# أسميتها حياة
هحكيلكم انهارده حكايه بنتى اللى هى مش بنتى ..بس هى اكتر من بنتى ...
انا مبلخبطش فى الكلام و لا حاجه زى ما انتوا متخيلين انا كلامى صحيح و فى كامل قوايا العقليه 😅
من حوالى ٢٦ سنه اتجوزت رشاد كنت ساعتها فى سنه اولى كليه التربيه و كان رشاد مهندس متخرج بقاله سنتين من كليه الهندسه . امى جوزتنى بدرى لأنها كانت ارمله و كانت امكانياتها الماديه ضعيفه و ما صدقت تلاقى حد محترم زى رشاد يتقدملى .... و بصراحه رشاد كان رحيم بينا اوى فى مسأله الجهاز دى و مخلنيش جبت حاجات كتير فى الجواز هما يدوب طقم حلل و شويه اطباق و لوازم المطبخ ...حتى لبسي صراحه هو اشترالى اكتر من نصه و كان بيدينى فلوس أثناء الخطوبه و كنت بجهز بيها نفسي
رشاد هو اللى جاب أجهزة المطبخ لما لقى امى مش قادره تجيبها و الحكايه دى مكنش حد يعرفها غيرى انا و هو و امى الله يرحمها بس
كل اللى رشاد كان بيعمله معايا دا خلانى احبه جدا احبه اكتر من اى حد فى الدنيا
رشاد كان بيخاف على من الهوا الطاير ... رشاد مكنش خطيبي و بس لا دا كان ابويا و اخويا و حبيبي و كل ما لى
انا حبيت رشاد من حبه لى .... رشاد كانت نظرة عينه لى بتقول بحبك
و انا كنت فرحانه اوى بالحب ده... الحب اللى عمر ما حد حسسنى بيه قبل كدا .. لان ابويا مات و انا صغيره و موعاش عليه و امى بالرغم من حنيتها بس كانت مشغوله عنى شويه بشغلها عشان تقدر تصرف على و كمان كانت دايما تشد على علشان تعلمنى
أما رشاد فكان الحب ...الحب الخالص المنزه من كل غرض
هو خطبنى و انا فى الثانويه العامه و اتفتحت أحاسيسي عليه هو...
هو كان أول و اخر راجل فى حياتى 😍
و كان بيشجعنى على المذاكره جدا و كان دائما يقولى نفسي تدخلى كليه طب و لما كنت أسأله اشمعنى طب يعنى ؟
يقولى اصل انا كان نفسي ادخل كلية الطب اوى بس للاسف مجبتش مجموع و دخلت هندسه الحمد لله
و لما كنت أقوله بس انا اعرف ان طب دى محتاجه مذاكرة جامده و مصاريف ياما كان يقولى ولا يهمك انا هصرف على دراستك بس اتجدعنى انتى و ادخلى بس
و لما نجحت فى الثانويه و مجبتش المجموع اللى هو كان بيحلم بيه لى زعل شويه بس برده فرحنى و جاب لى سلسله دهب مكتوب عليها أسمى هديه نجاحى
المهم......
اتجوزته فى شقه فى بيت العيله رشاد كان له اخين اكبر منه و كان بيت العيله مكون من اربع ادوار
الدور الاول حماتى ساكنه فيه ... ست كبيره و فى حالها لكن كانت مريضه و زاد مرضها اكتر بعد ما جوزها توفى
الدور التانى و التالت سلايفى الرجاله متجوزين و مخلفين
سلفى محمد اللى فى الدور التانى اكبر من جوزى بعشر سنين و كان صراحه زى أبوه و ساعده كتير و كان متجوز و عنده بنت وولد .....البنت عندها ٨ سنين و الولد ٦ سنين
أما سلفى اللى فى الدور الثالث سعيد و كان أكبر من جوزى ب٨ سنين و برده كان متجوز و عنده بنتين بنت عندها ٧ سنين و بنت عندها ٣ سنين
أما حمايا الله يرحمه توفى قبل ما اتجوز رشاد بحوالى خمس سنين يعنى رشاد كان لسه فى الثانوى ساعتها
قبل ما اتجوز رشاد كان مفهمنى أن مرتات اخواته بينزلوا يخدموا امه و كان بيقولى انى انا كمان هنزل اشوف طلباتها
انا صراحة كنت مقلقه لانى كنت بسمع عن المشاكل اللى بتحصل فى بيت العيله و شغل السلايف اللى بنسمع عنه
بس صراحه رشاد طمنى جدا و قالى متقلقيش خالص مش هخلى حد يدوس لك على طرف و متخافيش اخواتى و زوجاتهم طيبين و امى طيبه جدا
اتجوزت رشاد و من تانى اسبوع بقيت انزل لحماتى علشان اشوف طلباتها
بصراحه كان عندهم نظام حلو فى البيت
كنت قبل ما اجى كان سلايفى الاتنين مقسمين شغل شقة حماتى يوم و يوم يعنى مرات محمد كانت تنزلها حد و تلات و خميس
و مرات سعيد كانت بتنزل سبت و اتنين و اربع
و كانوا يوم الجمعه ينزلوا يتجمعوا باولادهم و ازواجهم يطبخوا و يتغدوا سوا و كان بيجى أختين لحماتى مره او مرتين فى الشهر عشان يزوروها لأنها كانت تعبانه و مبتقدرش تروح فى حته
لما انا اتجوزت سلايفى طلعوا يباركولى و قالولى على نظام البيت و قالوا إنهم هيسبونا اسبوع و بعد كدا الشغل يتقسم علينا احنا التلاته كل واحده يوم
يعنى كل واحده مننا يومين فى الاسبوع و يوم الجمعه نتجمع كلنا
و فعلا من تانى اسبوع نزلت و بقيت اعمل اللى حماتى محتجاه من أكل و شرب و غسيل و مسيح و مسح سلم
و تنضيف البوابه و غسيلها بالميه و الصابون
و كانت الحياة ماشيه
و فى يوم جمعه كنا كلنا متجمعين تحت عند حماتى و كانت اختها جايه تزورها فى اليوم ده و سالتنى قدام الكل
ايه يا مشيره مفيش حاجه كدا جايه فى السكه ؟
الكلام ده بعد حوالى ٣ شهور من جوازى
قلت لأ يا خالتى لسه و الله
قالت لا اتجدعنوا كدا سلايفك الاتنين حملوا فى نفس الشهر اللى اتجوزوا فيه ....
