#مصطفى_قصه_حقيقيه
#الجزء_الاول
بدأت حكايتى لما كنت صغير عمرى ما يتجاوزش العشر سنين ...كنت اخ وحيد على اربع بنات
و بالرغم من وضعى ده اللى لو اتوجد فى اى بيت مصرى هيكون معناه انى متدلع جدا وواخد حقى تالت و متلت لانى وحيد اهلى طبعا و شايل اسمهم ...بقول بالرغم من كدا الا انى من صغرى كنت احب انى اكون راجل بمعنى الكلمه ...و صراحه الحج والدى كان له دور كبير برده فى كدا و عمره ما حاول يعاملنى معامله خاصه او يبين أنه بيفضلنى على اخواتى البنات
زى ما قلت لكم انا من اول ما وعيت و انا انسان عملى جدا كنت احب اشتغل فى اى حاجه تجيب ليا قرش
اشتغلت كل الشغلانات اللى تخطر على بالكم ...كنت اشتغل يوميه مع مبلط ...مع نقاش اشيل رمل ماشي اشيل اسمنت ميضرش ...اشتغل مع سباك تمام ..
و طبعا كل ده بجانب دراستى
عاوز احكيلكم عن اول موقف اثر فى نفسيتى جدا و شكل شخصيتى بعد كدا
فى يوم رجعت البيت و كنت فى الاعداديه لقيت امى قاعده زعلانه و بتعيط
مالك يا ماما
مفيش حاجه يا مصطفى
مفيش ازاى ؟؟ دا انتى عنيكى حمرا دم من كتر العياط
مفيش يا حبيبي احضرلك العشا
لا عشا ايه ؟؟ هو انا هعرف اكل لقمه وانا شايفك زعلانه اوى كدا ؟قولى يا ماما فى ايه ؟
ابوك يا مصطفى اتخانق معايا على مصاريف البيت و سابلى البيت و مشي من غير ما يسيب ليا و لا مليم
ياااا دا اللى مزعلك ؟؟؟ و لا يهمك يا حبيبتى الفلوس مفيش اسهل منها اوعى تزعلى نفسك استنى معايا عشره جنيه اهم خديهم
لا يا ابنى لا
لا ايه ؟؟ انا راجلك و انا اللى هصرف عليكى ...هو فاكر أنه بكدا بيلوى دراعك و الا ايه ؟؟؟ و لا يهمك خالص انا من بكرا هنزل ادور على شغل و اجيب لك اللى عاوزاه
ربنا يخليك يا ابنى و ميحرمنيش منك ابدا و لا من دخلتك عليا
قومى بقا جهزيلى الاكل اللى قلتى عليه و الا رجعتى فى كلامك يا سوسن
لا مرجعتش حالا يا حبيبي
ايوه بسرعه اصل فى ديناصور بيصوصو فى بطنى مش عصافير 😅
و ابتديت فعلا من تانى يوم ادور على شغل بأجره اعلى علشان محسسش امى بأى قهر و لا زعل
ابويا كان راجل موظف مرتبه كله مية جنيه
كان بيدى امى منهم جزء و يحتفظ لنفسه بالباقى
بقيت كل اللى بشتغل بيه اديه لامى كنت اجيب لها عشره جنيه و ساعات عشرين فى اليوم
امى كانت تقولى يا ابنى انت هتدينى كل اللى بتشتغل بيه ؟ طب خلى حاجه لنفسك
لا يا ماما خديهم كلهم و لا اشوفك زعلانه ابدا
بس كدا كتير اوى يا مصطفى
و ماله ...هاتى اللى نفسك فيه انتى و اخواتى و اوعى تشيلى هم طول منا عايش على ضهر الدنيا دى
ربنا يخليك ليا يا ابنى و يبارك فى عمرك و صحتك يا رب
ابويا غاب عن البيت شهر كان فاكر أنه بيأدب امى بالطريقه دى
لما رجع بعد الشهر لقى البيت احسن ما سابه البيت مكنش ناقصه اى حاجه بل بالعكس امى اشترت حاجات جديده فى البيت
كنت فاكر أن ابويا هيفرح بيا و يقول ابنى كبر و سد مكانى لكن للاسف لقيته زعل و حطنى فى دماغه من اليوم ده و قالى انا رجعت عشانكم و كان ممكن اطلق امك دى عشان تتعلم الادب بعد كدا
و ماله يا بابا ما كنت تطلقها ...هو انت فاكر أن احنا هنموت من غيرك ؟؟؟ امى انا كفيل بيها و لا حد فى الدنيا دى يقدر يكسرها طول منا عايش فوق وش الأرض
