حكايه محمود كامله

#حكاية_محمود

#الجزء_الاول

ايه دا ...انا فين ؟؟. ...

ايه السواد اللى انا فيه دا ....انا مش عارف 

مش شايف اى حاجه ....الدنيا كحل ادامى

الريحه هنا وحشه اوى 

ايه دا اللى جه فى ايدى دا .....لااااا دا عضم 

انا فين .....انا فى قبر 😲😲😲😲

الحقونى ...... الحقونى يا ناس ياللى بره الحقونى 

محدش سامعنى ....هعمل ايه ؟؟

انا هحاول اشوف سلم المقبره دى فين و احاول اطلع او اقرب من السطح و انادى

فين .... فين السلم يارب ...يارب انا خايف اوى ....معايا يارب ..... يارب خرجنى من القبر دا 

انا ايه اللى جابنى هنا ......انا مش فاكر اى حاجه ...انا مين ؟؟؟

اهو السلم اهو 

و ادى فتحة المقبره أو الباب 

يا نااااااس الحقونى ....انا هنا افتحولى 

يظهر إن إحنا بالليل لان مفيش اى بصيص نور 

يارب يارب غيتنى يارب 

يارب مليش غيرك ......ايه اللى بيتحرك جنبى دا 

سلام قول من رب رحيم انا سامع صوت حاجه بس مش قادر اميز ايه دى 

سلام قول من رب رحيم 

الحقونى يا ناس ...حد يفتح لى

كل ده كان بيحصل لمحمود جوه المقبره و فى نفس الوقت ده كانت بتسكن عيله عم سعد التربى بجانب المقابر 

ياابا ....أبا .....

فى ايه يا عزيزه ؟؟

انا سامعه صوت يا أبا 

يا بنتى استهدى بالله و نامى ...هى دى اول مره نسمع حاجه زى دى ؟؟ 

لأ يا أبا الصوت المره دى مختلف 🥺

و مختلف ازاى بقا يا ناصحه ؟؟

يعنى احنا اه بنسمع بس بنسمع صريخ بنسمع كلمه او اتنين لكن انا بقالى فتره عماله احاول اسمع و زى ما يكون حد بيستغيث و يقول افتحولى 

بقولك ايه يا عزيزه انتى وارثه القلب الخفيف من امك الله يرحمها ....سبينى انام عندى شغل بدرى 

شغل ايه يا أبا ؟؟

عارفه الاستاذ مدحت اللى الترب بتاعته فى الاول؟ 

ايوه عارفاها

اهو جالى امبارح و طلب منى نجدد له الترب علشان العيون اتملت ...و ادانى العربون

فانا رحت لعمك سليم البنا و هيجى بكرا باذن الله نهد العيون القديمه و نبنى عيون جديده و نبنى دور تانى عشان نعمل

 معضمه

و ليه معضمه يا أبا ما تدفنوا العضم تحت التراب و خلاص

و الله يا عزيزه دا اللى طلبه الاستاذ مدحت و انا مقدرش أقوله لا ...

المثل بيقولك ايه ؟؟ اربط الحمار مطرح ما يقول صاحبه

طيب يا أبا و هتعوزنى فى حاجه ؟؟ و الا اروح مشوار كدا؟؟

اه طبعا هعوزك امال مين هيعملنا الغدا انا و عمك سليم؟ ....و بعدين مشوار ايه اللى هتروحيه دا ؟

لا مفيش دا انا كنت عايزه اروح المستشفى ضرسي ناقح على بقاله كام يوم كدا و كنت عاوزه اروح اخلعه 

طب معلش متروحيش بكره و حطى عليه فص قرنفل يسكن لك الالم لحد ما تبقى تروحى المستشفى بعد بكرا

امرك يا أبا 

تانى يوم عزيزه راحت جابت خضار و فرخه و بدأت تطبخ الغدا لابوها و اللى معاه 

كل شويه عزيزه تسمع دبه و تكدب نفسها و تقول دا اكيد صوت تكسير العيون اللى عم سليم شغال فيها 

عزيزه خلصت الغدا و حطته على الصينية و راحت لابوها عشان يتغدا

اهلا عزيزه ...ازيك يا بنتى بقالى كتير مشوفتكيش

ازيك يا عم سليم و ازاى خالتى ام غريب 

و الله الحمد لله ..بخير و غريب ابنى بيسلم عليكى اوى ....لما عرف أن لى شغل مع ابوكى انهارده قالى سلملى على عم سعد و على عزيزه يا ابا