طبعا انا اتحرجت اوى و كنت نفسي ارد عليها و اقولها هو دا بارادتى يعنى ما كله بإرادة الله
بس سكت و خدت الكلمه فى نفسي و لما طلعت قعدت اعيط.... رشاد شافنى و قالى مالك يا حبيبي زعلان ليه مين زعلك ؟؟
قلت له انا عاوزه اروح لدكتور نسا يا رشاد
قال ليه هو انتى تعبانه و الا ايه؟
قلت له لا بس عاوزه اشوف الحمل اتاخر ليه لدلوقتى
قالى ايه الهبل دا حمل ايه اللى بتفكرى فيه و انتى داخله على امتحانات ...هو انا قلت لك انى عايز اخلف يا ستى
لا مقولتش بس نظرات خالاتك ووالدتك و سلايفى لى بتموتنى و عايزه اعرف سبب تاخير الحمل ايه
تأخير ايه و هبل ايه يا بت يا هبله دا انتى لسه عندك ١٩ سنه يعنى ايه عيله ...عمرك شفتى عيله بتولد عيل 😂🤣🤣🤣🤣
يا رشاد متهزرش من فضلك
اسكتى يا مشيره و ركزى فى دراستك احسن من الكلام اللى بتقوليه دا و بكرا يا ستى ترجعى تعيطلنا و انتى بتشدى شعرك من العيال و انا هقولك احسن احسن 😜😜😜😜😜
ساعتها ضحكت و قعدت اذاكر بس برده كلام خالته بيرن فى ودنى و أنهم اكيد كلهم بيتكلموا على من ورايا😔
اد ايه الناس ممكن تجرح غيرها بكلمه و هما مش حاسين بيرموا الكلمه و ميعرفوش انها بتبقى زى النار فى قلب اللى قدامهم و هما و لا على بالهم . لو الناس تخليها فى حالها مكنش اللى حصل حصل
بعد موقف خالة زوجى دا انشغلت فى امتحانات و بقيت مركزه اوى علشان انجح و افرح رشاد جوزى اللى كان بيدعمنى بكل قوة
خلصت امتحانات و النتيجه طلعت و نجحت الحمد لله
رشاد صمم أنه يعمل عزومه كبيره بمناسبة نجاحى
و فعلا عملنا عزومه كبيره اوى على حساب جوزى
و صراحه سلايفى الستات وقفوا معايا و عملنا اكل زى ما يكون فرح عزمنا امى وخالاته و أخواله و أعمامه و طبعا اخواته و أولادهم و بعض الجيران و الكل كان فرحان
اكل و حاجات حلوه و حاجات ساقعه و لقيت خالته بتسلم عليه و تبوسه و تقوله عقبال ما نيجى نبارك لك على النونه يا رشاد يا حبيبي
طبعا انا سمعت الكلمه و حبست دموعى هى ليه مصممه أن فى اى مناسبه تعكنن على و تخلينى ازعل
عرفت بعد كدا أن خالته دى كانت نفسها تجوز بنتها لجوزى و هو مرضيش و قالها أن بنتها زى اخته بالظبط
طبعا خلصنا العزومه و بقى اكل كتير جدا و حلويات
رشاد طلب منى إن إحنا نجيب اطباق أو علب و نوزع على الجيران ....و فعلا وزعنا و الناس كانت فرحانه اوى
بعد ما خلصنا توزيع الاكل و تشطيب المطبخ انا و سلايفى طلعت فوق و انا مقهورة .... فات ٦شهور على جوازى
و كل ما الناس تشوفنى تسالنى ... و حماتى صراحه مبتتكلمش بس دايما الاقيها بتدعى لى بعوض يجيلى
و عارفه انها نفسها تشوف ابن لرشاد لأن رشاد أصغر عيالها و له معزة خاصه عندها
امى فى اليوم دا باتت معايا و شافتنى و انا زعلانه و سالتنى مالك يا حبيبتى
قلت لها انا عاوزه اروح لدكتور نسا يا ماما اشوف ايه سبب تاخير الحمل لغاية دلوقتى
امى قالت لى و مستعجله على ايه يا حبيبتى افرحيلك شويه و اتهنى انتى و جوزك قبل ما العيال تيجى تلخمكم و تخليكم مش عارفين تبصوا وراكم ....طب انتى عارفه انا قعدت مع ابوكى خمس سنين قبل ما اخلفك و كانت اجمل سنين عمرى و عمره الصراحه ما قالى نروح لدكتور و الا نشوف الخلفه و انا كمان مكنش الموضوع ده هاممنى خالص لانى كنت بعتبر ابوكى دا ابنى و جوزى و حبيبي و كل حاجه لى فى الدنيا
بس اكيد لما عرفتى انك حامل فى كنتى سعيده يا ماما؟
طبعا دا انا ساعتها كنت طايره من الفرحه و كنت حاسه ان اللى فى بطنى دا هيربطنى اكتر و اكتر بابوكى الله يرحمه
و بابا لما عرف عمل ايه ؟
ياااا فكرتينى باجمل لحظات حياتى يا مشيره ..ابوكى لما عرف بقت الدنيا مش سايعاه بقى يرقص و يسقف و انا اضحك عليه و راح مطلع كل الفلوس اللى فى جيبه و قال و الله لأتصدق بكل اللى معايا عشان خاطر الخبر الجميل دا
و فعلا خرج و الفلوس فى ايده محطهاش فى جيبه تانى و نزل على الجامع اللى قصادنا و حط كل الفلوس اللى معاه مخلاش قرش فى جيبه
و طلع لى و هو فرحاااان .... و انا قلت له طب مش كنت تخلى معانا اى قرش ...افرض حصل حاجه دلوقتى
قال متخافيش .... اوعى تصدقى أن إحنا كدا فقدنا الفلوس بالعكس دا ربنا هيبارك لنا و يضاعفهالنا
و انا قلت له و نعم بالله طبعا بس ....
قال مبسش و لا حاجه انا هقوم اعملك فرخه حلوه كدا من اللى فى الفريزر و شويه رز جنبهم تاكلى صوابعك وراهم
ضحكت و قولت له أنت اللى هتعملى ؟؟؟
قال ايوه طبعا دا انا بطبخ احسن منك اومال انتى فاكره ايه
و فعلا ابوكى كان نفسه فى الاكل حلو اوى و عمل لنا الاكل و قعد ياكلنى و يقولى كلى عشان تغذى البت
قلت له أنت خلاص عملتها بنت ...قال ايوه انا نفسي فى بنت اوى و تكون شبهك كدا يا حلو انت يا حلو ...
قلت له بس انا نفسي فى ولد و اسميه محمود على اسم ابويا الله يرحمه
قال الله يرحمه اوعدك لو جه ولد هنسميه محمود على اسم ابوكى و لو جه بنت هسميها مشيره على اسم امى الله يرحمها ...
طيب يا ماما و لما ولدتينى و عرف انى بنت عمل ايه ؟
يااااا عمل فرح و جاب كهارب و عمل ليله لاهل الله و دبحنالك عقيقه خروفين و لما قلت له السنه ان للبنت خروف و الولد هو اللى بيتدبح له خروفين
قال اسكتى مشيره عندى بالف ولد دا دى هتبقى حبيبتى
و فعلا انتى كنتى نور عين ابوكى مكنتيش تنامى الا فى حضنه و كان مدلعك موت و كنت كل ما اقوله كدا هتفسد البت يقولى و انتى مالك يا غياره انتى غيرانه منها و يضحك و انا أقوله كدا اخص عليك زعلانه منك
كان يقوم و يبوسنى فى جبينى و يقولى هو انا لى بركة الا مشيره و ام مشيره دا انتى الحب الاولى
لغاية ما فى يوم جالى الخبر المشؤوم و كان أسوأ يوم فى حياتى .... قبلها كنتى عماله تصرخى و انا مش عارفه بتصرخى ليه زى ما يكون قلبك حاسس يا حبيبتى و بقيت رايحه جايه بيكى و عماله اقول اكيد عندها مغص و الا حاجه تعباها...و كنت بقول لما ابوها يجى ناخدها عند الدكتور و نشوف مالها
بعدها لقيت الباب بيخبط استغربت أن ابوكى مفتحش و دخل زى كل يوم ...و قمت افتح له لقيت ناس جايبين لى بطاقته و نضارته و بيقولولى جوزك عربيه خبطته و فى المستشفى ....بقيت أجرى زى المجنونه و انتى على دراعى و معايا اتنين من الجيران
اول ما وصلت و دخلت عليه لقيت حالته صعبه اوى و الدم مغرق هدومه قعدت اصرخ صابر ....صابر .. انتبه لى و بص عليكى كدا و قالى خلى بالك من مشيره