انت ازاى تكلمنى بالشكل ده يا لاااا....انت فاكر نفسك بقيت بنى آدم لما جبت لك قرشين ؟ لا فوق كدا انا لسه ابوك و ممكن اطردك زى الكلب بره بيتى
من اليوم ده و علاقتى بابويا بقت متوتره جدا ...بقى يفسر اى تصرف اعمله انى بحط راسى براسه ...هو مكنش فاهم اد ايه منظر امى و هى بتعيط زعلنى و اد ايه تخليه عنا و احنا خمس افراد فى رقبته حز فى نفسي جدا مكنتش مصدق أنه ممكن يتخلى عننا بالسهولة دى ...طب لو حتى انت مختلف مع امى و متخانق معاها ذنب اولادك ايه ؟؟؟
للاسف ساعات الخلافات بتنسينا أننا عندنا مسؤليه ربنا هيسألنا عليها يوم القيامه
المهم مرت الايام و دخلت الثانوى و صراحه العيشه فى البيت كانت كل يوم بتصعب اكتر و اكتر
ابويا كان مصمم أنه يضايقنى و يقل منى قدام اى حد من اصحابى
يعنى لو واقف قدام البيت مع حد و بتكلم معاه كان ينادى عليا و يستهزأ بيا و يهزأ اصحابى قدامى
الموقف ده اتكرر كتير اوى لدرجه انى مبقتش قادر اتحمل و كنت دايما افكر انى لازم اسيب البيت و امشى
انا الحمد لله صوتى حلو جدا و دى موهبه ربنا حبانى بيها
لما اصحابى شكروا فى صوتى و بقوا مبهورين بيه فكرت ليه مستغلش صوتى ده فى انى اكسب بيه فلوس
فى المرحله دى كنت دخلت كليه التجاره و بدأت أغنى فى الجامعه و فى الحفلات و زاد الموضوع و ابتديت أغنى فى الافراح ....قدمت فى معهد الموسيقى علشان اثقل موهبتى
فى الفتره دى كان الخلاف وصل مع ابويا للذروه مبقاش طايقنى حرفيا فى البيت
و انا كنت بكسب كويس اوى ...
قررت انى امشي و اسيب البيت و فعلا أجرت شقه صغيره ...اخدت هدومى بس
امى لما شافتنى قعدت تعيط و تقولى هتسبنى لمين يا مصطفى ؟
انا مش هسيبك يا ماما ...بس لازم ابعد انا اعصابى مبقتش مستحمله اللى بيحصلى ده ...انا هجيلك برده كل يومين كدا مش هسيبك يا امى
و مشيت من البيت بشنطة هدومى ... كنت عاوز استقل بحياتى و اخلص من التحكمات و السخريه اللى دايما كانت ملازمانى
انا فاكر اول يوم اكون لوحدى فى الشقه اللى أجرتها كان عندى احساسين متضادين
الاول انى مبسوط انى اخيرا هستقل بنفسي و محدش هيتحكم فيا
و التانى انى زعلان لانى حسيت انى اتقطعت من بيتى و بعدت عن امى و اخواتى اللى بحبهم
اول يوم كنت فيه لوحدى حبيت اثبت لنفسي أن الموضوع سهل و انى هقدر اعتمد على نفسي و اعمل اكلى
اشتريت ارز و جبت حله صغيره و حطيت فيه الرز بعد ما غسلته و حطيت عليه ربع كوبايه ميه
و قعدت استنى أن الرز يستوى ربع ساعه نص ساعه ...ساعه كامله الرز مش راضى يستوى ابدا و لقيت الرز اللى فى الحله اتفحم تماما #دجيهان_عادل
ايئس بقا و اقول خلاص ؟؟ لا ابدا
تانى يوم رحت لامى و سألتها الرز بيتعمل ازاى و بيتحط عليه اد ايه ميه
امى قالت لى على طريقه الرز و عرفت ساعتها انى تقريبا محطتش ميه ع الرز 😁
جبت ورقه و قلم و كتبت وراها طريقه الرز و طريقه كام نوع كدا من أنواع الطبيخ
و بقيت انفذ المكتوب فى الورقه مره يطلع كويس و مره لا لحد ما تعلمت الطبيخ و بقيت طباخ بريمو .
