#دار_المسنين
# الجزء_الاول
الحاجه عايده عاوزاكى يا مدام ناديه
حاضر هجيلها بعد شويه هفطر بس و اروح لها على طول
ايه حكايه الحاجه عايده دى يا ناديه ؟ كل شويه تبعت لك
و الله يا مياده دى ست كبيره محدش بيسال عليها و بتعتبرنى بنتها و بتحب تتكلم معايا
محدش بيسأل عليها ليه هى معندناش ولاد؟؟
لا عندها تلاته واحد دكتور و واحد مهندس و التالته مدرسه
ياااا ....طب و ازاى مبيسالوش عليها ؟
يوووو ...دا كتير اوى الحاجات دى ...انتى بس اللى لسه جديده و متعرفيش الدنيا بقت عامله ازاى ...بكرا تعرفى
هروح بقا لها دلوقتى لانى لما بتأخر عليها بتزعل منى ....سلام مؤقت
صباح الخير يا ماما عايده
صباح النور يا ناديه يا بنتى ....اتأخرتى على ليه ؟؟
و الله مسافه ما اكلت لقمه بس و جيت لك على طول
طب و ليه مجتيش تفطرى معايا ...انا مجهزالك سندوتشات المربى بالقشطه اللى بتحبيها اهيه و سندوتشات الجبنه الرومى
ربنا يخليكى لى يا حبيبتى ....بس مش عاوزه اتقل عليكى و اجى افطر معاكى كدا كل يوم
لا عيب تقولى كدا يا ناديه ...انا زعلت منك
لا و الله ما تزعلى و الله ما اقدر على زعلك يا ماما عايده و الله انا بعتبرك زى امى
انتى امك موجوده يا ناديه ؟؟
لا امى ماتت و انا فى الاعداديه ...و سابت فراغ كبير اوى فى حياتى ....ابويا اتجوز بعد موتها بسنه واحده تانيه بس مكنتش بحبها لانى كنت بحس انها جت اخدت مكان امى
طبعا يا بنتى مفيش زى الام ....طب و عملتى ايه ؟
مفيش كنت عايشه معاهم فى البيت كأنى مش معاهم طول النهار قافله على نفسي اوضتى و قاعده لوحدى لغايه ما اخدت ثانويه عامه و دخلت كليه خدمه اجتماعيه فى محافظه تانيه و كان الوضع دا مريحنى بشكل كبير خاصه بعد مرات ابويا ما خلفت ولد و بنت و كنت بشوف اد ايه ابويا مهتم بيهم اوى
و بعدين يا بنتى كملى
مفيش اول ما خلصت الكليه ابويا جاب لى عريس ابن واحد صاحبه وقالى اتجوزيه ....صراحه مكنش فارق معايا اتجوز مين ...انا كنت عاوزه امشي من البيت بأى طريقه و خلاص ....و فعلا اتجوزته وورانى اللى عمرى فى حياتى ما شفته
يا ستار يارب ليه ؟ كان بيعمل ايه ؟؟
بصى يا ستى اول ليله لينا سوا ....اول ما دخل و قبل ما اقلع فستانى... بص لى و قالى :
انا شايف اكتر من حد اداكى نقطه فى ايدك
قلت له ايوه دول خالاتى و عماتى و قرايبي
طيب فين الفلوس دى ؟؟
ليه ....عاوزهم ليه ؟
وريهوملى بس
قمت طلعت الفلوس و لسه بوريهمله لقيته خطفهم و حطهم فى جيبه.... و قالى هما دول كلهم و الا مخنصره حاجه ؟؟
انا طبعا اتفاجئت جدا بالموقف و استغربت فلما لاحظ انزعاجى الشديد قعد يضحك و يقولى متخافيش اوى كدا ...احنا خلاص بقينا واحد فلوسك هى فلوسي و فلوسى هى فلوسك و انا برده اللى هبقى اسد النقطه دى
طبعا انا كنت لسه صغيره يدوب ٢٢ سنه و خال على كلامه
بدأ بعد كدا الطبع السيئ يبان اكتر بخل فى كل حاجه حتى فى مشاعره بيستخسر يقول كلمه حلوه و ميعرفش أن الواحده بتبقى منتظره من جوزها مجرد كلمه ....كلمه ترويها و تخليها دايما مرعرعه زى الورده
بقيت افضل طول اليوم من غير اكل و لما أسأله عن مرتبه كان ينكر انه معاه فلوس و يتحجج أن مرتبه ضعيف
و فى يوم و انا برتب الدولاب لقيت دفتر توفير بفتحه لقيته باسمه ....ببص على الرصيد اللى فيه مكنتش مصدقه نفسي ...قلت اكيد انا قريت غلط
لكن لا دا صح ....رصيده ١٠٠ الف جنيه و سايبنى جعانه....رصيده مئة ألف و عمال يشتكى من الفقر ليل نهار
اول ما شفت كدا الدنيا لفت بي ...و لقيت نفسي وقعت على الأرض. ....معرفش قعدت على الحال ده اد ايه
و لما فقت كنت حاسه ان ضغطى واطى اوى مش قادره اقف على رجلى بقيت ماشيه اتسند على الحيطه لحد ما وصلت للباب ناديت على جارتى اللى قدامى جت جرى و اخدتنى و نزلنا اقرب مستوصف
و هناك قاسوا لى الضغط و لقوه واطى فعلا و الدكتوره اللى هناك شكت انى حامل و عملت لى اختبار حمل و فعلا طلعت حامل
روحت البيت بعد ما الدكتوره كتبت لى على علاج و فيتامينات لقيته قاعد مستنينى و بيقولى كنتى فين يا هانم؟ و ازاى تخرجى من غير اذنى ؟
قلت له كنت فى المستوصف و الدكتوره كتبت لى العلاج ده
علااااج ايه .....ليه عندك ايه أن شاء الله
انا حامل يا فتحى
نعم نعم حامل ازاى ....هو انا مش منبه عليكى أننا هنأجل الحمل شويه لغايه ما نشم نفسنا....انا لسه مديون من مصاريف العفش و الفرح
بصيت له كدا و مش مصدقه ....
و قلت له ليه الكدب يعنى؟؟ مديون ايه ؟؟
و انا هكدب عليكى ليه يعنى ؟ انا ممعيش فلوس لحمل و لا ولاده و اظن انى مفهمك من البدايه ....عاوزه بقا تجيبي علاج روحى لابوكى يجيبهولك و الا انزلى اشتغلى و اصرفى على نفسك
اصرف على نفسي ؟؟ امال دا ايه يا فتحى و طلعت الدفتر من الدولاب
هو شاف الدفتر و هاج زى الثور و بقى يضرب فى باديه و برجليه و يقولى بتدورى ورايا يا بنت الكلب ....فاكره نفسك ناصحه و انا اصرخ ....و يشد فى شعرى لما مسح بى بلاط الاوضه و طردنى بره الشقه و قفل الباب
انا بقا جريت على بيت ابويا شعرى منكوش و عنيه متوته من الضرب ...اول ما مرات ابويا شافتنى قلبت وشها ..و لما ابويا سمع منى اللى حصل غلطنى
ايه غلطك ازاى ؟؟؟
ايوه و الله زى ما بقولك كدا ..و قالى عيشي و متدوريش ورا جوزك ما هو كله لكى و لاولادك بعدين ...انتى خلاص مبقاش لكى مكان هنا ...قومى يلا لما اروحك لجوزك
ياااا معقوله يا بنتى الكلام ده ؟
ايوه معقوله ...هو خاف من مراته اللى ما صدقت انى غورت من البيت على حد قولها و وسعت على عيالها كل واحد منهم فى اوضه ...مش ناقصه بقا انى اروح ازاحمهم تانى فى المكان 😔
كملى يا ناديه ..
طبعا لما ابويا رجعنى لفتحى ذلنى ذل و لا كأنى خدامه عنده بقى يسبنى بالايام ملقيش غير العيش الناشف اكله و طبعا مقدرش اعترض لانى عارفه اللى فيها و أن ابويا هيرجعنى له تانى
كان لى جاره ست كبيره زى امى كانت تشوف حالى و اصعب عليها كانت ساعات تدينى اكل من عندها
و فى مره دخل لقانى باكل رز و حتة فرخه جارتى دى كانت مديهوملى و كان بقالى كذا يوم مكلتش و الحمل تاعبنى اوى و كنت فى الشهر الخامس
اول ما دخل و لقى الاكل جن جنونه و اتهمنى انى بسرقه و بجيب اكل من وراه ....و بقيت أحلف له أن ده اكل جارتى مديهولى و هو طبعا مصدقش و بقى يقول اول مره اشوف حد بيسلف حد فراخ ....و راح شادد الطبق من ادامى و نزل على بالحزام ضرب ....على كل حته فى جسمى و صريخى كان جايب الجو ....لدرجه انى اغمى على من كتر الضرب
بعدها لقيته بيفوق فى و لقيت بركة دم تحت منى
اخدنى و رحنا على المستشفى العام و هناك قالولى أن دى حاله اجهاض ....و طلبوا منى اعمل محضر لما لقوا اثار الضرب على كل حته فى جسمى
طبعا جوزى قالهم مفيش داعى للمحضر هى وقعت من على السلم و هى نازله فحصلها الكدمات دى
الدكتور بص لى كدا ....بمعنى صحيح الكلام ده ؟
هزيت راسى و انا ببص لفتحى بخوف... ايوه صحيح
طبعا اتعملت لى عمليه وابنى نزل خمس شهور من بطنى و كان متخلق و عنده شعر و عنيه مغمضه ...عمرى ما هنسي منظره ابدا و انا شايفه الممرضه بتلفه فى قماشه خضرا و بتديه لابوه ...و الدكتور بيقوله لازم تسميه و تصلى عليه و بعد كدا تدفنه
ياااا على الحسره اللى نزلت فى قلبى ساعتها ....بقيت اصرخ اصرخ أن ضنايا راح منى لحد ما جابولى حقنه مهدئه
دخلت بعدها فى دور اكتئاب شديد جدا و مرضتش ارجع بيتى ...و روحت على بيت ابويا
طبعا مكنش مرحب بى ...بس انا صممت على الطلاق و قلت لابويا انى مش هرجع لفتحى تانى حتى لو قطع من جسمى بالحته و أنه لو اجبرنى على الرجوع هموت نفسي
ابويا قدام اصرارى الشديد وافق على الطلاق و بعت لفتحى و ساومه يطلق فى هدوء لأحسن نعمل فيه محضر بالضرب و اجهاض الجنين و طبعا كان شرط فتحى الوحيد انى اتنازل عن كل حاجه نفقتى و مؤخرى و جهازى حتى الحاجات اللى كان جايبها لى ابويا اخدها
و اتطلقت و بقيت اشوف نظره الضيق من مرات ابويا و بقت تعاملنى اسوء معامله
كنت انزل ادور على شغل علشان اغور من وشها لكن مكنتش بلاقى غير شغلانه فى محل ملابس ...مكتبه
لغايه ما فى مره لقيت اعلان فى الجرنال طالبين موظفات فى دار مسنين بس بشرط يكونوا مقيمين فى الدار ...و طبعا الشرط دا جه فى مصلحتى و كنت فرحانه اوى بيه و سبت بلدى و جيت اشتغلت هنا فى القاهره
هو انتى مش من هنا يا ناديه ؟؟
لا أنا من الشرقيه من بلد صغيره كدا
و بقالك اد ايه بتشتغلى هنا ؟؟
بقالى دلوقتى ٣ سنين ....قاعده فى الدار هنا
طب و اهلك مبيسالوش عليكى ؟؟
ساعات بكلمهم بالتليفون و خلاص
يااا قطعتى قلبى يا بنتى ....سبحان الله انا لو بنتى زيك كدا عمرى ما افكر انى ابعدها عنى ابدا ....انتى طيبه اوى يا ناديه
ربنا يخليكى يا امى معلش دوشتك
لا متقوليش كدا يا حبيبتى......بقولك ايه يا ناديه
نعم يا ماما عايده
قومى هاتيلى الصندوق اللى فى الدولاب ده
حاضر .....اهو الصندوق
يا ترى ماما عايده عاوزه الصندوق ليه ؟؟ و يا ترى حكايتها ايه هى كمان ؟؟ دا اللى هنعرفه فى الجزء الجاى باذن الله 😘
يتبع .......😍
#د.جيهان_عادل💐
#دار_المسنين
#الجزء_الثانى
بقولك ايه يا ناديه
نعم يا ماما عايده
قومى هاتيلى الصندوق اللى فى الدولاب ده
حاضر .....اهو الصندوق
عايده كانت شايله مفتاح الصندوق فى سلسله لابساها حوالين رقبتها
عايده فتحت الصندوق و اخدت منه سلسله فضه متعلق فيها ايه الكرسي
عايده قفلت الصندوق بسرعه و مدت ايدها لناديه
خدى يا ناديه يا بنتى دى سلسله فضه غاليه على اوى كانت بتاعه امى الله يرحمها
لا لا يا ماما عايده ... مقدرش اقبلها منك
أخص عليكى مش بتقولى انك بتعتبرينى زى امك
ايوه طبعا و الله بس بنتك اولى بيها منى
بنتى 😔😔 الله يسامحها و يسهلها بقا
خديها منى متكسفنيش يا ناديه
حاضر يا ماما عايده .....تسلم ايدك ...متعرفيش هديتك دى عندى اد ايه ...انا محدش ادانى هديه قبل كدا
انتى تستاهلى كل خير يا ناديه....انا عاوزاكى تلبسيها متقلعهاش من رقبتك ابدا
حاضر يا ماما عايده
الا صحيح يا ماما عايده انتى بقالك شهر هنا و معرفش عنك غير ان لكى تلات اولاد ....بس معرفش ليه جيتى هنا؟ و ليه مش قاعده مع واحد منهم ؟.... و ليه مبشوفش حد بيسأل عليكى منهم ؟؟
لا دى حكايه طويله اوى يا ناديه هبقى احكيهالك على رواقه......انا دلوقتى هروح اقعد مع الحاجه روحيه سمعت انها تعبانه شويه
ايوه فعلا مياده كانت بتقولى.. ما هى المسؤله عن حالتها
طب ما تيجى معايا نزورها يلا
يلا يا ماما عايده
ناديه و ماما عايده مشيوا لآخر الطرقه و اللى بتنتهى باوضه الحاجه روحيه
ناديه خبطت على الباب ....سمعت صوت ضعيف بيقول ادخل
اول ما دخلوا لقوا ست كبيره فى بدايه السبعينات لابسه ايشرب بنى على دماغها رابطاه من على رقبتها ....شكلها نحيل اوى و ايديها مكرمشه جدا و بيظهر عليها نقط بنى و نايمه على سريرها
ازيك يا روحيه يا حبيبتى
ان شالله تسلمى يا .....انتى اسمك ايه ؟؟
انا عايده ....انتى مش عارفانى يا روحيه ؟؟
اه ..اه عارفاكى ....و مين الشابه اللى معاكى دى ؟
دى ناديه شغاله هنا....ما انتى شفتيها مية مره يا روحيه
هنا همست ناديه فى ودن ماما عايده و قالت لها معلش يا ماما عايده اصل عندها زهايمر و بتنسي الحاجات اللى حصلت قريب....لكن الحاجات البعيده فاكراها اوى
ااه ...ربنا يشفيها يا بنتى
و انتى عامله ايه يا روحيه دلوقتى
انا كويسه بس عبدالرحمن مجاش
عبدالرحمن مين يا روحيه ؟؟
عبدالرحمن جوزى ...أصله راح الجيش و لسه مجاش لدلوقت ....انا قلقانه عليه
هنا ردت ناديه و قالت متقلقيش زمانه جاى يا حاجه
ماما عايده هزت راسها و قالت لناديه هو فى الجيش صحيح ؟؟
ناديه قالت لها لا دا مات من خمس سنين بس هى ساعات بتنسي .....للاسف هى مخلفتش و مكنش لها غير جوزها ده هو كل دنيتها و عشان كدا دايما تسأل عليه
هنا بصت عايده فى الارض بضيق و قالت يعنى اللى خلفوا عملوا ايه 😏؟؟؟
طيب عاوزه منى حاجه يا روحيه ؟؟
لا كتر خيرك يا .....يا ....