و لقيته فجأه شهق و نفسه قطع ...انا للحظه مستوعبتش اللى حصل ...لقيت الممرضات و الدكتور جايين يجروا و راحوا زقنى بره الاوضه و قعدوا يعملوا إنعاش للقلب بس مفيش فايده 😔 و خرج لى الدكتور و قالى البقاء لله
بقيت أشد فى الدكتور و اصرخ و أقوله لا .. صابر ممتش ادخل ادخله تانى ...هو فى غيبوبه ...ابوس ايدك حاول تانى ... طب اعمله صدمات كهربا ...ارجوك يا دكتور دا انا مليش غيره فى الدنيا.... دا بنته لسه عندها سنتين ...مين هيربيها ...مين هيعلمها.... مين هيصرف عليها
ارجوك يا دكتور ابوس ايدك
الدكتور قالى والله يا ست احنا عملنا كل اللى نقدر عليه بس هو عمره كدا
طبعا لقيت الدنيا اسودت فى وشي ووقعت من طولى
الجيران اللى كانوا معايا اخدوكى و خلصوا الإجراءات
و بدأت رحلتى معاكى بقيت اوديكى حضانه و اروح اشتغل فى مصنع لأن معاش ابوكى كان صغير اوى لانه مات صغير يا حبيبي كان عنده ٣٠ سنه 😔
انا اسفه يا ماما قلبت عليكى المواجع
لا ابدا يا بنتى هو انتى فاكره انى ناسيه ...انا كل يوم بنام دمعتى على خدى لما بفتكر الله يرحمه ابوكى و من ساعه ما مات و انا بقوم بالليل اصلى قيام ليل و ادعيله أن ربنا يرحمه و يغفر له و يجمعنى بيه فى الجنه ان شاء الله
انا بحبك اوى يا ماما
و انا كمان يا مشيره بحبك يا بنتى و مش عاوزه اى حد يأثر عليكى و يخليكى تزعلى عايزاكى زيى كدا جبل واقف متهزوش اى ريح و إن كان على حكاية الدكتور انا يا ستى هاخدك اوديكى عند دكتوره شاطره اوى عشان ترتاحى بس ..مع انى متاكده أن مفكيش اى حاجه بإذن الله
قمت بوست راس امى و ايدها و قلت لها ربنا يخليكى ليا يا ست الحبايب
و انا كمان يا مشيره بحبك يا بنتى و مش عاوزه اى حد يأثر عليكى و يخليكى تزعلى عايزاكى زيى كدا جبل واقف متهزوش اى ريح و إن كان على حكاية الدكتور انا يا ستى هاخدك اوديكى عند دكتوره شاطره اوى عشان ترتاحى بس ..مع انى متاكده أن مفكيش اى حاجه بإذن الله
قمت بوست راس امى و ايدها و قلت لها ربنا يخليكى ليا يا ست الحبايب
بعد شويه طلع رشاد من تحت و كان فرحان اوى بالعزومه الحلوه اللى اتعملت و كانت امى نامت
دخل رشاد على و لاقانى قاعده سرحانه ...و سالنى
سرحانه فى ايه يا مشمش ؟؟
قلت له انا عاوزه اطلب منك طلب بس متكسفنيش
عينى ليكى يا مشمشتى اطلبى و لو اقدر عليه هعمله لكى فورا
انا عايزه اروح لدكتوره نسا عشان عايزه اتطمن و اشوف سبب تاخير الحمل ايه ؟
تانى يا مشيره ؟؟؟؟؟؟
عشان خاطرى يا ريشو ...عشان خاطر مشمش حبيبك
خلاص يا ستى روحى و لو انى مش مقتنع بالكلام ده .....دا لا وقته و لا ميعاده ...بس اذا كان دا اللى هيريحك خلاص روحى
يريحك قلبك بزيارة الحبيب النبى ياااارب
انا و انتى يا حبيبتى
تانى يوم امى حجزت بالتليفون عند الدكتوره و رحنا على اخر النهار
الدكتوره كشفت على و قالت لى انتى زى الفل مفيش اى سبب للتاخير
قلت لها صحيح يا دكتوره يعنى انا أقدر اخلف ؟
قالت ايوا بس كله بامر الله طبعا
و نعم بالله و الله يا دكتوره انا قلت لها الكلام ده و قلت لها مستعجله على ايه انتى لسه صغيره بس مش عارفه دماغها فيها ايه
ردت الدكتوره متقلقيش خالص يا مشيره لأن القلق فى الحالات دى بيأخر ....سبيها على الله
طيب يا دكتوره مفيش منشط كدا و الا اى حاجه اخدها تسرع الحمل ؟؟
و الله انتى ما محتاجه منشطات خالص و التبويض عندك ممتاز ..بس عشان اريحك يا ستى هكتب لك على منشط تاخديه فى وقت معين فى الشهر و سبيها على الله زى ما قلت لك.
مشيت من عند الدكتوره و انا فرحانه و زاد عندى الامل انى ممكن احمل زى اى انسانه طبيعيه ...
رجعت البيت و حكيت لرشاد على اللى الدكتوره قالته
و قالى شفتى يا بت زى ما قلت لك بالظبط
قلت له صح يا قلب البت هو انت تقول حاجه غلط ابدا
قال امال ليه المقاوحه من الاول ؟ ابقى اسمعى الكلام بقا
فات شهرين تلاته و لغاية ما تميت السنه و برده محصلش حمل .... كود...
رشاد اقترح على نروح نقضى خميس و جمعه فى اسكندريه بمناسبه عيد جوازنا الاول ...طبعا انا ما صدقت و فرحت اوى
و فعلا سافرنا قضينا احلى يومين عسل فى حياتنا
لما رجعنا من السفر امه ندت عليه و انا طلعت على فوق بعد ما سلمت عليها لانى كنت تعبانه اوى من السفر
بعد شويه لقيت رشاد طالع مسهم
مالك يا رشاد هى ماما قالت لك حاجه ضايقتك ؟؟
لا ابدا مفيش حاجه يا مشيره
كدا بتخبى على مشمش حبيبك ؟؟
مبخبيش و لا حاجه بس هى كلمتنى فى موضوع الخلفه دا و قالت لى فاتت سنه اهو و انا نفسي افرح باولادك قبل ما اموت
طب ليه مقلتلهاش انى كشفت و أن مفيش حاجه و الخلفه دى من عند ربنا
يا حبيبتى قلت لها و قلت انى مش مستعجل و لسه قدامنا العمر أن شاء الله
و هى ردت قالت لك ايه
هى سكتت و قالت زى ما تحب يا ابنى انا مبدخلش فى حياتك بس كنت عايزاك تشوف نفسك بدرى علشان تلحق تخلف لك عيل يحمل اسمك
قلت لها أن شاء الله يا ماما .... عايزه منى حاجه ؟
قالت لأ 😒
و طلعت
طيب يا رشاد تعالى نروح لدكتور تانى و نشوف
يا مشيره و الله الموضوع دا مش فى دماغى اصلا و انا سايبها على الله
و نعم بالله بس ربنا قال ناخد بالاسباب و أن كنت انت مبتفكرش فى الموضوع دا غيرك بيفكر و انا قلت لك قبل كدا أن الكل بيبص على و فى عنيهم الف سؤال و سؤال ليه محملتيش ؟ زى ما يكون انا اللى مانعه الخلفه 😔
احنا نروح نحجز بكرا عند دكتور احمد اللى مرات اخوك سعيد بتروح له بتقول عليه شاطر اوى هاخد منها النمره و نحجز عنده
لا بلاش الدكتور اللى بتتعالج عنده مرات اخويا احنا مش عاوزين حد يعرف عننا حاجه و لا تقوليلها هاتى النمره و لا حاجه انا هسال حد من اصحابى على دكتور كويس و نروحله
بعد يومين سالت رشاد عن الدكتور و قال إنه شاف دكتور كويس و خلى واحد صاحبه حجزله اخر الاسبوع عنده
و رحنا فى الميعاد .... و الدكتور كشف على و قال المدام زى الفل مفيهاش اى حاجه
قلت امال الحمل اتاخر ليه يا دكتور احنا بقالنا سنه
الدكتور قال احنا دلوقتى لازم نعمل تحليل للزوج و نشوف و ربنا يسهل
لقيت رشاد ظهر على وشه القلق و قال بس انا كويس يا دكتور مبشتكيش من حاجه
الدكتور طمنه أن دا إجراء روتيني فى الحالات اللى زى دى و ان شاء الله مش هيكون فى حاجه
الدكتور كتب لى شوية فيتامينات و كتب لرشاد التحليل و قاله يروح يعمله بعد ٣ ايام
رشاد عمل التحليل و كان ميعادنا مع الدكتور الخميس اللى بعده
اخدنا التحليل و رحنا للدكتور
الدكتور اول ما بص فى التحليل سكت و بان على وشه الضيق ....