فى الفتره دى كان صيتى ذاع و كنت خلصت كليتى و معهد الموسيقى و كنت بحلم اعمل شريط علشان اتعرف اكتر و اكتر و اشتهر اكتر و اكتر
و فعلا ابتديت اجمع كل فلوس تجيلى علشان احقق حلمى و بعد اكتر من سنتين قدرت أجمع حوالى ٢٥٠ الف جنيه تمن عمل الشريط #دجيهان_عادل
اشتريت الكلمات و اتفقت مع ملحنين و حضرت ست أغنيات حلوين جدا
كنا زمان بنأجر استوديو و نجيب مهندس صوت علشان نسجل الاغانى و بعد كدا بنعبيها على شريط صغير كدا و شريط تانى علشان لو فى اى تعديلات ( دا الكلام اللى عرفته بعدين ) و بعد كدا بناخد الشرايط دى لشركات التوزيع تطبع أو تسجل على شرائط الكاسيت تمهيدا لتنزيلها فى السوق
لما سألت عن مهندسين الصوت كان المهندس ساعة الشغل بتاعته بحوالى ٢٠٠ جنيه فى الساعه و طبعا الشريط بيحتاج وقت طويل جدا و كل اغنيه بتقعد بالساعات على ما تتظبط
واحد صاحبى ابن حلال قالى انا اعرف لك مهندس صوت بياخد مبلغ أقل من كدا و هيوفر عليك كتير اوى
هياخد كام يعنى ؟؟
بياخد ١٢٥ جنيه فى الساعه و طبعا دا هيوفرلك كتير جدا #دجيهان_عادل
و هو فين المهندس ده
المهندس ده اسمه يوسف بيشتغل فى استوديوهات سيدهم
اه عارفها طب ما تكلمهولى
حاضر ...انا معايا رقم الاستوديو اللى بيشتغل فيه هكلمهولك حالا
و فعلا صاحبى اتصل على المهندس يوسف و اتفقنا على كل حاجه و ابتدينا نسجل الأغنيات
تم تسجيل كل اغنيتين فى ستوديو ...يعنى الست أغنيات اتسجلوا فى تلات استوديوهات
قعدنا ايام و ليالى نسجل لحد ما خلصنا
طلب منى المهندس يوسف انى انزل العتبه اجيب له الشريط الصغير اللى هيعبى عليه الشغل
نزلت جبته و عبى الشغل و ادهولى
اول ما مسكت الشريط الدنيا مكنتش سايعانى كنت حاسس انى خلاص بينى و بين الشهره فركة كعب #دجيهان_عادل
مكدبش عليكم اصابنى الغرور الشديد و كنت بقول أن اغنياتى هتغلب اغانى كل الموجودين بالساحه
طبعا فى الفتره دى مكنتش بنام كفايه لأن الشغل كان متواصل
لما اخدت الشريط قلت استريح كام يوم فى البيت بعد كدا انزل شركه من شركات التوزيع بتاعه واحد صديقى
للاسف قعدت ٢٥ يوم فى البيت عشان ارتااااح ...و انا بقا حاسس بنفسي و مش قادر اقولكم كنت بحلم بأيه ....
الدنيا كلها هتكون بين اديك يا واد يا مصطفى ... بكرا السينما تطلبك و التلفزيون كمان #دجيهان_عادل
اكيد لما ينزل الشريط الناس كلها هتعرفنى و تشاور عليا و المعجبين هيبقوا حواليا من جميع الجهات لدرجه انى هجيب بودى جارد يحمينى من المعجبين و المعجبات و خاصة المعجبات لانى بتكسف 😉☺️
و بكرا التلفزيون يعمل معايا لقاءات و المذيعه تقدمنى للناس
المطرب المشهور نديم
اه منا نسيت اقولكم أن اسم الشهره بتاعى كان نديم
المهم اخدت الشريط الصغنون المتسجل عليه حلمى و اللى صرفت عليه دم قلبى ( تقريبا فلوسي كلها ) و رحت لمدحت صاحبى و صاحب شركة التوزيع
اهلا..... فينك يا نديم ...ايه يا ابنى انت رحت و قلت عدولى و الا ايه ؟؟
معلش يا مدحت اصل كنت بعبى الشريط بتاعى
ايه دا ؟؟؟ انت عملت شريط ؟
ايوه #دجيهان_عادل
الف الف مبروك يا نديم طب مش تقول يا ابنى
