#عنبر_خمسه
#الجزء_الخامس
و سبت البيت فعلا فى محاوله منى انى اضغط عليهم انهم يتراجعوا عن اللى عاوزين يعملوه ...بس للاسف كل شيء تم فى عدم وجودى و كأنى مليش اى لازمه و سافرت ساره مع عريسها بفستان فرحها بعد اسبوع واحد و للاسف مشفتش بنتى و لافرحت باليوم اللى كل ام بتحلم بيه 😔
و ليه حضرتك كنتى معترضه بالشكل ده ؟؟ عشان فرق السن و الا حاجه تانيه ؟
حاجه تانيه ايه ؟
قصدى أخلاقه يعنى ...هل أخلاقه مكنتش كويسه ؟؟
لا انا مليش دعوه بأخلاقه ...انا بتكلم أنه ادها مرتين فى السن.
بس فى بنات كتير بتتجوز رجاله اكبر منها
ايوه بس ساره مش محتاجه انها تتجوز واحد اكبر منها ساره ابوها كان غنى جدا و احنا مش محتاجين
تمام ممكن تكملى من فضلك
مفيش ...بعد كدا احمد جه صالحنى و رجعت شقتى و ساره حاولت تكلمنى اكتر من مره و تحاول تعتذرلى بس انا كنت زعلانه منها اوى
يعنى فضلتى مخاصمه ساره ؟؟
انا كنت فاكره انها هتمضى شهر العسل بس زى ما احمد فهمنى و كنت مصممه انى مكلمهاش الا لما تيجى و تعتذرلى بنفسها
بس للاسف المده طالت و الشهر بقا سنه
و مكلمتهاش فى السنه دى ؟؟
كلمتها بس بصراحه كلامى معاها كان قليل ...هى اتحدتنى و مقدرتش انسي لها اللى عملته ده
طب علاقتها بجوزها كانت عامله ازاى
اللى كنت بسمعه من احمد ان علاقتهم كويسه و هى كانت مبسوطه و باعت الدنيا عشانه
طيب مدام بنتك مبسوطه انتى ايه اللى يزعلك ؟
منا قلت لك يا دكتور ...دى مسأله مبدأ
تمام كملى حضرتك
بعد كدا نزلت ساره هى و جوزها و راحوا على شقتهم
احمد اتحايل عليا اننا نروح نزورهم بس انا نفسي مكنتش قابله انى اروح بيته و هو عارف انى رفضاه
و فعلا ساره عشان متزعلنيش لقيتها جايالى هى و جوزها
قعدت تبوس فيا و تقولى وحشتينى
و اعتذرلى سامر و قبلت اعتذاره على مضض
ابتدوا بعد كدا يكونوا على طول عندنا و احنا نروح لهم بس جوزها بقى يشتكى منها أن أحوالها ابتدت تتغير من ساعه ما رجعوا من بره
تتغير ازاى بقا ؟؟
يعنى كان يقولى انها بتفضل تكلم نفسها كأنها بتتكلم مع حد تانى و بصوت عالى
بيجيلها كوابيس يوميا و تقوم تصرخ
ساعات بيتهيألها حاجات زى حشرات كتير ماشيه على الحيطان
انا فى الاول مصدقتوش و كنت بقول أنه عاوز يجننها خاصة أن مكنش بيظهر عليها اى حاجه نهائى يعنى كنت اشوفها مرتين أو تلاته فى الأسبوع ملحظتش عليها اى حاجه
طب ليه هو مودهاش لدكتور عشان يشوف السبب للحاله اللى كانت فيها دى ؟؟
انت عارف يا دكتور حساسيه الموضوع ده ... و بعدين هى نفسها مكنتش معترفه بالكلام ده ..حتى لما لفت نظرها و قلت لها جوزك بيشتكى منك نفت تماما انها بتعمل كدا
بعد كدا لقيتها فى يوم جايه فرحانه جدا
باركيلى يا ماما.... بارك لى يا بابا
الف مبروك يا حبيبتى بس على ايه ؟؟
انا حامل
الف الف مبروك يا حبيبتى
الله يبارك فيك يا بابا ....ايه يا ماما مش هتقوليلى مبروك ؟
مبروك يا ساره ...بس اتسرعتى فى الحمل كدا ليه يا بنتى ؟
اتسرعت ايه بس دا احنا قربنا على السنتين متجوزين اهو ...دا سامر هيفرح اوى لما يعرف
انتى لسه مقولتلوش ؟؟
ايوه انا لما شكيت قلت اروح اكشف و مكنتش عاوزه أقوله لأكون غلطانه و لما الدكتوره طمنتنى جيت على هنا على طول و مرضتش أقوله فى التليفون مستنيه لما أقوله و احنا لوحدنا و اشوف رد فعله بعنيا
طب ما تستنى شويه يا ساره
و استنى ليه يا ماما ؟
قصدى عقبال ما الحمل يثبت شويه
مش هقدر يا ماما دا انا مستنيه بالليل ده بفارغ الصبر 😘
كويس اوى ...و بعدين
مفيش..... مرت تلات شهور و لقينا تليفون فى نص الليل بيرن علينا
احمد قام مفزوع لقى سامر بيكلمه و بيقوله احنا فى المستشفى لأن ساره تعبت شويه
جرينا انا و احمد على المستشفى لقيناها فى اوضه العمليات و للاسف اجهضت
ساره كانت فى حاله نفسيه وحشه جدا لدرجه اننا ساعتها استعنا بدكتور عبداللطيف النجار عشان يخفف الحاله اللى وصلت لها
اه استاذنا طبعا
قعدت عنده فى المصحه الخاصه حوالى ١٥ يوم بعدها خرجت و ابتدينا كلنا نلاحظ عليها اللى كان بيقوله سامر و مكناش مصدقينه
بقت على طول شاردة ...بعد كدا بقت تصرخ فجاه من غير اى سبب ..