رشاد بص له كدا بقلق و قاله ايه دكتور هو فى حاجه فى التحليل مش كويسه ؟؟؟
اخدنا التحليل و رحنا للدكتور
الدكتور اول ما بص فى التحليل سكت و بان على وشه الضيق ....
رشاد بص له كدا بقلق و قاله ايه يا دكتور هو فى حاجه فى التحليل مش كويسه ؟؟؟
انا اسف يا بشمهندس عندك شويه مشاكل كدا فى العدد و الحركه
يعنى ايه؟ يعنى مش هخلف ؟
الخلفه دى بأمر الله و لا انا و لا انت لينا دخل فيها ...بس احنا هنشتغل على برنامج علاجى لمده ست شهور و ان شاء الله خير
طلعنا من عند الدكتور بعد ما كتب لرشاد روشته كبيره فيها مكملات غذائيه و ادويه تانيه غاليه اوى
طول الطريق رشاد كان ساكت و انا كمان متكلمتش كنت خايفه من ردة فعله فى الشارع
دخلنا شقتنا و لقيته اترمى على اول كنبه فى الصاله و حط الدوا قدامه و عنيه كلها دموع
انا دخلت عملت كوبايه ليمون و حطيتها قدامه و قعدت تحت رجله على الأرض رفعت ايده من على وشه و قلت له :
انت زعلان ليه ؟؟ الدكتور قالنا أن الدوا أن شاء الله هيعالج المشكله البسيطه دى و خلاص ايه اللى حصل يعنى يخليك تقهر نفسك كدا
رشاد كان ساكت و مبيتكلمش 😔
و بعدين يا رشاد انا حاسه ان ربنا فضله واسع و أنه إن شاء الله هيرزقنا....
الكلام كان بيقف و مش عارفه اكمل و انا شايفاه ابتدى يعيط بصوت عالى ....لقيت نفسي انا كمان بعيط على عياطه و قمت من الأرض اخدته فى حضنى و قعدت اطبطب عليه ... قعدنا على الحال ده شويه لغاية ما سكت و مسحت دموعه من على خده و قلت له أنت تعبان دلوقتى قوم غير هدومك و نام لك شويه
رشاد قام من غير ما ينطق بكلمه و دخل على السرير اترمى عليه بهدومه و انا قعدت فى الصاله اعيط و اكلم نفسي ....
هل لا قدر الله لو المشكله اللى عند رشاد دى متحلتش يبقى كدا خلاص مش هبقى ام ابدا ..... مش هيكون لى طفل يقولى يا ماما .... هل انا هقدر اسيب رشاد و اتجوز غيره عشان ابقى ام .....بس انا مقدرش اسيبه ابدا .....
رشاد هو قلبى و حياتى هو كل حاجه لى .... رشاد فعلا ابويا واخويا و ابنى .... انا فى الحقيقه بعيط على زعله اكتر من انى بعيط على موضوع الحلقه دا.
اه طبعا الموضوع كبير بس زعله عندى اكبر من اى شئ
انا خلاص معنتش اتكلم فى الموضوع دا تانى ....طب لو سألونى عن تأخير الحمل زى ما بيعملوا هرد اقول ايه ؟
مش لازم حد يعرف عننا حاجه زى ما رشاد قال ...و أن كان و لابد يبقى أقول إن عندى شوية مشاكل فى التبويض و خلاص ....
قعدت افكر بالشكل دا و حتة انى مش هقول لحد دى ريحتنى شويه و قمت دخلت على اوضة النوم لقيت رشاد نايم و على خده دمعه 😔 طفيت النور و نمت جنبه
تانى يوم رشاد صحى من بدرى جدا و انا قلقت اول ما شفته قام من جنبى و طلعت وراه فى الصاله
صباح الخير يا حبيبي
صباح النور
نمت كويس انهارده ؟؟
عايزه ايه يا مشيره ؟
لا مش عايزه حاجه انا بطمن عليك بس
اطمنى يا ستى انا بخير
انت بتكلمنى كدا ليه يا رشاد هو انا عملت لك حاجه
بكلمك ازاى يعنى ؟؟؟ شايفانى عملت لك حاجه ؟بقولك ايه انا مش عاوز اتكلم مع حد و الا اقولك انا هسيب لك البيت خالص و امشي من وشك
و فعلا قام فتح الباب و خرج و انا مذهوله من طريقه كلامه لى ....انا عشت معاه سنه عمره ما كلمنى بالطريقه دى ..... طب كان ياخد و يدى معايا فى الكلام و انا كنت هقوله أن الخلفه متهمنيش و كل اللى يهمنى هو و بس
انا برده لازم اعذره و مش هزعل منه انا لازم اسيبه براحته
اليوم ده كان الجمعه يعنى يوم التجمع تحت عند حماتى
غسلت وشي و اتوضيت و صليت الصبح و نزلت تحت قلت اكيد هلاقى رشاد تحت
لكن للاسف ملقتوش و حماتى سالتنى عليه قلت لها واحد صاحبه اتصل عليه وراح له
سلايفى نزلوا يحضروا الفطار معايا و محمد اخوه سالنى امال فين رشاد يا مشيره منزلش يفطر معانا ليه ؟
قلت له أصله فى مشوار مع واحد صاحبه يا استاذ محمد
رشاد مجاش على الغدا ...و الكل بقا يسأل عليه و امه كانت قلقانه عليه و انا كمان كنت هموت عليه بس بحاول مبينش
امه ندتنى لوحدى و سالتنى هو فى حاجه حصلت يا بنتى ؟؟ هو حصل ما بينكم زعل و الا حاجه ؟
قلت لا ابدا يا ماما مفيش زعل و لا حاجه
قالت انا يا بنتى مبتدخلش بينكم بس عايزه اتطمن عليكم برده ...انتى عندى متتخيريش عن رشاد و انا ملاحظاكى طول النهار برده مش زى عوايدك و مسهمه كدا
لا ابدا يا ماما مفيش حاجه ...متشغليش بالك بس
طيب يا بنتى لو حبيتى تتكلمى فى اى وقت انا موجوده ...انا يهمنى أن كلكم تكونوا مبسوطين و بخير
خرجت من عندها و انا حابسه دمعتى بالعافيه و طلعت على فوق ....
بعد شويه لقيت رشاد جه من برا ...جريت عليه و قلت له احضرلك العشا
قال لا و دخل على اوضة الاطفال .... دخلت وراه و قلت له
هو انا زعلتك فى حاجه
قاطع كلامى و قالى لو سمحتى يا مشيره انتى مزعلتنيش و لا حاجه و انا مش زعلان منك بس انا مش عايز اتكلم ....من فضلك سبينى على راحتى لغاية ما أهدى و اجى اكلمك انا بنفسي
حاضر يا رشاد انا مش هضايقك و هسيبك براحتك خالص
الوضع دا استمر اسبوع و رشاد يدخل البيت اخر النهار على اوضة الاطفال ينام و يصبح يمشي على شغله ...مكلمنيش فى الأسبوع دا كلمه واحده و انا بموت من جوايا و مش عارفه اعمل ايه و لا اقول لمين
و الكل لاحظ رجوعه المتاخر و معاملته المتغيره و لما كانوا بيسالونى كنت بقولهم أنه عنده مشاكل فى الشغل
بعد الاسبوع ما عدى لقيت رشاد داخل على اوضه النوم فرحت اوى و قلت اخيرا هيكلمنى ...قمت من مكانى زى طفل كان مستنى أبوه اللى جاى من الشغل و جايبله حاجه حلوه معاه
قمت حضنته و قلت له وحشتنى ....هنت عليك متكلمنيش الفتره دى كلها يا ريشو
راح شايل اديا من حوالين رقبته و قالى مشيرة احنا لازم نطلق .....