معلش و الله يا مدحت انشغلت و تاه عن دماغى انى اكلمك
طب و جبت مين مهندس صوت ؟؟
المهندس يوسف
يوسف مين دا ؟؟
يوسف اللى بيشتغل فى استوديو سيدهم
ايه ؟؟ مين اللى شار عليك بيوسف ده ؟
واحد صاحبى ...ليه هو فى حاجه ؟؟
اصل اللى اعرفه ان استوديوهات سيدهم دى الاجهزه اللى فيها قديمه و. الاستوديوهات اللى انت سجلت فيها مكنها حديث ...مش عارف يوسف دا عرف يتعامل معاها و الا لا
يا خبر ...انت قلقتنى يا مدحت
انت معاك الشريط #دجيهان_عادل
ايوه هو معبيلى الشريط على الشريط الصغير ده
طب هات كدا لما نسمع
مدحت اخد الشريط و حطه على الجهاز يا خبر اسوح على اللى سمعته
صوتى واطى جدا و صوت الآلات عالى اوى
اول ما سمعت الاغنيه كنت هموت
مدحت قالى أهدى بس يمكن تكون دى اللى بايظه بس... تعالى نسمع التانيه
سمعنا التانيه و لقيناها زى الاولى .و التالته و الرابعه....الشريط كله بايظ
يا خبر منيل
اهدي يا نديم طب مش معاك الشريط التانى اللى بنعدل منه ؟#دجيهان_عادل
لاممعييش غير ده
ازاى كدا؟؟؟ المفروض أن فى شريط تانى بيتسجل عليه الشغل و نقدر منه نعدله
لا مدنيش غير ده و قالى عشان اوفر عليك
يا خبر ...انت كدا فى ورطه ...طب اقولك اطلع جرى على الاستوديوهات اللى انت سجلت فيها الاغانى يمكن تلاقيها لسه هناك على الاجهزه
طلعت جرى على الاستوديوهات زى ما مدحت نصحنى
و رحت على اول استوديو و سألت على الاغنيتين اللى سجلتهم هناك
قالولى اتمسحوا
يا خبر اتمسحوا ازاى ؟؟
احنا بنحتفظ بالشغل لمدة ١٥ يوم بس بعد كدا بنمسح اى شغل
و طبعا انا بقالى ٢٥ يوم قاعد فى البيت
جريت على الاستوديو التانى و التالت لقيت نفس الكلام ...الظاهر أن ده عرف عندهم و انا معرفش
طبعا كدا كل حاجه راحت ...مبقاش فى ايدى اى شئ اعمله
انا ممعيش غير حته شريط بايظ ملوش اى لازمه ...
الدنيا اسودت فى وشي و مبقتش شايف قدامى #دجيهان_عادل
خسرت كل فلوسي اللى اشتغلت بيها سنين فى لحظه واحده بسبب مهندس مش فاهم
و بسبب عدم خبرتى ...ضيعت كل الطبخه عشان بجنيه ملح
اه يوسف هو السبب...... هو اللى دمر حياتى و خسرنى فلوسي و مستقبلى انا لازم اقتله و ادمر حياته زى ما دمرنى و خسرنى كل شيئ.
و فعلا اخدت سكينه كبيره خبيتها فى هدومى و طلعت على استوديوهات ابراهيم سيدهم
اول ما دخلت علي يوسف
مسكت فيه و قعدت اصرخ زى المجنون
مدام ملكش فى الاجهزه و مبتفهمش ليه تعمل كدا ؟؟
هو انا عملت ايه ؟؟
الشغل كله بايظ ...منك لله
بقولك ايه انت كان لك شغل و انا سلمته لك ...مش مسؤليتى بقا باظ ليه و ازاى ؟ و بعدين انت جاى تحاسبنى بعد شهر ؟؟ كنت فين الفتره اللى فاتت دى كلها ؟؟
يعنى ايه يعنى هو انا بتبلى عليك ؟؟
و الله معرفش ...بس لو الشغل كان فيه حاجه كنت جيت لى تانى يوم مش تستنى شهر و تجيلى
يعنى انا اللى طلعت غلطان فى النهايه ؟؟
ايوا طبعا ...و ملكش عندى اى حاجه و أعلى ما فى خيلك اركبه
حااااااضر ....انا هوريك
طلعت السكينه علشان اضربه بيها لكنه اول ما شافها هرب منى و دخل اوضه و قفل على نفسه
فضلت ارزع على الباب و أقوله
