفه ابو سريع عمل كدا ليه ؟
ما انتى طيبه و هبله ...تهامى يا حلوة اللى محرضه
انتى بتقولى ايه يا برقوقه ؟ و تهامى غرضه ايه من كدا ؟
الا غرضه ...هو انتى بعد ما كنتى هتعملى العمليه لابنك كنتى هتعملى ايه ؟؟
انا كنت بقول يارب لو شفيت لى ابنى هتوب عن كل اللى بعمله دا و ادور على شغله نضيفه اكل منها انا و ابنى
ايوه و قلتى الكلام ده لمين ؟؟
قلته لفايزه
اهى فايزه بقا راحت قالت لتهامى و قالت له على الفلوس اللى بتحوشيها مع ابو سريع ...قام تهامى راحله و قالوا إنك لو اخدتى الفلوس هتطيرى من ايده
طب و هيستفيد ايه من كدا ؟
اللى عرفناه أنه قسم الفلوس هو و ابو سريع طبعا مش بالنص ...بس خد ٥٠ الف منه و راح اداهم للبت تونه اللى بيحبها و هى اللى رستنا على الحكايه كلها . كمان هو بيستفيد منك و لما تتوبى هتقطعى سبوبه حلوه بالنسباله
هبت تيتى من مكانها واقفه
يا ابن الكلب يا تهامى يا ابن الكلب ...و دينى لاقتلك
اوعى تقربى منه ...انتى فاهمه ؟ تهامى ده مجرم عارفه يعنى ايه مجرم ...دا مش بعيد يرمى على وشك مية نار زى ما عمل فى البت فيفي
مين فيفى و ليه رمى عليها مية نار ؟؟
دى واحده كانت شغاله معاه زيك كدا و حبت تسيبه و تروح تشتغل فى حتة تانيه بس هو مرضيش و لما يئس منها ...قال مدام مش هتشتغلى معايا يبقى مش هتشتغلى مع غيرى و خلاها مروحه فى يوم و رمى على وشها مية نار ...
طب و الشرطه ؟
شرطة مين يا حبيبتى ؟ اتقبض عليه خد سنتين سجن و طلع بنص المده و لا كأنه عمل حاجه ...و بعدين يا حبيبتى انتى متعرفيش ممكن يعمل فيكى ايه ...دا ممكن يخطف ابنك عشان يخليكى ترضى تشتغلى معاه تانى
ايه ابنى لا ...الا ابنى ...
يا حبيبتى انا بوعيكى و خلاص اوعى تقفى قدام ابو سريع أو تهامى الاتنين مجرمين و ممكن يعملوا فيكى اللى متتخيلهوش ...انا همشي بقا عشان الحق الشغل
ذهبت برقوقه و تركت تيتى فى دوامه و خوف شديد على ولدها
برقوقه عندها حق ...تهامى ممكن يخطف ابنى و يحرق قلبى عليه ...انا لازم امشي من هنا و ابعد خالص عن ابوسريع و تهامى
هبت تيتى واقفه ... احضرت حقيبه جمعت فيها ملابسها و ملابس كريم
يلا يا كريم يا حبيبي
على فين يا ماما ؟
تعالى بس هنروح مشوار سوا
طب استنى يا ماما انا كنت بسمع الراديو بيذيعوا حدوته حلوه اوى
مفيش وقت يا كريم هبقى اجيب لك راديو صغير يكون بتاعك انت لوحدك
بجد يا ماما ؟
بجد يا روح ماما ...بس يلا بسرعه لسه قدامنا كذا مشوار
نزلت تيتى إلى الشارع مره اخرى بسبب تهامى ابتعدت عن المكان بقدر ما تستطيع ..
بحثت عن غرفه تلائم إمكانياتها الماديه إلى أن وجدت حجره صغيره فوق سطوح بيت تفى بالغرض
الغرفه بها سرير و بعض الاشياء القليله التى قد تساعدها على الاقامه بها
جلست تيتى تفكر ماذا ستفعل ؟ و كيف ستدبر نقود عمليه كريم من جديد ؟
انا لازم اشتغل زى ما انا ...بس لحسابى و اجمع كل قرش عشان العمليه
و فى أول خروج لها بالشارع بمفردها قابلت ماجد و حدث ما حدث ....
أفاقت تيتى على صوت كريم
انتى نمتى يا ماما ؟
ايوه يا كريم نمت ...عاوز حاجه ؟
لا كنت عاوز اسالك هو انتى هتنزلى الشغل انهارده تانى ؟
اه ممكن يا كريم ...ايه هو انت خفت لما نمت لوحدك ؟
لأ يا ماما انا راجل و مبخفش
اسم الله عليك يا حبيبي ربنا يحفظك لى يارب
يتبع......
#قصص_وحكايات_د_جيهان_عادل
#تيتى
#الجزء_الثانى_عشر
ليس من بيننا من هو معصوم من الخطأ ، لا تستعظم ذنب أحد حتى لا تقع بالذنب
فى المساء تلقت تيتى اتصالا من رقم غريب
الو
الو ايوا يا تيتى انا ماجد انا خلصت شغل و مستعد اجى افوت عليكى دلوقتى
اهلا يا باشا كنت بقول انك نستنى
لا ازاى ؟ انا لسه مخلص شغل حالا ...حتى متغدتش لغايه دلوقتى و مستنى نتعشى سوا
طيب قدامك اد ايه على ما توصل ؟
قدامى حوالى نص ساعه
طب حلو اوى هكون لبست و عشيت كريم
أغلقت تيتى الهاتف و احضرت الطعام لكريم
انا عاوزاك تاكل كويس يا كريم عشان تاخد الدوا ...انا هلبس دلوقتى و انزل الشغل
مين اللى كان بيكلمك ده يا ماما ؟
دا .... صاحب الشغل يا حبيبي ...مالك يا كريم انت زعلان انى هنزل انهارده تانى؟
لا يا ماما ...انا مش زعلان من كدا
اومال مالك يا حبيبي ؟ ايه مضايقك ؟
كان نفسي يكون لى اب ..كنت أتمنى أنه ياخدنى يخرجنى امسك ايده و يجيب لى كل اللى اتمناه
اخص عليك يا كريم هو انا حرماك من حاجه ؟
لا يا ماما بس انا محتاج ابويا اوى ...انا صحيح مبشوفش بس كان نفسي احس بوجوده ...كان نفسي احس بحضنه و حنيته
ابوك الله يرحمه كان حنين اوى يا كريم
الله يرحمه يا ماما ..بس كان نفسي اشوفه ...هو انتى معاكى صوره لبابا يا ماما ؟
لأ للاسف ممعيش
يا خساره كان نفسي اشوفه لما اعمل العمليه و ارجع اشوف مره تانيه
هبقى ادور لك على صوره يا كريم
هو بابا مات ازاى يا ماما ؟
بابا ...مات....مات فى حادثه انت مالك أسئلتك كتير ليه انهارده ؟ يلا أن كنت خلصت اكل خد الدوا
حاضر يا ماما
انا هنزل دلوقتى و هرجع الصبح أن شاء الله
هتباتى تانى يا ماما ؟؟
ايوا يا كريم الشغل اللى انا رايحاه شغل كويس و صاحب الشغل بيدينى فلوس اكتر
صحيح يا ماما هو احنا ليه سبنا سكننا القديم و جينا هنا
انت لكاك اوى الليله يا كريم ...يلا يلا انا اتاخرت
تصبح على خير
و انتى من اهل الخير يا ماما
نزلت تيتى السلم تكاد عيناها تنفجر بالدموع
مساء الخير يا ماجد باشا
مساء الفل يا تيتى
هنروح على فين ؟؟؟
المكان اللى تحبيه ...بصى ايه رايك هاخدك اعشيكى فى مطعم حلو اوى فى وسط البلد
لا مش عاوزه اروح وسط البلد ...مش عاوزه
طب أهدى اهدى مالك ؟ طب خلاص هاخدك و نروح مطعم فى المقطم مبسوطه كدا يا ستى ؟
ايوه مبسوطه
طب يلا بينا
انطلق ماجد حيث المطعم المقصود
طلب الطعام و جلسوا ينتظروا
انتى مالك كدا ؟ انا شايفك من اول ما نزلنا و انتى مش طبيعيه ...انتى زعلانه من حاجه ؟
لا مفيش حاجه يا ماجد باشا ...انا مش عاوزه اشيلك همى
انتى عارفه يا تيتى انا بعمل المغامرات اللى زى دى ليه ؟
و الله كنت عاوزه اسالك السؤال ده بس اتحرجت يا باشا
زمانك بتقولى باشا كبير زى ده ايه يجبره يعمل كدا ؟ صح ؟؟
ايوه صحيح دا انت ممكن تتجوز ست البنات
منا كنت متجوز يا تيتى ..
الله امال راحت فين؟
طلقتها
ممكن اسال ليه يا باشا ؟
دى حكايه طويله يا تيتى
طب ما تقولهالى احنا ورانا ايه يعنى ؟
طيب بعد ما نتعشي هحكى لكى كل حاجه
بعد دقائق وضع العشاء ...التهمت تيتى الطعام بشهيه كبيره ... كان ماجد يراقبها و يبتسم فهى تاكل كطفل صغير غير عابئه بمن حولها ...لا تراعى اتيكيت و لا حركات متكلفه
انتهى العشاء ....خرج ماجد و تيتى من المطعم ....ركبا السياره و انطلقوا إلى أن وصلوا إلى كورنيش النيل
تعالى نركن العربيه هنا و ننزل نتمشي على الكورنيش شويه يا تيتى
ايه ده احنا هنعمل زى الطلبه يا ماجد باشا ؟
تصدقى انى عمرى ما مشيت مع بنت كدا على النيل و لا عمرى خرجت مع حد اصلا ...انا طول عمرى كنت جد اوى فى حياتى ....مكنش لى علاقات كتير و خاصة بالبنات
ياااا امال اتجوزت ازاى ؟
لا جوازى ده كان وراه حكايه كدا
احب اسمعها
انا لما فكرت فى الجواز كان كل همى انى اناسب عيله كبيره و بس ...
قلت عيله الزوجه برده لازم تكون حاجه تشرف ...و كل ما كانت العيله كبيره و فيها مراكز كبيره دا هينفعنى فى البزنس بتاعى
شفت طليقتى سلوى اول مره فى فرح كان لحد من اصحابى كانت بدر منور ...لابسه فستان شيك اوى ...مفيش حد بلا استثناء إلا و كان بيبص عليها
لفتت انتباهى جدا و سألت عليها و عرفت هى بنت مين
ابوها كان صاحب اكبر شركه استيراد و تصدير ...عيلتها كلها مناصب لواءات شرطه و وزره سابقين
كانت اصل و جمال ...
دخلت البيت من بابه لانى مليش فى اللف و الدوران
و طبعا ابوها طلب طلبات خياليه و هى صراحه بمستواها ده و بجمالها كانت تستاهل
طبعا اشتريت لها فيلا فخمه جدا ...الاثاث كله من ايطاليا
جبت لها شبكه الماظ بمبلغ و قدره ...عملت فرح فى افخم فندق فى مصر ...كانت كل البلد بتحكى عنه
كنت متخيل انى هعيش السعاده اللى معشتهاش ...انا طول عمرى وحيد ..... والدى ووالدتى مخلفوش غيرى ...والدتى اتوفت و انا فى الثانويه و بعدها بعشر سنين مات والدى .....مسكت الشغل بعده و حاولت اكبر شركه والدى و عملت مجموعه من الشركات و بقيت اصغر رجل أعمال فى مصر بالقوه دى
و زى ما نجحت فى شغلى كنت اتمنى انى انجح فى تكوين عيله.... و كنت فاكر أن سلوى هتكون كل عيلتى اللى بحلم بيها ...لكن للاسف مفيش حاجه من دى اتحققت
ليه يا باشا ؟؟ ايه اللى حصل ؟
يتبع......
#قصص_وحكايات_د_جيهان_عادل
#تيتى
#الجزء_الثالث_عشر
بعد انتهاء العشاء ذهب ماجد و تيتى ليمشوا على كورنيش النيل و بدأ ماجد يحكى لتيتى عن زوجته السابقه سلوى
حيث قال :
و زى ما نجحت فى شغلى كنت اتمنى انى انجح فى تكوين عيله.... و كنت فاكر أن سلوى هتكون كل عيلتى اللى بحلم بيها ...لكن للاسف مفيش حاجه من دى اتحققت
ليه يا باشا ؟؟ ايه اللى حصل ؟
اللى حصل انى اخترت على أساس المظهر اكتر من الجوهر
ست فاضيه تافهه مدلعه جدا عمر ما همها شغلى و لا همها زعلى ...كل همها أصحابها و شلة النادى ... رحلات مع اصحابها
كنت لما اعترض بس على اى شئ زى خروجها المتكرر و سهرها كانت تقوم الدنيا فوق راسي و تروح تشتكى لأهلها و كانت تسيب البيت و تروح لأهلها ساعات بدون اى سبب
معظم اكلنا كان من بره أو تخلى الخدامين يعملوه
كنت بتمنى ارجع الاقيها عاملالى اكل و تقولى عملته عشانك ... كنت نفسي احس باهتمامها لى و حبها و خوفها على
بالعكس كنت ساعات اشوف فى عنيها نظره ماديه بحته ...هى مش محتاجه منى اى حاجه لأنها معاها الفيزا اللى عملتها لها و هى بتصرف زى ما هى عاوزه و الفواتير ساعات الاقيها جايه لى على الشركه
كل ده مكنش مشكله بالنسبالي اد ما كان ناقصنى الاحتواء الاهتمام
طب ما تكلمتش معاها ليه يا باشا ؟
اتكلمت كتير جدا بس هى كانت مغروره و متغطرسه و مبتقبلش كلمه من حد
طب و بعدين ؟ ايه كان سبب الطلاق ؟
سبب الطلاق انها اجهضت نفسها لما عرفت انها حامل
طب و انت عرفت ازاى ؟ ما يمكن انت ظالمها ؟
لا انا هقولك انا عرفت ازاى هى مخبتش و اعترفت عادى جدا
انا من اول جوازنا و انا نفسي فى اسره زى ما قلت لكى و كنت بتمنى انى اخلف عدد كبير من الأطفال عشان يكونوا عزوه و قوه لى و امتداد لاسمى ...كنت دايما اقولها انى نفسي تجبيلى اطفال كتير و كان دايما ردها لا لا مش دلوقتى انا لسه صغيره انت عاوز جسمى يبوظ
و جسمك هيبوظ ليه يا سلوى ؟
هو انت متعرفش أن الحمل و الولاده بيبوظوا شكل البنت
طب و ماله انا موافق و راضى بيكى على اى وضع
و انت مالك انت اهم شئ اكون أنا اللى راضيه عن شكلى
انتى بتقولى ايه ؟؟ هو انا مليش اعتبار أو خاطر عندك خالص ؟
اعتبار ايه و خاطر ايه اللى بتتكلم عليه ده بلاش و النبى شغل المسلسلات ده
مسلسلات ؟ الله يسامحك ...هو انتى بتحبينى يا سلوى ؟
ههههههههه مش بقولك انت بتتفرج على مسلسلات كتير ...بقولك ايه انا مش فاضيه عندى تمرين فى النادى سلام
كنت الاقى حبوب منع الحمل عندها فى دولابها و اتخانقت معاها كذا مره و برده مفيش فايده
لحد ما جت من عند ربنا و حملت على الحبوب
رجعت البيت لقيتها قاعده فى سريرها على غير العادى و قاعده تعيط
فى ايه مالك يا سلوى ؟ انتى تعبانه و الا ايه ؟
مفيش حاجه
لا أصل مش عادتك تقعدى كدا يعنى ؟
قلت لك مفيش حاجه
طب خلاص انا اسف
قمت اغير هدومى و دخلت الحمام ...سمعتها بتكلم واحده صاحبتها فى التليفون و بتقولها ...