الله يسلمك و يسلمه يارب 

يلا جبت لكم شويه طبيخ يستاهلوا بقكوا

طول عمرك شاطره يا عروسة ابنى 

هنا رد سعد ...يلا يا اخويا شد حيلك و تعالوا اخطبوها 

عزيزه اتحرجت و حطت وشها فى الارض..............بعد كدا

قعدوا كلهم أكلوا و شربوا الشاى اللى كانت عاملاهلهم عزيزه فى الترمس

و  سابت بقيه الشاى لهم و شالت الصنيه

عايز حاجه منى تانى يا أبا ؟؟

لا يا عزيزه تسلمى .....تسلم ايدك على الاكل ...بيفكرنى بأكل المرحومه بالظبط ....كان لها نفس كدا فى الاكل و لا اتخن تخين يعمل زيه ..مع انها ماتت و انتى صغيره بس سبحان الله

ما انت اللى معلمنى برده يا أبا ....انت استاذ و لا الشيف الشربينى 😂😂

يا جمالووو يا جمالوووو

لأ.....دا الشيف حسن يا ابا ....انت بتلخبط ليه ؟؟

و كمان عارفه الشيفات من بعض ده ايه دا ده دا  .....شوفت يا حج سليم جيل الايام دى عارف كل حاجه 

طبعا يا سعد ...هو الموبيل و الا التلفزيون خلى فى نفس الناس حاجه ؟؟؟

تعيش و تفتكر يا أبا ....انا ماشيه بقا

عزيزه اخدت الصينيه على رأسها و روحت ع البيت و هى ماشيه سمعت صوت مكتوم بينادى 

الحقونى ....حد يفتح لى ...الحقونى يا ناس

عزيزه حطت الصنيه على الأرض و قربت ببطئ شديد للمقبره اللى طالع منها الصوت و قعدت تسمع 

الحقونى ....افتحولى

انت مين ؟؟

انا ...انا معرفش بس افتحولى 

ايه اللى دخلك هنا ؟؟ 

معرفش ....ارجوكى افتحيلى 

عزيزه خافت و قالت ليكون عفريت ؟؟🙄🥺🥺🥺

سلام قول من رب رحيم 

افتحيلى بالله عليكى 

لا يا اخويا مليش دعوه انا هروح انده لك ابويا

عزيزه جريت على ابوها و الحج سليم فى أول الترب و بقت تصرخ و هى رايحه عليهم من بعيد

الحق يا أبا..... الحق ....فى عفريت و الا واحد مدفون حى فى الترب 

اول ما ابوها سمعها اتسرع و خرج بره مقبرة الاستاذ مدحت 😲

عفاريت ايه يابنت الكلب اللى بتقولى عليها؟؟؟

و الله زى ما بقولك ...انا كلمته و قالى طلعينى 

هو فين دا يا بت ؟؟

فى مقبره عيله الغندور اللى قدام اوضتنا بالظبط 

بس يا بنتى مقبره الغندور دى بقالها كتير محدش قرب منها و لا فيها حد مدفون قريب ....ازاى بقا اللى بتقوليه دا ؟؟

معرفش يا أبا يبقى اكيد عفريت 

سليم قال ما عفريت الا بنى ادم يا عزيزه ...طب ما يلا يا سعد نشوف فى ايه ؟؟ و ايه اللى بتتكلم عنه البت 

يلا بينا ....تعالى ورينى فين ؟؟ بس عارفه لو لقيت دا مقلب من مقالبك شوفى هعمل فيكى ايه ؟

لا و الله يا ابا ما مقلب 

يا ترى عم حسين التربى هيعمل ايه ؟؟ يا ترى هيخرج محمود و الا لا ؟؟ و يا ترى محمود ده حكايته ايه ؟؟ 🤔

دا اللى هنعرفه فى الجزء الجاى باذن الله 

يتبع ......🙄

#د.جيهان_عادل😲

#حكاية_محمود

#الجزء_الثانى

طب ما يلا يا سعد نشوف فى ايه ؟؟ و ايه اللى بتتكلم عنه البت 

يلا بينا ....تعالى ورينى فين ؟؟ بس عارفه لو لقيت دا مقلب من مقالبك شوفى هعمل فيكى ايه ؟