ودينى منا سايبك ...لازم اقتلك انهارده ...و الله منا سايبك
فى الأثناء دى بعض الناس الموجوده راحوا لابراهيم سيدهم صاحب الاستوديو و قالوله ان فى واحد بيتخانق مع المهندس يوسف و عاوز يقتله
الراجل جه بسرعه و كنت عامل زى التور الهايج عمال اخبط على الباب و عاوز اكسره #دجيهان_عادل
فى ايه يا استاذ ؟؟
فى ايه ؟؟؟ فى أن المهندس اللى عندك دمر لى مستقبلى و خسرنى كل حاجه
طب أهدى و تعالى نتكلم فى مكتبى
رحت معاه المكتب و حكيت له الحكايه
الراجل قالى و بعدين انت عاوز ايه دلوقتى ؟
عاوز حقى
و حقك دا عاوزه ازاى بقا ؟؟؟
عاوز فلوسي اللى خسرهالى
انت تعرف انى ممكن ابلغ عنك دلوقتى و اتهمك انك جاى تتهجم على الاستوديو و اعملك قضيه شروع فى قتل و مية واحد شاهدين عليك
يعنى ايه يعنى ؟؟#دجيهان_عادل
يعنى تتفضل بره مشوفش وشك هنا تانى أحسن اطلب لك البوليس
معرفتش ارد عليه ...الكلام وقف على لسانى...منتهى الظلم و القهر لما تكون مظلوم و متقدرش حتى تعبر عن غضبك ...منتهى الظلم انك تبقى عارف إن الشخص ده ظلمك و مش قادر تعمل معاه حاجه .....يااااااا ربنا يكفيكوا قهر الرجال
دى حاجه تهد جبال
خرجت من عنده و رحت قعدت على الرصيف المقابل للاستوديو و قعدت اعيط
استغفر الله العظيم ....يارب ....اعمل ايه يا ربى
روحت البيت و قفلت على نفسي و دخلت فى حاله اكتئاب رهيبه .....#دجيهان_عادل
مبقتش اروح شغل و طبعا فى مجالنا ده لو غبت شويه بتتنسي خالص
تخيلوا قعدت سنه فى البيت محدش سأل عليا
هتقولولى حتى اهلك ؟؟؟
هقولكم انى اتصلت على امى و قلت لها انى مسافر بره و انى بكلمها من المطار
امى طبعا استغربت ازاى اسافر كدا مره واحده من غير اى مقدمات بس انا اقنعتها أن السفر جه فجأه و انا مكنتش عامله حساب #دجيهان_عادل
فضلت سنه بحالها مبخرجش من البيت الا للضروره القصوى علشان اجيب اكل
تخيلوا بقا أن صحابى اللى كنت فاكرهم اكتر من اخواتى و اللى عملت معاهم مواقف جدعنه كتير جدا جدا و كانت فلوسي هى فلوسهم ...و مكنتش الاقى واحد فيهم فى ضيقه الا و اساعده
تخيلوا أن محدش فيهم سأل عليا و لا قال مصطفى راح فين ؟؟
و انا صراحه كانت حالتى النفسيه مش مخليانى عاوز اكلم حد خالص
بعد ما قعدت سنه فى البيت الفلوس اللى معايا خلصت و مبقاش معايا مليم فى جيبي ...#دجيهان_عادل
قعدت يومين من غير اكل لحد ما بطنى وجعتنى جدا
فكرت انى اروح لواحد صاحبى عزيز اوى عليا و ياما ساعدته و خيري عليه
اول ما شافنى و طبعا كان شكلى متغير اوى دقنى طويله و شعرى طويل و كنت فى حاله يرثى لها
ايه دا ؟؟ مصطفى ؟؟؟... ازيك يا مصطفى
الله يسلمك يا سعيد
انت مال شكلك عامل كدا ؟؟؟ اول مره اشوفك فى الحاله دى
يعنى كنت سألت عليا يا سعيد ؟؟
انا فاكرك مسافر و الله
لا مكنتش مسافر
الله امال كنت فين الفتره دى كلها ؟؟
كنت قاعد فى البيت لانى خسرت كل فلوسي فى الشريط اللى عملته
يا خبر... خسرت فلوسك كلها ؟؟#دجيهان_عادل
ايوه ....دا انا بقالى يومين مكلتش و الله فلوسي كلها خلصت
و الله يا مصطفى انا لو معايا فلوس كنت اديتهالك بس ....
