#عنبر_خمسه
#الجزء_التاسع_عشر
و بالفعل اشتريت عبايه خروج شيك و طرحه و شويه مكياج 😂 و باروكة شعر و جزمه حريمى بكعب و بقيت ايه ست اخر حلاوه 😂😂😂
استنيت لحد ما الساعه جت ١٢ بالليل و رحت على العماره اللى فيها شقة ساره
اول ما وصلت لقيت البواب قاعد و حاطط راديو صغير على ودنه و عمال يسمع الست
طب و بعدين هطلع ادامه ازاى ؟؟
بصيت على العماره من فوق لتحت لقيت فى يافطه كبيره لطبيب امراض نسا ...قلت حلو اوى
و اخدت بعضى و دخلت على طول
الراجل وقفنى
رايحه فين يا ست ؟؟
طالعه للدكتور كامل
طب اتفضلى فى الدور التالت
ركبت الاسانسير و نزلت فى الدور التالت كنت خايف البواب يكون ملاحظ رقم الدور و طلعت على رجلى تلات ادوار لان شقه ساره كانت فى السادس .
طلعت و لقيت الشقه فى اخر الطرقه ...الدور فيه اربع شقق و شقه ساره اخر شقه
طلعت طفاشه قديمه ...اه منا نسيت اقولكم أن والدى كان عنده مكنه بيطلع بيها على المفاتيح و ياما اشتغلت معاه أثناء الاجازه و كان معايا طفاشه من ساعتها بسيبها معايا لاى ظروف أن مفتاح يضيع أو كدا
فتحت الباب و دخلت ريحة الموت فى كل مكان
الشقه متنضفه بس فيها ريحه غريبه و الحيطان فيها بعض طرطشه للدم تقريبا اللى نضف مخدش باله منها ..
دخلت على اوضة المكتب ...مكتب فخم جدا و فى جنب مكتبه مرصوص عليها كتب كتير اوى .
بس التراب مغطى كل شئ
شلت التابلوه و لقيت الخزنه ابتديت اجرب كل الأرقام اللى ساره اديتهالى ...لكن للاسف و لا رقم نفع
الخزنه محتاجه خمس ارقام و مفيش اى رقم نافع
بقيت اقلب الارقام و برده مفيش فايده
اكيد هو مستخدم حاجه تانيه
ما هى لو الخزنه بالحروف كنت قلت إنه مستخدم حروف اسم ساره أو مستخدم حروف اسم سامر و مزود حرف لكن هى مش بالحروف..
و بعدين فى الحيره دى
طب احاول اخلع الخزنه من الحيطه و اخدها افتحها فى اى مكان عند اى حداد ؟؟
الخزنه متثبته فى الحيط و لا يمكن اخرجها الا لو كسرت الحيطه حواليها
طب و بعدين ؟؟؟؟
مش عارف اتصرف
جتلى فكره هى مجنونه شويه بس يمكن ...... يكونش سامر مستخدم اسمه بس بالارقام ؟؟؟
يعنى مثلا السين شكلها كدا زى رقم ٣
و الالف يشبه رقم ١
و الميم شكلها قريب من ٩
طب و الر ....دى ملهاش اى شكل فى الارقام خالص ...اه ممكن يكون مستخدم مكانها بين الحروف ...حرف الر الحرف العاشر بين الحروف الابجديه
يبقى كدا الرقم اللى ممكن يكون مفتاح الخزنه ٣١٩١٠
اجرب يمكن
الله ...الخزنه اتفتحت فعلا ...الحمد لله يارب
المذكرات اهى ....و كارت الميمورى اهو ....و ايه الكيس الاسود ده ؟؟؟
ايه دااا 😳 ؟؟؟؟؟ دا الماظ
كل ده الماظ ؟؟؟؟ هو كان بيتاجر فيهم و الا ايه ؟؟؟؟
اخدت الحاجات بسرعه و حطيتهم فى شنطة ايدى و طلعت من الشقه على الاسانسير و خرجت من العماره كأن اتكتب لى عمر جديد
و اخدت المذكرات و رحت الفندق لأن الوقت كان أتأخر و مينفعش اروح لساره فى الوقت المتاخر ده
و شفت المذكرات و منها عرفت أن اعتدال مش ام ساره و انها مبتخلفش و عشان كدا ابو ساره اتجوز واحده كانت بتشتغل سكرتيره عنده فى الشركه و للاسف ماتت بعد حوالى سنه و نص بسرطان الثدى
ابو ساره معرفش يتصرف ...البنت أصبحت يتيمة الام و ميقدرش يسبها ...