ايه انت بتقول ايه ؟؟؟
انا مش عاوز اظلمك معايا
تظلمنى ايه ؟؟ و مين قالك انى حاسة بظلم ؟
انا مش هستنى انك تحسي بالظلم معايا و لا انك تعيشي محرومه من الامومه و لا هستنى انك تكونى ضحية ظروف ملكيش ذنب فيها
انت بتقول ايه ؟ محرومة ايه و ضحية ايه اللى بتتكلم عليها ؟ انت ليه بتسبق الأحداث ؟ انت خلاص يئست من رحمة ربنا و قررت انك مش هتخلف و انك مش عاوز تحرمني من الخلفه؟
يا مشيره انا اخدت التقارير و رحت عرضتهم على اتنين دكاتره تانين و قالولى أن نسبه انى اخلف قليلة جدا تكاد تكون منعدمه ... و انا زى ما قلت لك مش عاوز اظلمك و لا اديكى امل مش هيحصل
اسكت ... متقولش كدا ...انت مدخلتش فى رحمة ربنا و لو افترضنا انك فعلا مش هتخلف زى ما بتقول عايزنى اسيبك ؟؟طب ازاى ؟؟ هو انت فاكر أن انت جوزى و بس ....انت ابويا اللى مشفتوش ...انت ابنى اللى مخلفتوش ....انت اخويا اللى عمر ما حسيت بوجوده الا معاك
بلاش كلام عاطفى يا مشيره و خليكى فى الواقع اللى اكبر منى و منك
واقع ايه اللى اكبر منى و منك يا رشاد ؟؟ فهمنى...فهمنى من فضلك
واقع أن انتى لسه صغيره و من حقك تكونى أم
عايزه اسالك سؤال يا رشاد و تجاوبنى عليه بكل صراحه ؟هل لو انا اللى كنت طلع عندى مشكله ومبخلفش كنت هتسبنى ؟؟
لا طبعا عمرى ما كنت هسيبك
طب يبقى انت جاوبت على نفسك خلاص ...و انا كمان زيك و عمرى ما هتخلى عنك ابدا
بس انا مش عاوز اظلمك معا
بس ..انت عمرك ما ظلمتنى و لا هتظلمنى و اسكت بقا عشان انا زعلانه منك اوى ... ازاى فكرت انك تبعد عنى أو تطلقنى ...ازاى طاوعك لسانك انك تنطق الكلمه دى ؟
انا بحبك يا مشيره و كان لازم اديكى حق الاختيار
و انا يا سيدى مش عاوزه الحق ده ...مش عاوزاه. ...انا عاوزاك انت و بس.... انا معرفش راجل تانى فى دنيتى غيرك انت ....انا مليش حد فى الدنيا غيرك انت
خلاص يا مشيره انا آسف
لا آسف كدا دى مش كفايه 😊
اومال عاوزه ايه يا ستى ؟
عاوزاك توعدنى انك مش هتقطع الأمل فى ربنا و انك تاخد الادويه اللى الدكتور كتبهالك و انك تاخدنى فى حضنك دلوقتى و تبوس على راسي و تقولى حقك على يا حياتى
حاضر يا ستى حقك على يا حياتى و يا قلبى و يا عقلى كمان...ربنا يخليكى لى
و يخليك لى يا حبيبي
بعد كدا رشاد ابتدى ياخد العلاج اللى كتبه له الدكتور و انتظم عليه ....و فاتت الست شهور و الكل بدأ يبص لى بنظرة اتهام انى السبب فى تأخير الحمل .
و فى يوم لقيت سلفتى الكبيره ثناء بتقولى ايه يا مشيره مفيش حاجه جايه فى السكه والا ايه؟
قلت لها ربنا يسهل يا ام احمد
قالت انا اعرف دكتوره كويسه اوى ممكن اخدك و نروح لها و نطمن عليكى
قلت لها انا دلوقتى عندى امتحانات ...أن شاء الله بعد الامتحانات هبقى اروح .
حتى أن محمد سلفى الكبير اتكلم مع رشاد فى الموضوع ده و قاله ما تاخد مراتك تكشف عليها و تشوف ايه سبب تأخير الحمل طبعا رشاد كان متضايق بس مقدرش يقوله أن مراتى مفيهاش حاجه و قاله أن شاء الله و طلع و هو متضايق جدا و قالى
انا مش عارف ليه الناس مش سيبانى فى حالى ما كل واحد يخليه فى حاله لازم كل ما حد فيهم يقعد معايا يفكرنى و يقولى على حكاية الحمل دى و الله انا عاوز امشي من البيت ده و بفكر انى انقل شغلى لمحافظه تانيه عشان الكلام ده
قعدت اخفف عليه و أقوله معلش هما خايفين عليك و نفسهم يفرحوا باولادك و إن احنا لازم نريحهم و نقولهم إن إحنا هنروح و بعد كدا نقولهم إن الدكتور قال إن التبويض مش منتظم و أنه ادانى شويه ادويه امشي عليهم و خلاص
رشاد قالى طب و ليه اطلعك انتى السبب
قلت له ارجوك يا رشاد انا عاوزه كدا ...دا هيريحنى اكتر
رشاد هز دماغه بالموافقه و شكله مكنش مقتنع اوى
و فعلا رحنا للدكتور و طلب من رشاد يعمل تحليل تانى بعد كورس العلاج اللى اخده
و فعلا عمل التحليل و لقى تحسن بسيط اوى فى النتيجه
الدكتور قاله أن الحل دلوقتى فى طفل الانابيب
بصينا انا و رشاد لبعض و قلت ايه طفل الانابيب دا؟؟
كنا اول مره نسمع عن الموضوع ده
الدكتور قال زوج حضرتك عنده مشكله فى العدد و الحركه و ممكن أن نتغلب على الموضوع ده بأننا نعمل عمليه تخصيب للبويضه خارج الرحم و بعد كدا بنزرعها فى رحم الأم و بتستكمل مراحل الحمل العاديه بطريقه طبيعيه
رشاد استغرب و قاله و هل دا حلال ؟؟
الدكتور قال طبعا حلال لان البويضه المخصبه دى بتبقى من الزوج و الزوجه هو مجرد بس إن إحنا بنخصب بره و نزرعها بعد كدا
سألته طب مش ممكن تتلخبط البويضه دى مع اى حد و يزرعوا لى بويضه مختلفه مش بتاعتى
الدكتور ضحك و قال مش ممكن طبعا و ايه مصلحتهم يزرعوا فيكى غير البويضه بتاعتك
رشاد سأله طب حضرتك بتعمل العمليه دى يا دكتور ؟؟
الدكتور قاله للاسف لا بس انا ممكن أدلكم على مركز للتلقيح الصناعى و اطفال الانابيب لواحد زميل لى لسه راجع من لندن بقاله سنتين و بيشتغل فى الموضوع ده
سألته و الموضوع دا مكلف يا دكتور ؟ و نسبه نجاحه اد ايه ؟؟؟
هو طبعا مكلف شويه ، و نسبه نجاحه ٥٠٪ تقريبا
تمام يا دكتور ممكن حضرتك تدينا اسم المركز و عنوانه
اه طبعا اتفضل دا الكارت بتاع دكتور سامح صاحب المركز
متشكرين جدا يا دكتور
العفو نورتونى..