بس بس ....انت فاكر انى جاى اخد منك انت فلوس ؟؟؟؟
استنى يا مصطفى متزعلش مش قصدى
و الا قصدك ؟؟ سلام عليكم
و خرجت من عند سعيد و انا مصدوم ...بقا ده صاحب عمرى اللى كنت بقسم لقمتى معاه ؟؟ دا انا اخترتك من دون الناس كلها لانى كنت فاكرك الاقرب ليا
ياااااااا يا زمن ...حوجتنى للخسيس قليل الاصل #دجيهان_عادل
مشيت شويه و رجليا اخدتنى على محل واحد صاحبى اسمه وحيد
كنت مخنوق جدا و حاسس انى لو روحت بالشكل ده هيجرالى حاجه
قلت اروح اقعد مع وحيد شويه
و دخلت عليه و سألنى عن سبب الشكل اللى شايفه ده ؟؟؟
حكيت له كل حاجه بما فيهم موقف سعيد صاحبى #دجيهان_عادل
وحيد فى ثانيه بعت جاب لى اكل و طلع فلوس من جيبه و ادهوملى
لا لا مش عاوز فلوس
عيب عليك يا مصطفى دا انا لحم كتافى من خيرك
متقولش كدا يا وحيد بس انا عاوز اشتغل و ممدش ايدى لحد
طب انت ناوى تعمل ايه يا مصطفى ؟؟ هترجع تغنى تانى ؟؟
لا أغنى تانى لأ ...انا خلاص كرهت المجال ده و كرهت اسمع سيرته
طب انا عندى لك مشروع حلو اوى ...
بجد ؟ مشروع ايه دا ؟
انا بتاجر الايام دى فى المكياج المحلى
طب و انا افهم ايه فى المكياج يا وحيد ؟
انت مخك حلو يا مصطفى و هتنفعنى اكيد حط ايدك فى ايدى يا صاحبى و احنا نعمل احلى شغل
بس انا ممعييش اى فلوس يا وحيد ؟؟
عيب عليك يا مصطفى دا شغلك معايا يعتبر مكسب كبير ليا
الله يكرمك يا وحيد انا مش عارف اشكرك ازاى
عيب عليك تقول كدا احنا اخوات يا جدع
و اشتغلت فعلا مع وحيد و الحمد لله انا دماغى حلوه و شغاله ...الشغل كبر و بقيت افتح مجالات و اماكن مختلفه لتوزيع البضاعه .
و فى يوم و انا قاعد مع وحيد افتكرت حاجه كنت ناسيها و نزلت على دماغى زى القنبله
يا خبر
فى ايه يا مصطفى ؟
تصدق انا كنت ناسي حاجه مهمه اوى
حاجة ايه دى ؟؟
انا كنت عامل وديعه فى البنك بتلاتين ألف جنيه و ناسيها خالص
ههههههههه انت مجنون يا مصطفى فى حد ينسي تلاتين الف جنيه ؟؟
و الله زى ما بقولك كدا يا وحيد ...دماغى مجبتش الموضوع ده من الهم اللى كنت شايله
طب الحمد لله انك افتكرت
انا هروح افك الفلوس دى و ادخلها فى الشغل بتاعنا عشان يكبر
و فعلا روحت البيت و قعدت ادور على ورق الوديعه لحد ما لاقيته رحت فكيت الوديعه و دخلت فلوسي فى الشغل مع وحيد صاحبى
كبر الشغل اكتر و اكتر و كنت الحمد لله وش الخير على صاحبى و جت قدامى صفقه مكياج مستورد نضيف جدا عن الأنواع المحليه اللى كنا بنشتغل فيها انا ووحيد
رحت لوحيد و قلت له
أما انا عندى لك خبر
خير ان شاء الله يا وش الخير
فى صفقه مكياج مستورد انما ايه مكسبها حلو جدا
مكياج مستورد ايه يا ابنى احنا زبايينا الناس الغلابه اللى عاوزه تشترى قلم روج بخمسه جنيه ماسكرا بعشره جنيه انت بقا لما تيجى تقولها القلم بخمسين جنيه مش هتشترى و لا هتعبرك
بس دى انواع انضف بكتير يا وحيد اورجينال
منا فاهم بس الزبونه بتدور على. الأرخص
يا وحيد البضاعه دى لها زباينها برده
زباينها الناس اللى معاها فلوس امال احنا زباينا الناس الغلابه اللى عاوزه تكون حلوه بأقل التكاليف ميهمهاش بقا أن النوع ده خطر على بشرتها و الا مش حلو على المدى الطويل دول ماشيين بسياسه احيينى النهارده و موتنى بكرا
بس انا شايف أن الصفقه دى حلوه جدا يا وحيد
لصاحب نصيبها بقا يا مصطفى
يعنى ايه يا وحيد ؟؟ مش هتدخل معايا فى الصفقه دى ؟؟
لا يا عم مليش فيه ؟؟ و انصحك يا مصطفى بلاش هتخسر مبلغ كبير اوى لو معرفتش تصرف البضاعه دى
و يفوز باللذات كل مغامر يا عم وحيد ...انا هشتريها و اللى يحصل يحصل
انا حذرتك يا مصطفى و انت حر
ربنا يسترها يا وحيد
و اشتريت الصفقه بمبلغ كبير جدا تقريبا كدا كل اللى كان معايا
بقيت الف على الصيدليات و ابيع لهم القلم اللى بيشتروه مثلا ب ٤٩ جنيه اديهلهم انا ب٢٣ جنيه و اكسب فيه مثلا ٣ جنيه
الصيدليات مكنتش مصدقه و لما كنت بقولهم على السعر كانوا يطلبوا كميات أكبر لان السعر لقطه طبعا و انا كمان المكسب ده بالنسبه للمحلى اللى كنا بنكسب فيه نص جنيه و جنيه فى الحته
.يعتبر المكسب ده كبير و حلو جدا بعد شويه لما الناس جربوا البضاعه رفعت السعر من ٢٣ إلى ٢٦ و برده السعر كدا بالنسبه للصيدليات لقطه
بعت الصفقه بسرعه جدا و كسبت منها مبلغ محترم اوى
و عرفت الطريق للصين و ابتديت أوسع نشاطى و فتحت محل خاص بيا و بقيت اوزع على محافظات تانيه كتير
فضلت فى الشغل ده حوالى خمس سنين كنت اتعرفت اوى فى السوق و بقى ليا أسمى.