انا مش عارفه الحمل ده حصل ازاى ؟ انا باخد الحبوب بانتظام ...انا لازم اتخلص من الحمل ده
و تقريبا كدا صاحبتها دى كانت بتقولها حرام عليكى و هى كانت بترد و تقول
لأ مش حرام و لا حاجه ...الحرام انى ادهول نفسي بالعيال فى السن ده و اخسر جمال جسمى اللى الكل بيشهدوا بيه
انا خلاص حجزت عند دكتور و هروح عشان الاقى حل للمصيبه دى
قفلت السكه و انا واقف فى الحمام مش مصدق نفسي معقول ؟ معقول دى انسانه و لها قلب عايزه تقتل ابنها عشان منظرها ؟؟ معقول دى بنى ادمه طبيعيه ؟ كل ست فى الدنيا بتحلم باليوم اللى تتجوز فيه عشان تخلف و تكون أم ...دا دى غريزه
خرجت من الحمام و انا شايط ....
اللى سمعته دا حقيقى. ؟
سمعت ايه ؟
انتى حامل و عايزه تسقطى نفسك ؟
و انت مالك دى حاجه متخصكش
أما انا مليش دعوه ...اومال مال مين ؟ انتى اتجننتى و الا ايه ؟
انا اتجننت؟ انت ازاى تقول كدا ؟
انا اقول زى ما انا عاوز و ابنى مش هسمح لك تقتليه
انت مين عشان تسمح و الا متسمحش ...فوق لنفسك انت لولا علاقات ابويا مكنتش وصلت للى انت فيه ده
لا يا حبيبتى انا كبير من قبل ما اشوف وشك أو وش ابوكى
انت ازاى تتكلم على و على بابى بالشكل ده ؟طب و الله منا قاعده لك فى البيت
لا منا مش هسيبك تخرجى زى كل مره ...المره دى معاكى ابنى ...مش هتخرجى من هنا الا اما تولدى و تدينى ابنى و بعد كدا لو عاوزه تمشي اتفضلى
انت اتجننت اكيد ...انت عاوز تحبسنى ؟؟ دا انا اهد الدنيا فوق دماغك
اتكلمى على ادك يا ماما ...انتى لسه مشوفتيش منى الوش التانى ....هاتى الموبيل ده من ايدك
اخدت منها الموبيل عشان متتصلش على حد من أهلها و قفلت عليها باب الاوضه و كلفت اتنين من حراس الفيلا بالوقوف قدام الباب ....و خليت خدامه مخصوص تدخلها الاكل و الشرب
كان كل هدفى انها تدخل فى شهور الحمل عشان بعد كدا الحمل يكون ثبت و يبقى من الصعب اجهاضه
قفلت موبايلها و لما ابوها كلمنى يسأل عليها قلت لها انها سافرت فرنسا تعمل شوبنج ...و طبعا ابوها كان متعود على حركات كتير من ده عادى جدا ...و هو اصلا كان مشغول مسالش عليها فى الشهر اللى حبستها فيه غير مره
طبعا فى الاول بقت تصرخ و تكسر فى الاوضه و كانت كل ما تكسر حاجه او تبهدل حاجه كنت اخلى الخدامين يغيروها و يجيبوا غيرها
بعد كدا دخلت فى حاله حزن و بكا و قطعت الاكل
دخلت عليها و قلت لها الوضع ده مينفعش يا بنت الحلال..انتى لازم تاكلى عشان خاطر ابننا أو بنتنا
بصت لى كدا و سكتت شويه و قالت خلاص انا موافقه موافقه على ايه ؟
موافقه انى اكمل الحمل بس بشرط
اشرطى زى ما انتى عاوزه
تكتب لى الفيلا باسمى
و انا موافق ...اول ما تولدى هكتبها باسمك
لا انا عاوزك تكتبهالى بكرا بيع و شرا
حاضر يا ستى
و تسيبنى أخرج متحبسنيش
هو انا غاوى احبسك يعنى ؟ انا عملت كدا عشان بس متجهضيش نفسك ... بس طبعا مفيش تنطيط زى الاول
ماشي انا موافقه ...بس بعد كدا متقولش انك عاوز تخلف تانى
بصى مش هنتكلم فى الموضوع ده دلوقتى ...بكرا لما تخلفى و تبقى ام انتى بنفسك هتبقى عاوزه تخلفى تانى
قومى يلا خدى دش و غيرى هدومك عشان نخرج نتعشا بره
حاضر هقوم
رحنا خرجنا و جبت لها هديه كمان و عدت الليله بسلام و كنت فاهم انها خلاص رضيت بالأمر الواقع
تانى يوم اخدتها و رحت سجلت لها الفيلا بكل محتوياتها و كانت فرحانه جدا
انا كمان كنت فرحان اوى لفرحها و سبتها فى البيت و روحت اخلص شويه حاجات فى الشغل
لما رجعت ملقتش عربيتها واقفه في الجراش
دخلت أسأل عليها لقيت الخدامين بيقولوا انها مشيت على طول بعد ما وصلتها
دا كله و انا مش واخد اى خوانه و قلت اكيد راحت النادى لصحابها
رنيت على تليفونها لقيته مقفول ...اتجننت ...ركبت عربيتى و رحت على النادى ملقتهاش هناك و كلهم قالوا بقالها شهر مجتش
قلت اكيد عند اهلها ...اخدت عربيتى و رحت على بيت اهلها و سألت عليها ملقتهاش برده
و لقيت ابوها بيقولى مش انت قلت انها فى فرنسا
قلت ايوه بس هى رجعت من يومين ....خلاص يا عمى انا هرجع البيت زمانها رجعت
طيب يا ابنى اول ما توصل طمنى
حاضر يا عمى
و رجعت البيت و قعدت على نار ...لحد ما جالى تليفون من حمايا
بقا كدا يا سي ماجد ؟ حابس البت و بتقول فى فرنسا ...و الله لأربيك و أعلمك اللى اهلك معلمهوش لك
يتبع......
#قصص_وحكايات_د_جيهان_عادل
#تيتى
#الجزء_الرابع_عشر
و رجعت البيت و قعدت على نار ...لحد ما جالى تليفون من حمايا
بقا كدا يا سي ماجد ؟ حابس البت و بتقول فى فرنسا ...و الله لأربيك و أعلمك اللى اهلك معلمهوش لك
اسمعنى بس يا عمى
اسمع ايه و زفت ايه ؟ انا هوريك يا ماجد عشان تبقى تعمل فى بنات الناس كدا
و قفل السكه فى وشي من غير ما يدينى فرصه ادافع عن نفسي او اشرح له سبب اللى عملته ده
طبعا قعدت بعدها كام يوم مش عارف اتصرف ازاى ؟...الراجل ده له معارف كتير و ممكن يضرنى فعلا
بعد اسبوع من الكلام ده اتصلت علي حماتى و اخدت منها ميعاد عشان نسوى الموضوع
اول ما دخلت لقيت حمايا و حماتى و عم مراتى سيادة اللوا و خال مراتى سيادة العميد ...قلت بس انا وقعت و لا حدش سمى على
حمايا قاعد منفوخ على آخره و مبينطقش و لقيت حماتى بتتكلم
ايه اللى انت عملته دا يا ماجد ؟ ازاى تحبس سلوى و توقف عليها كلابك كأنها مجرمه ... دى الامانه اللى أمناك عليها ؟
اسمعينى بس مش تفهمى انا عملت كدا ليه
رد خالها... اى كان اللى عملته دا ميدكش الحق تعمل فيها كدا
رد عمها ..هى مش لها أهل يا ابنى انت ؟
يا فندم اسمعونى بس...طب بعد اذنكم ممكن تنادوا سلوى تحضر القاعده دى
سلوى تعبانه من اللى عملتوا فيها
انا معملتش فيها حاجه انتوا مش فاهمين
لأ احنا فاهمين كويس اوى ..اما انت مش اد الجواز بتتجوز بنات الناس ليه ؟
هنا رد حمايا ...انت تطلقها و تحمد ربنا انى مقتلتكش زى ما قتلت ابن بنتى
استنى استنى ابن بنتك مين اللى انا قتلته ؟ ابنى جراله ايه ؟ ابنى مات ؟
يا سلام على البراءه ...اما انت مش عاوز خلفه بتتجوز ليه ؟
هو مين اللى مش عاوز خلفه انتوا فاهمين ايه ؟؟ انتوا فاهمين غلط ...سلوى لازم تيجى قدامكم دلوقتى و تقول لكم الحقيقه ....يا سلوى يا سلوى
يا بجاحتك يا اخى ...طب انا هناديهالك تكسفك قدام الكل
يا سلوى
نعم يا بابا
تعالى يا بنتى
حاضر يا بابا
نزلت الست هانم و هى ماسكه بطنها و كأنها ملاك نازل من السما ...البراءه بتشع منها
احكي يا بنتى اللى حصل قدام عمك و خالك و حبسك ليه الاستاذ ده ؟
انا يا بابا من اول ما اتجوزت و انا نفسي اخلف ...و هو كان غاصب على اخد حبوب منع الحمل
انتى بتقولى ايه ؟؟.دا عكس الحقيقه خالص ...انتى كدابه
لو سمحت متتكلمش و خليها تقول كل اللى عندها ... كملى يا سلوى
كان كل يوم يأكد على انى اخد الحبوب و لما كنت اساله ليه بيعمل كدا ؟ كان يقول اصل العيال هتشغلنا دلوقتى ...لازم ندى لنفسنا سنتين و الا تلاته نستمتع فيهم
و كانت بتحصل خلافات كتير بينا و مكنتش برضى احكيلكم كان عندى امل أنه يتغير
لغايه ما جاتلى فكره انى اعمل نفسي باخد الحبوب قدامه و احطها تحت لسانى و بعد كدا ارميها من غير ما ياخد باله ...و فعلا عملت كدا و كنت بقول لما احمل هحطه قدام الأمر الواقع و ساعتها مش هيقدر يعترض
كدابه و الله العظيم كدابه
قلت لك اسكت من فضلك و سيبها تكمل كلامها و عيب كدا تشتمها و احنا قاعدين قدامك
ما هى بتكدب و الله العظيم بتكدب
كملى يا سلوى
المهم حملت و لما عملت اختبار الحمل كنت فرحانه اوى و كنت فاكراه هيفرح زيى ...قابلته و انا طايره من الفرحه و قلت له خلاص يا مودا هتبقى اب
لقيته ثار جدا و قالى ازاى حصل كدا ؟
قلت له أمر ربنا ..انت هتعترض ؟
راح جايبنى من شعرى و قالى الحمل ده لازم ينزل حالا
قلت لا مش ممكن دا يحصل
المهم حبسنى و اخد موبايلى و بقا كل يوم يسم فى بدنى بالكلام و يقولى لازم تيجى معايا عند دكتور ننزل البيبي ده و لما كنت ابكى و أقوله ودينى عند اهلى و سبنى فى حالى كان يقولى لا ..اهلك مين ؟ انتى مش هتخرجى من هنا الا اما تعملى اللى انا عاوزه
قطعت الاكل و هو خاف يحصلى حاجه لقيته داخل على و فى ايده عقد للفيلا باسمى و بيقولى يا حبيبتى ربنا يهديكى شوفى انا بحبك ازاى و كتبت الفيلا باسمك ...اسمعى كلامى بقا
قلت له ياااا كتبت الفيلا دى كلها باسمى عشان متخلفش منى ؟؟ انت عارف انا بقى اللى مش عاوزه الحمل ده دلوقتى
فرح اوى و قالى طيب انا هتصل على الدكتور نروح ننزله
و فعلا روحت معاه و الدكتور عمل لى العمليه و للاسف جالى نزيف و كانت حالتى صعبه ...الدكتور طلع يقوله ...خاف ليحصلى حاجه ساب الدكتور و جرى و جالكم هنا عشان يسبك عليكم الدور و يفهمكم أنه ميعرفش مكانى ...و انا لما فقت الدكتور قالى هو مين اللى كان معاكى ده يا مدام ؟
قلت له دا جوزى .