عايده يا حبيبتى
كتر خيرك يا عايده .... ابقى تعالى تانى
هجيلك اخر النهار تانى ....يلا يا ناديه
تعالى يا ناديه نروح للحاجه صفيه نسلم عليها
حاضر يا ماما عايده يلا بينا
ناديه و ماما عايده مشيوا مسافه مترين و لقوا اوضه الحاجه صفيه
خبطوا على الباب .....
ادخل
دخلوا لقوا ست فى الستينات من عمرها قاعده على كرسي و فى أيدها ابرتين تريكو و خيط صوف لونه تركواز و لابسه نضاره و مسرحه شعرها و عامله كحكه و شعرها كله ابيض و حاطه فيه ورده ....رابطه حوالين رقبتها ايشارب ملون عياقه كدا
ازيك يا صفيه ....عامله ايه ؟؟
اهلا عايده تعالى يا حبيبتى ....اتفضلى يا ناديه ....تعالوا
تشربوا ايه يا جماعه عندى هنا شاى و كركديه و ينسون
لا متشكرين يا حبيبتى احنا جايين نطمن عليكى بس
ربنا يخليكوا يارب طب اجيب لكم حاجه ساقعه
لا ساقعه مين ...انتى عارفه السكر و تحكماته
هنا ردت ناديه و قالت بس ايه الشال الحلو اللى بتعمليه دا يا مدام صفيه ؟؟
دا شال بعمله علشان الشتا ...اصل الشال بتاعى القديم بقى شكله وحش اوى
بس تسلم ايدك شكله هيطلع شال تحفه
تسلمي يا حبيبتى ...اتفضليه
الله يكرمك يارب دا انا ازودهولك
طب ايه رايك يا صفيه تعمليلنا انا و ناديه كل واحده شال و نديكى تمنه ...و لو اى حد عاز شال تعمليله بالفلوس
انا تحت امركم ...اصلا دى هوايتى المفضله و الحاجه اللى بتسعدنى
طيب خلاص انتى تقولى لناديه الشال بياخد كام شلة خيط و هى تنزل تجيب لى و لها لون على ذوقها و تاخدى أجرة ايدك
لا من غير حاجه خالص .. بس هاتولى الخيط و ملكمش دعوه
لا الشرط نور ....لازم تاخدى عمايل ايدك
ماشي يا ستى انا تحت امرك
ما يؤمر عليكى ظالم يارب ......قولى يلا لناديه الشال ياخد كام شله
الشال يا ستى بياخد تلات شلات ...بس تجيبي لى خيط تركى علشان يكون كويس ...غسيل و لبس
ماشي ...و هتاخدى كام على الشال ؟
يا ستى مش هنختلف
لا لازم تقولى ...دا تعبك و مجهودك و انتى اللى تقدريه
و الله ما هنختلف يا حاجه اى حاجه
طيب انا بسمع أن اللى بيعمل كروشيه أو تريكوا بياخد اد تمن الخيط مرتين صح كدا؟؟
ايوا صح بس انا مش هاخد منكم الا اد تمن الخيط و خلاص يعنى لو الخيط قطع تلات قروش هاخد تلات قروش زيهم
و احنا موافقين ..... نستاذن بقى
ما انتوا قاعدين يا حاجه ....
لا يدوب بقا علشان الغدا خلاص قرب......يلا يا ناديه يا بنتى
الحاجه عايده خرجت هى و ناديه من اوضه صفيه ...و لقوا حركه غير عاديه فى الطرقه .....ناس بتجرى على اوضه الحاجه روحيه
ناديه سألت مياده اللى كانت بتجرى هى كمان
فى ايه يا مياده ؟؟
الحاجه روحيه بتطلع فى الروح ....و الدكتور عندها دلوقتى و اتصلنا على مديره الدار و جايه حالا
الحاجه عايده بقت واقفه مذهوله و بقت تقول لا حول و لا قوة الا بالله ....احنا كنا لسه عندها من شويه .....لا حول و لا قوة الا بالله
عايده و ناديه راحوا على اوضه روحيه لقوها عرقانه اوى و عنيها باصه فى السقف و جسمها مشدود و بتتنفس بصوت عالى كأنها مش قادره تاخد نفسها
عايده اول ما شافتها كدا بقت تتشاهد و تلقنها الشهاده
قولى يا روحيه اشهد ان لا اله الا الله و ان محمد رسول الله ....و قعدت تكرر لها الشهاده
انتبهت روحيه لصوت عايده و قالت انت جيت يا عبدالرحمن ....انا مستنياك من زمان يا حبيبي ....انا لبست لك الفستان الابيض اللى كنت بتحبنى البسه لك ....خد ايدى اهى ......
قولى يا روحيه اشهد ان لا اله الا الله و ان محمدا رسول الله
روحيه بصت لعايده و ابتسمت و قالت اشهد ان لا اله الا الله و ان محمدا رسول الله .....و فاضت روحها
عايده بقت تحمد ربنا..... الحمد لله ...لا حول و لا قوة الا بالله..انا لله وانا اليه راجعون
كل اللى كانوا واقفين فى الاوضه بقوا يعيطوا ....الموت دا لحظه صعبه اوى ممكن تختار اى حد منا فى اى لحظه. و اصعب موت هو موت الفجأه الموت اللى ميديش صاحبه فرصه أنه يتوب أو يتراجع عن ذنب بيذنبه........ربنا يحسن ختامنا جميعا 😔😔
يتبع ......😔
#د.جيهان_عادل💐
#دار_المسنين
#الجزء_الثالث
بعد ما الحاجه روحيه ماتت اتصلوا على قرايبها علشان يجوا يستلموا الجثمان ....
جه ابن أختها.... واد عامل زى الطحش كدا لابس جلابيه و طاقيه و عنده شنب واكل نص وشه... و كان حريص اوى على حاجتها و دهبها و بيسأل عن خواتمها و غوايشها اللى قلعوها لها طبعا اول ما ماتت علشان الغسل و التكفين...
لو سمحتوا خالتى كانت لابسه تلات غوايش و خاتمين و سلسله هما فين ؟؟
مياده بصت له كدا بقرف ...هو دا اللى همك ؟؟ ...يا اخى الست بقالها سنين هنا انت متعرفش عنها حاجه و لا فى يوم سألت عليها و جاى دلوقتى تسأل عن دهبها
جرا ايه يا استاذه هو ده حق و الا مش حق ؟؟ و الا انتوا عايزين تلهفوا الحاجه ؟؟
يا استاذ عيب تتكلم بالشكل ده ....ايه نلهف دى ؟؟
منا أما بسألكم عن حاجه المرحومه عمالين تبصوا لبعض و تتلفتوا ....فيه ايه ؟؟
يا سيدى و لا بنبص و لا بنتلفت اتفضل الحاجه اهى و مش زى ما انت قلت 😏
ازاى يعنى لا انا عارف خالتى كان معاها ايه بالظبط
و لا انت عارف و لا نيله خالتك كان معاها أربع غوايش مش تلاته و كان معاها اسوره و دبله و تلات خواتم و مبلغ مالى قدره تلات آلاف سبعميه و خمسين جنيه ....اتفضل اهم
الواد هرش فى دماغه و الفرحه بانت على وشه لما لقى الدهب اكتر من اللى هو متوقعه و قالها عدم اللامؤاخذه يا استاذه ..متزعليش منى
لا ياسيدى و لا زعلانه و لا حاجه بس امضيلى انك استلمت متعلقات المرحومه
الواد هرش فى شنبه اللى شبه المقشه و قال
اهييه...هو لازمن يعنى ؟؟
ايوا.. لازمن ...و لو مش عاوز تمضى يبقى مش هتستلمهم
لأ و على ايه ؟؟ همضى اهو ...هاتى بقا
الواد مسك العلبه اللى فيها الدهب زى ما يكون لقى كنز على بابا بقت عنيه تلمع و بقا يتمم على الحاجه بأديه و عنيه انها مظبوطه ...و بعد ما أتأكد انها كامله راح قفل العلبه و قال تمام يا استاذه...استأذن انا بقا
نعم 🥺 تستأذن ازاى ...طب و الجثمان ؟؟؟
اه ...عدم اللامؤاخذه كنت هنسي ...معلش الربكه اللى انا فيها بس هأهأهئ
مياده بصت له بقرف اكتر من القرف الاولانى 🙄 و بقت تقول فى نفسها جتك خيبه مش هامك الا الفلوس
الواد ركب مع خالته فى سيارة نقل الموتى و مشيوا
ناديه و مياده بقوا يضحكوا على منظره لما شاف الدهب و الفلوس لدرجه انه نسي خالته 😂
تانى يوم ناديه راحت تصبح على الحاجه عايده زى كل يوم لقيتها قاعده زعلانه اوى
فى ايه يا ماما عايده زعلانه كدا ليه ؟
مفيش يا بنتى
لا لا انا عايزاكى تفرفشي كدا ...بصى انا جبت الخيط اللى اتفقنا عليه مع الحاجه صفيه ...اهم لونين احلى من بعض شوفى اللون اللى يعجبك فيهم
اى حاجه يا بنتى مش هتفرق
لا هتفرق ....بصى كدا اللون الچانچا دا حلو اوى هيبقى تحفه عليكى
حلو يا بنتى تسلم ايدك
لا يا ماما انتى مش عاجبانى خالص انهارده...فى ايه مالك ؟؟ هتخبى على نونه حبيبتك ؟؟
مفيش حاجه يا بنتى بس منظر روحيه و هى بتموت و مفيش حد من أهلها جنبها أثر فى اوى ...و تخيلت نفسي مكانها و زعلت اوى 😔
اهلها مين ؟؟ ما انتى لو شفتى ابن اختها مكنتيش قلتى كدا 😂 ....واد كدا عامل زى ضرفة الباب و كان هيمشى من غير ما ياخد خالته معاه
ازاى يا بنتى ؟؟
اه و الله زى ما بقولك كدا ...الواد اول ما شاف دهب المرحومه و فلوسها نسي نفسه 😂
لا حول و لا قوة الا بالله.....الدنيا اتقل خيرها يا بنتى
لا يا امى الدنيا لسه بخير ...بس اكيد فى الكويس و فيه الوحش
عندك حق يا ناديه
و بعدين الحاجه روحيه الله يرحمها مكنش عندها اولاد لكن انتى ربنا يخلى ولادك و يحميهم لكى يا رب يعنى انتى وضعك مختلف عنها خالص
و لا مختلف و لا حاجه ....هما فين ولادى دول ...انا بقالى شهر هنا و هما عارفين مكانى و تليفونى و محدش فيهم كلف خاطره حتى و اتصل على,😰
معلش يا حبيبتى الغايب حجته معاه ...يمكن مشغولين و الا عندهم ظرف ...الله اعلم بيهم ..ادعيلهم و خلاص
و الله يا بنتى بدعيلهم بالرغم من جحودهم على وظلمهم لى ....بس انا برده مسامحاهم
بقوم بالليل اصلى و ادعيلهم أن ربنا يهديهم و يحنن قلوبهم على ...بس نفسي بتصعب على اوى
لا لا متزعليش نفسك بكرا يجوا و تفرحى بيهم ... بقولك ايه انتى فطرتى ؟؟
لأ و الله يا بنتى مليش نفس😔
لأ ازاى بقا .... ثوانى و هجيب الفطار نأكل سوا
ناديه راحت جابت الفطار و قعدت تتكلم مع الحاجه عايده و تحاول تضحكها و تخفف عليها احساس الوحده
يلا بقا انا همشي دلوقتى عشان هخلص شويه شغل كدا عندى.... عاوزه حاجه منى ؟
لا كتر خيرك يا بنتى ...انا هصلى الضحى و بعديها هنام شويه .