بعد ما خرجنا من عند الدكتور ....رشاد كان ماشي ساكت خالص فقلت له بتفكر فى ايه يا رشاد؟
قال بفكر فى حكاية طفل الانابيب دى
انت فعلا عايز تعملها ؟
انا مش عارف يا مشيره و اللى محيرنى اكتر أن نسبه نجاحها ٥٠ ٪ زى ما الدكتور قال ...انتى ايه رايك ؟
و الله يا رشاد زى ما تحب ..انا معاك فى أى قرار هتاخده
ربنا يسهل يا مشيره و يعمل اللى فيه الخير
روحنا البيت و لقينا اخواته محمد و سعيد قاعدين مع والدته تحت دخلنا سلمنا عليهم و امه سالته عملتوا ايه عند الدكتور يا رشاد ؟؟
رحت رديت بسرعه و قلت لها أن الدكتور قال إن فى شويه مشاكل فى التبويض كدا و هتتحل بالعلاج أن شاء الله
رشاد بص لى كدا و كأنه مش عاجبه اللى قلته
امه ردت معلش يا بنتى ربنا يسهل و يشفيكى يا رب
الموضوع بعد كدا اتقفل خالص حتى رشاد مفتحنيش فى موضوع طفل الانابيب ده و الكل سكت و مبقاش يتكلم
عدى على الكلام ده سنتين و كنت مشغوله فيهم بدراستى و اخدت البكالوريوس و كانت فرحة عمرى انا و رشاد
مبروك يا استاذه مشيره
ايوا ايوا استاذه بشهادة الدوله يا ابنى
عاوزانى اجيب لك ايه بقا هديه بمناسبه نجاحك ؟
مش عاوزه حاجه هو انت مخلينى عاوزه حاجه يا حبيبي
امممممم و لا حتى عاوزه دى ؟؟
ايه دى ؟؟
دى يا ستى تذكرتين لتركيا نروح نتفسح هناك اسبوعين
ايه انت بتقول ايه .....انا مش مصدقه عنيا ....ربنا يخليك ليا يا حبيبي دى احلى مفاجأه شفتها فى حياتى
طبعا بعدها حضرت اوراقى و جواز سفرى و سافرنا و قضينا هناك احلى اسبوعين فى حياتنا
رجعنا من السفر فرحانين و جايبين هدايا لكل البيت
بس لما دخلنا عليهم لقيت حماتى زعلانه و لما سألناها ايه مزعلك قالت سماح بنت اختى اتطلقت ..بعد ما جوزها منه لله ضربها علقه سقط اللى فى بطنها
رشاد قالها معلش يا ماما بكرا ربنا يرزقها باللى احسن منه أن شاء الله
طلعنا فوق حطينا الشنط و حضنت رشاد و قلت له ربنا يسعدك زى ما اسعدتنى ..
ربنا يخليكى لى يا حبيبتى
بعد كام يوم حماتى لقيتها بتنادينى و بتقولى تعالى يا بنتى عايزاكى فى موضوع
قلت لها خير يا ماما
قالت انتى بقالكم حوالى اربع سنين متجوزين و مخلفتوش و انا كان نفسي اشوف حتة عيل لابنى
أمر الله يا ماما ...
و نعم بالله يا بنتى بس برده ربنا أمرنا أن إحنا ناخد بالاسباب
ما احنا روحنا للدكتور زى ما حضرتك عارفه
عارفه يا بنتى ...و محصلش حمل برده يبقى نعمل ايه ؟
نعمل ايه يا ماما ؟
انا فكرت كتير و ملقتش حل الا انى اجوز رشاد واحده تانيه ...و مش هلاقيله احسن من سماح بنت اختى ...بنت طيبه و منكسره و هترضى بأى حاجه و متخافيش انا هجوزهم هنا معايا فى شقتى و انتى هتدنك زى ما انتى و هو هيقسم الايام بينكم بالعدل ....ها قولتى ايه يا بنتى؟
بصيت لها و الدموع فى عنيا هو حضرتك قلتى الكلام ده لرشاد؟؟
قالت لأ لسه مقلتلوش بس انا عارفه انى لو قلت له مش هيمانع اى واحد يا بنتى يتمنى يشوف له حته عيل يحمل اسمه ... و انتى كمان لما تقوليله انك موافقه ساعتها هو عمره ما هيرفض
و مين قال لحضرتك انى موافقه
لازم توافقى يا حبيبتى لو بتحبى رشاد... اللى بيحب حد بيبقى عايزه مبسوط و بيتمناله الخير
طبعا ..... طبعا يا ماما
قالت يعنى خلاص اعتبرك موافقه ؟؟؟
قلت لها اللى رشاد يشوفه انا موافقه عليه
ربنا يكملك بعقلك يا بنتى
عن اذنك انا طالعه فوق
اتفضلى يا بنتى
طلعت فوق و انا نفسي اصرخ اصرخ من الظلم كان نفسي اقولها بأى حق عايزه تكسري خاطرى كدا و تجوزى ابنك معايا فى نفس البيت ... مين اداكى الحق تتدخلى فى حياتنا؟؟؟....بس سكت و منطقتش مش عشانها عشان رشاد و استنيت رشاد لما يجى اكيد هو هيرفض و مش هيوافق على حاجه زى دى
اخر النهار رشاد دخل على و هو مسهم عرفت على طول أن أمه فاتحته فى الموضوع و سالته عن رأيه ؟؟
العجيب أنه سكت و مقلش اى حاجه
بقيت مستغربه من سكوته و سالته هو انت موافق و الا ايه ؟؟
قال يا مشيره انا مش عاوز ازعل امى ....هى برده نفسها تشوف لى طفل
انت بتقول ايه ..... هو انا فى عيب ...انت اكتر واحد عارف انى معنديش أى موانع للخلفه
ايوه انا عارف بس هى متعرفش و لا حد من اخواتى يعرف و اظن ان انتى كنتى صاحبة الاقتراح ده
يعنى ايه ..... يعنى انت هتتجوز على فعلا ؟؟؟
انا مش مصدقه ودانى .... طب لو اتجوزت و مخلفتش الست الوالده هتجوزك التالته ؟؟؟ صحيح انتوا عالم ظلمه
بقولك ايه يا مشيره احترمى نفسك و متغلطيش
انا فعلا هحترم نفسي و هسيب لك البيت عشان الست الوالده تجوزك فيه بدل ما تزنقوها و تتجوزوا معاها تحت
من فضلك يا رشاد الماذون اللى هيجوزك يطلقنى
و فعلا قمت لميت هدومى و الدموع مغرقه وشي و مش قادره اصدق ازاى هو يعمل فى كدا ؟؟ و كنت فاكره أنه هيجى ورايا و يصالحنى و يقولى كنت بهزر معاكى و أشوفك هتعملى ايه ....بس للاسف دا محصلش و سابنى امشى و هو قاعد فى الصاله فاتح التلفزيون و بيتفرج عليه
كنت نازله من على السلم و حاسه ان رجليا مش شايلانى جسمى كله بيترعش و حاسه أنه هيغمى على قبل ما اوصل لبيت والدتى
وقفت تاكسي و ركبت و لاخر لحظه كنت متخيله أنه هيجى ورايا ....بس للاسف 😔
اول ما خبطت على امى و فتحت لى اتخضت
ايه يا بنتى اللى حايبك دلوقتى ؟؟ و ايه الشنطه اللى فى ايدك دى ؟؟
انا خلاص يا ماما هطلق من رشاد
ليه كفى الله الشر .... استهدى بالله كدا ...هو فى زى رشاد
رشاد هيتجوز على يا ماما
ايه .... هيتجوز ؟؟؟ هيتجوز ازاى ؟؟مش معقوله يا مشيره رشاد يعمل كدا ...لازم فى سوء تفاهم
مفيش سوء تفاهم و لا حاجه ...انا تعبانه تعبانه يا ماما
طب ادخلى بس ريحى شويه على ما اعملك لقمه تاكليها و بعدين نتكلم
لا يا ماما ارجوكى مليش نفس انا عاوزه انام بس
طيب يا بنتى ادخلى استريحى شويه
دخلت اوضتى و انا مش مصدقه أن كل دا حصل معايا ...طب فين الحب اللى كان ظاهر فى عنيه معقوله كل دا كدب معقوله كان ممثل شاطر كدا ...معقول انا انخدعت فيه للدرجادى ؟؟؟؟ دماغى هتنفجر و مش عارفه افكر
امى خلتنى دخلت اوضتى و راحت متصله على رشاد
الو ... اهلا يا رشاد يا ابنى
اهلا يا ماما
هو ايه اللى حصل يا ابنى ؟؟
هو مشيره مقلتلكيش ؟؟
هى قالت انك عاوز تتجوز عليها ...بس انا مصدقتش و قلت اكيد فى سوء تفاهم
لا يا ماما مفيش سوء تفاهم و لا حاجه دى رغبة والدتى و هى من حقها تشوف حفيدها برده
طيب يا ابنى و ماله بس انتوا لسه صغيرين دا انا خلفت مشيره دى بعد خمس سنين من الجواز ..يعنى لسه بدرى
زى ما قلت لحضرتك دى رغبة والدتى و مقدرش ازعلها و مشيره على دماغى عاوزه تفضل على ذمتى اهلا و سهلا عايزه ننفصل انا تحت امرها
ياااا هى وصلت للانفصال كمان يا رشاد ..و الله كتر خيرك
على العموم دا حقك برده و انا مقدرش اقولك شيئ و لما بنتى تصحى هتكلم معاها و اشوفها عاوزه تعمل ايه بالظبط ...مع السلامه يا ابنى .