بعد كدا ابتدت حكايه الموبيلات دى تظهر و عرفت أن مكسبها اكتر بكتير من المكياج
ابتديت اعمل نشاط الموبيلات ده بجانب المكياج و فعلا لقيت أن مكسب الاكسسوارات لا يقارن اطلاقا بمكسب المكياج وعشان كدا غيرت نشاطى كله بعد حوالى سنه من شغلى فى النشاطين و عملت شركه و بقيت استورد اكسسورات الموبيلات من الصين
اول صفقه عملتها كانت صفقه بطاريات و اشترتها و نزلتها السوق بنص التمن اللى بيبيع بيه التجار و ناس كتير اوى كانت متضايقه منى
سافرت السعوديه عملت عمره و حجيت الحمد لله و سافرت دول الاتحاد الأوروبى كلها
كمان سافرت الامارات و الصين
لفيت كتير اوى و كنت مأجل حكايه الجواز دى لحد ما شفتها
داليا اخت زوج اختى ..
بنت جميله رقيقه اوى شفتها لاول مره فى بيت اختى
اه منا نسيت احكيلكم أن اخواتى اتجوزوا ووقفت جنبهم و جنب والدى اللى بالمناسبه بقا صديقى الصدوق بعد كدا و بطل يضايقنى لما شاف نجاحى و فهم انى مبحطش راسي برأسه
طبعا رجعت البيت و عشت مع ابويا و امى بعد ما اخواتى البنات اتجوزوا
لما شفت داليا سألت منى اختى عنها لو مرتبطه أو لا
قالت لى لا قلت كويس اوى ....شفتها فى كذا مناسبه و اتعلقت بيها اكتر و اكتر
داليا كانت مع اختى فى نفس البيت لأن اختى متجوزه فى بيت عيله
ابتدت زياراتى تزيد لمنى عشان اشوف داليا...و كنت بشوف فى عينها الاعجاب بيا لحد ما صارحتها و لقيت منها القبول
كنت فرحان جدا انى اخيرا هرتبط بحد حبيته من كل قلبى
بس للاسف يا فرحه ما تمت .... حماة اختى كانت عامله مشاكل مع منى
و اختى محبتش انى اتجوز بنتها ...كلمه من منى على كلمه من حماتها الدنيا وقعت فى بعض و ستات العيلتين اتخانقوا
مكنش موافق من العيله بتاعه داليا الا ابوها و خالها
اتصلت عليه و قابلته و فهمته أن ده كلام ستات و الراجل كان متفهم جدا و قالى انا. معاك
لكن داليا نفسها لما قلت لها تعالى نتجوز و ابوكى معانا قالت مقدرش اخسر اهلى عشان حد
يااااا الدنيا اسودت فى وشى لتانى مره فى حياتى ازاى انا احبها الحب ده كله و هى تقابله بالشكل ده ؟؟
اكيد هى محبتنيش من الأساس ...لو كانت حبتنى كانت حاربت معايا ووقفت قدام الجميع
امى لما شافتنى فى حاله وحشه قالت لى و لا يهمك انا عندى لك عروسه احلى من داليا دى.... بنت غلبانه و مطلقه معاها طفل لو اتجوزتها هتكسب ثواب فيها
قلت لها ماشي يا ماما اشوفها
رحت شفتها و للاسف مرتحتش و للاسف مره تانيه اخوها استفزنى بالكلام و قال
انا اختى مطلقه هتقدر تتجوز فى خلال شهر احنا مش بتوع دخول و خروج
لقيت نفسي برد عليه و أقوله انا اتجوز فى ١٥ يوم و مش عاوزها الا بشنطة هدومها و الا اقولك انا هجيب لها الهدوم كمان
و فعلا فى خلال ١٥ يوم كنت متجوز ثريا
من اول يوم حسيت أن ثريا مش شبهى انا بحب الهزار و الضحك و الفسح و الخروج بحب امتع نفسي و اللى حواليا ...بحب اقف اطبخ و اكل اكل كويس