ناديه راحت تخلص شويه حاجات و قعدت مع مشرفات الدار و قعدوا يتكلموا
ناديه قالت احنا عاوزين نعمل حاجه نخفف بيها على الناس اللى معانا ....حاجه تفرحهم و تسعدهم
ياريت و الله يا ناديه.... .......عندك افكار؟؟
ايوه عندى اكتر من فكره بس مش عارفه بقى هينفعوا و الا لأ
بصوا احنا نعملهم حفلات دوريه يعنى مثلا كل شهر مره
، نعمل مثلا يوم رياضى ، نعملهم رحلات ، نخلطهم مع اطفال الملجأ التابع لينا ...هما عندهم طاقه حب كبيره ممكن يدوها للاطفال دول
و الله أفكارك حلوه يا ناديه ...بس لازم المديره توافق عليها الاول
انا هدخلها و اعرض عليها الموضوع و ممكن نستفيد منهم هما نفسهم يعنى لو واحده فيهم بتعرف تغنى ....لو حد من الرجال بيعرف يعزف ... لو حد بيعرف يعمل حلويات عشان الحفله و كلنا نتشارك سوا دا هيفرحهم اوى.
جميل ربنا يوفقك يارب ....اهى المديره جت اهيه.....ادخلى كلميها و تعالى طمنينا
دخلت ناديه و عرضت أفكارها على المديره و المديره فرحت بيها اوى و قالت لها انا موافقه بس انتى اللى هتكونى المسؤله قدامى عن تنظيم الحفلات و الرحلات دى ...و اى دعم مادى الدار هتتكفل بيه فى سبيل إسعاد الناس اللى ضحوا كتير عشانا و دى ابسط حاجه نقدمهالهم علشان نسعدهم
ناديه شكرت المديره و خرجت فرحت زمايلها و ابتدت تفكر هتبدا منين ؟؟
ناديه راحت على ماما عايده علشان تاخد رأيها فى الموضوع
ماما ناديه فرحت اوى و قالت انا هكون اول المشاركين فى الحفله دى يا ناديه
صحيح ...ازاى يا ماما عايده ؟؟
هقولك .....
عايزين تعرفوا ماما عايده هتشارك ازاى فى الحفله ؟؟ استنونى فى الجزء الجاى باذن الله 😘
يتبع .......😘
#د.جيهان_عادل💐
#دار_المسنين
#الجزء_الرابع
ناديه راحت على ماما عايده علشان تاخد رأيها فى الموضوع
ماما ناديه فرحت اوى و قالت انا هكون اول المشاركين فى الحفله دى يا ناديه
صحيح ...ازاى يا ماما عايده ؟؟
هقولك.... انا يا ستى هعملك حلويات الحفله كلها من تورت ل جاتوهات ..حلويات شرقيه.... بسبوسه ..كنافه ..جلاش
الله الله ...ايه الحلاوة دى يا ماما عايده
لا دا انا استاذه فى الحاجات دى ...كنت فى اعياد ميلاد ولادى كنت اعملها و الناس كانوا مبيصدقوش...و كانوا يقولوا اكيد انتى جايبها من بره
يا بختهم بيكى و الله يا ماما عايده ....انا كان نفسي يكون لى ام كانت تعملى عيد ميلاد كدا ....بالعكس كنت يوم عيد ميلادى ده بقعد اعيط على حالى و أن محدش فاكرنى
يا حبيبتى يا بنتى ....انتى عيد ميلادك امتى ؟
انا عيد ميلادى بعد عشر ايام ...بس خلاص كبرنا على الكلام ده
و لا كبرتى و لا حاجه انتى زى الفل اهو و لسه صغيره
امال احنا نقول ايه بقا ؟؟ يا بنتى انتى فى عز شبابك و لازم تعشيه و تفرحى بيه ...
بعد كل اللى حكيتهولك ده بتقولى كدا يا ماما عايده ؟؟
ايه هو اللى حكيتهولى دا ؟؟ امال أما تسمعى حكايتى هتقولى ايه ؟؟ انا بقا لو هعمل زيك كدا ...كنت دفنت نفسي من زمان اوى
ايوه صحيح ...انتى مش هتحكيلى بقا حكايتك يا ماما عايده ؟؟
حكايتى طويله و مش عايزه اضايقك يا ناديه
لا مش هتضايقينى و لا حاجه بس مشتاقه اسمعها...حاسه ان عندك كلام كتير جواكى عاوزه تقوليه
حاضر يا ستى هحكيهالك
صلى على اللى هيشفع فيكى يوم القيامه
عليه افضل الصلاة و السلام 😍
انا يا ستى اتولدت يتيمه الاب ...يعنى ابويا الله يرحمه مات و انا فى بطن امى و كان لى تلات اخوات
يعنى بقينا اربعه فى رقبة امى الله يرحمها بنتين وولدين ...امى ضاقت بيها الدنيا و بقت تعيط ليل نهار
و طبعا رجعت عند اهلها و جالها المرض الوحش من كتر حزنها على ابويا الله يرحمه
امى مكملتش السنه الا و هى مدفونه جنب ابويا 😔
و كانت صدمة العمر على جدتى و جدى ...جدتى فضلت لابسه عليها الاسود لحد ما ماتت 😔
طبعا ساعتها جدتى هى اللى بقت مسؤله عننا ...أكلنا و شربنا و لبسنا....بس انا كان لى معزه خاصه شويه عندها لانى اصغر واحده و مشوفتش ابويا و ملحقتش اشبع من حنان امى ...فبقت تدلعنى عن اخواتى الباقيين
و لما كبرت و اخواتى اتجوزوا كنت أنا اللى عايشه معاها و كنت اخدت دبلوم تمريض و بشتغل ممرضه فى المستشفى العام و كنت واخده بالى منها و من طلباتها ...حاولت ارد لها شيئ صغير من اللى عملته معايا انا و اخواتى ...كنت احميها و اكلها و اشربها و اغسل لها هدومها ... كنت بعاملها فى أواخر أيامها كأنها بنتى مش جدتى و كانت دايما تتدعيلى أن ربنا يوقف لى ولاد الحلال
جت قبل ما تموت الله يرحمها قالت لى يا عايده يا بنتى انا حاسه انى قربت اموت
بعد الشر عنك يا امى ( كنت بقولها يا امى عشان انا معرفتش أم غيرها )
انا خايفه عليكى يا بنتى لاخواتك يبهدلوكى بعد ما اموت و يطردوكى من البيت
يبهدلونى ليه بس يا امى ؟؟ دول اخواتى برده
منا عارفه يا بنتى بس النفوس بتتغير... و أدى انتى شايفه مفيش حد بيسأل على فيهم و لا بيعبرنى من ساعة ما اتجوزوا كأن مفيش لهم جده ربتهم و اهتمت بيهم
معلش يا امى ...ربنا اعلم بظروفهم
و عشان ظروفهم دى انا بقولك انى خايفه عليكى ليبهدلوكى
طب و ايه الحل ؟؟
الحل انى هكتب لك نص البيت علشان محدش يقدر يخرجك منه بعد ما اموت
بس يا امى.....
مفيش بس ....هو دا الحل اللى انا شايفاه يحفظ حقك و ميخلهومش يعضوا فيكى ....و كمان انا كدا مش بظلمهم انا جوزتهم كلهم و جهزتهم لكن انتى لأ ...كمان انتى اللى شايلانى و جايبالى علاجى و كل اللى اعوزه ...هما محدش فيهم سأل على بحبايه دوا
و فعلا يا ناديه جدتى كتبت لى نص البيت و لما ماتت و اخواتى عرفوا الكلام ده زعلوا منها و منى و عملوا لى مشاكل جامده . و كانوا فعلا عاوزنى أخرج من البيت بأى طريقه عشان يبعوه و ياخدوا فلوسهم
اتجوزت انا واحد ابن حلال كان شغال سواق عربيه نقل و كان بينقل بضاعه و فاكهه من محافظه لمحافظه و صراحه عمره ما داس لى على طرف و عمره ما قل أدبه على ...بالعكس كان بيعاملنى بمنتهى الاحترام و كنت بقول أخيرا ربنا عوضنى عن السنين الكتير اللى عشتها وحيده من غير اب و لا ام... و سكنت فى نفس بيت جدتى و كان من البيوت القديمه المعموله بالطوب النى و الخشب
و خلفت منه تلات اولاد ولدين و بنت
ابنى الكبير بعد تسع شهور بالظبط من جوازى و سميته طارق على اسم ابويا الله يرحمه
بعدها بسنتين حملت بابنى التانى اسامه و سمناه على اسم حمايا الله يرحمه
بعدها جت البنت و كنت فرحانه بيها اوى و سمتها على اسم جدتى الله يرحمها ثريا
و سبحان الله اتكرر اللى حصل مع امى😔....... و جوزى مات فى عز شبابه و ساب لى التلات عيال . كان راجع بالليل و مكنش نايم كويس عينه غفلت قام داخل فى شجره كبيره رأسه اتخبطت و مات
انا فاكره ليلتها ...قلبى كان مقبوض مش عارفه ليه و كنت لسه جايه من المستشفى و واقفه اطبخ بسرعه قبل ما يجى ...بس قلبى كان عمال ينغز على مش عارفه ليه و البت ثريا كانت عماله تصرخ و مقريفه اوى
اول ما الباب خبط فرحت اوى و قولت الحمد لله أنه جه ...لكن للاسف لقيت الناس جايبينه سايح فى دمه و بيقولولى البقاء لله
انا جالى حالة ذهول ....عارفه يا ناديه انا مصوتش خالص ....بقيت ابص له كدا و مش مصدقه أنه مات ...بقيت شبه المتخدره أو اللى بتحلم ....كل اللى عملته اخدت ولادى فى حضنى و قعدت فى ركن حضناهم و انا عماله ابص على الجيران و هما بيجيبوا المغسل و الميه و الكفن و دخلوا بيه الاوضه يغسلوه
عارفه فقت امتى ؟؟.....لما لقتهم حاطينه فى النعش و خارجين بيه ......معرفش حصلى ايه ساعتها حسيت ان كانك ولعتى فيا نار فجأه و أن حسره كبيره نزلت فى قلبى أنى مش هشوفه تانى ...و لا هايخدنى فى حضنه تانى ....و لا يطبطب على كتفى لما اكون زعلانه ....الراجل ده مكنش جوزى و بس....لا دا كان ابويا اللى مشفتوش
بقيت أجرى ورا النعش بتاعه زى المجنونه و عايزه انزله من على كتف الناس ....و النسوان بقوا يمسكوا فى و حاوطونى من كل الجهات و يقولولى حرام عليكى حرام عليكى
و انا على لسانى كلمه واحده ربنا يسامحنى بقا عليها
كلمه يا لهوى يا لهوى يا لهوى ....قعدوا يقفلوا بقى و انا بصرخ و اقول يا لهوى لدرجه انهم كانوا هيكتموا نفسي ...و لولا ست كبيره جاره لينا جت و زقتهم من حواليا و قالت لهم ابعدوا عنها ...كانوا ممكن يموتونى و هما مش واخدين بالهم
بعد ما فقت من الصدمه ربطت ضهرى علي اولادى
و بقيت أجرى هنا و هنا علشان اصرف عليهم و أعلمهم احسن تعليم
بقيت احرم نفسي من اللقمه و الهدمه علشان خاطرهم
و جالى ناس كتير علشان يتجوزونى منهم واحد ممرض زميلى كان ظروفه شبه ظروفى ارمل بس بدون اطفال
و قالى ولادك هحطهم فى عينى
و ساق ناس كتير على و انا كنت لسه ٢٦ سنه بس انا موافقتش و خفت على اولادى ادخل عليهم راجل غريب
مقدرتش اتحمل فكرة أن واحد يبص لهم بصه وحشه و الا يشخط فيهم و الا يزعلهم
ياااا يا ماما عايده ...دى حكايه و لا فى الحواديت ...كملى
و بعدين يا ستى ......