لا و الله يا ابا ما مقلب 

اهو يا أبا هناك 

الحقونى ....خرجونى ارجوكم 

انت مين ؟؟ و ايه اللى دخلك عندك ؟؟

معرفش ...انا صحيت لقيت نفسي هنا 

طب اسمك ايه ؟؟ و منين ؟؟

بقولك معرفش ...ارجوك خرجنى نفسي اشم الهوا 

حاضر حاضر ....ايدك بايدى يا سليم علشان نرفع الغطا

اول ما سعد فتح الغطا هو و سليم شهق محمود شهقه جامده و قال أشهد أن لا إله إلا الله و اشهد ان محمد رسول الله 

اول ما شافته عزيزه هى كمان شهقت و قالت يا لهوى انت ايه اللى عامل فيك كدا يا جدع 

محمود كانت هدومه مقطعه و دماغه لازق عليها دم مغرقها و ايديه و قميصه المتقطع غرقانين دم ناشف عليهم 

محمود بص كدا على نفسه و على هدومه و هز رأسه كدا انه مش عارف ايه اللى عمل فيه كدا ؟؟ و مكنش قادر يقف على رجليه من الدم اللى نزفه و من الرعب اللى شافه طول الليل و هو محبوس فى المقبره

سليم قال لازم نوديك المستشفى دلوقتى يا ابنى جرح راسك دا شكله غويط اوى و ستر ربنا أن الدم اتجلط عليه و قفله لولا كدا كان دمك اتصفى 

محمود قاله ملوش لازمه انا هبقى كويس دلوقتى يا عمى 

و لسه بيقوم راح واقع مغمى عليه 

يا خبر الجدع وقع من طوله ...ايدك يا سعد نسنده على ما عزيزه تجرى توقفلنا تاكسي 

عزيزه جريت جابت تاكسي و ركبوا كلهم و راحوا المستشفى 

هناك الدكتور فوّق محمود و خيط له الجرح...و لما عرف أن محمود مش فاكر اى حاجه عن نفسه جاب له دكتور مخ و اعصاب اللى قالهم أنه فاقد للذاكره بشكل مؤقت نتيجه الخبطه و نتيجه الصدمه لما قام لقى نفسه فى المقبره....و أنه خلال أيام هيستعيد ذاكرته باذن الله

محمود رجع مع سعد و عزيزه البيت لانه مكنش عارف يروح فين ...سعد قاله انا مش هسيبك الا اما الذاكره ترجع لك و تفتكر كل حاجه و تروح لأهلك 

طبعا محمود قعد يشكر فيه جدا و يقوله انا مش عارف أودى جمايلك دى فين يا عم سعد 

لا جمايل و لا حاجه انت زى ابنى و انا عندى اوضه لازقه فى اوضتى انا و عزيزه هقعدك فيها 

بس الاول لازم تغير هدومك المقطعه دى ....هقوم اجيب لك جلابيه و غيار من بتوعى علشان تستحمى و تغير هدومك على ما عزيزه تعملك لقمه تاكلها زمانك ميت من الجوع

و الله يا عم سعد مش عارف اشكرك ازاى

تانى ؟؟؟ ما قلنا مفيش شكر و لا حاجه و انا زى ابوك ...

محمود قلع هدومه و استحمى و لبس جلابيه عم سعد و قعد على السرير يحاول يفتكر اى حاجه ...طب حتى اسمه؟؟ او مين جابه هنا ؟؟ مش قادر يفتكر

عزيزه دخلت حطت الاكل قدامه 

اتفضل لقمه كدا على ما قسم ...بس بكرا ان شاء الله هجيب فراخ و اعملك شوربه لسان عصفور عشان الدم اللى نزل منك 

كتر خيرك ...متتعبيش نفسك 

و لا تعب و لا حاجه ....لسه مفتكرتش حاجه ؟؟

لا و الله ...عمال احاول افتكر بس مش قادر

خلاص متتعبش نفسك خد علاجك بس واستريح و انت هتبقى عال و هتفتكر كل حاجه أن شاء الله الدكتور قالنا كدا

يا رب ...انا برده عاوز ارجع لاهلى علشان متقلش عليكم اكتر من كدا 

طب بقولك ايه فين الهدوم اللى انت قلعتها ندور فيها يمكن نلاقى اى حاجه تدل على شخصيتك أو سكنك 

اهى هناك اهى رميتها لانك شايفه اد ايه الهدوم مقطعه و معدتش تنفع تتلبس 

طيب هقوم اجيبها و ادور فيها يارب الاقى حاجه 

عزيزه قامت جابت القميص و البنطلون بتوع محمود و طبعا القميص كان فاضى خالص مفيهوش اى ورق 