امى قفلت السكه و قعدت تعيط لما عنيها احمرت من العياط و بقت مش قادره تاخد نفسها
تانى يوم صحيت الصبح و حضرت لى الفطار و انا كانت نفسي مسدوده خالص
امى اتكلمت معايا و قالت لى أنه من حقه برده يكون له عيل يفرح بيه بصيت لها كدا و سكت مقدرتش اجرح فيه و لا اقولها أنه هو سبب تاخير الحمل مش انا
امى قعدت تحاول تقنعنى أن رشاد متجوزنى من اربع سنين و مشفناش منه إلا كل خير و حاولت تقنعنى انى افضل على ذمته بس انا مرضتش و اصريت
و امى كانت مستغربه من اصرارى دا و كانت بتقولى يا بنتى دا رشاد اللى كنتى بتقولى أنه روحك يا بنتى هتتعبى لو سبتيه
و انا جوايا نار من ظلمه لى ...
قلت لها لو سمحتى يا ماما انا مش عاوزه اتكلم فى الموضوع دا خالص و من بكرا هنزل اشوف اى شغل فى مدرسه خاصه و هعيش حياتى ..متخافيش مش هموت 😔
و فعلا تانى يوم نزلت دورت فى كذا مدرسه لغايه ما ربنا كرمنى بمدرسه خاصه كويسه جدا و المدير بتاعها راجل محترم اوى
و فعلا اشتغلت فيها مدرسه رياضيات و حاولت انسي رشاد و الالم اللى سببه لى .... بس مقدرتش 😔😔
كل ليله بفتكره بفتكر ضحكته بفتكر حنانه على بفتكر كل حاجه عملها عشانى و افضل اعيط لغاية ما اروح فى النوم ،كنت حاسه انى فى كابوس و كان نفسي اصحى منه
بعد حوالى شهرين لقينا تليفون البيت بيرن
امى ردت لقيت حماتى عاوزه تيجى تزورنا هى و ابنها الكبير محمد
امى فرحت اوى و رحبت بيهم و بعد ما قفلت السكه قالت لى اكيد حماتك جايه تصالحك
بصيت لها كدا و انا عارفه أن حماتى مش جايه تصالحنى و لا حاجه لأنها معتبره أن انا اللى حرماها من الحفيد اللى هى منتظراه و حتى لو هى جايه تصالحنى فهى جايه برده تصالحنى مع وجود ضره لى
امى جهزت حاجه ساقعه و قعدت تستناهم
حماتى و سلفى محمد جم و قعدوا معانا و لقيت سلفى بيقول احنا جايين ناخدك نروحك يا مشيره
امى ردت يا اهلا و سهلا يا استاذ محمد
قلت له اروح ازاى و فين رشاد مجاش معاكم ليه
ردت حماتى و قالت رشاد يا بنتى بيجهز نفسه عشان قراية فاتحته الاسبوع الجاى و اول ما سماح توفى عدتها هيتجوزوا على طول ...و زى ما قلت لك هما هبتحوزوا تحت و انتى هتفضلى مكانك فوق احنا برده عشرة اربع سنين و عمرنا ما شفنا منك حاجه وحشه
و ان قلت لا يا طنط انا مش موافقه ارجع على ضره ؟؟
يبقى انتى كدا يا بنتى مبتحبيش ابنى و مش عاوزه مصلحته
رد سلفى و قالى يا مشيره انتى زى بنتى و انا بقولك أن محدش هيدوس لك على طرف و هترجعى معززه مكرمه بلاش يا بنتى خراب البيوت
لا يا استاذ محمد انا مقدرش ارجع زى ما قلت لحضرتك
يعنى مفيش فايده
ايوه مفيش فايده
ردت حماتى... طيب يا بنتى حاجتك كلها و مؤخرك و نفقتك هيوصلوكى على داير مليم احنا مبناكلش حق حد
رديت و قلت لها لا يا طنط انا مش عاوزه حاجه دول هديه منى للعروسه ...انا مش عاوزه غير ورقتى و بس
امى كانت قاعده هتعيط بس كانت ماسكه نفسها بالعافيه و كل شويه تبص لى كدا انى أهدى الامور بس انا كرامتى كانت مجروحه اوى ...😔😔
سلفى و حماتى قاموا مشيوا و انا دخلت اوضتى و قعدت اعيط ....اعيط على حالى و على ابويا و اخويا و جوزى و ان خلاص معنتش هشوفه تانى ...كنت حاسه ان روحى هتتسحب مع ورقة طلاقى بس برده ظلمه لى كان قاسي اوى 😣
حماتى روحت لجوزى و حكت له على اللى حصل معايا و قالت له احنا يا ابنى عملنا اللى علينا و عدانا العيب هى اللى مش عاوزه تعيش ...احنا بقا بمشيئه الله نروح نقرأ فاتحة سماح بنت خالتك و اول ما العده تخلص هنعمل الدخله فوق فى شقتك...لو عايز تغير اوضه النوم اغيرهالك مع أن كل حاجتك جديده و نضيفه زى ما تكون مفروشه امبارح ... هى سماح مش عاوزه حاجه بس احنا هناخد لها خاتم معانا و احنا رايحين نقرأ الفاتحه وانا يا سيدى اللى هجيبه هديه منى
رشاد رد عليها و قالها خلاص يا ماما خلصتى كلامك؟؟
قالت ايوا يا ابنى
قال انا مش هتجوز سماح يا ماما... و مش قاعد هنا اصلا انا خلاص طلبت نقلى لمرسي مطروح و خلاص هسافر الأسبوع دا
ايه ؟؟؟ انت بتقول ايه يا رشاد انت اتجننت ؟؟
لأ يا ماما انا عاقل و عارف انا بعمل ايه كويس
طب ما تفهمنى يا عاقل عملت كدا ليه و هتمشي و تسيبنى ليه ؟؟؟؟؟
عايزه تعرفى الحقيقه انا هقولك الحقيقه .....