عاوزين تعرفوا بقيه حكايه ماما عايده استنونى فى الجزء الجاى باذن الله 😘
يتبع .....😍
#د.جيهان_عادل💐
#دار_المسنين
#الجزء_الخامس
بقيت احرم نفسي من اللقمه و الهدمه علشان خاطرهم
و جالى ناس كتير علشان يتجوزونى منهم واحد ممرض زميلى كان ظروفه شبه ظروفى ارمل بس بدون اطفال
و قالى ولادك هحطهم فى عينى
و ساق ناس كتير على و انا كنت لسه ٢٦ سنه بس انا موافقتش و خفت على اولادى ادخل عليهم راجل غريب
مقدرتش اتحمل فكرة أن واحد يبص لهم بصه وحشه و الا يشخط فيهم و الا يزعلهم
ياااا يا ماما عايده ...دى حكايه و لا فى الحواديت ...كملى
و بعدين يا ستى ابتديت اشتغل ليل نهار كنت اشتغل الشفت بتاعى فى المستشفى و ارجع الف على البيوت اى حد محتاج حقنه اديله اى حد محتاج اعلق له محلول ...كمان كنت بجيب شويه هدوم كدا و ابيعهم بالقسط......و ياما ناس اكلتنى فى فلوس و ياما ناس كانت بتكرمنى و تدينى اكتر من حقى ...و كانت ماشيه
لما ابنى الكبير طارق اخد الثانويه العامه بمجموع كبير كانت الفرحه مش سايعانى بقيت ازغرط و افرق شربات على الجيران كلهم
اخر النهار طارق جه و قالى انا هروح اسحب الورق بكرا يا اما علشان اقدم فى الكليه
قلت له وماله يا دكتور طارق ....روح يا ابنى ربنا يجعل لك فى كل خطوه سلامه
قال لا دكتور ايه بس ....انا هقدم فى كليه تجاره أو اداب
ليه يا ابنى ....ليه عاوز تكسر فرحتى و تدخل كليه عاديه ...دا انا اول ما سمعت المجموع اللى جبته فرحت اوى و بقيت احلم باليوم اللى اشوفك فيه دكتور اد الدنيا
يا امى خليكى واقعيه ...كليه الطب هتحتاج فلوس كتير اوى....و انا عاوز ادخل كليه عاديه عشان اعرف اشتغل حاجه كدا جنب الكليه و اساعدك
و مين قالك انى عاوزاك تساعدنى يا ابنى
يا امى انا شايف كل حاجه بعينى...مش محتاج حد يقولى حاجه ....انتى طول النهار تلفى على رجليكى و بعديها بتيجى تعمللنا أكلنا و شربنا و تغسلى هدومنا ...انا مبشوفكيش بتنامى تلات ساعات على بعض
يا ابنى ملكش دعوه بى ....ملكش دعوه ...انا عاوزاك تفرحنى و تدخل كليه الطب ....انا ياما حلمت باليوم ده و كنت كل ما اشوف دكتور امتياز صغير جاى .. أتخيلك مكانه و ببقى فى منتهى السعاده و انا متخيله أن الناس هتنادى على و تقول أم الدكتور راحت ..أم الدكتور جت
ارجوك يا ابنى متكسرش خاطرى ...الله يرضى عليك
طب و مصاريف الكليه يا امى ؟؟
ملكش دعوه انا عامله حسابى لليوم ده و عامله جمعيه كبيره و حاطه فلوسها فى البوسته مخصوص علشان دراستكم
حاضر يا امى ...هروح بكرا باذن الله اقدم فى كليه الطب
و فعلا قدم و بقيت فرحانه بيه اوى و هو شايل البلطو الابيض على ايده
بعدها اسامه ابنى برده جاب مجموع عالى بس اختار كليه الهندسه ... بس اسامه مكنش زى طارق
ازاى بقا يا ماما عايده ؟؟
قصدى أن طارق كان شايل همى و كان بيحاول يوفر على لكن اسامه كان باصص فوق و مكنش عاجبه حاله ....كان دايما يتخانق معايا على اللبس الجديد و المصروف ...و دايما كان يندب حاله أنه أقل من زمايله و انه ياريته ما دخل كليه الهندسه و مكنش شاف اللى بيشوفه دا
و لما كنت أقوله:
يا ابنى احنا على ادنا و اللى بقدر عليه بعمله لك
مادام مش اد تعليمنا بتعلمينا ليه ...كنتى طلعتينا من غير تعليم احسن
كدا يا ابنى ؟؟؟ يعنى بعد دا كله و مش عاجبك برده ؟
ما هو انتى مبتشوفيش اللى بشوفه فى الكليه ...العيال أدى راكبين عربيات و لابسين احسن لبس و بياكلوا احسن اكل ...و انا عامل زى الجربوع معنديش غير طقمين بروح بيهم لما اشتكوا على جتتى ...و اركب الاتوبيس و اتحشر فيه ساعتين علشان بيلف بيا القاهره كلها عقبال ما يوصل للجامعه
يا ابنى حرام عليك بطل بطر على نعمة ربنا لتزول من وشك
ما تزول ...انتى محسسانى انك معيشانى فى نعيم ... بلا قرف
اليوم ده ابنى مشي وسابنى بعد ما شوح لى بأيده لاول مره فى حياته ...و بات الليله دى بره
بقيت اعيط على حالى ...اد ايه الام و الاب بيتعبوا و العيل مبيحسش بيهم
اد ايه ممكن يجرحهم بكلمه و هو مش واخد باله و لا حاسس أنه بيقطع قلوبهم بكلامه
اد ايه صعبانه على نفسي اوى
لما ابنى اتاخر ليلتها مكنتش عارفه انام و بقيت قلقانه عليه اوى و نسيت تجريحه لى و كلامه الجاحد و مبقاش فى تفكيرى غير حاجه واحده بس.. انى اخرج ادور عليه فى الشوراع
صحيت طارق من النوم
قوم يا طارق اخوك مرجعش لغاية دلوقتى و الساعه بقت واحده بالليل
تلاقيه بيذاكر مع حد من صحابه يا ماما متقلقيش
لا يا ابنى ...انا اتخناقت معاه انهارده و هو ساب لى البيت و مشي
اتخانق معاكى امتى يا امى ؟؟
و انت فى الكليه ...بس مش مهم دلوقتى قوم الله يرضى عليك اسال عنه عند أصحابه اللى تعرفهم
حاضر يا ماما ...هقوم اهو ....ما احنا مورناش الا سي اسامه دا راخر .
طارق فضل يلف على اخوه طول الليل لغاية ما وصل له عند واحد صاحبه ساكن فى اخر البلد ...
راح اخده من عند صاحبه و قعد يزعق له ازاى يعمل كدا
يومها اسامه مسك فى اخوه و اتخانقوا فى السكه و هما جايين و دخلوا البيت و هما مبيكلموش بعض
اول ما شفت اسامه الدمعه نزلت من عينى و قلت له ليه كدا يا ابنى؟؟ تعمل فى كدا ؟؟
الواد بص لى و راح داخل اوضته ينام
طارق قالى الواد ده عيل حمار مبيحسش...و بعد كدا انا مش هروح ادور عليه تانى انتى مشفتيش عمل فى ايه فى السكه
معلش يا طارق حقك على يا ابنى
و لا يهمك يا امى هدخل بس انام لى ساعتين علشان الحق اروح الكليه ...الله يسامحه بقا ضيع على مذاكرة الليله
معلش يا حبيبي ...ادخل يلا و انا هصحيك و انا ماشيه على المستشفى
بعد الموقف ده الواد اسامه كأنه اتبدل أو عرف نقطة ضعفى و بقى كل يوم و التانى يطلب منى فلوس اشي لورق ..دروس ..ادوات ...و لما كنت أقوله طب استنى لما اقبض كان يقول خلاص مش رايح الكليه الا اما تقبضى بقا
و كنت غصب عنى اروح اتصرف فى اى حاجه عشان اجيب له اللى هو عايزه
طب و البنت يا ماما عايده؟...اظن دى كانت احن واحده عليكى
بنتى ....دى انيل واحده فى عيالى ...شوفى انا بحكيلك ايه عن اسامه ؟..دا ميجيش حاجه فى اللى عملته فى البت .....
كنت فاكره زيك كدا انها هتكون الحنينه على ...لكن بالعكس دى كانت اكتر واحده بتعاملنى كأنى عدوتها أو كأنى السبب فى الظروف اللى احنا فيها
كانت دايما ناقمه على حياتها و متطلعه زياده عن اللزوم
و مكنتش نافعه فى مدارس ...كل اللى كان هاممها تلبس الضيق و تحط الطرحه على شعرها و نص شعرها طالع بره و تمشي مع اشكال غريبه كدا
زاد ده اوى و هى فى الاعداديه ....و طبعا انا كنت مشغوله طول الوقت فى شغلى و بجرى على أكل عيشى و صراحه مكنتش واخده بالى اوى من حاجات كتير البت بتعملها
لغايه ما فى يوم حسيت بشويه تعب و استأذنت من المشرفه و رجعت بدرى من المستشفى
و انا ماشيه بضرب بعينى كدا لقيت بنت لابسه بنطلون محزق اوى مش عارفه دخل فيها ازاى و فارده شعرها على ضهرها و ماسكه فى ايد واد شكله صايع كدا ...لابس بنطلون زى بتوع البنات لازق على جسمه و مطول شعره و لابس سلسله فى رقبته
الواد و البت ماشين يهزروا مع بعض هزار سخيف بالايد و البت عماله تميل عليه بمياعه و هو يلف ايده على رقبتها
بصيت كدا و قلت فى نفسي فين أهالى العيال دول 😏؟
اول ما قربت منهم لقيت البنت ثريا بنتى 😲😲😲
ها ....و بعدين يا ماما عايده ؟
و بعدين ......
عاوزين تعرفوا ايه حصل بعدين مع ماما عايده و ثريا بنتها استنونى فى الجزء الجاى باذن الله 😘
يتبع ........
#د.جيهان_عادل💐
#دار_المسنين
#الجزء_السادس
انا ماشيه بضرب بعينى كدا لقيت بنت لابسه بنطلون محزق اوى مش عارفه دخل فيها ازاى و فارده شعرها على ضهرها و ماسكه فى ايد واد شكله صايع كدا ...لابس بنطلون زى بتوع البنات لازق على جسمه و مطول شعره و لابس سلسله فى رقبته
الواد و البت ماشين يهزروا مع بعض هزار سخيف بالايد و البت عماله تميل عليه بمياعه و هو يلف ايده على رقبتها
بصيت كدا و قلت فى نفسي فين أهالى العيال دول 😏؟
اول ما قربت منهم لقيت البنت ثريا بنتى 😲😲😲
ها ....و بعدين يا ماما عايده ؟
و بعدين اول ما شفتها اتصعقت زى ما يكون سلك كهربا مسك في بقيت اضرب فيها هى و الواد اللى معاها بأديا و بالشنطه.....الواد طبعا جرى و انا بقا مسكتها جرتها من شعرها .....بقت تصرخ فى الشارع و تحاول تطلع الطرحه تحطها على شعرها
اول ما قربت من البيت طبعا بقيت ماسكاها زى العسكرى اللى قافش حرامى.... فتحت الباب و انا ماسكاها من دراعها و زقتها دخلتها على جوه
و بقيت اضرب فيها بكل قوتى ...
بقا دى اخرتها ؟؟؟ بعد ما شقيت عليكى انتى و اخواتك عايزه تعرينى ؟؟
بقا دى اخرتها ؟؟ بعد ما ربطت ضهرى عليكم و بقيت زى التور اللى داير فى ساقيه عاوزه تفرجى الناس على ؟
بقا دى اخرتها ؟ تمشيلى مع واد صايع و تلبسي اللبس ده و تمرمغى سمعتنا فى التراب
انطقى يا بت جايبه البنطلون ده منين ؟؟؟
من ...من واحده صاحبتى
و لبستيه فين انطقى ؟
كنت لابساه تحت مريله المدرسه
و المريله فين ؟؟؟ اكيد فى الشنطه طبعا ....هاتى الشنطه دى
و فتحت شنطة بنتى و لقيت اللى عمرى ما تخيلته فى حياتى 😲😲🥺
لقيت قلم روج و مسكره و كحل و لقيت علبة سجاير و شريط برشام و طبعا انا كممرضه عارفه الشريط دا بتاع ايه؟؟
ايه دا ؟؟؟؟ فهمينى ايه دا ؟؟ علبة السجاير و شريط الترامادول دول بيعملوا ايه فى شنطتك ؟؟؟؟ دا انا هشرب من دمك انهارده ....موتك حل انهارده
هقول .....هقول يا ماما ... بس متضربنيش
انطقى يا بت انطقى متجننيش 😡
علبه السجاير و الشريط دا بتوع مادوا
مادوا مين يا بت انطقى؟
مادوا اللى شوفتينى ماشيه معاه
نهارك اسود .....ماشيه مع واحد بيشرب مخدرات ؟؟؟ و عمل فيكى ايه تانى ؟؟
معملش حاجه
لاااااا و انتى فاكرانى هصدقك تانى ....انا لازم اخدك اكشف عليكى عند دكتوره نسا
لا يا ماما لا ....