كل يوم كوابيس و صريخ رهيب
ابتدى الموضوع يتطور بعد كدا و بقت تأذى نفسها
كانت بتعمل ايه ؟؟
كانت بتقطع شعرها و تعور نفسها و تقول كلام غريب أن جوزها عاوز يموتها و كانت بتنفى انها هى اللى اذت روحها و تقول إن هو اللى عمل كدا
طبعا احنا تعبنا اوى لدرجه ان والدها من حزنه عليها اتوفى فجأه ....
و فضلت انا معاها بقيت مبفارقهاش رحت عشت معاها عشان اخد بالى منها و خبينا عليها خبر موت والدها
و هى مسألتش على والدها خالص ؟؟
هى كانت فى دنيا غير الدنيا ... مكنتش واعيه للى هى فيه و الا اللى حواليها
تمام كملى حضرتك
فضلت قاعده معاها قرب السنه بس جه ميعاد الفحص السنوى بتاعى كنت بروح اقعد يومين فى مستشفى السلام الخاص اعمل كشف دورى علشان ضغطى كان بيعلى على طول و عندى مشاكل فى القلب
الف سلامه على حضرتك
الله يسلمك
كنت محتاره اروح و اسيب ساره و الا ابقى جنبها و خلاص..... بس سامر قالى اتطمنى انا مش رايح الشغل اليومين اللى انتى هتغبيهم دول و هفضل جنبها
و بالفعل رحت المستشفى و بعدها بيوم سمعت خبر انها قتلت جوزها و مثلت بجثته ساعتها الدنيا اسودت فى عنيا و لقيت نفسي وقعت مفوقتش إلا و الدكاتره بيقولوا جلطه و من ساعتها و انا مبتحركش زى ما انت شايف
الف سلامه عليكى
الله يسلمك يا دكتور
ممكن من فضلك طلب اخير
اتفضل
ممكن اخد البوم الصور ده معايا ...أنا متأكد أنه هينفعنى فى علاج ساره
الالبوم كله ؟ طب خد صوره او اتنين دا ده اللى بقيلى منهم
اوعدك انى هرجعه لكى تانى
خلاص خده يا دكتور المهم ساره تخف
متشكر اوى لحضرتك سلام عليكم
و عليكم السلام
نزلت من عند الست اعتدال و كلامها زادنى حيره ....ليه ساره ظهر عليها الحاجات دى بعد رجوعها من السفر ؟ و ليه جوزها ساعتها معرضهاش على طبيب نفسي و بعد كدا وداها مصحه ؟؟؟ و ليه لما لقى حالتها بتسوء كدا مرجعهاش المصحه
كل دى اسئله دارت فى دماغى و اكيد كلكم عاوزين تعرفوا إجابتها زى منا عاوز اعرف إجابتها
عاوزين تعرفوا الاجابه على اسئله الدكتور أحمد استنونى فى الجزء الجاى باذن الله تعالى.
#دجيهان_عادل
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب
اكيد الشقة مسكونة
ردحذفاكيد الشقة مسكونة
ردحذفروعاتك يا دكتورة
ردحذف��������
ردحذفأفريقيا مشهورة بالسحر والسحرة ممكن تكون اتعملها سحر هناك....جميلة يا د .تسلم ايديك
ردحذف😕🙄
ردحذفجميلة جدا تسلمي أحلى دكتورة جيهان ربنا يسعدك و يفرح قلبك حبيبتي 💖 💖 💖 💖 💖 💖 💖 💖
ردحذف