قال دا طلع يجرى اول ما قلت له أن جالك نزيف و لو استمر النزيف ممكن تدخلى فى غيبوبه
ساعتها كرهته اكتر و لا يمكن افضل على ذمته يوم واحد كمان ...دا كان السبب فى موت ابنى و كان هيموتنى انا كمان
انتى اكيد مجنونه ....انتى بتكدبى كدا ازاى ؟؟ انا مش مصدق نفسي انك بالبجاحه دى ؟؟
انا بكدب الله يسامحك ...طب اهو يا عمى عقد الفيلا اللى كتبهالى عشان أجهض نفسي
لما لقتها بتقول كدا ابتديت اقولهم انها كدابه و أن عكس ده اللى حصل و انى كتبت لها الفيلا عشان ترضى تخلى الحمل
طبعا هما صدقوها هى و ابوها قال بنتى مبتكدبش ...بنتى عمرها ما تعرف تكدب
اتغظت اوى و قلت له بنتك دى مفتريه و ربنا هينتقم منها الظالمه و انت كمان راجل ظالم لانك لو حابب تتأكد من الكلام هتتأكد و تعرف انها كدابه لكن كبرك عميك
الراجل قام وقف و قال انت قليل الادب ازاى تتكلم معايا كدا ؟
اتكلم معاك و مع اللى اتخن منك كمان ...انت فاكر نفسك ايه ؟؟
انا هوريك انا مين و ازاى تطاول على بالشكل ده ...انا غلطان انى حطيت ايدى فى ايدك و جوزتك بنتى
دا انا اللى غلطان انى ناسبت العيله دى....... بنتك طالق ...اشبعوا بقا بالفيلا و اللى فيها
حاضر يا ماجد أن ما وريتك ...
لا تورينى و لا اوريك و يلا بنتك عندك اشبع بيها
و سبتهم و خرجت و انا دمى فاير ... كان هاين على اطلع مسدسي و افرغه فيهم كلهم
روحت على البيت اخدت شنطة هدومى و روحت على شقة اهلى القديمه
بعد كدا الباشا قعد ينكش ورايا و يبلغ عنى الضرايب و ينزل قدامى فى المناقصات و يقدم عروض يخسر فيها كل ده عشان يخسرنى و يخرب بيتى و خلاص
لما ضاق على الحال و لقيتنى فعلا يمكن أفقد كل اللى عملته هنا ابتديت انقل نشاطى لدوله تانيه و الحمد لله ربنا وسعها عليا من حيث لا أدرى و عجبتنى الحكايه و ابتديت أوسع نشاطى فى دوله تانيه و تالته و خليت هنا شركه ابويا بس دى تعتبر شركه صغيره بالنسبه لباقى الشركات
ياااا دى حكايه و لا فى الحواديت يا باشا
عشان كدا انا اتعقدت من بنات الناس اللى بتقولى عليهم ...عارفه انا ساعات بشوف بنات شوارع انضف من طليقتى دى بنت الناس
بس اكيد فى بنات ناس كويسه مش كل الناس هتبقى زى سلوى مراتك
انا بقا معدش عندى وقت و لا نفس ادور ...و خلاص رضيت بحالى بالشكل ده و الحمد لله على كل حال
يااا ...دا اللى يشوف بلاوى الناس تهون عليه بلوته و انا اللى كنت فاكراك باشا كبير معندكش مشاكل و عايش احلى عيشه
مش انتى لوحدك يا تيتى ...الناس لها المظهر فاكرين أن اى واحد راكب عربيه و عنده بيت حلو او عنده شويه فلوس يبقى كدا معندوش اى مشاكل ... لكن لو يعرفوا الحقيقه كانوا اشفقوا علينا بدل ما يحسدونا
عندك حق و الله يا باشا ...بس سبحان الله ربنا مبيعملش حاجه وحشه انت اه فقدت الفيلا بتاعتك و الراجل ضيقها عليك هنا بس يمكن حصل كدا عشان توسع نشاطك و تكبر اكتر و اكتر
عندك حق يا تيتى ...تصدقى انك بتقولى حكم
ايوه طبعا ...انا ياما قابلت و ميغركش انى صغيره كدا ...انا ورد على خلق و حكايات خلونى و لا كانى عندى خمسين سنه
انتى جميله اوى يا تيتى
الله يكرمك يا ماجد باشا
مش هتقوليلى بقا حكايتك زى ما حكيت لك حكايتى
مش عاوزه اغمك بس
يا ستى انا نفسي اعرف حكايتك ...يلا احكى
و بدأت تيتى تحكى لماجد حكايتها و هو يسمعها بتأثر شديد ...تكاد عيناه تدمع من كم الالم الذى مرت به
يتبع......
#قصص_وحكايات_د_جيهان_عادل
#تيتى
#الجزء_الخامس_عشر
سمع ماجد حكاية تيتى بكل انتباه ...جلست تتحدث و الدموع تتساقط من عينيها ...بكل مرحله من حكايتها كان يزداد تأثرها و تكاد تكون كلماتها غير مفهومة
يااا انتى كمان حكايتك صعبه اوى يا تيتى
عشان كدا مكنتش عاوزه احكيلك و اشيلك همى ...انا غلطت غلطه من عشر سنين بدفع تمنها لحد دلوقت.....اتحولت من بنت عاديه بتحلم انها يكون عندها بيت و اطفال زى اى حد الى انسانه ساقطه الكل بيبص لها بصه مش كويسه
بس انتى بايدك تغيرى دا كله يا تيتى
مقدرش يا ماجد باشا ...انا خلاص اتحطيت فى طريق و مش هعرف ارجع منه ...انا لازم اجمع لابنى فلوس العمليه عشان يرجع يشوف تانى
طيب دى حاجه سهله يا تيتى
سهله عندك انت لكن عندى انا هتاخد منى سنتين على الأقل
طب و ايه تانى ؟
ايه تانى ايه مش فاهمه ؟
يعنى ايه اللى يخليكى متغيريش الوضع اللى انتى فيه ده
هقولك ...مين يا ماجد باشا يرضى يدخلنى بيته و يرضى انى اكون زوجه له مين يآمن على انى افتح له بيته و ميخافش منى و لا يبقى قلقان أنه سايب فى بيته واحده زيى
فى كتير يا تيتى
طب هات لى واحد من الكتير دول ...شوفت أدى انت سكت اهو ....مش بقولك
يلا يلا معلش انى ضايقتك بس انت اللى اصريت تعرف حكايتى
يلا على فين ؟
يلا على الفيلا بتاعتك و الا هنروح مكان تانى ؟
لا انا هروحك عشان تروحى تقعدى مع ابنك
لا مينفعش يا ماجد باشا ...مينفعش ...انت عارف انا ورايا ايه ..اليوم الواحد يفرق معايا
يا ستى إن كان على الألف جنيه ..اهم يا ستى خديهم
ان شالله تسلم يارب ...ربنا يكرمك زى ما بتكرمنى...و الله لو الاقى حد يقعد لى بكريم كنت سافرت معاك بكرا و مكنتش سبتك ابدا
طب بقولك ايه يا تيتى ...ما تيجى معايا انتى و كريم
اجيبه ازاى لمؤاخذه ...كريم ميعرفش انا بشتغل ايه
منا فاهم طبعا ...بصى انا اصلا هبقى مشغول طول اليوم يعنى هنخرج بالليل بس ..هاخد لك اوضه انتى وابنك على الأقل تفسحيه شويه و تخليه يلمس مية البحر ..هينبسط اوى على فكره
ياريت يا ماجد بيه دا من زمان بيطلب منى الطلب ده بس كنت بقول خساره الفلوس و اخليها للعمليه ...و اهو جه ابن الحرام اللى لهفهم منى ...... كتر الف خيرك و الله انا مشفتش زيك ابدا
لا اللى زيى كتير بس انتى مصادفتيش منهم حد...يلا بينا عشان اتاخرتى على كريم و بكرا هبعت لك العربيه الساعه سبعه الصبح عشان توصلك
حاضر انا هجهز نفسي و اجهز كريم قبل سبعه باذن الله
اوصل ماجد تيتى إلى بيتها ...ودعته بكثير من الامتنان
استنى يا تيتى
نعم يا ماجد باشا
خدى ده لكريم
ايه دا يا باشا ؟
دا تليفون نسخه مخصوصه للمكفوفين ...التطبيقات فيه ناطقه ..هتسهل على كريم التعامل معاه عن التليفون العادى
ربنا يسعدك و يكرمك يا باشا و الله انا مش عارفه اقولك ايه
متقوليش ...اطلعى يلا لابنك و لو صاحى فرحيه باللون
لا زمانه نام من زمان ...بس الصبح هديهوله و اكيد هيفرح اوى ....ربنا يسعدك زى ما بتسعد ابنى
مع السلامه يا تيتى
الله يسلم عمرك يا ماجد باشا
صعدت تيتى على السلم بخفه ....أدارت المفتاح بالباب ...دلفت إلى الغرفه
مين ؟؟ مين بيفتح الباب
دا انا يا كريم متخفش
انتى مش قلتى انك هتباتى فى الشغل يا ماما
ما هو الشغل اتلغى الليله يا حبيبي عشان فى سفر بكرا
انتى هتسافرى و تسبينى يا ماما ؟
لا يا حبيبي هاخدك معايا ... صاحب الشغل راجل طيب اوى و رضى انى اخدك معانا
صحيح يا ماما ...انا اول مره اسافر
لا و ايه هتروح مكان فيه بحر كمان و هخليك تنزل تبلبط فى الميه
الله يا ماما انا من زمان و نفسي اروح البحر
منا عارفه يا حبيبى ...بس قولى بقا انت ايه مصحيك لحد دلوقتى يا كريم ؟
اصل ..اصل
اصل ايه ؟ اتكلم على طول يا كريم
اصلى مبعرفش انام و انتى بره ببقا قلقان عليكى اوى
يا حبيبي ...ربنا يخليك ليا يا نور عينى
عارف انت تستاهل هديه حلوه على الكلام الحلو ده
انا مش عاوز حاجه يا ماما كفايه انك هتودينى البحر معاكى
لأ انت لو عرفت انا جايبالك ايه معايا مكنتش قلت كدا
جايبالى ايه يا ترى ؟
فاكر الفون اللى قلت لى أنه مع احمد صاحبك فى المدرسه ؟
ايوه دا تليفون حلو اوى يا ماما معمول مخصوص للمكفوفين ..التطبيقات ناطقه و الساعه و فيه راديو ...اصل احمد كان بيسبهولى كتير و عارف بيشتغل ازاى
اهو انا جبت لك واحد زيه
صحيح يا ماما ؟؟
صحيح يا روح ماما ...اتفضل اهو
ربنا يخليكى لى يا رب...انا عارف بيشتغل ازاى
لا يا كريم مش هينفع نشغله دلوقتى بكرا الصبح نبقى ناخده معانا و اركب لك الخط و تشغله زى ما انت عاوز
حاضر بس كان نفسي اسمع الساعه حتى
خلاص يا كريم و نام بقا عشان هنصحى الساعه سته الصبح باذن الله
حاضر يا ماما
فى اليوم التالى حضر السائق أمام بيت تيتى ركبت السياره هى و كريم و انطلقت السياره إلى شرم الشيخ
وصلت السياره إلى الفندق وجدت تيتى موظف من طرف ماجد فى استقبالها هى و كريم
اتفضلى يامدام مفاتيح الاوضه بتاعة حضرتك اهيه ...انا خلصت كل حاجه بس اتفضلى حضرتك عند موظف الاستقبال عشان تكملى بيانات البطاقه ...انا هروح اجيب الشنط من العربيه
اومال فين ماجد بيه ؟
ماجد باشا وصل من بدرى لانه كان مسافر مع الوفد على الطياره ...هو مش بعيد عن حضرتك هو واخد اوضه جنبك ...بس هو دلوقتى دخل الاجتماع و مش هيخلص قبل الساعه خمسه ....لو حضرتك لكى اى طلبات انا معاكى هو موصينى بكدا لغايه ما يخلص شغله
لا تمام اوى ...احنا هنطلع نستريح انا و كريم و بعد كدا هنشوف هنعمل ايه
طيب الكارت بتاعى اهو فيه رقم تليفونى
لو عوزتينى فى اى وقت اتصلى على
متشكره اوى ..انت اسمك ايه ؟
اسمى فؤاد
اسمك على اسم اخويا
لى الشرف يا فندم
دا انت كمان شبهه اوى ( قالت فى نفسها )
ذهبت تيتى لإكمال بياناتها أعطت الموظف بطاقتها ...أحضر فؤاد الحقائب
اى خدمات تانيه يا فندم
لا شكرا يا فؤاد
صعدت تيتى إلى الغرفه هى و كريم ..لم تصدق نفسها فالحجره متسعه جدا نظيفه انيقه المراتب من الاسفنج
اخذت تيتى و كريم يقفزوا فوق السرير الواسع و يضحكوا ضحكات مرتفعه كأنهم لم يضحكوا من قبل
بعد دقائق وجدت تيتى الباب يدق
اتفضل
هوم سيرفس يا فندم
ماجد باشا موصى نجيب لحضرتك الفطار
متشكره جدا
جلست تيتى هى و كريم يلتهموا الطعام ..ثم ناما على السرير من شدة التعب
بعد الظهر أفاقت تيتى و افاق كريم
انا عاوز اروح البحر يا ماما
انا معرفش حاجه هنا يا كريم ...هنروح ازاى بس
مش عمو اللى قابلنا قالك لو عوزتى اى حاجه اتصلى على
ما تتصلى عليه و خليه يودينا البحر
اه تصدق فكره ...و الله انت ذكى زى امك يا كريم ...انا حطيت الكارت بتاعه فين ؟.... اه اهو
اسمه ايه ؟؟؟؟؟ فؤاد أمين الشواف ؟؟ اخويا ؟؟😲
يتبع......
#قصص_وحكايات_د_جيهان_عادل
تيتى
#الجزء_السادس_عشر
قد تلعب الصدف ادوارا مهمه فى حياتنا ...لا نعرف لماذا حدثت ؟ و لكن من المؤكد أن لكل شيئ حكمه و اشاره من الله عز وجل
.............................................