ابو ساره اخد ساره و راح اعترف لاعتدال بأنه اتجوز عليها لانه كان نفسه فى طفل و أن مراته توفت و البنت مبقاش لها غيره
أعتدال لما عرفت النار قادت فى قلبها و كرهته أنه خانها و راح اتجوز عليها
بس مقدرتش تسيبه لانه كان موفر لها مستوى عالى أعلى بكتير من عيلة اهلها
سامر بيحكى فى المذكرات اد ايه اعتدال كانت بتكره ساره و أن والدها كان بيلاحظ ده و بيحاول معاها و بيقولها انها يتيمه مش ذنبها اى حاجه و ساره متعرفش لها أم غيرها
لكن اعتدال مكنتش قادره تخبى النار الى فى قلبها و بقى حقدها يزيد يوم عن يوم كل ما ساره تكبر و تشوف ابوها بينفذ لها طلباتها و مبيرفضش لها طلب
سامر كاتب أن احمد ابو ساره كان حكيله على الموضوع ده و أنه بيحاول يعوض ساره عن اليتم و عن معامله اعتدال الجافه جدا ليها و عشان كدا مبيرفضش لساره طلب ..
سامر دخل لاعتدال من النقطه دى و ابتدى يتقرب ليها و يفهمها انها خساره فى جوزها الخاين و أنه يستحق الخيانه
و للاسف اعتدال استجابت له و حللت لنفسها الخيانه و بدأت تخون جوزها من و ساره فى الاعداديه
بس كانت فى الاول بتدارى و مبتقبلوش الا كل فتره طويله
مع كبر ساره و اهتمام ابوها بيها و انشغاله فى شغله و ببنته ابتدت العلاقه بين سامر و اعتدال تكون اقوى و على فترات أقل
لحد ما ساره ابتدت تدخل حياته و لقى أن ساره افيد له طبعا لأنها هتورث معظم ثروه ابوها
و فعلا ابتدى يركز عليها و يحاول معاها و يهمل فى اعتدال و يتحجج لها بأى حجه
و طبعا من مصلحته أن الموضوع يكون سر لحد ما يلف دماغ ساره و يسيطر عليها
و ده اللى حصل فى وجهه نظره و اتجوز ساره غصب عن اعتدال اللى اما عرفت اتصلت عليه و هددته انها هتفضحه و تقول لاحمد على كل حاجه
و طبعا سامر سخر منها و قالها و ماله روحى قوليله هيعملى ايه يعنى ؟ أقصى حاجه مش هيجوزنى بنته بس انتى هتفقدى كل حاجه و هيرميكى زى الكلبه
اعتدال انهارت و معرفتش تعمل ايه .
مكتوب فى المذكرات رحلة سامر لأفريقيا مع ساره و مغامراته اللى لا تعد و لا تحصى
و بعدها رجوعه هو و ساره و دخول اعتدال مره تانيه فى حياته
و ابتدى يحكى ازاى اعتدال كانت متغاظه من ساره و عاوزه تتخلص منها بأى طريقه .....
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب
هايل جدا تفكيره سليم وعرف يستنتج الباسوورد 👏👌
ردحذفهايل جدا تفكيره سليم وعرف يستنتج الباسوورد 👏👌
ردحذفهايل جدا تفكيره سليم وعرف يستنتج الباسوورد 👏👌
ردحذف