و خايفه من ايه مدام معملتيش حاجه ؟؟
لا مش هروح اكشف .... انا معملتش حاجه
البت لما أصرت كدا خفت فعلا انها تكون غلطت مع الواد ده و خايفه تتكلم ....دخلت جبت سكينه من المطبخ و قفشت فى رقبتها و حطيت السكينه عليها و قلت لها يا اما تروحى معايا دلوقتى يا اما هدبحك
البت اترسمت فى عينها نظره رعب عمرى ما شفت زيها و انا الصراحه مكنتش عارفه انا بعمل ايه ...كنت حاسه ان الشيطان واقف فى دماغى و بيقولى موتيها و ارتاحى من عارها
بس كدا تصرفك غلط يا ماما عايده
عارفه يا بنتى و للاسف الموقف ده خلاها بعد كدا بهدلتنى اكتر .... بس اللى عملته دا كان من قلة حيلتى و خوفى عليها ....يمكن لو كان لها اب مكنتش عملت كدا و لا كنت اتصرفت كدا من الأساس ...و كنت سبت له التصرف معاها
ها ...و بعدين يا ماما عايده
و بعدين اخدتها فعلا و رحت لدكتورة نسا معرفه ...و قلت لها البت وقعت من على السلم وقعه جامده و عاوزه اتطمن عليها
الدكتوره بصت لى كدا باستغراب ...و قالت طب و ايه يعنى وقعت ؟؟
قلت لها معلش يا دكتوره ريحينى بس
حاضر يا مس عايده ..مع انى مش شايفه أنه له لازمه الكلام ده
الدكتوره قامت لبست الجوانتى و انا على نار عاوزاها تخلص بسرعه و تقولى النتيجه
و كنت عماله افكر لو طلعت مش بنت هعمل ايه ....هموتها ؟؟ و الا هروح اجيب الكلب ده يتجوزها ؟؟
طب دا لسه فى الاعداديه ...هتتجوز ازاى دى ؟؟ و هل الواد هيرضى يتجوزها اصلا ؟؟؟
انا عماله افكر و دماغى تلف و قطع تفكيرى صوت الدكتوره و هى بتقول
يا ستى البنت زى الفل مفيهاش اى حاجه زى ما هى بختم ربنا
اول ما سمعت الدكتوره قالت الكلام ده اخدت شهيق بصوت عالى و قلت الحمد لله
البت راحت بصت لى بصه ....زى ما تكون بتقولى شوفتى انا معملتش حاجه ... انتى ظلمتينى
اخدت البت و روحت و متكلمتش كلمه واحده طول الطريق
طبعا انا كنت حاسه انى زودتها شويه بس زى ما قلت لك لما شفت شريط الترامادول تصورت إن ممكن اى حاجه تحصل بقا ....فيه بعد المخدرات ايه تانى ؟؟
اول ما دخلت قلت لها اوعى تفتكرى عشان مطلعش فيكى حاجه يبقى كدا خلاص ...لا و حياة امك ما انتى معتبه عتبه المدرسه تانى و لا هتشوفى الشارع بعينك
لا يا اما الا المدرسه ....و الله ما عنت هكلمه تانى
اسم الله عليكى يا اختى متفوقه اوى ....دا انتى مش نافعه و بتنجحى بالزق ....هى كلمه واحده مفيش مدرسه يعنى مفيش مدرسه
البت دخلت اوضتها تعيط و انا ملقتش حل غير ده ....هى دى الطريقه الوحيده اللى ممكن اتطمن عليها بيها خاصة انى مش فاضيالها و طول النهار الف على رجليا
و فعلا البت غابت اسبوع من المدرسه و أخواتها ساعتها كانوا فى الثانوى و قعدوا يتحايلوا على انى ارجع اختهم المدرسه و مرضتش اقولهم انى شفتها ماشيه مع ولد او لقيت معاها ترامادول و سجاير و لما سالونى ليه مش عاوزه توديها المدرسه قلت لهم لقيتها لابسه بنطلون ضيق و ماشيه مع بنات شكلها مش تمام
طب و ليه يا ماما عايده مقلتيش لاخواتها يمكن كانوا يقدروا يتعاملوا معاها ؟؟
يا بنتى دول شباب عارفه يعنى ايه شباب ؟؟ يعنى الدم فاير فى عروقهم على طول ...و خفت يعرفوا يموتوها أو يروحوا يدوروا على الواد ده و يتخانقوا معاه
صح عندك حق فعلا ....طب و بعد كدا عملتى ايه معاها ؟؟
مفيش يا ستى ...طبعا انا كان نفسي تتعلم برده و مكنتش هبقى مبسوطه أن بنتى تطلع جاهله ....بس كنت عاوزه أادبها برده
قلت خلاص انا هخليها تاخد الشهاده من منازلهم ...يعنى تقعد تذاكر فى البيت و تروح على الامتحانات بس و فعلا رحت عملت ورقها و حولتها منازل
السنه دى البت نجحت بس على الحروكروك بس كنت فرحانه و قلت خلاص تاخد دبلوم تمريض زيى و اشغلها معايا و خلاص ... بس للاسف تمريض كانت بتاخد من مجموع اكبر من مجموعها ...و دخلتها دبلوم فنى تجارى
طب انتى بتقولى انها اتغيرت من ناحيتك بعد الموقف ده ؟ اتغيرت ازاى بقا ؟
ايوه يا بنتى اتغيرت و بقت دايما تتهمنى انى السبب فى فشلها و لولا انى عملت فيها كدا مكنتش دخلت التعليم الفنى دا و كانت هتبقى زى أخواتها و تدخل الثانوى العام ....و كانت دايما تتهمنى انى بكرهها و انى بفضل أخواتها الولاد عليها
بس و الله يا بنتى ابدا ....بس عشان هى بنت كنت خايفه عليها بزياده و دماغى مجبتنيش اتصرف معاها الا كدا
فاهمه و الله يا ماما عايده بس هى اكيد مكنتش هتفهم كدا
فعلا يا بنتى
طب و بعدين حصل ايه ؟؟
دخلت تجاره تلات سنين و حاولت اتابعها و كنت كل يوم و التانى اطب عليها فى المدرسه لغايه ما خلصت التلات سنين على خير و كانت عقلت شويه
و فى يوم و انا قاعده فى المستشفى لقيت واحده زميلتى جايه تقولى انها جايبه عريس للمحروسه بنتى
العريس كان قريبها و جدع ابن حلال و لما عرضت على البت الموضوع البت وافقت على طول ....بس انا كنت مقلقه من الموضوع علشان العريس ده مش من بلدنا ...من بلد بعدنا بساعه كدا بالعربيه
و قلت لها يا ثريا الجدع كويس بس انا مش عاوزاكى تبعدى عنى ...ساعه مواصلات بعيد اوى و انا كان نفسي تتجوزى جنبى هنا فى البلد
راحت بصت لى حته بصه عمرى ما انساها و قالت لى :
دا من حبك لى اوى يعنى 😏 ...دا اكتر حاجه عجبانى فيه أنه بعيد و انى همشي من هنا و ابعد عنكم خالص
كلمتها شرخت قلبى ....هى ازاى متخيله انى مبحبهاش؟ طب هى ليه مش مقدره انى موت نفسي عشانها و عشان أخواتها و حرمت نفسي من كل متع الدنيا عشانهم 😔
و حصل ايه بعد كدا يا ماما عايده
بعد كدا ....
طبعا عاوزين تعرفوا حصل ايه بعد كدا ؟ دا اللى هتعرفوه الجزء الجاى باذن الله 😘
يتبع ......
#د.جيهان_عادل💐
#دار_المسنين
#الجزء_السابع
راحت بصت لى حته بصه عمرى ما انساها و قالت لى :
دا من حبك لى اوى يعنى 😏 ...دا اكتر حاجه عجبانى فيه أنه بعيد و انى همشي من هنا و ابعد عنكم خالص
كلمتها شرخت قلبى ....هى ازاى متخيله انى مبحبهاش؟ طب هى ليه مش مقدره انى موت نفسي عشانها و عشان أخواتها و حرمت نفسي من كل متع الدنيا عشانهم 😔
و حصل ايه بعد كدا يا ماما عايده
بعد كدا العريس جه شافها و عجبته و الشهاده لله الجدع كان طيب و حنين و البت كانت شخصيتها شديده عليه شويه
ازاى يعنى ؟؟
يعنى كلمتها لازم تمشي عليه و يبقى نهاره اسود لو معملش حاجه طلبتها منه ...معرفش البت جابت القوة دى منين ؟
جابتها من ضعف شخصية خطيبها يا ماما عايده
صح يا بنتى عندك حق ...و لما كنت بشوفها بتعامله كدا كان يصعب على خاصه أنه يتيم اب و ام ملوش حد الا قرايبه من بعيد و كنت أقوله يا ابنى اجمد عليها شويه و متخلهاش تدلع عليك كدا
و لما عرفت انى قلت له كدا بهدلتنى و اتهمتنى انى عاوزه اخرب عليها و انى متغاظه منها
طب انا هتغاظ منها ليه ..دا بنتى مش واحده غريبه
بس اقول ايه كل ما قلبى كان يصفى لها كانت ترجع تعكره تانى بأفعالها
و طبعا مقولكيش كانت بتحاول تنتقم منى اد ايه فى حكايه الجهاز دى ...و كنت اجيب اللى تطلبه عشان متتهمنيش انى بفرق بينها و بين أخواتها و انى مستخسره فيها زى ما كانت دايما بتقول
بقت تشترى لبس و رفايع و اجهزه و حاجات كتير محدش كان بيجبها و جوزها مطلبهاش اصلا
و لما كنت اتعب من طلباتها و اقولها ارحمى شويه كانت تقول هو انا أقل من فلانه ؟؟ و لا اقل من علانه اللى اهلها جابولها و جابولها....
كنت اسكت و اقول حاضر يا بنتى و بقيت ادخل فى جمعيات و رحت اخدت قرض عشان اجيب لها الهدوم و جبت لها الاجهزه بالتقسيط و بقيت اسدد كل شهر
لغايه ما جوزتها الحمد لله ...و مقلكيش بقا على الحاجه اللى جبتهالها فى الصباحيه عربيه داتسون مليانه اشي فاكهه و اشي فطير و طيور و اقفاص طماطم و خضار الموسم ساعتها و شوال ارز و شوال مكرونه و خبزت لها طابور عيش ...و ياريته عجبها 😂
المهم كانت دايما بتفتكرنى فى المصايب بس ....يعنى تتخانق مع جوزها على أسباب هايفه و تكون هى الغلطانه و الغلط راكبها من ساسها لراسها الاقيها بتتصل بى و تقولى هسيب له البيت
أجرى انا عليها اركب مواصله و على بيتها اصالح ما بينهم و ببقى شايفه انها الغلطانه و اقول جوزها معلش اصبر عليها لسه صغيره و جاهله
و جت حملت و بقت كل يوم و التانى تتصل تعالى يا ماما لى انا تعبانه
و كنت اروح لها و اخد لها العيش معايا و اخد الفاكهه و لوازم البيت و مكنش يعجبها و تقعد تعيب على الحاجه
و انا اقول معلش عيله و مش فاهمه حاجه
خلفت ابنها الاول و كنت فرحانه بيه اوى اول حفيد بقا و رحت عشان اقعد معاها اخدمها عقبال ما تقوم و تشد حيلها بقت تعاملنى معامله وحشه ...متعزمش على بالاكل و هى عارفه انى بتكسف أمد ايدى ....كانت تكشر فى وشي و انا كنت فاهمه كل حاجه بس عامله نفسي مش واخده بالى ...مش عاوزه اسيبها عشان تعبانه ...و كمان مكنتش قادره اسيب حفيدى احمد
المهم بعد ما ولدت قلت لها تعالى ركبى وسيله عشان متحمليش على طول ....
عملت فيها ام العريف و قالت انا برضع نضيف و ملكيش دعوه
بعدها و الواد عنده اربع شهور لقيتها بتتصل بى و تقولى انها حامل و عماله تعيط
طب يا بنتى مش قلت لك تعملى حسابك
يا خبر ....طب و عملت ايه بعد كدا يا ماما عايده ؟؟
مفيش كملت الحمل و كان متعب جدا لأنها كانت والده قيصريه ابنها الاول و طبعا كل ما الحمل يكبر كان بيتعبها جدا
و عدت فترة الحمل التانيه و بقا معاها طفلين ولد و بنت الفرق بينهم حوالى سنه
طبعا مكنتش بتعرف تتصرف و مكنتش بتقدر تنام منهم و كانت تقريبا شبه مقيمه عندى يعنى بتروح لجوزها خميس و جمعه بس و ترجع لى من اول الاسبوع ...و انا فى الفتره دى بقيت اخد إجازات كتير عشان خاطرها
و طبعا أخواتها كانوا فى كليات و كانوا بيذاكروا و منزعجين جدا من الدوشه اللى هى عاملاهالهم بس كنت بقعد اسكت فيهم و اقولهم اطلعوا ذاكروا فى الاوضه اللى فوق السطح
و مرت الايام عيالها كبروا شويه و حملت للمره التالته و البيت عندى قلب مروستان
بس كان أخواتها اتخرجوا الحمد لله و بدأوا يشتغلوا....بعد ما خلصوا الجيش طبعا
فترة الجيش دى برده كانت صعبه على اوى...الاتنين دخلوا الجيش سوا بس كل واحد فى حته بقيت فى فترة التدريب اعمل لكل واحد زياره و اسافر و اروحله
الدكتور طارق كان فى دمياط و اسامه كان فى السويس
بعد كدا كانوا بينزلوا اجازات و كنت لازم احضر لهم احلى اكل و احلى شرب طبعا
بعد ما خلصوا الجيش طارق جاله تكليف فى مستشفى حكومى فى حته بعيد شويه ....حته كدا تبع بنها بس طارق ابنى كان غاوى تعليم و كان طموحه أنه يسافر يكمل دراسات عليا بره و فعلا كان بيقدم للمنح على طول و مكنش بيفوت فرصه ...دا طبعا مع تسجيله هنا للماجستير
اما اسامه فقعد يدور على شغل لحد ما لقى شغلانه فى شركه ...بس كعادته دايما مكنش راضى بحاله و كان عمال يدور على سفر لاى بلد عربى علشان يحسن مستواه و يجيب العربيه اللى نفسه فيها
و فى يوم لقيت طارق داخل عليا و هو طاير من الفرحه و لما سألته قالى أن اسمه جه فى المنحه اللى كان مقدم لها فى ألمانيا و أنه لازم يجهز ورقه فى خلال شهر عشان يسافر
طبعا لما سمعت كدا قعدت اعيط ... طارق البكرى بتاعى و احن عيل على ...و صعب على فراقه اوى ..بس انا مقدرش اقف قدام حلمه و مستقبله
و مر الشهر بسرعه جدا وودعت ابنى و استودعته عند الله
و لما وصل هناك بقا يبعت لى و يطمنى على حاله
و بعد مرور سنه لقيته بيكلمنى و بيقولى أنه اتعرف على واحده المانيه هناك و أنه اتفق معاها على الجواز
طبعا انا انزعجت جدا... لان معنى الكلام ده أنه هيقعد بره و مش هشوفه تانى
هو قعد يطمنى و يقولى انا هبقا انزل و متقلقيش ....و اتجوزها ...