انا معرفش حاجه هنا يا كريم ...هنروح ازاى بس
مش عمو اللى قابلنا قالك لو عوزتى اى حاجه اتصلى على
ما تتصلى عليه و خليه يودينا البحر
اه تصدق فكره ...و الله انت ذكى زى امك يا كريم ...انا حطيت الكارت بتاعه فين ؟.... اه اهو
اسمه ايه ؟؟؟؟؟ فريد أمين الشواف ؟؟ اخويا ؟؟😲
بتقولى ايه يا ماما ؟
مبقولش يا كريم ...بص احنا هنستنى عمو ماجد هو يبقى يودينا البحر
هو مش عمو اللى قابلنا قالك أنه هيخلص اخر النهار ؟ هنروح امتى بقا ؟ و النبى يا ماما اتصلى عليه و خلينا نروح
حاضر يا كريم
الو ...ايوا يا اااستاذ فؤاد انا تيتى
اهلا يا فندم
بقولك ايه ..احنا كنا عاوزين نروح البحر انا و كريم ممكن تقولنا نروح ازاى ؟
انا تحت امرك يا فندم ماجد باشا حاجز فى قريه الشمس السياحيه هنا هاخد حضرتك اوديكى
لا متتعبش نفسك ...انت بس خلى السواق يستنانى و انا هنزله يوصلنى
لا طبعا يا فندم مينفعش انا لازم اوصلكم بنفسي و اطمن على سلامتكم و ابقى فى خدمتكم لو عوزتوا اى حاجه ... حضراتكم ممكن تجهزوا امتى ؟
ربع ساعه كدا
طيب تمام ربع ساعه هكون واقف قدام باب الفندق
ارتبكت تيتى ...فقد انتابها شعور متناقض من الفرحه و الخوف
شعورها بالفرحه لرؤيه أخيها و الذى تشتاق إليه كثيرا
و شعورها بالخوف أن يعرفها و يكون ردة فعله غير متوقعه ...ثم انها لا تعرف ماذا أخبره ماجد عنها ؟
،،،،،،،،،،،،،،،،،،،،،،،،،،،،،،،،،،،،،
هو معرفنيش لانه كان صغير لما سبته كان يدوب ١٣ سنه و انا برده شكلى اتغير خالص و المكياج اللى انا مبهدله بيه وشي مخلهوش يعرفنى
انا هحط مكياج اكتر و احاول اغير ملامحى و هلبس نضاره شمس كبيره و طاقيه ...عشان ميفتكرنيش
نزلت تيتى و هى ترتعد و بيدها كريم
انتى مالك يا ماما ؟
مفيش حاجه يا كريم
اصل ايدك ساقعه اوى ...انتى خايفه من البحر و الا ايه ؟
ايوه يا كريم خايفه ...اول مره انزل البحر
متخافيش انا همسك ايدك و مش هخليكى تقعى خالص
ربنا يخليك لى يا حبيبي ...طبعا ما انت الراجل بتاعى
خرجت تيتي خارج الفندق لتجد فؤاد يقف بجانب السياره كالبدر
يا سلام لو اقدر اخدك فى حضنى يا واد يا فوفه ... حضنك وحشنى اوى ( كانت تقول لنفسها تلك الكلمات و هى تخفض رأسها لاسفل حتى لا يلاحظ فؤاد ملامحها جيدا )
وصلت السياره إلى قريه الشمس السياحيه و قد أصبح كريم و فؤاد اصدقاء بينما لم تنطق تيتى بكلمه واحده
يلا يا فؤاد هتنزل معانا الميه
لا يا كريم مش هينفع
و ليه بس ؟
اصلى مش جايب مايوه معايا ... مكنتش عامل حسابى
يا خساره ...دا ماما خايفه من الميه و كنت فاكر انك هتنزل معانا تشجعها
معلش يا كريم اوعدك المره الجايه هنزل معاك و اعلمك العوم كمان
هنا تذكرت تيتى أن فؤاد كان من أسرع شباب القريه فى السباحه و كثير ما أقيمت المسابقات فى ترعه القريه و دائما كان فيها الاول
أفاقت تيتى على كلمات فؤاد ........ اتفضلى يا هانم
الله انا شامم ريحه البحر يا ماما ...يلا بقا ننزل
استنى يا كريم بس
لا يا ماما مش قادر
طب انا هقف قدامك على الشط و انت متبعدش
انتى مش هتنزلى معايا ؟
لا يا كريم مش عاوزه مكياجى يتلخبط
مكياجك برده و الا انتى خايفه ؟
و هخاف من ايه يا كريم ؟؟
هتخافى من الميه يا ماما
لا انا مش خايفه و لا حاجه ...يلا بقا بطل غلبه و يلا هات ايدك اوصلك للميه
الله الميه حلوه اوى يا ماما ...تعالى انزلى معايا
لا يا كريم لا
ما تنزلى معاه يا فندم الميه تحفه انهارده ...انا لو كنت أعرف كنت عملت حسابى و نزلت معاه
انت اتعلمت سباحه فين يا فؤاد؟
انا كنت بعوم فى ترعه بلدنا و كنت دايما اسرع واحد فى البلد ...بعد كدا لما انتقلنا اسكندريه بقيت اعوم فى بحر اسكندريه
و انتوا سبتوا بلدكم ليه يا فؤاد ؟
مفيش كان لى اخت كبيره ماتت فى حادثه ..ابويا اللى يرحمه هو وامى مستحملوش الخبر و بقوا مش قادرين يقعدوا فى البلد ...سبنا البلد و طلعنا اسكندريه هى بينا و بينها حوالى نص ساعه بالقطر يعنى مش بعيده و لا حاجه بس الهدف كله أننا ننسي اللى حصلنا فى بلدنا
ابويا مات ؟؟ ( همست تيتى )
و انت لك اخوات تانين غير اختك اللى ماتت دى يا فؤاد ؟
ايوه عندى اتنين الصغير مسافر السعوديه بعد ما اخد الدبلوم و الوسطاني شغال فى اسكندريه و قاعد مع امى
يا ماما ....تعالى طلعينى
حاضر يا كريم ....يلا بينا بقا على الفندق عشان نتغدى لانى بعدها هسيبك و انزل الشغل
طب ما تسبينى مع عمو فؤاد انا حبيته اوى يا ماما
لا احنا مش عاوزين نزعج عمو فؤاد يا كريم
لا يا فندم مفيش ازعاج انا جاى مخصوص من فرع الشركه فى مصر عشان اكون فى خدمتكم
هزت تيتى رأسها ...قالت فى نفسها ( سبحان الله و من ضمن كل اللى بيشتغلوا عنده ميلقيش غيرك انت يجيبه يلازمنى ؟......اكيد ابويا مات بحسرتى ...يا ترى يا اما عامله ايه ؟ نفسي اترمى فى حضنك اوى و اقعد اعيط .....يااااا يا اما وحشنى حضنك و حنيتك اللى مشفتش زيها )
يلا يا فندم ؟؟
اه ...يلا يا فؤاد
عادت تيتى و تحمل فى قلبها الحزن ...يكاد الالم يعتصر قلبها
اهلى معتبرنى فى نظرهم ميته ...اومال انتى فاكره ايه ؟؟ فاكره بعد العمله اللى عملتيها فيهم هيكونوا بيدوروا عليكى و عاوزين ياخدوكى بالاحضان ؟ دا مش بعيد فؤاد لو عرفنى يموتنى بايده ...اكيد زمانهم بيقولوا انى سبب تشريدهم و موت ابونا
يلا يلا ماما انا استحميت و لبست لوحدى اهو ...يلا ننزل نتغدى عشان عاوز انام اوى
طيب يا كريم حاضر
نزلت تيتى و كريم لتناول الغداء فى مطعم الفندق و صعدا سويا إلى الغرفه
استلقى كريم على السرير و غط فى نوم عميق
استلقت تيتى بجانبه لكنها لم يغمض لها جفن ...تذكرت والدتها و تخيلت كيف اصبح شكلها الان ..تذكرت أخيها الصغير حمزه كيف كبر و اصبح رجل يسافر بمفرده إلى بلد آخر ...
يا ترى بقا شكلك ايه يا حمزه انت و عمرو ...بيتهيالى قمر زى ما انتوا ...فؤاد شكله اتغير اوى برده بس للاحسن معرفتوش و هو لابس البدله كدا و متأنتك...بس نسيت اساله هو تعليمه ايه ؟
اسكتى بقا يا بت لياخد باله انك عماله تسالى عن حياته و يجى فى دماغه انك أخته ...انا خلاص مش هساله تانى عن حاجه ....بس ازاى بس ؟ انا كان نفسي اعرف كل حاجه حصلت لهم فى السنين اللى فاتت دى....شكلك مش هتجبيها لبر يا بنت الشواف
هنا قطع حبل افكار تيتى صوت جرس الهاتف
نظرت تيتى فوجدت رقم ماجد على الشاشه
الو ...ايوا يا تيتى انا خلصت خلاص
انت فين يا ماجد ؟
انا بريح فى الاوضه اللى جنبك شويه ...
طيب انا جايلاك
انتفضت تيتى واقفه هندمت شعرها و ملابسها ...طرقت باب غرفة ماجد
اتفضل
ازيك يا تيتى ...انا عرفت انكم رحتوا البحر انتى و كريم يا رب تكونوا انبسطوا
انبسطنا ؟؟ اه انبسطنا الحمد لله
مالك يا تيتى ...شكلك فى حاجه غريبه هو فى حد ضايقكم ؟
انت جبت لنا فؤاد ده منين يا ماجد بيه ؟
ليه ؟ هو غلط فى حاجه ؟
لا مغلطتش بس اخترته هو بالذات ليه ؟
لا انا مخترتوش و لا حاجه انا طلبت من مدير العلاقات العامه عندى فى الشركه يرشح لى واحد يكون معاكم لانى مش فاضى زى ما انتى شايفه و اكتر من نص النهار مش هكون معاكم
و بيشتغل ايه فؤاد ده ؟
بيشتغل فى العلاقات العامه ...هو فى ايه ؟ هو فؤاد عمل حاجه ضايقتك ؟؟
فؤاد اخويا يا ماجد باشا
اخوكى ؟؟؟؟؟؟؟؟؟
يتبع......
#قصص_وحكايات_د_جيهان_عادل
تيتى
#الجزء_السابع_عشر
انت جبت لنا فؤاد ده منين يا ماجد بيه ؟
ليه ؟ هو غلط فى حاجه ؟
لا مغلطتش بس اخترته هو بالذات ليه ؟
لا انا مخترتوش و لا حاجه انا طلبت من مدير العلاقات العامه عندى فى الشركه يرشح لى واحد يكون معاكم لانى مش فاضى زى ما انتى شايفه و اكتر من نص النهار مش هكون معاكم
و بيشتغل ايه فؤاد ده ؟
بيشتغل فى العلاقات العامه ...هو فى ايه ؟ هو فؤاد عمل حاجه ضايقتك ؟؟
فؤاد اخويا يا ماجد باشا
اخوكى ؟؟؟
قهقه ماجد بصوت مرتفع
انتى مبخته و الله
مبختة ايه بس ؟ قول نحس ...انا كنت خايفه أنه يعرفنى
و انتى عرفتيه ازاى ؟
من النيله الكارت بتاعه
متخافيش مدام معرفكيش من الاول مش هيعرفك ... بس غريبه أنه حتى مشبهش عليكى ههههههههه
انت بتضحك ؟ الله يسامحك
معلش و الله مش قادر امسك نفسي أصلها صدفه عجيبه اوى
انت عارف لو عرف انى اخته ممكن يحصلى ايه ؟
و لا هيحصلك حاجه
انت بتقول ايه ؟ انت متعرفش هما ممكن يعملوا فى ايه ؟
هما مين اللى يعملوا فيكى ايه ؟
اخواتى ...اصلى عرفت ان ابويا مات الله يرحمه
الله يرحمه ....و انتى متخيله بقا أن اخواتك بيدورا عليكى عشان ينتقموا منك ؟؟ دا مش بعيد يكونوا نسيوا اصلا أن لهم اخت أو اعتبروكى ميته
هو فعلا لما سألته قال إن كان له اخت و ماتت
انتى كمان سألتيه ههههههههه ....ما شاء الله عليكى ذكيه
خلاص بقا يا باشا ...هو انت قلت له عنى ايه ؟
يا بنتى أقوله ايه ؟ دا مجرد موظف صغير اوى عندى ....يعنى مفيش ما بينا كلام
مش عارفه انا خايفه اوى
متخافيش و لو عايزه امشيه و اجيب غيره اعمل كدا ...لو ده اللى يريحك يعنى
لا خلاص دا هو فاضل بكره و خلاص هنمشي
لا ما هو هيجى معانا اسكندريه كمان
الله ...دا قالى أن امى و اخويا عايشين هناك
هنا ضحك ماجد بشكل هستيري
ههههههههه حلو اوى يبقى تروحى تزوريهم بقا
انت بتهزر و انا واقعه فى مصيبه
يا ستى خدى الأمور ببساطه مش يمكن ربنا عمل كدا عشان ترجعى لأهلك
و ارجع لاهلى ازاى بقا ؟ طب و علاج ابنى هعالجه منين ؟ و اقولهم الواد ده ابن مين ؟
انا عاوز اقولك على حاجه يا تيتى بس متزعليش منى
اتفضل يا باشا انا مش ممكن ازعل منك
مش يمكن ربنا عمل كدا و خلى ابوسريع يسرقك بعد ما كان بيراجع معاكى الحساب لاكتر من سنه عشان متعالجيش ابنك بفلوس حرام ؟
طب و هو انا كان قدامى غير كدا و معملتش ؟
لا متجديش لنفسك مبرر لغلط بتعمليه ...سلوى مراتى وجدت لنفسها مبرر انها تسرق الفيلا و كل اللى فيها لمجرد انى حبستها الشهر اللى قلت لك عليه ...قالتهالى كدا بعد ما طلقتها
قالتها لك ازاى ؟
اتصلت على و قالت لى انت عارف انى ميهمنيش فيلتك و لا حاجتك بس انا عملت فيك كدا أدبا ليك عشان تبقى تحبس ولاد الناس تانى ...و لسه هتشوف بابى هيعملك فيك ايه
و انت عملت ايه يا باشا
هعمل ايه ؟ قعدت اضحك
اهو انت كدا كل شويه تضحك و خلاص
يا تيتى لازم تعرفى إن ربك يمهل و لا يهمل جاب لى حقى لغايه عندى
ازاى يا باشا ؟ هى رجعت لك الفيلا ؟
لا مرجعتهاش و لا حاجه بس ربنا عوضنى عن تمنها عشرات الاضعاف دا غير انى لسه سامع انهارده أن ابوها أعلن إفلاسه ...اللهم لا شماته هو كان بيحاربنى عشان أفلس شوفى بعد حوالى ٧ سنين ربنا امهله فيها بس جاب لى حقى زى ما قلت لك
طب و سلوى ؟ متعرفش عنها حاجه ؟