هى بقى لقيتها العكس تماما تقيله متحبش الضحك لو لقتنى بضحك تستغرب و تقولى بتضحك على ايه
غير أنها مكنتش بتعملى اكل الا فى المناسبات كنت كل يوم ارجع ملقيش اكل اقوم اتصل بالدليفرى
لدرجة انى جيت فى يوم و اتفقت معاها تطبخ لى و هنفذ لها كل اللى هى عاوزاه و طلبت منها نعيش كويسين مع بعض وافقت و كنت فى منتهى السعاده
هما يومين يا مؤمن و رجعت ريما لعادتها القديمه
تعبت اوى و مقدرتش اسيبها لأنها حملت على طول بعد جوازنا و خلفت ليا بنتى ندى
اجمل زهره فى حياتى و هى اللى انا عايش عشانها
عشت مع مراتى حوالى ٦ سنين بس تعبت
تعبت من المعامله الجافه و التجاهل رحت جبتها فى يوم و قعدتها قدامى و قلت لها على كل اللى جوايا من ناحيتها و انها بتعمل كذا و كذا و كذا ....
و نهيت كلامى معاها انى هطلقها
هى مكنتش مصدقه انى بقول كدا و كانت فكرانى بهزر
بس انا بجد كنت جبت أخرى و مش قادر اتحمل اكتر من كدا
اتفقت معاها انى هطلقها قامت خدت ابنها و سابت بنتى و مشيت و لقيت اختها بتتصل بيا و تقولى انت عاوز تطلقها ؟؟ مش لما تجيب اللى فى القايمه الاول يا مصطفى ؟
قلت لها العفش كله موجود تعالوا خدوه قالت لا اختى عاوزه قيمه القايمه فلوس مش عايزه العفش قلت و ماله قيمتها كام يعنى ؟؟
قالت هو انت مشفتهاش و انت بتمضى عليها
قلت لا مشوفتهاش
خلاص هبعت لك صوره منها
و بعتت لى صوره و لقيت قيمه القائمه ٣٠٠ الف جنيه انا شفت الرقم ذهلت
الرقم ده من ١٥ سنه كان رقم خرافى و انا فعلا مدتش خوانه و لا بصيت فى القايمه ساعتها
اتصلت باختها و قلت لها الفلوس انهارده هتكون جاهزه و الطلاق هيتم انهارده
و طبعا محبتش سيره لاهلى عن ال٣٠٠ الف دول
و طلقتها و سابت لى البنت هتستغربوا بس مش دى اول مره تسيبها كانت بتغضب بالست شهور و تسيبهالى
المهم انا حالتى النفسيه ساءت جدا و بنتى صعبت عليا كانت لسه يدوب خمس سنين
رحت اتصلت عليها و قلت لها ارجعى شقتك و على عفشك و ربى بنتك و طلباتك كلها مجابه افتكرت انى عاوز أرجعها قلت لها لا انا بعمل كل ده فى سبيل أن بنتى تبقى مرتاحه و مبسوطه
و اهو بقالى سنين مطلق ..اتعرض عليا ستات كتير جدا من العيله و القرايب و الاصدقاء بس انا مرضتش اغلط نفس الغلطه اللى غلطتها قبل كدا
انا نفسي احب و اتحب ...نفسي فى ست تحبنى تحب مصطفى لنفسه و لصفاته ..واحده ارتاح على كتفها من تعب السنين و اقول خلاص ربنا عوض صبري خير بالانسانه دى
ادعولى ربنا يرزقنى بيها و يفرح قلبى
ربنا يفرح قلوبكم كلكم .
تمت 🌷🌷
ارجو لو القصه عجبتكم الدعاء لوالدى و لسائر موتى المسلمين.
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
جميله يادكتور . الواد ده شبهى فقرى
ردحذفههههههههه بعد الشر عنك
ردحذف