طب و نزل اجازات زى ما قالك ؟؟
نزل مرتين اتنين فى خلال ١٥ سنه ...و كل ما أقوله انزل يا ابنى نفسي اشوفك يقولى حاضر ...اصل ظروف الشغل...اصلى مش فاضى ...
طب و خلف على كدا يا ماما عايده ؟؟
ايوا خلف بنتين بس للاسف سمعت أنه مراته اخدت بناته و طلبت الطلاق و مشيت و ميعرفش عنها حاجه
طب ليه عملت كدا ؟؟
عملت كدا يا ستى لما قالها انى تعبت من الغربه و هنزل نهائى لبلدى
طبعا هى معجبهاش الكلام و رفضت انها تعيش فى مصر
و رفعت دعوه طلاق و المحكمه طلقتها منه و للاسف خدت بناته و مشيت و بقا هو يا حبيبي بعد ما خلاص كان بينهى شغله و نازل رجع قعد تانى عشان يدور على بناته
يا خبر ....الله يكون فى عونه...طب و المهندس اسامه بقا عمل ايه ؟؟
البشمهندس بقا يا ستى ....
طبعا عاوزين تعرفوا البشمهندس حصل معاه ايه هو كمان ؟ دا اللى هتعرفوه فى الجزء الجاى باذن الله 😘
يتبع .....😎
#د_جيهان_عادل_💐
#دار_المسنين
#الجزء_الثامن
ملحوظه من فضلكم قبل بدايه الجزء الثامن
لاحظت أن فى ناس بتاخد قصصى و تنشريها فى جروبات تانيه و انا معنديش مانع فى كدا ...بس اللى حرام بقا انى الاقيهم شايلين أسمى من على القصه و من على حتى صوره الغلاف وبيكتبوا اسمهم و ينسبوا القصه لهم...دا حرام شرعا و سرقه و انا مش هسامح اى حد يعمل كدا ...
💞💞💞💞💞💞💞💞💞💞
عملت كدا يا ستى لما قالها انى تعبت من الغربه و هنزل نهائى لبلدى
طبعا هى معجبهاش الكلام و رفضت انها تعيش فى مصر
و رفعت دعوه طلاق و المحكمه طلقتها منه و للاسف خدت بناته و مشيت و بقا هو يا حبيبي بعد ما خلاص كان بينهى شغله و نازل رجع قعد تانى عشان يدور على بناته
يا خبر ....الله يكون فى عونه...طب و المهندس اسامه بقا عمل ايه ؟؟
البشمهندس بقا يا ستى اشتغل شويه فى شركه هنا زى ما قلت لك و بعدين دور على سفريه و سافر السعوديه و قعد هناك خمس سنين و عمل فيهم قرشين حلوين ...و لما نزل اشتغل فى شركه كبيره اوى و محترمه و جاب العربيه اللى كان بيحلم بيها
و فى يوم لقيته داخل على و بيقولى أنه عاوز يتجوز
الف مبروك يا اسامه يا ابنى ...دا يوم المنى لما اشوفك عريس فى الكوشه كدا و افرح بأولادك ...و لقيت بقا بنت الحلال و الا اشوفلك انا واحده على ذوقى ؟
لاااا ذوقك ايه بس ...انا خلاص لقتها و اخدت ميعاد مع والدها كمان
ياااا و اخدت الميعاد كمان ؟؟؟ طب و جاى تقولى ليه ؟؟
امال هتجوز من وراكى؟؟
ما انت قررت من ورايا و اخدت ميعاد من ورايا
ماما انا مش صغير انا عندى ٢٩ سنه ...لفيت و رحت هنا و هنا و سافرت ...يعنى انا مش عيل مستنى الاذن منك
الأذن منى ؟؟؟ و الله كتر خيرك يا ابنى 😔 بس عاوزه اقولك أن العيل مهما كبر بيفضل طول عمره فى نظر امه لسه صغير و محتاج لها
متزعليش منى يا امى انا مش قصدى ... بس انتى دايما تحسسينى انى عيل و مليش شخصيه
ابدا و الله يا ابنى ...انت فاهم غلط ...بكرا لما تتجوز و تخلف تعرف اللى بقولهولك ده
طيب هتيجى معايا بقا الجمعه الجايه عند العروسه ؟؟
طب مش لما تقولى الاول مين دى ؟ و عرفتها منين ؟؟
دى يا ستى مهندسه زميلتى فى الشركه و بنت ناس اوى
ربنا يهنيك يا ابنى و يفرحك يا حبيبي
بس عاوز اقولك على حاجه من غير زعل يعنى ....
قول يا اسامه يا ابنى ربنا ما يجيب زعل يارب
انا مش عاوزك تقولى قدام العروسه و اهلها انك بتشتغلى ممرضه
ليه يا ابنى هى شغلانة ممرضه دى حاجه وحشه و الا بطاله لا سمح الله 🥺🥺 ؟؟؟
لا ابدا بس زى ما قلت لك أن عيلتها كبيره اوى و صراحه مش حابب يعرفوا أن امى ممرضه
ياااا انت بتستعر منى يا اسامه ؟؟
لا ابدا و الله .....بسسسس هو انتى مش يهمك شكلى قدام الناس ؟؟
خلاص يا ابنى زى ما تحب ...و لو عاوزنى مجيش خالص انا مستعده و مش هزعل منك
لا ازاى ؟؟ لازم تيجى معايا امال هروح لوحدى ؟؟
و رحنا فعلا يا بنتى خطبناله البنت اللى قال عليها و للاسف اول ما شفتها قلبى مرتحلهاش خالص
ليه بقا يا ماما عايده ؟؟ يعنى شفتى منها ايه ؟؟
بصى يا ستى ...انا اول ما دخلت عليها هى و امها لقيتهم بيبصوا على كدا من فوق لتحت .....مع انى كنت لابسه لبس كويس و جديد
و بعدين جيت اسلم عليها و ابوسها راحت بعدت كدا بجسمها و سلمت بأيدها بس
طبعا انا اتحرجت و سلمت عليها بالايد
و طول القعده لما عينى تيجى عليها و ابتسم لها كانت تبص لى بنظره جامده كدا ...ملهاش اى معنى
المهم ابوها قعد يتفق مع ابنى على الجهاز و الشبكه و الفرح و الشقه و طبعا طلب طلبات هايله
طب ووافقتوا ليه يا ماما عايده ؟؟
هو انتى فاكره انى كنت اقدر اعترض و الا اقول كلمه ...دا ابنى كان منبه على مية تنبيه انى متكلمش و لا لى اى دعوه بالاتفاق اللى هيحصل
طبعا الراجل طلب شبكه غاليه اوى و عفش غالى و الفرح فى فندق عشان معازيمه من الناس العليوى
بعد ما خرجنا من عندهم فضلت ساكته و زعلانه و ابنى محاولش يسألنى زعلانه ليه ...طبعا عشان ميفتحش على نفسه فتحه
بس انا مقدرتش اسكت و اول ما وصلنا البيت قلت له أنت عاجبك الاتفاق ده ؟؟
بص لى و سكت
رد على متبصليش كدا ؟؟
اه عاجبنى ....هو انتى عاوزه تطلعينى عيل قدامهم و الا ايه ؟؟ بعد ما اتفقت معاهم عايزانى ارجع فى كلامى ؟؟
بس الاتفاق بالعقل ...ايه الهبل اللى طلبينه دا كله ....دا انت فلوسك كلها مش هتكفى اللى طالبينه
يا ستى لو جيت قلت لك هاتى حاجه متبقيش تدينى ...و بعدين انتى مش قادره تفهمى أن دى فرصه عمرى مش هقدر اعوضها ابدا
فرصه ازاى يعنى ؟؟ انا شايفه أن البنت جمالها على اده اوى و متعنطظه و رافعه مناخيرها على ايه مش عارفه
هو الجواز بالجمال ؟؟ الجواز دلوقتى بالوضع الاجتماعى البنت اللى مش عاجباكى دى ابوها مدير عام فى شركه كبيره و امها مديرة مدرسه و خالها سفير و عمها عميد ..و المثل بيقولك حاسب قبل ما تناسب
لأ انت فاهم المثل غلط يا عين امك ... المحاسبه هنا يعنى تدور و تحسبها كويس قبل ما توقع نفسك فى جوازه و نسب انت مش اده
و مش اده ليه يا ماما ؟؟ انا راجل مهندس عندى عربيتى و فلوسي و وظيفتى و اقدر اجيب كل اللى قالوا عليه
خلاص يا ابنى انا نصحتك و انت حر اعمل اللى انت شايفه
و فعلا اتجوزها و صرف اللى قدامه و اللى وراه و أجر لها شقه واسعه فى التجمع الخامس فرشها بأغلى فرش.
طب و سابوكى لوحدك ؟؟
ايوه ........بنتى كانت بتجيلى من وقت للتانى
طب و مرحتيش قعدتى مع ابنك ليه ؟؟ و انتى بتقولى ما شاء الله شقته واسعه
اسكتى و النبى يا بنتى ...اروح فين بس
دا انا مدخلتش شقته دى غير مرتين اتنين مره و هو لسه بيفرشها و مره بعد جوازه كنت رايحه ابارك له و اخته و جوزها اللى ودونى ......و معرفش يتراح لها ازاى اصلا
ازاى يعنى ؟؟؟ معقوله الكلام ده ؟
ايوه معقوله ...هى اصلا لما رحت لها قابلتنى مقابله وحشه اوى ...و فضلت قاعده مكانها تبرد فى ضوافرها مكلفتش خاطرها تقدم لنا حاجه نشربها ...قام هو جاب حاجه ساقعه و قدمهالنا
بعدها قلت له انا مش دخلالك بيت تانى...و ساعة ما تحب تشوفنى انت عارف الطريق تعالى و طل على
و بعدين يا ماما عايده ؟؟
بعدين اللى سمعته بعد كدا من اخته أن مراته دى خاربه بيته و مرتبه مش مكفيها مصاريف و فسح و نوادى....و زاد الموضوع لما خلفت له توأم ولدين ...بقا مش ملاحق و بقى يلف حوالين نفسه و استلف من طوب الارض علشان يكفى مصاريف الست الهانم اللى مبتخلصش
و بعدين ؟؟؟
و لا قبلين يا بنتى ...كان بيجيلى كل فين و فين و ساعات كان يجيب ولاده اشوفهم
و لما تعبت و طلعت على المعاش جالى و هو حالته تصعب على الكافر و اشتكالى أنه مديون بمبلغ كبير و عربيته بايظه و أنه مش عارف يعمل ايه ؟
سألته :طب و مرتبك الكبير بيروح فين يا ابنى ؟؟
مرتبى يا امى بيروح على المدارس الخاصه و ايجار الشقه و المصاريف اللى مبتخلصش
صراحه صعب على يا بنتى رحت مطلعه له عشر الاف جنيه من مكافأه نهايه الخدمه اللى كنت اخدتها و انا خارجه معاش و ادتهومله
طبعا بنتى لما عرفت انى اديته الفلوس دى زعلت و طلبت اديها هى كمان زى ما اديته و اتهمتنى انى دايما بفرق بينهم و بفضل الولاد عليها
طب و مين عرفها انك ادتيله الفلوس دى يا ماما عايده ؟
هى يا بنتى سألتني فين فلوسك ؟؟ و انا صراحه مبعرفش اكدب فقلت لها
و طبعا لما زعلت كان فايض معايا ٦ آلاف جنيه رحت اديتها خمسه و فضل معايا الف اصرف منه
طب و ايه اللى جابك هنا بقا🤔🤔🤔 ؟؟؟
هقولك يا بنتى ....بعد ما اديت لابنى الفلوس جالى بعدها بشهر و قعد يعيط ....انا شفته كدا اتخضيت وصعب على اوى ....
مالك يا اسامه بتعيط ليه يا ابنى ؟؟؟
طبعا عاوزين تعرفوا اسامه كان بيعيط ليه ؟؟ و جاى عاوز ايه ؟؟ دا اللى هتعرفوه فى الجزء الجاى باذن الله 😘
يتبع .....
#قصص_وحكايات_د_جيهان_عادل
#دار_المسنين
#الجزء_التاسع
طب و ايه اللى جابك هنا بقا🤔🤔🤔 ؟؟؟
هقولك يا بنتى ....بعد ما اديت لابنى الفلوس جالى بعدها بشهر و قعد يعيط ....انا شفته كدا اتخضيت وصعب على اوى ....