كان عندى فضول اعرف حصلها ايه ؟ سألت عليها و لقيتها اتجوزت بعدى على طول و للاسف كانت فى مره رايحه رحله من رحلاتها و سايقه بجنون كعادتها عملت حادثه كبيره اوى شالوا لها الرحم و قعدت فى الجبس كام شهر و اتطلقت للمره التانيه و عايشه لوحدها دلوقتى فى الفيلا اللى اخدتها منى ظلم
يا سبحان الله
بصى انا مش بقولك كدا فرحان فيهم لأ و الله بس بقولك أن الحرام بياخد معاه الحلال كمان
انت عندك حق بس انا معرفتش اتصرف غير كدا
بصى يا تيتى انا عاوز اقولك حاجه من ساعة ما شفتك
اتفضل يا باشا
انتى فعلا شكلك بنت ناس و مش وش مرمطه و لا لايق عليكى الشغلانه دى و عشان كدا طلبت انك تيجى معايا لانى عاوز اساعدك...بس لى كلمتين معاكى قبل ما اساعدك
اتفضل يا باشا
انتى الاول غلطتى و عالجتى الغلط بغلط اكبر اللى هو هروبك ..بعد كدا استسهلتى الحرام و قبلتى تشتغلى فى بار ..شفتى الخطوات دى كلها جرتك الخطوه ورا التانيه
انتى مثلا لو من عشر سنين قلتى لنفسك انى هبقى كدا مكنتيش هتصدقى نفسك
صح يا ماجد بيه عندك حق
طيب انتى عاوزه تخرجى من اللى انتى فيه ده و الا حابه تفضلى على الوضع ده و كل يوم مع راجل شكل
لا طبعا مش عاوزه اكون كدا بس نفسي اعالج ابنى
علاج ابنك انا متكفل بيه يا ستى ملكيش دعوه بيه
صحيح ؟؟؟ربنا يخليك .....ايدك ابوسها
استغفر الله ...عيب كدا يا تيتى ...انا حابب اساعدك عشان فعلا انتى صعبتى على و سوء تصرفك هو اللى أدى بيكى لكدا و لو استمريتى على كدا الله اعلم بقا ممكن يحصل لك ايه
بصى انا عاوز منك اسم عبدالرحمن ابو كريم بالظبط و انا اوعدك انى هقلب عليه مصر كلها لحد ما الاقيه
طب معلش فى السؤال يا بيه ...و هو عبدالرحمن لو لقيته يعنى هيرضى يتجوز واحده زيى ؟
ما هى دى الخطوه التانيه اللى هنعملها انا عاوز اعملك مشروع كبير نكون فيه شركا سوا يعنى مثلا ممكن اعملك مشغل كبير ..انا برأس المال وانتى تديري المكان ... لازم تتحولى لسيدة اعمال محترمه لازم تغيري طريقه لبسك دى و تقللى مكياجك ده ...لازم ترجعى تقى مش تيتى
يا سلام يا ماجد بيه انت كأنك بتعيشنى فى حلم جميل مش عاوزه اصحى منه ابدا
و لا حلم و لا حاجه ...بس المهم تبعدى عن القاهره خالص و عن اى حد كنتى تعرفيه هناك
حاضر حاضر انا تحت امرك
عاوزه تروحى فين ؟
اروح اسكندريه عاوزه ابدأ هناك على نضيف
عاوزه تكونى جنب اهلك صح ؟
ايوه بس مش هروح لهم الا اما اتغير خالص و ابقى انسانه نضيفه
حاضر يا تقى ...انا من النهارده هبعت واحد من عندى فى الشركه يشوف مكان مناسب يتعمل مشغل و هنجيب الماكينات و البنات اللى هتشتغل و فى خلال أيام باذن الله كل شئ هيكون جاهز
ربنا يخليك يا ماجد بيه
انتى بنت حلال و تستاهلى كل خير يا تقى ....ابنك بقا هبعت لك العربيه الصبح تروحى تعمليله اشاعات و تقرير فى مستشفى متخصص للعيون هنا و هناخد التقرير ده هنبعته المانيا و نشوف هيردوا علينا بايه
ربنا يخليك و يكتر من امثالك يا رب جميلك دا عمرى ما هنساه ابدا
و لا جميل و لا حاجه المال مال الله و احنا مجرد خدام له
اظن انتى بتقولى دلوقتى فى نفسك مدام انت متدين اوى كدا بتروح تعمل مغامرات و تجيب بنات من الشارع ليه ؟
صراحه اه يا باشا ...السؤال ده هيجننى بس لا مؤاخذه مش ممكن كنت أسأله بعد اللى عملته معايا دا كله
انا هريحك يا ستى ...هتصدقينى لو قلت لك أن ده اول مره اعمل فيها كدا؟
بس انت قلت انك كنت بتعملها كتير
لا دا كان بس كلام عشان تحسي انى مقطع السمكه و ديلها و طبعا انتى عارفه انى ملمستكيش
ايوه بس قلت اكيد حضرتك عندك مانع و صراحه قلت اكيد عاوز تتمنظر بيا قدام الناس
ههههههههه اتمنظر بيكى ؟
انا عارفه انى مش اد المقام يعنى
لا عفوا مش قصدى ... بس مفيش واحد بيتمنظر بواحده و يجيب ابنها معاها يا تيتى
ههههههههه اه صحيح عندك حق
اللى منعنى مش سبب صحى زى ما انتى فاهمه ... النفس الانسانيه تحمل الخير و الشر مفيش فينا حد شيطان على طول و مفيش فينا حد ملاك على طول .......انا انسان حاسس بالوحده و للحظه كنت هضعف بس ربنا سبحانه و تعالى انقذنى و خلانى مش قادر ارتكب ذنب زى ده
انت طيب اوى يا ماجد
و انتى كمان طيبه يا تيتى و لولا ربنا بيحبك مكنش خلى ابوسريع يسرقك و يخليكى تسيبي الشغل و تقابلينى فى المكان اللى شفتك فيه ده
يتبع......
#قصص_وحكايات_د_جيهان_عادل
تيتى
#الجزء_الثامن_عشر
انا انسان حاسس بالوحده و للحظه كنت هضعف بس ربنا سبحانه و تعالى انقذنى و خلانى مش قادر ارتكب ذنب زى ده
انت طيب اوى يا ماجد
و انتى كمان طيبه يا تيتى و لولا ربنا بيحبك مكنش خلى ابوسريع يسرقك و يخليكى تسيبي الشغل و تقابلينى فى المكان اللى شفتك فيه ده
فى اليوم التالى ذهبت تيتى لإجراء الفحوصات الطبيه لكريم فى مستشفى خاصه للعيون
راسل ماجد مستشفى مشهوره للعيون بألمانيا لاجراء عمليه كريم
فى المساء :
انا بعت الاشاعات اللى جبتيها انهارده من المستشفى لمستشفى فى ألمانيا يا تيتى و ربنا يسهل
انا مش عارفه اشكرك ازاى يا ماجد بيه
مفيش شكر و لا حاجه ....و كمان كلمت عبدالحميد يشوف مكان يصلح لعمل مشغل كبير و بعت ايميل لشركه ماكينات خياطه و سرفله فى الصين هنشترى عشر ماكينات بشكل مبدأى كدا و بعدين نبقا نكمل
يااا كل ده عملته ؟
اه طبعا و كلفت ناس تنزل بلدكم تسأل اى حد عن عبدالرحمن و عيلته و أن شاء الله هنسمع اخبار كويسه قريب
انت ازاى كدا ؟ انت بجد ملاك
الله يكرمك ملاك ايه بس ؟ يلا بقا انا خلصت شغل انهارده تعالى هناخد كريم و نروح الملاهى
الملاهى ؟؟ ازاى ؟ هو كريم ينفع يروح الملاهى
اه طبعا ينفع ...دا هيفرح جدا كمان ...هو انتى عمرك ما ودتيه الملاهى ؟
لأ منا قلت هيخاف
هيخاف ايه بس ؟ دا انتى اللى خوافه
انا فعلا بخاف عليه جدا
طب يلا لبسيه و الاقيكم جاهزين فى عشر دقايق
حاضر يا فندم
بعد دقائق .....
اهلا استاذ كريم ...انا عمك ماجد
اهلا يا عمو ...ماما بتقول عليك راجل طيب اوى
ربنا يخليك انت و ماما يارب ....ايه رايك يا كريم احنا هنروح نجيب شويه لبس لك و لماما و بعدين هنروح الملاهى
ايه الملاهى دى يا عمو ؟؟
دا مكان كبير مليان مراجيح و عربيات و حاجات حلوه اوى
الله انا بحب المراجيح اوى ...كنت بركبها فى الحضانه
طيب يا عم انا هوديك و افسحك يلا بينا
توجه ماجد لأحد المولات الكبيره ...اختار لتيتى و كريم ملابس انيقه و بعض الاحذيه و الحقائب
بعد ذلك توجه ماجد إلى الملاهى ركب كريم و ماجد و تيتى كثير من الألعاب تصاعدت ضحكاتهم إلى عنان السماء
اشترى ماجد الايس كريم و الفشار و الحلوى
بعد خروجهم من الملاهى و ركوبهم السياره
انا بحبك اوى يا عمو ...انا عمرى ما فرحت كدا
اوعدك يا عم كريم انى هفسحك مره تانيه لما ربنا يشفيك و ترجع تشوف تانى
ربنا يخليك يا عمو انا نفسي اشوف مره تانيه عشان اعرف شكل ماما بس
طب و مش عاوز تعرف شكلى انا كمان يا كريم ؟
اه طبعا يا عمو عاوز طبعا و عاوز اشوف عمو فؤاد كمان
بقولك ايه يا ماجد بيه..... انا مش شايفه فؤاد انهارده يعنى ؟
انا رجعته القاهره يا تيتى
و ليه كدا بس ؟
عشان الموضوع اللى قلتيلى عليه
طب ما انت قلت إنه مش هيعرفنى
ايوه قلت بس الكلام ده لو خليتى بقك مقفول مش كل شويه تسأليه و تخليه ياخد باله
ايوه عندك حق .......كدا احسن برده انا مبقدرش امسك نفسي ببقا نفسي اساله عن حاجات كتير وحشانى
خلاص يا تيتى غيري الموضوع ..... عبدالحميد لسه مكلمنى و خلاص لقى بيت دورين كبير و حلو ينفع سكن و ينفع عمل المشغل فيه
كويس اوى
طيب هو هيجهز لك الدور التانى و هيفرشه لكى ...هل فى اى حاجه لكى فى سكنك عاوزه تروحى تجبيها و الا تروحى على هناك على طول ؟
ايوه فى شويه حاجات كدا محتاجه اجيبهم و اوراق و مستندات
طيب تمام هخلى السواق ياخدك تروحى تجيبي حاجتك و و هيجيبك تانى يوم عندى فى اسكندريه
و ليه تانى يوم انا هجيب الحاجه فى دقايق و اجى على طول
بس هيبقى تعب عليكى و على كريم يا تيتى
و لا تعب و لا حاجه يعنى احنا مسافرين مشي ... ادينا بنتفسح
طيب لو حسيتى بالتعب انتى أو كريم خليكى و قولى للسواق يفوت عليكى تانى يوم
حاضر يا ماجد بيه ...جمايلك فوق راسي و الله ..ربنا يخليك لينا يارب
فى اليوم التالى توجهت تيتى إلى غرفتها لتحضر أوراقها و ملابسها
دلفت تيتى لداخل الحجره...احضرت حقيبه كبيره وضعت بها كل ملابس و كتب كريم ...وضعت ملابسها و كل اشياءها ... أغلقت الحقيبه
نظرت تيتى لجدران الغرفه المتهالكة و كأنها تودع حياة الضياع ...ستبدأ بعد قليل حياه جديده مختلفه ...ستعود إلى العفه و الشرف الذى تربت عليه
اطلقت تيتى زفره من اعماق قلبها ...يلا يا كريم
فتحت بابها لتخرج من قفص الرذيله و تتنشق هواء الفضيله
على فين العزم أن شاء الله ؟
تهامى ؟؟؟؟ 😲
انت ايه اللى عرفك مكانى ؟
هو انتى فاكره انك تقدرى تهربى منى ؟ دا انتى بتحلمى بقا ؟
انت عاوز منى ايه يا تهامى ؟
ما انتى عارفه انا عاوز ايه يا قطه
شغل معاك تانى مش هيحصل يا تهامى
الله... القطه كبرت و طلع لها خرابيش اهو
ايوه كبرت و لو قربت منى هخربشك يا تهامى
ههههههههه انتى اد الكلام اللى بتقوليه ده يا قطه ؟
انت عاوز منى ايه مش كفايه كنت بتاخد عرقى و فى الاخر سرقتنى انت و ابو سريع الكلب ده
انا سرقتك ؟؟
متنكرش انا عرفت كل حاجه ....
مش بقولك القطه كبرت ....اه انا اللى حرضت ابو سريع ياخد فلوسك بس دا عشان مصلحتك يا تيتى
يا سلام مصلحتى ازاى يعنى ؟
يعنى انا سمعت انك بعد العمليه كنتى هتعتزلى و تتوبى و تنهى مشوارك الفنى بدرى بدرى
ايوه و دا يخصك فى ايه ؟
يخصنى طبعا ...انتى رأس مالى ...هو انتى ناسيه يا بت أن انا اللى نجرتك و لبستك اللبس اللى مكنتيش تحلمى بيه دا ؟
يا ريتك يا شيخ ما لبستنى و لا كنت شوفت وشك ابدا
بقا كدا يا قطه ؟؟ دا آخرة المعروف ؟
معروف ؟؟ انت بتسمى اللى عملته معايا دا معروف ؟ انت استغليت حوجتى و زعلى على ابنى و خدتنى لطريق كله معاصى
الله الله على ستنا الشيخه ....مين يا بت اللى ملى دماغك بالكلام ده ؟ البيه اللى رايحه جايه فى عربيته ؟
بيه ؟؟ بيه مين ؟
هنا امسك تهامى شعر تيتى و جذبها بعنف
اوعى تكونى فاكره انى نايم على ودانى و الا مش عارف انتى بتروحى فين و بتيجى منين ؟ انا وراكى خطوه بخطوه و عارف كل تحركاتك و عارف انتى بتعملى ايه كويس
اوعى ابعد عنى ....شغل مش هشتغل و اعلى ما فى خيلك اركبه يا تهامى
ههههههههه اعلى ما فى خيلى اركبه؟؟ حاااضر هركبه يا تيتى ...بس خليكى فاكره انتى اللى بدأتى ..انا جيت لك بالحسنى بس انتى الظاهر مينفعش معاكى الحسنى
هاتى بقا الواد ده عشان تعرفى تتحدينى ازاى
ابنى ...ابنى .... كريم ...لا يا تهامى لا ....الحقونى الحقونى ....ابنى
حمل تهامى كريم... اسرع هابطا درجات السلم بعد أن دفع تيتى دفعه قويه وقعت على الأرض و اغلق عليها الباب...