حطته على جنب و قعدت تدور فى جيوب البنطلون الجينز برده ملقتش اى حاجه ....بس و هى بترمى البنطلون من أيدها لمحت الجيب الصغير اللى فى البنطلون و قالت يمكن الاقى فيه حاجه 

عزيزه مسكت البنطلون تانى و دخلت صابعها فى الجيب لقت ورقه 

طلعت الورقه و هى فرحانه ....لقت رقم تليفون مكتوب جنبه استاذ علوى

بص كدا يا ااااا ...انا مش عارفه اناديلك بايه؟؟ بص انا هسميك يوسف مؤقتا على ما نعرف اسمك 

ماشي يوسف يوسف بس اشمعنى يوسف يعنى

اصل سيدنا يوسف اترمى فى البير من غير ذنب عمله و انت اترميت فى قبر و بيتهيالى برده انك معملتش حاجه شكلك راجل طيب و ابن حلال 

ربنا يكرم اصلك يا اختى 

بص كدا يا يوسف الرقم ده ...مكتوب عليه استاذ علوى ...الرقم مبيفكركش بحاجه؟؟ أو الاسم ده ؟؟

محمود اخد الرقم من ايد عزيزه و بص له كدا و هز رأسه لا مش عارف 

طب خلاص ...الصبح نتصل على الرقم و نسأله يمكن يعرفك أو يدينا اى معلومه عنك 

ياريت ....من بقك لباب السما يارب 

يلا خد دواك دلوقتى و نام و ارتاح و الصبح بمشيئه الله هنعرف الرقم ده حكايته ايه ؟

تانى يوم الصبح عزيزه عملت الفطار لمحمود و دخلت عليه هى و عم سعد 

ازيك يا يوسف يا ابنى عامل ايه دلوقتى ؟؟

الحمد لله يا عم سعد بخير ...بس الصداع مبيسبش دماغى 

معلش يا ابنى الخبطه اللى اخدتها على راسك برده مش سهله ...و اكيد بالعلاج هتبقى كويس اوى باذن الله 

يارب يا عم سعد .....و الليله اللى قضتها فى القبر كمان كل ما افتكرها شعر راسي يقف ....حاجه صعبه اوى يا عم سعد و احساس ميتوصفش 

ردت عزيزه صحيح يا يوسف مشفتش عفاريت و الا حاجه جوه ؟؟

لا عفاريت لأ  مشفتش بس حسيت بحاجات بتمشي حواليا كنت سامع الصوت بس طبعا مش شايف اى حاجه ...الدنيا كانت كحل ....بس الرعب اللى كنت فيه مكنش يتقدر....كنت عمال افكر لو محدش سمعنى و طلعنى هعمل ايه ؟؟ هموت هنا بالبطئ ...هتتعذب روحى فى كل لحظه لغايه ما تطلع 

قعدت احسس لغايه ما ايدى جت على حجر مسكته و قعدت اخبط بيه لأن ايدى وجعتنى من كتر الخبط على باب المقبره الخرسانى ....

و اول ما الصبح طلع عرفت ...لانى لقيت بصيص صغير جدا من ضوء نازل ...فاتجدد الامل عندى تانى إن ممكن حد يسمعنى و يساعدنى ....مسكت الحجر و بقيت اخبط 😔

اااه هو انت اللى كنت عمال تخبط دا انا افتكرت أن دا صوت تكسير مقبره الاستاذ مدحت 

هنا عم سعد افتكر حكايه المقبره بتاعه الاستاذ مدحت و أنه لازم يروح يشوف سليم عمل ايه و خلص و الا لسه 

طب انا هروح يا ابنى اشوف عمك سليم خلص الشغل و الا لسه نص ساعه و هجيلك 

طب يا أبا هات موبيلك نتصل ع الرقم اللى قلت لك لقناه فى جيب يوسف ...يمكن نعرف اى حاجه عنه 

هتتصلى دلوقتى يا عزيزه ؟؟ الساعه سبعه الصبح يا بنتى ...يمكن الراجل نايم ....بصى هروح اشوف عمك سليم خلص و الا لأ و اجى على طول و نتصل بالراجل

طيب يا أبا تحت امرك😏 ...و لو انى هفضل على نار ...دا انا ما صدقت النهار طلع علشان اعرف مين علوى دا ؟