مالك يا اسامه بتعيط ليه يا ابنى ؟؟؟
مفيش يا امى ....عندى شويه مشاكل كدا و مش عارف احلها ازاى ؟؟
مشاكل ايه كفى الله الشر ؟ قولى يا ابنى
مفيش كنت كاتب وصلات امانه على نفسي و صاحبها هيقدمها للنيابه و مش عارف اجيب الفلوس منين ؟؟
وصلات امانه ليه يا ابنى ؟؟ و خدت الفلوس صرفتها فى ايه ؟؟ و كام المبلغ اللى عليك ده ؟؟
دى فلوس مأخدتهاش مره واحده ....عشان زى ما انتى عارفه مصاريفى كتير و عيالى فى مدارس غاليه
و عليك كام يا اسامه ؟؟
على ١٠٠ الف جنيه
ايه مية الف ازاى ؟؟ صرفتهم فى ايه ؟؟
يا امى انا مصرفتش الفلوس دى كلها بس انا كنت بتعامل بالفوايد يعنى فعليا انا اخد ستين الف بس منه و بعد الفوايد بقوا ميه الف
فوايد ؟؟ قصدك ربا 😔 ....بتتعامل بالربا يا اسامه ؟؟
طب و صرفت الستين الف ازاى و فى ايه ؟؟
منا قلت لك يا امى انى مأخدتش المبلغ على بعضه ....فى الاول اخدت عشر الاف و كنت بسدد له زى قسط كدا
و لما اتزنقت تانى رحت اخدت منه مبلغ تانى و طبعا زود على الفايده
و عملت الموضوع ده كام مره كدا ورا بعض لغاية ما لقيت نفسي مش عارف اسدد و الحمل زاد على
و مراتك الشملوله بنت الناس فين يا اسامه؟؟ ليه مبتساعدكش ...مش قلتلى انها فرصه و هتنقلك نقله تانيه
هى فعلا نقلتك بس لتحت مش لفوق
مراتى لما عرفت انى مهدد بالسجن خدت ولادى وراحت عند اهلها و قالت لى أما تعرف تحل مشاكلك ابقى تعالى لى بيت بابا انت عارفه كويس
و لما قلت لها أن الديون دى كلها بسببها و سبب اولادها
قالت و اما انت مش اد الجواز من بنات الناس بتتجوز ليه؟؟
ياادى المصيبه اللى حلت على دماغى ....اعمل ايه يا ربى و انت كان عقلك فين ؟؟
منا قلت هسدد من مرتبى بس ...انا اترفدت من شغلى
ايه اترفدت ؟؟ ليه اترفدت ...عملت ايه
معملتش يا ماما ...المدير مبيحبنيش و دايما حاططنى فى دماغه معرفش ليه ؟..جيت من شهر اتخانقت معاه و مشانى😔
و من ساعتها عمال ادور على شغل بس هو عمال يسوء سمعتى و يقول للناس انى مش بتاع شغل
هى دى آخرة الربا يا ابنى ...الفلوس الحرام بتدخل بالخراب على الواحد و على بيته ...احمد ربنا انها جت على اد كدا.
الحمد لله على كل شيئ
طب و هتعمل ايه دلوقتى يا اسامه ؟؟
مش عارف يا ماما ...انا جيت افضفض معاكى يمكن تلاقيلى حل ...و فكرت اطلب من طارق فلوس بس مش عارف
طارق ؟؟؟ سيب طارق فى اللى هو فيه مراته لما المحكمه حكمت لها بالطلاق خدت نص فلوسه و النص التانى داير يلف وراها عشان خاطر يشوف ولاده
طب اعمل ايه دلوقتى يا امى ؟
طب ما تبيع عربيتك الجديده
عربيتى عليها اقساط
اقساط ازاى ؟؟ مش كان معاك واحده قديمه ؟
منا لما بعت القديمه دفعت فلوسها مقدمه للعربيه الجديده و بقسط الباقى و طبعا مقدرش اتصرف فيها الا اما اسد تمنها
خلاص يا ابنى مفيش قدامى غير انى ابيع نص البيت اللى حيلتى ...معنديش غيره😔 ...بس برده مش هسيبك تتحبس و اقف اتفرج عليك
طب و هو نص البيت يجيب المبلغ ده يا امى
ايوه يجيب و يتفضل قرشين كمان اجر لى شقه بيهم اقعد فيها
ربنا يخليكى لى يا امى مش عارف من غيرك كنت عملت ايه
و قام يا بنتى باس راسي و ايدى
و فعلا عرضت البيت للبيع و اتباع البيت بمتين و أربعين ألف جنيه .....اخواتى اخدوا ١٢٠ الف و انا اخدت ال ١٢٠ الف اللى فاضله اديت لاسامه ١٠٠ الف و فضل معايا ٢٠ الف
طبعا بنتى لما عرفت زعلت بس انا قلت لها يعنى انتى عاوزانى كنت اسيب اخوكى يتحبس
قالت تصرفاته و مشيه ورا مراته هو اللى هيحبسه و المره دى بعتيله البيت المره الجايه بقا هتعملى ايه ...انتى كدا ظالمه لأن نص البيت دا كان من حقنا احنا التلاته مش من حق سي اسامه بس
يا بنتى انا قلت لطارق و هو مسامح
بس انا مش مسامحه ... طارق مش لازمه لكن أنا غلبانه انا و جوزى.....انتى دايما كدا ظالمه و مبتجيش الا على انا
انا ظالمه يا بنتى ؟؟؟🥺 بعد كل اللى عملته لكى دا ؟
طب خلاص خدى العشرين الف اللى باقيين و يبقى بكدا وصلك حقك ...عشان متقوليش بس انى ظلمتك
و رميت لها الفلوس يا بنتى و خرجت بشنطه هدومى مقلتش لى انتى رايحه فين ؟
و مشيت و انا معيطه و اتصلت على واحده صاحبتى اسالها عن دار مسنين و دلتنى على الدار هنا
طب ولادك عرفوا انك هنا ؟؟
ايوه عرفوا ...بعد ما قعدت يومين و محدش سأل على اتصلت انا بأسامه و قلت له
طب اسامه سابك بعد ما بعتى بيتك عليه ؟
اسامه الله يكون فى عونه مراته مدوخاه و سمعت انها رافعه عليه قضيه طلاق
طب و بنتك ؟؟
لا بنتى و لا عبرتنى حتى بتليفون زى ما يكون ما صدقت ترتاح منى ...بس هى عندها ولاد و بكرا تشوف اللى عملته فى
معلش يا ماما عايده سامحيها
و الله يا بنتى ما قادره ....بكرا يقعد ع الرفوف لما يكبر اللى ع الكتوف
طب ممكن تدينى رقمها اتصلك عليها ؟؟
لأ يا ناديه ...هى معاها تليفونى و عارفه انا فين و لو هى عايزه تيجى كانت جت ....الله يسهلها يارب
معلش يا حبيبتى متزعليش نفسك و اعتبرينى بنتك
و الله انتى احسن من بنتى يا ناديه ...ربنا عالم انا بحبك اد ايه
و انا و الله بعتبرك زى امى بالظبط ...استأذنك بقا علشان عارفه انى تعبتك ...استريحى شويه على ما يجى ميعاد الغدا
حاضر يا بنتى
ناديه خرجت من عند ماما عايده و هى حزينه و مقهوره و بقت تقول فى نفسها ...ازاى اولاد يعملوا فى امهم كدا ؟؟
جابوا قسوة القلب دى منين ؟
هما ليه مقدروش تعبها و تضحيتها عشانهم ؟
هما ليه انانيين كدا؟
ليه محسوش بيها و مشلوهاش زى ما هى شالتهم ؟
هما ليه مش مدركين أن معاهم حته من الجنه ...طب ياريت امى كانت عايشه كنت بوست رجليها ليل نهار😔
يتبع ....
#قصص_وحكايات_د_جيهان_عادل
#دار_المسنين
#الجزء_العاشر
ناديه بعد ما سمعت حكايه ماما عايده بقت صعبانه عليها اكتر و بقت تهتم بيها و تحاول تعوضها عن اللى شافته من ولادها
بعد كام يوم .....و بعد صلاة المغرب جت سميحه المساعده فى الدار و دخلت على ناديه اوضتها
ست ناديه ...تعالى ماما عايده عاوزاكى
عاوزانى ليه ؟؟ هى تعبانه و الا ايه ؟
لا بس هى قاعده فى اوضة الاكل و قالت لى ناديلى مس ناديه
حاجه غريبه اوى ...اول مره تعمل كدا ....حاضر هقوم اشوفها عاوزه ايه
خرجت ناديه لاوضه الاكل لقتها نورها مطفى ...
ايه دا ؟ هى سميحه بتشتغلنى و الا ايه ؟ فين ماما عايده؟
و فجاه نور الاوضه نور ....و لقت ناديه كل المقيمين فى الدار واقفين و قدامهم تورته كبيره مكتوب عليها ناديه و جاتوهات و حلويات على التربيزه ....و لقتهم كلهم فى نفس واحد بيقولوا لها
كل سنه و انتى طيبه يا ناديه
ناديه مصدقتش نفسها و بقت عنيها تدمع من كتر الفرح ...اول مره حد يعملى عيد ميلاد
ناديه بصت لماما عايده و عرفت انها السبب فى كل اللى بيحصل ده ....
قربت منها و حضنتها ....ربنا يخليكى لى يا ماما
استنى لما تشوفى جبت لك ايه كمان
ايه دااااا 😲😲😲😲 ....موبيل بكاميرا ؟؟؟؟؟؟
دا احدث موبيل نزل لحد دلوقتى ...انا لاحظت انك معاكى موبيل قديم شويه و قلت اجيب لك موبيل حديث تقدرى تدخلى منه على النت و تصورى بيه
يا حبيبتى يا ماما عايده ...دا كتير على اوى ..انا مش عارفه اقولك ايه ؟؟ انا مفرحتش كدا فى حياتى ...ربنا يسعدك يارب زى ما اسعدتينى
السعاده اللى انا شايفاها فى عنيكى دلوقتى مخليانى سعيده اوى يا ناديه
ناديه طفت الشمع و كل واحده من الأمهات كانت جايبه لها هديه رمزيه و فرحوا و رقصوا و أكلوا و كان اجمل يوم فى حياه ناديه عدى عليها
مديره الدار و المشرفات كانوا حاضرين الحفله و شافوا اد ايه الناس كانت فرحانه
بعد الحفله المديره ندهت ناديه و قالت لها كل سنه و انتى طيبه يا نادية الدار
و انتى طيبه يا مس اميره
انا شايفه الناس فرحانه اوى ...و عايزاكى بقا تنفذى الموضوع اللى قلتيلى عليه
قصدك موضوع الحفله ؟؟
ايوه بس عاوزينه على نطاق أوسع لانى هعزم ناس من الشؤون الاجتماعيه و يمكن اعزم وكيل الوزاره كمان
حاضر يا ميس اميره انا هجهز كل حاجه و أن شاء الله هكون عند حسن ظنك
طيب امتى هتكونى جاهزه ؟
يعنى ادينى تلات اسابيع كدا
لأ كتير يا ناديه هما اسبوعين بس
حاضر يا مس اميره هجهز كل حاجه و أن شاء الله هنعمل حاجه مشرفه تتشرفى بيها قدام الضيوف
ناديه تانى يوم بدأت تصور كل حته فى الدار بالموبيل اللى جابتهولها ماما عايده و طبعت الصور و بدأت تلاحظ فى كل صوره الحاجات اللى ممكن تتعمل علشان تخلى الشكل افضل
بدأت بالجنينه بتاعه الدار و شافت ايه ناقصها علشان يكون شكلها افضل
لقت ان الحشايش اللى فيها عاوزه تتقص و لقت انها محتاجه شويه أشجار و فل و ياسمين
و ابتدت ناديه تستعين بناس لها خبره فى المجال ده وبدأوا يقصوا الحشائش الزايده و يحطوا نجيله فى الأماكن الخاليه كمان زرعوا بعض الأشجار المثمرة ..بالاضافه لشجر الفل و الياسمين
ناديه بقت تستعين بنزيلات الدار فى دهان سور الجنينه الخشبي بألوان مبهجه و بقت النزيلات فرحانه جدا أنهم بيشاركوا و حاسوا انهم لسه عايشين و بيقدموا حاجه للمجتمع و لنفسهم
بعد كدا ناديه دخلت على الغرف و شافت ايه ناقصها و كملته
بعدها دخلت على اوضه الاكل و بقت تشوف لو اى ترابيزه محتاجه تصليح أو دهان ...كمان دهنت حوائط غرفه الطعام بألوان جميله و خلت إحدى النزيلات اللى بتعرف ترسم ..ترسم اشكال جميله على الحوائط
بعد كدا بدأ التجهيز للحفله......ناديه عملت ميزانيه للمشروبات و الحلويات و طبعا ماما عايده و فريق معاها بدأوا يجهزوا التورت و الجاتوهات و الحلويات التانيه
فريق تانى نزل جاب الاطباق و الكوبيات و الشوك و المناديل و مفارش التربيزات و الورود اللى هتتحط على التربيزات
ناديه قررت تعمل الحفله فى جنينه الدار لأنها بعد توضيبها بقا شكلها جميل و أوسع طبعا من غرفه الطعام
و بدأت تحط الزينه و اللمبات الملونه و ترص التربيزات و المفارش الملونه عليها و كل تربيزه عليها باقه ورد
كدا خلاص كل شي بقا جاهز للحفله ...و اتعملت الحفله زى ما ناديه خططت لها بالظبط و مس اميره كانت فخوره باللى عملته ناديه و كل الضيوف و النزيلات كانوا فرحانين جدا
و لما وكيل الوزاره شاف المجهود المبذول و اللى اتعمل فى الدار قال لاميره
دا جهد مشكور يا مدام اميره و ان شاء الله هرفع مذكره للوزير اشرح له فيها المجهود العظيم دا و أن شاء الله اجيب لكم تمويل اكبر للدار
اشكرك جدا يا فندم و أن شاء الله دى البدايه ...احنا لسه عندنا خطط لدمج الأيتام مع كبار السن لمدة يومين فى الاسبوع بشكل مبدأى بعد كدا هنزود عدد الايام و أن شاء الله هتكون تجربه ايجابيه للاولاد و لكبار السن
دا طبعا غير الانشطه اللى هنعملها زى الرحلات و المصايف و المعارض اللى بدأنا التجهيز لها بالفعل
عظيم يا مدام اميره ...عظيم جدا انتى من افضل رؤساء دور كبار السن اللى شفتهم فى حياتى
يا فندم اللى حضرتك شايفه دا مش مجهودى لوحدى ...دا مجهود مشرفات الدار و خاصه مدام ناديه بالاضافه الى مشاركات نزيلات الدار
جميل جدا التعاون اللى شايفه هنا دا يا مدام اميره و زى ما قلت لك هنحاول نزود لكم التمويل باذن الله علشان تقدروا توسعوا نشاطكم العظيم ده
الحفله كانت جميله و الكل فرح اوى بيها و الكل كان منبهر بالحلويات اللى عملتها ماما ناديه و مكنوش مصدقين انها هى اللى عملاها
بعد الحفله ما خلصت و الضيوف مشيوا مديره الدار جمعت كل الناس و شكرتهم على تعاونهم و خاصه ناديه و ماما عايده
ووجهت كلمه لناديه و قالت لها انتى يا ناديه اسم على مسمى ...انتى شعلة النشاط الموجوده هنا فى الدار و لولا مجهودك مكناش عرفنا نعمل كدا
ناديه ردت و قالت
دا بفضل تشجيع حضرتك و دعمك ليا يا مس اميره ....انا بقالى هنا تلات سنين بس مكنتش بلاقى اى دعم من المديرين السابقين لحضرتك
كمان مقدرش انسي تعاون ماما عايده و دعمها لى.... و نفسيتى اللى اتحسنت كتير اوى على اديها و حسستنى انى انسانه فى حد فى الدنيا بيحبها
احنا كلنا بنحبك يا ناديه علشان انتى انسانه تتحب بجد
ناديه قامت اخدت ايد ماما عايده و قالت لها انا كمان عاملالك مفاجاه تفرحك زى ما فرحتينا كلنا بس المفاجاه دى مش انهارده .....بكرا هتشوفى مفاجأتك قدام الدار كلها
يا ترى ايه المفاجاه اللى عاملاها ناديه لماما عايده ؟؟ دا اللى هنعرفه فى الجزء الجاى باذن الله تعالى
يتبع ...