اخذت تيتى تصرخ و تولول ...ابنى ..ابنى
يتبع......
#قصص_وحكايات_د_جيهان_عادل
تيتى
#الجزء_التاسع_عشر
ليس كل ما يتمناه المرء يناله ....قد تجبرنا الظروف على فعل ما لا نريد
حمل تهامى كريم... اسرع هابطا درجات السلم بعد أن دفع تيتى دفعه قويه وقعت على الأرض و اغلق عليها الباب...
اخذت تيتى تصرخ و تولول ...ابنى ..ابنى
قامت تيتى مسرعه وراء تهامى قفزت على درجات السلم و هى تصرخ كريم ...كريم و لكنها لم تجد أحد
أسرعت إلى السائق الذى كان ينتظرها على اول الشارع
مشفتش واحد شايل كريم و بيجرى من هنا يا محمد ؟
لا مشفتش حد ...هو فى ايه ؟
ابنى اتخطف
أسرعت تيتى فى الاتجاه الآخر لتبحث عن تهامى و لكن دون جدوى
صعدت تيتى مره اخرى الى حجرتها لتلتقط هاتفها
اتصلت تيتى على ماجد و لكنها وجدت الخط مغلق
اه صحيح زمان ماجد فى اجتماع ...انا لازم اروح ادور على تهامى الكلب ده بنفسي
أسرعت تيتى إلى النادى و لكنها لم تجده ...ذهبت إلى كل الاماكن التى يمكنها أن تجده بها و لكن بلا فائده
أصابها الجنون ....تذكرت تونه حبيبه تهامى
أسرعت إلى هناك حيث تسكن في حى قديم
صعدت درجات السلم كالمجنونه ..دقت على الباب بحده
فتحت لها فتاه فى الثلاثين شعرها مصبوغ بصبغه صفراء مرسومه الحاجبين ترفع أحدهما ،تضع الكثير من مساحيق التجميل ...فمها يتحرك باللبان
دفعتها تيتى و هى تهم بالدخول ....
فين ابنى يا تونه ؟.....كريم كريم
الله تعالى هنا رايحه فين ؟ هى وكاله من غير بواب
وديتوا ابنى فين يا اولاد الكلب
كلب أما يعضك اقفى عوج و اتكلمى عدل يا بت انتى
طلعى لى ابنى يا تونه انا بقولك اهو
ابنك مين ده يا اوخه ؟ .... ايه اللى هيجيب ابنك هنا ؟
يعنى مش عارفه ؟؟ تهامى
هنا خرج تهامى من غرفة النوم قائلا
انا سامع أسمى حد بينده عليا؟
هجمت تيتى على تهامى كالعصفور الذى ينقض على أسد
فين ابنى يا ابن الكلب ...هاتلى ابنى
رفع تهامى يده و اهوى به على وجه تيتى ...هو مين اللى كلب يا سفله يا عرة النسوان
امسكها تهامى من شعرها ...دفعها بقوه نحو الحائط ..أخذ يصدمها بالحائط إلى أن سأل الدم من رأسها
اخذت تيتى تصرخ ... ألقاها تهامى على الأرض و اخذ يركلها بقدمه
اخرصى يا بنت الكلب مسمعش حسك
عاوزه ابنى هاتلى ابنى
عاد تهامى يرفع تيتى من شعرها قائلا
عاوزه ابنك يا قطه يبقى تسمعى الكلام غير كدا مش هتشوفيه بعينك تانى
ابوس ايدك يا تهامى الا ابنى ...هعملك اللى انت عاوزه بس بلاش ابنى
ايووووه كدا ارجعى لعقلك
طب وديته فين ؟
ملكيش دعوه هو فين .... انتى تعملى اللى هقولك عليه و بعد كدا اقرر تشوفيه و الا لأ
ابوس ايدك يا تهامى الواد بياخد دوا و مينفعش يقطعه حالته تدهور
مليش فيه دا هيرجع لك انتى شوفى بقا عاوزه تاخرى دواه لحد امتى
طب انا مستعده اعمل اللى تقول عليه بس هات لى ابنى دلوقتى
انتى متتشرطيش على ..انا هنا اللى اتشرط يا بنت الكلب
طب اشرط زى ما انت عاوز بس المهم ابنى
الواد اللى كنتى رايحه جايه معاه ده ايه حكايته معاكى ؟ اوعى يكون ضحكتى عليه و هيتجوزك
لا و الله دا راجل طيب كان هيعمل لابنى العمليه و يعملى مشروع اعيش منه عيشه نضيفه
ههههههههه الله الله ايه يا بت الحلاوه دى ...الراجل ده ساكن فين ؟
هو عنده فيلا فى المريوطيه بس هو مبيقعدش فى مصر ...يعنى بيقعد كام يوم و يسافر
و كمان فيلا ...دا كدا احلوت اوى الحكايه دى ....طبعا تعرفى تروحى هناك
انا؟؟؟... لأ معرفش
يبقى انتى كدا مش عاوزه تشوفى ابنك تانى
لا لا ..اعرف اعرف
الراجل ده قالك هيسافر امتى ؟
فاضله تلات ايام و يسافر
حلو اوى. .... طيب هاتى يا حلوه تليفونك
ليه عاوزوا ليه ؟؟
انتى مال اهلك بقا ...
اتفضل اهو
اسمه ايه الراجل ده يا بت ؟
اسمه ماجد بيه
اه دا انتى رنه عليه اهو و لا مية مره كنتى عاوزه تستنجدى بيه صح ؟ ..
اسمعى بقا لما اقولك انتى دلوقتى تتصلى بيه و تقوليله الكلام اللى هقولهولك ده ...لا تزودى حرف و لا تنقصى حرف
حاضر
عارفه لو عملتى حركه كدا و الا كدا مش هتشوفى ابنك ده تانى ...و انتى الجانيه على روحك بقا
لا مش هعمل مش هعمل
انتى تكلميه و تقوليلوه انك كنتى بتضحكى عليه عشان تقلبيه فى قرشين . و تقوليله توبه ايه اللى عاوزنى اتوبها
حاضر
حسك عينك تغلطى و الا انتى عارفه هعمل فيكى ايه
حاضر ..حاضر
اتصلى يلا و افتحى الاسبيكر
تناولت تيتى الهاتف و يداها ترتعش ...لقد انتهى حلمها بحياه نظيفه تعيشها ....
الو ماجد بيه
الو ايوه يا تقى ...معلش انا لسه فاتح تليفونى دلوقتى كنت فى اجتماعات طول النهار و ببقى اقفله ...معلش لقيتك رنه على كتير اوى ...هو فى حاجه حصلت و الا ايه ؟
لا مفيش بس ...
استنى انا عندى ليكى خبر حلو اوى ...المستشفى فى ألمانيا لسه راده على و قالت إن فى امكانيه لعمل العمليه لكريم و نسبه نجاح العمليه مرتفعه جدا بس عاوزين الموضوع يكون اسرع عشان عصب العين ميضمرش اكتر من كدا
انا بقا هحجزلكم على الاسبوع الجاى و معلش هكلف عبدالحميد يتابع معاكى لأن زى ما انتى عارفه انا مسافر اخر الاسبوع ...بس اوعدك انى هبقى معاكى خطوه بخطوه بالتليفون
استنى بس يا ماجد بيه
استنا ايه بس يا تيتى انتى متعرفيش انا فرحان اد ايه
احنا و لا هنعمل عمليه و لا اى حاجه من اللى بتتكلم فيها دى
انتى بتقولى ايه ؟
بقولك ان المصلحه خلاص خلصت
مصلحة ايه مش فاهم
انت طيب اوى يا ماجد باشا ...هو اى حد يقولك كلمتين كدا تصدقه ؟؟
يعنى ايه يا تيتى ؟ انتى كنتى بتضحكى على ؟ طب ليه ؟
ليه دى عشان اقلبك فى قرشين .... عشان اتفسح لى يومين انا و الواد اللى مأجراه
ايه ؟؟ مأجراه ؟؟ يعنى كريم ده مش ابنك ؟
لأ مش ابنى و لا اعرفه ...دا ابن واحده صاحبتى جبته معايا و عملنا عليك نمره
انتى اقذر انسانه شفتها فى حياتى
ههههههههه اومال انت فاكر ايه ...واحده واخدها من الشارع هاتطلع ايه يعنى ؟؟
كلكم كدا ... مفيش واحده كويسه انا اسف انى صدقتك و كنت عاوز اساعدك
متشكرين يا باشا و ساعدتنا و هبشت منك عشر الاف جنيه فى يومين دا غير اللبس الالاجه اللى جبتهولى انا و الواد ...صحيح امه بتشكرك اوى ....انا قلت اشكرك برده و اعمل باصلى عشان متستناش كتير ...اصل التوبه و الاحترام ده يا باشا له ناسه و احنا مش ناسه
فعلا انتى متستهليش اى حاجه حلوه كنت عاوز اعملهالك ...فعلا انتى مش ناسه
اغلق ماجد السكه فى وجه تيتى ...اخذت الدموع تتساقط من عينيها...
خطف تهامى الهاتف من يد تيتى ...أخرج الشريحه أمام عينها و كسرها
شاطره يا تيتى عملتى دورك على أكمل وجه ...دا انا شخصيا صدقتك يا شيخه
انت كسرت الشريحه ليه ؟
متخافيش هجيب لك غيرها بس عشان ميوزكيش شيطانك كدا و الا كدا و تتصلى على الراجل تانى
و بعدين انا عاوزك بقا على الاسبوع الجاى تيجى معانا تورينا الفيلا بتاعه الراجل ده
و عاوز تروح هناك ليه ؟
هنقضى الويك اند هناك ...هكون عاوز اروح ليه يعنى ؟ عشان نسرقها طبعا
ايه تسرقها ؟؟؟
يتبع......