الحقيقه هى أن انا اللى مبخلفش و أن مراتى مفيهاش اى حاجه...و هى اللى صممت انها تقول على نفسها كدا و أن عندها مشاكل و للاسف انا وافقتها و سبتكوا تجرحوا فيها بنظراتكم و كلامكم و سؤالكم المستمر على حاجه متخصكوش ...حاجه تخصني انا و مراتى بس
و فى الاخر كمان بكل جبروت و قسوه تجبيها و تقوليلها هجوز جوزك لانك مش بتخلفى و تتهميها انها لو موافقتش تبقا انانيه و مبتحبنيش
لا يا ماما مشيره بتحبنى حب مفيش واحده تحبه لواحد
و مع تجريحكم ليها دا كله منطقتش و لا حتى قالت لامها أن العيب منى انا
بس انت يا ابنى مقلتلناش ...و بعدين انت وافقتنى لما قلت لك على موضوع سماح ..كان ممكن ترفض أو تقولى اللى قولته دلوقتى
عارفه يا امى انا وافقتك ليه و ليه سبتك تروحى لمشيره و تقوليلها أن فاتحتى الاسبوع الجاى ...علشان اخليها تقطع الأمل فى و تكرهنى و تقول فى نفسها انى ظلمتها و تطلق منى و هى ضميرها مستريح علشان تعيش حياتها و تتجوز و تخلف زى اى ست طبيعيه لأنها رفضت انى أطلقها من اول ما عرفنا انى انا السبب من تلات سنين
يا حبيبي يا ابنى و كل ده شايله فى قلبك و ساكت
لا يا ماما مشيره هى اللى شايله فى قلبها و ساكته و مستحمله رزالة خالتى اللى كل شويه تسم بدنها و مره مرات اخويا و مره انتى
و الله يا ابنى ما كنا نعرف طب خلاص متزعلش نفسك انا هروح لحد عندها اعتذرلها و اجيبها و اجى
دلوقتى هتروحى تجبيها لما عرفتى أن العيب منى لكن لما كنتى فاكره أن العيب منها كانت وحشه و مبتمناش لى الخير و السعاده صح ؟؟
يعنى ايه يا ابنى مش فاهمه ؟؟
يعنى تسبيها فى حالها يا ماما و متبوظيش اللى عملته سبيها تعيش حياتها و تفرح باولادها ليه تحكمى عليها انها تعيش طول عمرها من غير اولاد
بس هى راضيه يا ابنى و بتحبك
دلوقتى بقت بتحبنى يا ماما؟!!!!!!!!!!! معرفتيش الا دلوقتى مزعلتيش و انتى بتكسري قلبها و تتهميها باللى مش فيها !
على العموم انا خلاص زى ما قلت لك نقلت شغلى و قبل ما اسافر هروح أطلقها و من فضلك يا ماما كل حاجتها تاخدها و انا هديها مؤخرها و نفقتها كفايه الظلم اللى هى حاساه دلوقتى 😔
بس انت مينفعش تمشي يا رشاد ... ازاى يا ابنى عاوز تسيبنى و تمشي
يا ماما من فضلك دا قرارى و مش هرجع فيه ابدا
قرارك ايه هو انت عايش لوحدك فى الدنيا دى ...مش تشور اخواتك و امك و الا خلاص كبرت علينا
و انتى كنتى شورتى مين يا ماما لما قررتى تجوزينى تانى ؟ لا و روحتى قلتى لمراتى قبل ما تقوليلى
يا رشاد يا ابنى انا كان غرضى مصلحتك و الله ...طب حقك على
لا يا ماما و لا حق و لا حاجه كويس أن انتى عملتى كدا عشان منظلمش بنت الناس اكتر من كدا ...عن اذنك يا ماما انا طالع استريح شويه
رشاد لما طلع امه قعدت تعيط و راحت متصله بمحمد ينزلها تحت ...و قالت له على كل حاجه و أن رشاد عاوز يسبب البيت و يمشي
محمد قالها مفيش حل الا أننا نرجعله مشيره عشان يرضى يقعد و ميسافرش
امه قالت له أنه نبهه عليها متروحش لها و تسيبها تشوف مستقبلها
محمد قال دا كلام فاضى ...مراته لازم تعرف و ساعتها هى بنفسها تقرر ترجع و الا لا ...انا هروح لها و اكلمها
امه قالت له طب خدنى معاك يا محمد اعتذرلها و احب على رأسها
لا يا ماما متتعبيش نفسك انا هروح لها انا و سعيد و ربنا يعمل اللى فيه الخير
و فعلا محمد و سعيد جولى و حكولى على كل اللى حصل كنت حاسه ساعتها أن روحى اتردت لى ...كنت عارفه أن رشاد مش ممكن يعمل فى كدا
محمد قالى يعنى هترجعى معانا
قلت طبعا هقوم البس حالا
روحت بيتى و فتحت بمفتاحى و دخلت بشويش على طراطيف صوابعى دخلت لقيت رشاد نايم وواخد صورتى فى حضنه ..بصيت كدا له شويه و قعدت املى عينى منه ...وحشنى اوى اوى 😍😍
و رحت مقربه منه و بوسته فى خده ...قام من النوم مخضوض ...ايه دا انتى جيتى ازاى ؟؟
انا عرفت كل حاجه ...ووراك وراك مش هسيبك ..هنت عليك تسيبنى فى العذاب ده شهور حرام عليك يا رشاد
حقك على يا مشيره دنيتى كلها كان مضلمه من غيرك
طيب انا عندى ليك مفاجاه هايله و كنت ناويه مقولش لك عليها عشان كنت مزعلنى يا وحش
مفاجاه ايه دى ؟؟؟
انا ......انا حامل
ايه حامل ...حامل ايه .....معقوله حامل دا الدكتور قال النسبه قليله للحم...
هو الدكتور دا دخل فى مشيئه ربنا ؟ ربنا سبحانه و تعالى بيقول (لِّلَّهِ مُلْكُ السَّمَاوَاتِ وَالْأَرْضِ ۚ يَخْلُقُ مَا يَشَاءُ ۚ يَهَبُ لِمَن يَشَاءُ إِنَاثًا وَيَهَبُ لِمَن يَشَاءُ الذُّكُورَ أَوْ يُزَوِّجُهُمْ ذُكْرَانًا وَإِنَاثًا ۖ وَيَجْعَلُ مَن يَشَاءُ عَقِيمًا ۚ إِنَّهُ عَلِيمٌ قَدِيرٌ) صدق الله العظيم
و نعم بالله بس انتى حامل من امتى ؟؟
انا خلصت التالت اهو و داخله على الرابع يعنى قدامك ست شهور و تبقى بابا
ياااا..... الحمد لله يا رب اللهم لك الحمد و الشكر...الحمد و الشكر ليك يا رب.
بعد كدا انتقلت مع رشاد لمرسي مطروح لانه معرفش يرجع مكانه فى القاهره تانى و قعدنا هناك فى بيت تحفه بيطل على البحر مباشرة و خلفت هناك بنتى حياة
بنتى اللى هى مش بنتى ....لا دى حياتى كلها و حيات ابوها ....بنتنا اللى ردت فينا الحياة مره تانيه
أسميتها حياة لأنها كانت بدايه حياه جديده لينا كلنا و بوجودها عشنا احلى حياة 🥰😘😘😘
تمت
🌹🌹🌹🌹🌹🌹🌹🌹🌹🌹🌹🌹🌹🌹🌹
عايزه اقول كلمه بس للناس اللى بتدخل فى حياة غيرها و بيفضلوا يسألوا ليه متجوزتيش لحد دلوقتى ؟ ليه مخلفتيش لحد دلوقتى ؟ ليه مولدتيش لحد دلوقتى ؟ انتوا كدا بتجرحوا الناس و بتألموهم و انتوا مش حاسين و لازم تعرفوا أن كل ده قسمه و نصيب و محدش بيختار قسمته و لا نصيبه و انكم هتتحاسبوا على كل كلمه بتنطقوها و تجرحوا بيها غيركم... يا ريت الناس تخليها فى حالها و تدع الملك للمالك.
تحياتى للجميع
#د.جيهان عادل .
ارجو أن القصه تكون نالت اعجابكم لو عجبتكم القصه ادعوا لوالدى رحمه الله و سائر موتى المسلمين بالرحمه و المغفره
يا الله 😍😍جميلة القصة عبرتي عن حالي يارب ارزقني بفرحة مثل فرحة مشيرة و رشاد 😭😭قربت علي السنة الرابعة
ردحذف