#قصص_وحكايات_د_جيهان_عادل
#دار_المسنين
#الجزء_الحادى_عشر_والاخير
ناديه قامت اخدت ايد ماما عايده و قالت لها انا كمان عاملالك مفاجاه تفرحك زى ما فرحتينا كلنا بس المفاجاه دى مش انهارده .....بكرا هتشوفى مفاجأتك قدام الدار كلها
يا بنتى انا مش عاوزه حاجه انا يكفى بس انى فرحتك و فرحت الناس كلهم هنا
انتى فعلا فرحتينا ربنا يسعدك زى ما اسعدتينا
ناديه باست دماغ و ايد ماما عايده .... ماما عايده عنيها دمعت من كتر الفرحه
الحفله انتهت بس ما انتهش أحلامهم الجميله و إحساسهم انهم لسه عايشين و لهم وجود و لسه بيقدموا حاجه و زاد إحساسهم ده لما ناديه قالت لهم أننا هنبدأ فى عمل بعض الاشغال اليدويه و بعض الحرف الصغيره زى صناعة الميداليات و السلاسل و الانسيلات المفارش، ملايات السراير ....و غيرها من الأعمال اليدويه و كل ده هيتعمل فى معرض كبير و هيتقدم للجمهور بأسعار معقوله و يعتبر دخل اضافى ليهم و للدار
بعد الحفله ما انتهت كل نزيله اخدت كرسي و دخلته اوضه الطعام و باقى التربيزات شالهم عم شحاته البواب و دخلهم و رصهم مره تانيه
عايده دخلت سريرها و هى عماله تفكر يا ترى ناديه محضرالى مفاجاه ايه ؟؟
انا مش مستنيه حاجه منها بس صراحه انا فرحت انها فكرت فى ....انا من زمان اوى محدش فكر فى و لا حاول يفرحنى ....بس انا فرحانه اوى بناديه ياريتها كانت بنتى
اه بنتى ....الله يسهلها و يهدى حالها يارب....صعبان على منها اللى عملته فى طول عمرها بس انا برده امها و قلبى مش قادر يغضب عليها
اما اسامه فربنا يهديله حاله و ينور بصيرته يارب ....طول عمره معندوش قناعه باللى ربنا قسمهوله بس غلبان اه و الله غلبان ....ربنا يفتحها عليك يا اسامه يا ابن بطنى يارب
اما طارق فده نور عينى ...الحنين بتاعى ...ربنا يصلح حاله و يلاقى ولاده .....نفسي اشوفه اوى قبل ما اموت ...انا بقالى حوالى ٦ سنين مشفتوش 😔
نامت ماما عايده و هى عماله تدعى لأولادها بالرغم جفائهم ليها
تانى يوم ناديه راحت صبحت عليها و فطرت معاها زى .كل يوم
مش هتقوليلى يا ناديه عاملالى مفاجاه ايه
استنى على رزقك يا ماما انا كمان شويه هروح اجيب لك المفاجاه و هاجى
لأ يا بنتى متتعبيش نفسك بالله عليكى ...انا مش عاوزه حاجه
يا ستى تعبك راحه ...هو انا هتعب لأعز منك
طيب قومى هاتيلى الصندوق اللى فى الدولاب يا ناديه
حاضر يا ماما عايده .....اهو الصندوق
خدى يا بنتى
ايه دا ؟؟؟ دا جواب كتبته لاولادى ...ابقى اديهلهم لو جرالى حاجه
بعد الشر عنك يا ماما عايده ليه بتقولى كدا ؟؟
يا بنتى الموت علينا حق و كلنا لنا ميعاد و محطه هننزل فيها ......و خدى دا هديه منى ليكى
ايه دا حلق دهب ؟؟؟
ايوه خديه مش هلاقى اعز منك اديهوله
لا مقدرش اقبله منك ...انا كدا ابقى بستغلك
أخص عليكى يا ناديه بتستغلينى يعنى ايه ...دى رغبتى و لو مخدتهوش و الله و الله هزعل منك اوى ...دى حاجه بسيطه ...ياريت كان معايا اكتر من كدا اقدمهولك
تسلمى يا ست الحبايب
قومى بقا انا قفلت الصندوق اهو ....حطيه فى الدولاب
الصندوق ده فيه باقى معاشي و الف جنيه كنت شايلاها على جنب و معاهم صور ولادى و هما صغيرين و لسه فى حضنى 😔
إن شاء الله يرجعوا فى حضنك يا ماما عايده
ازاى يا بنتى ....ما خلاص الله اعلم هشوفهم تانى امتى
إن شاء الله هتشوفيهم و تفرحى بيهم تانى ....اسيبك بقا دلوقتى عشان اروح اجيب هديتك
ربنا يرضى عليكى يا ناديه و يفرحك يا بنتى
ناديه خرجت من عند ماما عايده و هى بتبتسم و بتقول فى نفسها ....اصلها مش عارفه انى انا مجهزالها هديه عمرها ما هتخطر على بالها
ناديه راحت تقابل دكتور طارق فى المطار ....و كانت بقالها فتره بتراسله و اقنعته ينزل يشوف والدته لأن حالتها النفسيه بتسوء يوم عن يوم و هما بعاد عنها
كمان ناديه قالت له أنه يقنع اخواته و يخليهم يجوا كلهم و يعملوا لامهم مفاجاه و اكيد هى هتفرح جدا بالمفاجأه دى
و فعلا ناديه أصرت تروح لطارق المطار و مستنتش يرجع و يبقى يجى تانى يوم لامه ....كمان قابلت هناك اسامه و ثريا جايين يستقبلوا اخوهم
اسامه اخدهم فى عربيته و عرفوا من ناديه كل اللى حصل مع امهم فى الشهرين الأخيرين
اول ما ناديه وصلت الدار الكل كان مستنيها علشان يعرفوا المفاجأة و الكل كان منتظر يشوف رد فعل عايده على المفاجأة الهايله دى
كلهم اتجمعوا و قرروا يروحوا مع ناديه اوضه ماما عايده و يشوفوا الفرحه لما تشوف اولادها
ناديه قالت لأولاد ماما ناديه و النزيلات استنونى هنا و لما اقول ادخلوا ادخلوا
دخلت عايده و هى بتقول يلا يا ماما ناديه جبت لك المفاجاه اللى قلت لك عليها ....يلا قومى صحصحى كدا
ماما عايده ....ماما عايده.... ماااااااااااما
لا متسبنيش تانى....انا ما صدقت أن يبقالى ام ...لاااااا
اولاد ماما عايده و زمايلاها دخلوا على صوت ناديه ....الكل وقف اتسمر مكانه و بقت الدموع تنزل منهم
ثريا نزلت على امها ...ماما لا ...انا جيت اهو ....متزعليش منى ...انا غلطت فى حقك .....ماما لا
و أسامة بقى يحاول يفوق فيها و يبوس فى رجليها و ايديها..... لا يا امى بالله عليكى ما تعملى فى كدا ....لا ارجوكى انا جيت لكى اهو ....بالله عليكى ما تموتى و انتى زعلانه منى
أما الدكتور طارق فأخدها فى حضنه و قال ياااااااا يا امى وحشنى حضنك اوى .....مكنتيش عارفه تستنينى شويه .....لا انا اللى غلطان انتى استنيتى كتير و انا اللى منزلتش حقك على يا امى حقك على يا حبيبتى
ياااارب يااااارب .....سامحينى يا حبيبتى سامحينى يا غاليه ....يا امى و ابويا ....يا خالى و عمى يا كل عيلتى
كلام اولاد ماما عايده قطع قلب كل اللى فى الدار ....بس ناديه كان لها رأى تانى
زمايل ماما عايده فى الدار خرجوا من الأوضه و هما عمالين يعيطوا و سابوها مع اولادها و ناديه
ناديه قامت مسحت دموعها اللى كانت مغرقه وشها و قالت ....بعد ايه ؟؟ بعد ايه جايين تندبوا حظكم و تفتكروا أن كانت لكم ام .....ليه مفتكرتوش لها اى حاجه حلوه و هى عايشه ....ليه دلوقتى حاسين بالندم ....ليه ....ليه محستوش من بدرى يمكن كنتوا فرحتوها قبل ما تموت
ليه تنيموها كل ليله معيطه و مشتاقه تشوفكم و انتوا ولا على بالكم ...ليه مفتكرتوهاش ليه مقدرتوهاش ليه ليه
على العموم هى سايبالكم جواب معايا اتفضلوا اهو ...
طارق اخد الجواب من ايد ناديه و فتحه لقى مكتوب فيه
بسم الله الرحمن الرحيم
ابنائى حبايبي ...إذا وصلكم خطابى ده يبقى معناه انى خلاص بقيت بين يدى الرحمن
انا عاوزه اقولكم انى مش زعلانه من اى واحد منكم و أن قلبى راضى عليكم كلكم و بدعيلكم
اوعوا تزعلوا أو تفتكروا انى ميته غضبانه عليكم
انا بحبكم ... و بتمنى من الله أنه يرضى عليكم برضاه و يسبل عليكم ستره
و عاوزه اقولك يا طارق ناديه اللى ادتك الجواب دى بنت حلال اوى و انا بعتبرها بنتى اللى مخلفتهاش ...لو عايز تسعد فى الدنيا اتجوزها يا ابنى ...مش هتلاقى احسن منها
و عايزه اقولك يا اسامه أن حل مشكلتك يا ابنى فى الرضا و القناعه...ارضى بما قسمه الله لك تكن اغنى الناس
و عايزه اقولك يا ثريا انتى بنتى حبيبتى ...افعالك كانت بتزعلنى بس عمرى ما كرهتك و كنت بتمنالك الخير دايما...كنتى بتتهمينى انى بفضل الولاد عليكى و انى بعاملك بقسوه بس دا مش صحيح لانى كنت بخاف عليكى اكتر منهم ...ربنا يحفظ لك ولادك يا بنتى و تفرحى بيهم و هتعرفى اللى بقوله لكى دا
فى النهايه ارجو منكم انكم تزورونى و متقطعوش بى و انا فى قبرى
مع السلامه يا حبايبي
طارق قرأ الجواب لاخواته بصوت عالى و الكل بقا مش عارف ينطق من كلام امهم اللى كانت حريصه حتى و هى ميته أن اولادها ميزعلوش ابدا . 😔
تمت
🌹💐🌹💐🌹💐🌹💐🌹💐🌹💐🌹💐🌹
انا عاوزه اقول بس كلمه ....اللى أبوه أو أمه عايشين حاول تغتنم فرصه وجودهم خليك بار بيهم ....عارفه أن مشاكل الحياه بتلهى الناس لكن صدقنى ابوك و امك هما البركه اللى فى حياتك و بموتهم بتموت البركه بموتهم بينكسر الضهر و السند
ربنا يرحم والدى و يغفر لوالدتى و يرحم آبائنا و امهاتنا جميعا يارب
ارجو أن القصه تكون نالت اعجابكم و السلام عليكم و رحمة الله و بركاته
#قصص_وحكايات_د_جيهان_عادل
.
جميله جداً
ردحذفتسلم ايدك
ردحذفجميييله يا دكتور👌👌