#قصص_وحكايات_د_جيهان_عادل
#تيتى
#الجزء_العشرين
انت كسرت الشريحه ليه ؟
متخافيش هجيب لك غيرها بس عشان ميوزكيش شيطانك كدا و الا كدا و تتصلى على الراجل تانى
و بعدين انا عاوزك بقا على الاسبوع الجاى تيجى معانا تورينا الفيلا بتاعه الراجل ده
و عاوز تروح هناك ليه ؟
هنقضى الويك اند هناك ...هكون عاوز اروح ليه يعنى ؟ عشان نسرقها طبعا
ايه تسرقها ؟ انا مش ممكن اشارك فى الجريمه دى
مش بمزاجك يا اختى ...انتى عارفه انا ممكن اعمل فيكى ايه
طب انا عاوزه ابنى عشان اروح
ههههههههه ضحكتينى و الله ابنك فى الحفظ و الصون و أن كان على علاجه هاتى العلاج اللى انتى عاوزه تديهولوا و انا هديهولوا بنفسي
طب ليه يا تهامى منا عملت لك كل اللى انت عاوزه
لا لسه شويه
امتى يا تهامى ؟
لما نروح نسرق الفيلا و تشتغلى معايا شويه فى حكايه الشقق المفروشه دى
لا يا تهامى انا عاوزه ابنى ...صدقنى هنفذ كل اللى هتقولى عليه
ما انا عارف ..هو انتى فاكره انى خايف منك................ انتى متقدريش تعملى حاجه و اظن انك شفتى قرصه صغيره اوى فى ودنك ....يعنى لو فكرتى تتوبى و الا الهبل اللى فى دماغك ده هتلاقى منى حاجه تانيه خالص اقل حاجه هشوهه جمالك الربانى ده
حاضر يا تهامى بس هات لى ابنى
انتى دلوقتى هتقعدى مع تونه هنا لحد ما نسرق الفيلا سوا
سوا ازاى ؟؟
سوا سوا ...مش عارفه ازاى يا قطه ؟ انتى دخلتى الفيلا دى و شوفتيها كويس من جوه و عارفه المخارج و المداخل يعنى هتسهلى علينا الموضوع و بعدين انتى بتقولى الراجل مسافر يعنى الموضوع سهل اوى خايفه من ايه يعنى ؟
طيب يا تهامى انا موافقه بس تجيب لى ابنى انهارده
و هو كذلك يا قطه ابنك هيكون عندك اخر النهار ...شفتى بقا قلبى حنين ازاى ؟
و انتى يا تونه تخلى بالك منها ...حطيلها حاجه ع الجرح اللى فى دمغها ده ...الزباين عندنا بيبقوا عاوزين حاجه اكسترا
حاضر يا معلم ...بس عاوزاك فى كلمتين كدا
ادخلى يا تيتى جوه ريحى جسمك شويه على ما نشوف الحته عاوزه ايه
قامت تيتى تجر أقدامها ...دلفت للغرفه...ألقت بنفسها على السرير ...ظلت تبكى و تبكى على أملها الضائع .....على أفضل فرصه فى حياتها ضاعت
فكرت أن الحل هو قتل تهامى ...لا يوجد غير هذا الحل و لكن بعد أن تعرف مكان كريم ...و لكن أن قتلت تهامى ستحبس اين سيذهب كريم ؟؟ يا الله لقد توالت على راسي النكبات ليس لى سواك يا الله
انا الان محبوسه لا اعرف مكان ابنى مرغمه على سرقه من أحسن إلىّ
اريد تحذيره و لكن كيف ؟؟ تهامى كسر الشريحه و لا احفظ رقمه ...دلنى يا الله
فى خارج الغرفه تجلس تونه مع تهامى
هو انت صحيح هتسيب لى البت دى هنا ؟
ايوه صحيح ؟ ايه عندك مانع ؟
انت عارف كويس انى مبقبلش البت دى من زمان يا تهامى ازاى بقا عاوزها تقعد معايا ؟
هو احنا هنتدلع يا تونه ...دا شغل يا ماما و العمليه كلها اسبوع او اقل على ما نسرق الفيلا بتاعه المحروس
طب و هتاخدها معاك ليه ؟؟ انت مش محتاجها اصلا ...ما ياما قلبت فلل انت و رجالتك من غير اى مساعده
تصدقى سؤالك ده عجبنى ؟ انا بحب الاسئله النبيهه دى
انا هاخد البت دى و هصورها و هى بتسرق معانا عشان اكتفها من جميع الجهات و متفكرش بعد كدا تخلع و تتوب زى ما هى عاوزه
يا ابن الجنيه يا تهامى طب فى حاجه تانيه كمان
ايه تانى يا تونه انا عارف شغل غيرة الحريم ده
و لا غيره و لا حاجه و بعدين انا هغير من دى ؟ انا بتكلم أن البت دى هتقعد هنا يعنى هتعرف عننا حاجات كتير ...انت ناسي أن فى ناس جايين لك بكرا عشان المصلحه إياها
متخافيش من البت دى ...انا خلاص طرمت اسنانها مش هتقدر تنطق و لا تعمل حاجه بالعكس احنا ممكن نشغلها معانا كمان
تشغل مين يا تهامى ؟
يا بت افهمى البت وجه جديد محدش هيشك فيه خالص و الله هتنفعنا ...قومى يلا حمرى لنا شويه كبد على كلاوى كدا عشان نتغدى و سيبك من الكلام ده
حاضر يا اخويا أما نشوف اخرتها
ظلت تيتى تنتظر كريم إلى أن انتصف الليل ...خرجت من الغرفه لتسأل تونه التى تجلس و أمامها لفافات التبغ
فين تهامى يا تونه
عاوزاه ليه
هكون عاوزاه ليه يعنى عاوزه ابنى
زمانه جاى هو لسه متصل على و بيقول أنه فى الطريق
بعد دقائق حضر تهامى و فى يده كريم
قفزت تيتى و اخذت كريم بين أحضانها و اخذت تقبله بكل مكان بوجهه و تقبل يديه و رأسه
انت كويس يا كريم ؟ وحشتنى يا عين امك
انا كويس يا ماما متقلقيش
الحمد لله يا ابنى
انا جبت لك الواد اهو زى ما وعدتك
تشكر يا سيدى عاوزه اروح اجيب له الدوا بتاعه من السكن
قوليلى الدوا فين و انا اجيبهولك
الله هو فى ايه يا تهامى انت حابسنى و الا ايه بقولك هروح اجيب الدوا و شويه حاجات لى و لكريم ...لو عايز تعالى معايا
طبعا رجلى على رجلك....يلا يا اختى
بس هجيب كريم معايا
لا كريم هيفضل هنا مع تونه
لا مش هسيب ابنى مع حد
خلاص هروح اجيب لك انا حاجتك انتى مش كنتى لامه حاجتك كلها فى شنط هروح اجيبهالك يلا نص ساعه و اكون عندكم
انا مش عارفه ايه الاشتغالات اللى ع المسا دى ؟
مالك يا تونه ؟ منا قلت له اروح اجيب حاجتى و هو اللى مش عاوز اعمل ايه يعنى
طيب يا اختى أما نشوف اخرتها معاكى انتى و ابنك
ذهب تهامى و احضر حقيبتين لتيتى ( بعد تفتيشهم ) كانت قد اعدتهم سابقا لتذهب مع ماجد ..
أخرجت تيتى دواء كريم و أعطته له اخذت كريم بحضنها و جلست تفكر ماذا ستفعل
فى اليوم التالى حضر مجموعه من الرجال و كانت تيتى لا تزال نائمه فى غرفتها مع كريم حيث أنها لم تنم إلا بعد شروق الشمس
أفاقت تيتى على حديث الرجال مع تهامى و علمت من خلال الحديث أن تهامى يتاجر باشياء كثيره محرمه و مجرمه من قبل القانون
يا ابن الكلب يا تهامى دا انت مخلتش حاجه غلط إلا و عملتها دعاره و مخدرات و سرقه الله يخربيتك و يخربيت اليوم اللى شفتك فيه ...انا لازم انتقم منك زى ما ضيعتنى و ضيعت ابنى معاك
هبت تيتى من على سريرها و ارتدت فستان قصير فردت شعرها خلف ظهرها مع رشه عطر ساحره
خرجت تيتى على الرجال الجالسين بالصاله
بمجرد أن وقعت أنظارهم عليها أبتسموا بشده ... لاحظ تهامى إعجابهم بتيتى
تعالى يا تيتى سلمى ع الرجاله
اهلا و سهلا
اهلا بيكى يا ست الكل
جلست تيتى تتحدث و عيون الرجال تنظر ...انتهز تهامى الفرصه وبدأ يتفاوض معهم على صفقه كبيره للمخدرات
دخلت تيتى بالحديث و اتفقت معهم اتفاق لا يحلم به تهامى ...حيث اتفقت أن تستلم منهم بضاعه ثمنها يتجاوز الاثنين مليون جنيه على أن يأخذوا نصف الثمن فقط و الباقى بعد تصريف البضاعه
فرح تهامى كثيرا بهذا الاتفاق و لكن اصابه بعض القلق فهو لا يمتلك هذا المبلغ المالى الضخم ...كل ما يمتلكه حوالى نصف مليون فقط لاغير
انصرف الرجال على وعد بسهره جميله مع تيتى.......
براوه عليكى يا تيتى ايه يا بت الحلاوه دى ؟ انتى عملتى كدا ازاى ؟ الناس دى صعبه اوى فى التعامل و مبيسلموش بضاعه إلا و فلوسها تكون حاضره
عيب عليك يا تهامى دا انا تيتى
لا بجد انتى شاطره اوى ...بس فى مشكله
مشكله ايه تانى ؟
انا ممعيش مليون جنيه ادفعهالهم
و لا يهمك ...محلوله
محلوله ازاى بقا ؟؟
من ابو سريع دا على قلبه اد كدا
بس انا مكنتش عاوز حد يشاركنى فى اللقمه دى
يا عم الموضوع خيره كتير و هتكسب من البضاعه دى و لا خمسه مليون
الله دا انتى حاسباها اهو
اه طبعا اومال انت فاكرنى هبله ...بس سيبك انت عمولتى هتبقى كام فى الموضوع ده
عمولتك ؟
ايوه طبعا لا اهو انت فاكر انى بعمل الكلام ده عشان خاطر جمال عنيك و الا ايه الشغل شغل يا روحى
اللى تعوزيه يا تيتى انا تحت امرك
انا مش طماعه انا هاخد الربع مليون اللى لهفتوها منى انت و ابو سريع
و انا موافق ...بس انتى اللى هتخلصى الموضوع ده مع الجماعه دول
طبعا اومال ايه ...عن اذنك لما اروح اشوف كريم
اتفضلى يا حلوه
وقفت تونه واضعه يداها فى خاصرتها و الضيق يظهر على وجهها و تنظر لتهامى نظرة المفترس قبل الهجوم على الفريسه
فيها لاخفيها يا تهامى
يتبع......
#قصص_وحكايات_د_جيهان_عادل
#تيتى
#الجزء_الواحد_والعشرون
وقفت تونه واضعه يداها فى خاصرتها و الضيق يظهر على وجهها و تنظر لتهامى نظرة المفترس قبل الهجوم على الفريسه
فيها لاخفيها يا تهامى
فى ايه يا تونه ؟ ما كلوا ليكى يا بت ...انا و كل اللى بعمله ده ليكى
لا يا اخويا. انا مش هيخيل على الكلام ده انا عاوزه نسبه زى الست
نسبه ايه بس يا تونه ؟ هو احنا هنقعد نقسم الفلوس لما تقل بركتها و بعدين هو انا مخلى نفسك فى حاجه ؟
بقولك ايه يا تهامى مليش فيه يا اما يا اخويا تشوفلك حته تانيه تروح تتفق فيها على اشغالك و تاخد السنيوره معاك
الله الله ...ما تتعدلى فى الكلام يا تونه انتى مالك بتعملى كدا ليه ؟
مش عارف مالى ؟؟ شوف انا بقالى معاك اد ايه ؟ و حصل فى بيتى كام عمليه قبل كدا ؟ و لا عمرك فكرت تدينى زى ما هتدى الهانم ...عملت ايه يعنى عشان تاخد ربع ارنب
يا ستى انتى مش فاهمه تيتى دى هتبقى مفتاح السعد علينا ...انتى مش شفتى الرجاله بتبص لها ازاى ؟
قلت لك مليش فيه ...انا هاخد زيى زيها و هاخد بعد كدا فى كل عمليه تتعمل فى بيتى
بقا كدا يا تونه ؟؟ بتلوى دراعى عشان خاطر بيتك ماشي
خرج تهامى غاضبا و جلست تونه تتوعد و تكاد النار تشتعل بها و هى بمكانها
خرجت عليها تيتى بعد أن سمعت الحوار
مالك يا ست تونه النار وكلاكى ليه ؟؟
انتى عاوزه ايه يا تيتى ابعدى عنى انا مجتش جنبك
انتى اصلا متقدريش تيجى جنبى
بقولك ايه يا بت اتلمى و غورى من هنا لاحسن ارتكب جريمه دلوقتى
ههههههههه غيرانه اوى ان تهامى هيدينى نسبه ؟ دا حقى يا ماما ...فاكره الفلوس اللى سرقتوها منى انتى و هو و ابو سريع ؟ لأ و لسه أن مرجعتش كل قرش خدتوه منى مبقاش انا تيتى
فلوسك ايه اللى خدناها منك يا حبيبتى ؟؟ بقولك ايه يا بت انا مش عاوزاكى فى بيتى امشي اطلعى بره
لا يا عنيا انا مش خارجه من هنا الا اما تهامى هو اللى يقولى
تهامى دا ايه يا اختى الشقه شقتى و كل حاجه هنا بتاعتى و تهامى ده ملوش حكم على حاجه هنا
برده مش خارجه و أما اشوف هتعملى ايه ؟
انا هوريكى هعمل ايه ؟
و قامت تونه تمسك بشعر تيتى و تضربها ، تعض ذراعها ، اوقعتها على الارض و هجمت عليها كاالاسد الجارح...اخذت تيتى تصرخ و تقاومها فقط دون أن تبادلها الضرب ...
خرج كريم على صوت تيتى يتحسس طريقه
ماما ... ماما فى ايه يا ماما
لعنته تونه هو و امه و دخلت احضرت حقائبها و القتها أمام الشقه
يلا من هنا ...امشوا برا يا ولاد الكلب
خرجت تيتى و فى يدها حقائبها و كريم يشعر بالذعر
فى ايه يا ماما ؟
مفيش يا حبيبي احنا هنرجع الاوضه بتاعتنا تانى
رجعت تيتى إلى حجرتها و انتظرت قدوم تهامى و بالفعل بعد مرور ساعه وجدت تهامى يدق على بابها
كويس انى لقيتك هنا ...انا قلت انك هتهربى ؟
ههرب ليه ؟ و هروح فين ؟ ما خلاص و بعدين احنا بينا اتفاق و انا مش هرجع فيه
طب و مشيتى ليه بس من عند تونه كنتى استنتينى
استناك ؟؟ منا لما قلت كدا ضربتنى و عضتنى ...شوف شعرى اتقطع ازاى ...شوف العض فى دراعى
معلش يا تيتى حقك عليا انا
بقولك ايه يا تهامى احنا داخلين على شغل كبير و لازم نكون مرتاحين و معندناش مشاكل.... مش ناقصين ست تونه و مشاكلها راخره
عندك حق و الله
طيب انت لازم توفر لنا مكان تانى و يكون فى حته حلوه مش فى حاره معفنه زى اللى كنت مقابل الناس فيها ...المنظر برده حاجه مهمه
كلامك مظبوط
بقولك ايه انت عملت ايه فى شقه خالتك اللى انا كنت قاعده فيها ؟
الشقه ؟؟؟ انا مأجرها لناس ....انتى عارفه انها فى مكان حلو و صراحه بتجيب قرش كويس
اهى الشقه دى اللى محتاجينها ...احنا لازم نتطق لفوق ... سيبك بقا من الشغل الصغير ده احنا لازم نكبر
ازاى يا تيتى ؟
يعنى لازم نسكن بمكان كويس و بعدين لازم يكون عندنا شركه او حاجه تغطى على نشاطنا الاصلى ....لازم يكون عندنا علاقات كتير ...انت عندك شبكه بنات و دول ممكن ينفعونا فى حاجات كتير اوى فوق ما تتخيلها
وضحى اكتر يا تيتى
يعنى مثلا البنات دول ممكن نزقهم على رجاله كبيره و لها مناصب و يصوروهم و نبتزهم و نخليهم يساعدونا فى اى عمليه شمال بنعملها
يخربيتك يا تيتى انتى دماغك سم ...انتى ازاى فكرتى فى الحاجات دى ؟
الدنيا بتعلم يا تهامى ...بس المهم التنفيذ
انا هخرج الناس انهارده من شقه خالتى
حلو اوى ....عايزاك بقا تغير كل حاجه فى الشقه و تعمل بار كبير لزوم الحفلات و طرابيزه كبيره لزوم اللعب و الذى منه
يا لعبك يا تيتى ....ادينى اسبوع واحد هكون مجهز كل حاجه
لا اسبوع كتير يا تهامى هما تلات ايام بس ...انت ناسي أن فى مقابله مع الناس كمان اسبوع و استلام البضاعه بعدها على طول
طب و حوار الفيلا ؟
فيلا مين ؟ قصدك فيلا ماجد بيه
لا الفيلا دى لها تخطيط تانى خالص
تخطيط ازاى ؟؟
يعنى انت فكرت هتحط المخدرات فين ؟؟
لا ...كنت هعينهم عند تونه
غلط طبعا ...أدى انت شفت اهو طمعت من اولها و عماله تقول بيتى و حاجتى
لا بس انا ضامنها انا ياما خزنت عندها بضاعه
لا بس المره دى تختلف البضاعه بملايين و الفتره الجايه كمان هنوسع نشاطنا اكتر و اكتر
طب و الحل ؟
الحل بقا أن احنا هنخزن البضاعه بتاعتنا فى الفيلا دى ...الراجل مبيجيش الا كل كام شهر مره ..نكون صرفناها
عفارم عليكى و الله ...انتى مخك ذرى
بس المشروطه محطوطه يا تهامى
اؤمرى يا ست الكل
هاخد الربع فى كل عمليه هتعملها
ايه ؟ الربع ليه ؟ الربع كتير يا تيتى
يا سبحان الله ما كنت بتاخد منى الربع و كنت ساكته
لا بس الربع هنا ملايين يا تيتى
و ماله منا كمان هكسبك ملايين يا تهامى
ماشي يا تيتى هعملك اللى قلتى عليه
اه صحيح انا عاوزه شريحه جديده بدل اللى كسرتهالى
اهيه يا ستى كنت جايبهالك معايا و شاحنهالك كمان
تمام كدا ...يلا بقا اعمل اللى قلت لك عليه بالحرف و دور على مكان نعمله شركه استيراد و تصدير
تمام يا تيتى
انصرف تهامى و جلست تيتى تفكر
انا هعرف انتقم منك يا تهامى و الف حبل المشنقه حوالين رقبتك كويس
بعد ايام تم تنفيذ كل ما خططت له تيتى مع تهامى
انتقلت تيتى إلى الشقه التى عاشت بها من قبل ...بدأت فى عمل حفلات لرجال أعمال كانت تعرفهم من نادى ابوسريع
تصالحت مع ابو سريع و اتفقت معه أن يدخل بالشراكة
رحب ابو سريع بالاتفاق و اسرع يتودد لتيتى
بدات تيتى تشغل تهامى و تجذبه بأفكارها الثمينه التى ستجعل منه رجل اعمال كبير فى خلال شهور
بدات ترسم عليه الحب و ان المصلحه قد قربتهم لبعضهما البعض
اهمل تهامى تونه نهائيا و انتبه الى محبوبته الجديده ...المحبوبه التى سترفعه إلى أعلى كان يقول بنفسه دائما
سبحان الله ما محبه الا بعد عداوه
و فى نفس الوقت الذى تخيل فيه تهامى أنه وصل إلى مبتغاه كانت تيتى تخطط لشئ مختلف تماما
ذهبت تيتى إلى القسم و طلبت مقابله ظابط المباحث
سمح لها الظابط بالمقابله
اتفضلى يا ستى ...تحت امرك
انا جايبالك يا بيه قضيه كبيره اوى مخدرات و دعاره و قمار
ايه دا ؟ فين الكلام ده ؟
بس توعدنى يا باشا انى اكون شاهد ملك فى القضيه
طبعا طبعا ...بس اقعدى كدا و احكيلى كل حاجه بهدوء
عنيا يا باشا
يتبع......
#قصص_وحكايات_د_جيهان_عادل
#تيتى
#الجزء_الثانى_والعشرون_والاخيره
انا جايبالك يا بيه قضيه كبيره اوى مخدرات و دعاره و قمار
ايه دا ؟ فين الكلام ده ؟
بس توعدنى يا باشا انى اكون شاهد ملك فى القضيه
طبعا طبعا ...بس اقعدى كدا و احكيلى كل حاجه بهدوء
عنيا يا باشا
جلست تيتى تقص على فارس باشا كل ما تعرفه عن تهامى و عن صفقاته المشبوهه و عن السهرات اليوميه التى تتم ببيته
اخبرته أيضا بصفقه المخدرات التى تم توزيعها و اسماء التجار و أخبرته بوجود صفقه اخرى بعد أيام
استمع فارس لشهادة تيتى باهتمام و فتح محضر أيد كل أقوال تيتى به ...أخذ إذن من النيابه بوضع كاميرات تسجيل فى شقه تهامى لتسجيل الاتفاقات على صفقات المخدرات و الدعاره
تم وضع الكاميرات و تسجيل كل شيء بشقه تهامى و تم معرفه مكان و موعد التسليم الصفقه الجديده
البضاعه المره دى بمبلغ كبير اوى يا تيتى ...انا حطيت كل اللى ورايا و اللى قدامى انا و ابو سريع فيها
و ماله يا تهامى ما انت هتكسب بدل الطاق عشره
بطلى قر بس يا تيتى خلى العمليه تعدى على خير ...احنا بقا بعد ما نستلم البضاعه هنروح بيها ع الفيلا زى كل مره
و ليه الفيلا ما انت خلاص بقا عندك مخازن يا تهامى
المخازن مش هتكفى و بعدين المخازن مليانه بضاعه من اللى بنصدرها
اصل انا خايفه صاحب الفيلا يكون جه ...انت عارف بينزل مصر كل كام شهر
متخافيش انا موقف نادورجيه لو حست بأى حركه هنتصرف على طول
طيب تمام
بعد ايام جاء الميعاد المنتظر و ذهب تهامى ببعض رجاله لاستلام البضاعه بالصحراء ...هجمت الشرطه عليهم و طاردتهم ...للاسف هرب تهامى بسيارته...تم التحفظ على البضاعه و النقود و باقى الرجال ...
تم القبض على ابو سريع بالتزامن مع القبض على شبكه الدعاره و تحريز تربيزه القمار
اما تيتى فقد كانت تعرف بما سيحدث اخذت كريم وأجرت شقه صغيره بمكان لا يعلمه أحد
تهامى لم يجد مكان يذهب إليه إلا شقه تونه تخفى و ذهب إليها بعد منتصف الليل.... دق على الباب ..خرجت تونه لتهامى
انت ايه اللى جابك هنا ؟
انا هربان يا تونه من البوليس خبينى عندك
نعم ؟ اخبيك فين يا عنيا ...يلا يا اخويا ...روح للى بعتنى عشانها
يا تونه انا فى ورطه اقفى جنبى ووطى صوتك شويه لحد يسمعنا
ما يسمعنا يا اخويا ...على رأى المثل فى حزنكم مدعيه و فى فرحكم منسيه ...يلا يا اخويا على ست تيتى بتاعتك
تيتى اختفت الظاهر انها هى اللى بلغت عننا
هههههه صحيح ؟؟ لللللولللى الف مبروك و الله فرحت فيك احسن تستاهل ربنا ينتقم منك و يكسر قلبك زى ما كسرت قلبى
بقولك اخرصى و متعليش صوتك
اوعى كدا شيل ايدك من على بقى ...هصوت و هلم عليك الناس
اخرصى بقا ...
يا لهوووووى
وضع تهامى يده على فم تونه اخذت تقاومه و تصرخ صرخات مكتومه إلى أن صمتت
القاها تهامى على الأرض و هو فى حاله ذهول فهو لم يرد قتلها إنما أراد اسكاتها فقط
لحظات ...وجد تهامى أهل الحى تجمعوا على صوت الصريخ و أمسكوا به و تم تسليمه للشرطه
تم التحقيق مع تهامى فى عدة جرائم.... المخدرات و الدعاره و القتل و تم توجيه تهمه المتاجره بالمخدرات لابوسريع و عدد من رجاله .
**************************
اما تيتى كانت تفكر طوال الفتره الماضيه فى طريقه لتخبر ماجد عن حقيقه ما جرى كما أنها كانت تحتاج إليه ليساعدها فى علاج ابنها بنقود حلال
اخرجت تيتى الكارت الذى أعطاه لها فؤاد ...و لكنها لا تستطيع أن تحدثه مباشره حتى لا يعرف حكايتها و ما حدث لها.
اخذت تيتى عنوان الشركه من الكارت و ذهبت لتسأل عن الاستاذ عبدالحميد الذى أخبرها عنه ماجد من قبل
وجدت عبدالحميد مدير الشركه بمصر ....قصت عليه الحكايه و طلبت منه أن يتصل أو يوصلها بماجد لتعتذر له و تحكى له حكايتها التى ظلمت فيها ظلم بين
و دللت تيتى على صدق كلامها بأخبار تهامى فى الجرائد
تفهم عبدالحميد كلام تيتى و رق لحالها و استدعى السائق و سأله عن حادثه خطف ابنها
تبين لعبد الحميد صدق كلام تيتى و طمأنها أنه سيخبر ماجد بكل شئ و أنه سيساعدها باذن الله
طلب منها رقم هاتفها حتى يعاود الاتصال بها مره اخرى
بعد ايام وجدت تيتى رقم دولى يتصل عليها
ردت تيتى بسرعه لتجد ماجد
الو ...ازيك يا تيتى
ان شالله تسلم يا ماجد بيه
عبدالحميد فهمنى على كل حاجه بس ليه محاولتيش تتصلى بى طول الفتره اللى فاتت دى ؟؟ و تفهميني اللى حصل معاكى؟ ...ليه اخترتى الطريق الصعب ؟
هقولك يا ماجد ...انا لما تهامى كسر الشريحه مكنتش عارفه اكلمك ازاى ؟ رقمك مكنتش حافظاه و كمان كنت عارفه انك خلاص سافرت
كمان لما تهامى ارغمنى انى اقولك الكلام اللى قلته لك فى التليفون حسيت بقهره كبيره اوى ...تخيل بعد ما كنت خلاص هعيش بالحلال و ابنى هيرجع يشوف تانى كل ده انتهى فى لحظه واحده بسبب تهامى ...تهامى اللى جرنى من الاول للطريق ده ....دا كله خلانى احلف انى انتقم منه و انى مش هسيبه ينفد بأعماله القذره دى و عشان كدا لما طلب منى نسرق فيلتك حاولت ارجعه عن اللى فى دماغه و أقوله أن احنا نعملها مخزن احسن عشان احميها من غير ما يشك فيا ...و خليته يعترف قدام الكاميرا أنه بيخزن فيها المخدرات من غير ما انت تعرف عشان ميبقاش عليك اى مسؤليه جنائيه
بس عاوزه اقولك على حاجه يا ماجد
اتفضلى يا تيتى
انا اتصلت بيك عشان متفضلش واخد عنى فكره مش كويسه و تفضل فاكر انى ضحكت عليك .....انا كنت بتقطع لما قلت لى كلكم كدا و أن مفيش واحده كويسه ...اى نعم انا عملت حاجات كتير غلط بس الا انت ...انا عمرى ما اعض الايد اللى اتمدت لى بالخير ابدا
انتى فعلا يا تيتى متعرفيش كلامك ده سود الدنيا اد ايه فى عنيا ...حسيت أن الدنيا دى اتقل خيرها و مبقاش فيها حد اقدر أصدقه ...هزيتى ثقتى فى الناس كلها
عارفه ...و عشان كدا رحت للاستاذ عبدالحميد عشان يقولك على الحقيقه
تانى حاجه عاوزه اقولهالك انا فى الفتره اللى فاتت دى بقا معايا فلوس كتير اوى اخدتها من تهامى عشان اسبك عليه الدور بس انا مش عاوزه اعالج ابنى بالفلوس دى ...انا نفسي اعالج ابنى بفلوس حلال
حاضر يا تيتى ...كل حاجه انا كنت واعدك بيها هعملهالك
لا يا ماجد بيه مش عاوزه كل حاجه انت وعدتنى بيها
لا مش فاهم ...يعنى ايه ؟
يعنى انا عاوزاك تعالج ابنى و نفتح سوا مشروع زى ما قلت لى لكن لحد كدا و خلاص كتر خيرك
يعنى ايه يا تيتى ؟ مش عاوزه ترجعى لأهلك؟ و لا اشوف لك عبدالرحمن فين ؟
لا مش عاوزه ....خلاص يا باشا معدش ينفع ...لا اهلى هيقبلونى بالوضع اللى بقيت عليه دا و لا عبدالرحمن هيقبل يتجوزنى و لى ماضى زى ده ....انا خلاص هعيش لابنى و بس و مش عاوزه اى حاجه من الدنيا دى
طيب انا هحترم قرارك يا تيتى و مش هناقشك فيه بس انا عندى فكره تانيه
فكرة ايه دى يا باشا ؟
بعد ما تعملى العمليه لكريم و تطمنى عليه انا عاوزك تيجى تشتغلى معايا فى الشركه الأم بره ....و تعيشي و تنسي كل اللى حصلك فى مصر و تنسي كل اللى قابلتيهم فى حياتك و تبدأى حياه جديده نضيفه ...و مين عارف يمكن تقابلى ابن الحلال اللى يعوضك عن كل اللى حصل معاكى
يااااا ...ياريت انت كدا تكون عملت فى معروف عمرى ما هنسهولك ابدا
انتى بنت حلال و تستاهلى كل خير يا تيتى .
تمت .
🌹🌹🌹🌹🌹🌹🌹🌹🌹🌹🌹🌹🌹🌹
انا عاوزه اقول بس كلمه تعقيبا على القصه دى ...مش معنى أننا غلطنا يبقى خلاص كدا نفضل مستمرين فى الغلط و نقول خلاص انا رجلى جت و معدش ينفع انى ارجع ...لا دا اسمه قنوط من رحمه الله. ربنا سبحانه و تعالى فاتح لنا ابواب التوبه ما لم تصل الروح للحلقوم أو تخرج الشمس من المغرب ...ربنا بيفرح بتوبه العبد
وقد جاء في الحديث: للهُ أشد فرحا بتوبة عبده حين يتوب إليه من أحدكم كان على راحلته بأرض فلاة، فانفلتت منه وعليها طعامه وشرابه، فأيس منها، فأتى شجرة فاضطجع في ظلها، قد أيس من راحلته، فبينما هو كذلك إذا هو بها قائمة عنده، فأخذ بخطامها، ثم قال من شدة الفرح: اللهم أنت عبدي وأنا ربك، أخطأ من شدة الفرح
صدق رسول الله صلى الله عليه و سلم 🥀
💞💞💞💞💞💞💞💞💞💞💞💞💞💞
اذا عجبتكم القصه ارجو الدعاء لوالدى رحمة الله عليه و سائر موتى المسلمين بالرحمة و المغفره
#قصص_وحكايات_د_جيهان_عادل
كان نفسي تيتي تتجوز ماجد في الاخر 😂😂😂😂
ردحذف