انتى كدا دايما يا عزيزه ....مستعجله على طول 🤨

طبعا يا حاج الوقت كالسيف إن لم تقطعه قطعك 😂

طيب يا عزيزه هروح نص ساعه و اجيلك على طول تقطعيه زى ما انتى عاوزه 😂😂😂

و انا خارجه معاك اهو هروح اشغل نفسي فى اى حاجه كدا فى الاوضه على ما تيجى

اقعد انت يا يوسف افطر بقا و خد دواك على ما اجيلك انا و ابويا و نشوف الحكايه دى

يا ترى هيحصل ايه بعد كدا ؟؟ و هل الرقم اللى معاهم ده هيوصلهم لحاجه ؟؟؟🤔🤔🤔🤔

دا اللى هنعرفه فى الجزء التالت 

يتبع ......🤔

#د.جيهان_عادل🌹

#حكاية_محمود

#الجزء_الثالث

بعد شويه جه عم سعد و نادى على عزيزه 

يلا يا عزيزه هاتى الرقم و تعالى نشوف يوسف 

حاضر يا أبا ...انا جايه اهوو

يلا يا أبا خد الرقم اهو ...

طب ملينى الرقم ...... يا بنتى الرقم مقفول 

طب حاول تانى يا أبا

حاضر ....مقفول يا بنتى

يا  خساره ...كان عندى امل نعرف منه اى حاجه 

متتعبوش نفسكم يا جماعه انا اول ما اشم نفسي همشي على طول ...مش عايز اتقل عليكم اكتر من كدا

لا عيب عليك ...متقولش كدا يا ابنى ...انت هتفضل هنا معانا لغايه ما نوصلك لأهلك

ربنا يخليك يا عم سعد ...بس انا مقدرش اقعد كدا من غير شغل....... ..انا لازم ادور على اى شغل ...

خلاص لو عايز تشتغل معايا و متبقاش خايف من الشغلانه تعالى 

لا اخاف من ايه ؟؟ ياريت و الله 

طب خلاص من بكرا تنزل معايا 

طب ممكن اعرف طبيعه الشغل يعنى بنعمل ايه؟؟

مفيش حاجه صعبه بنجهز الشغل نحضر المقبره نفتحها و نرش ميه قدامها و نجهز المنامه لو فى جثه و الا حاجه بنحطها فى جنب و لما الجثه الجديده بتيجى بننزل بيها و نفكك عنها و نريحها بعد كدا بنطلع و نقفل عليها 

طب دى شغلانه سهله اوى يا عم سعد

سهله بس امانه يا ابنى و فى ناس كتير بتخاف من شغلانه الحانوتى دى 

ليه بس الناس تخاف من ايه ؟؟ دى حتى شغلانه كلها عظه و تذكره بالاخره و بعدين لو كل الناس خافوا منها مين هيدفنهم ؟؟

هنا ردت عزيزه ...يبقى خلاص هتنزل الشغل من بكرا

تانى يوم كان جاى جنازه و عم سعد طلب من يوسف أنه يجهز الحوش

يوسف شمر دراعه و بدأ يرش الميه و يفتح باب المقبره 

عزيزه دخلت عليه و شافته و هو لابس الجلابيه و عضلاته اديه باينه و لاحظت قوته و هو بيرفع غطا المقبره مقارنة بابوها الراجل العجوز و اعجبت بيه اوى 

عزيزه راحت اوضتها و بقت تكلم نفسها ....انتى اتجننتى يا عزيزه ؟؟ ازاى تعجبى بيه و انتى متعرفيش عنه اى حاجه ؟؟ ما يمكن يكون متجوز  و عنده عيال ؟؟يمكن يكون له حبيبه مستنياه ؟؟ يمكن يكون مش فى دماغه الحب و الكلام ده....يا بت اتهدى و اقعدى ...الواد اه حليوه شعره ناعم و جميل لونه خمرى عنيه سودا دمه خفيف بس دا ميخلكيش تعجبى بيه كدا ؟؟ لا اختشي على دمك 

هنا عم سعد قطع تفكير عزيزه و هو بيقولها 

بت يا عزيزه ....واقفه تكلمى نفسك ليه يا هبله ؟؟

عزيزه اضطربت اوى و قالت مفيش يا أبا ....مفيش حاجه

طب يلا يا بنتى اعمليلنا الغدا بسرعه ...يوسف قرب يخلص

يعنى يوسف نفعك فى الشغلانه دى يا أبا ؟؟

اوى يا عزيزه ...انا يا بنتى كبرت و ربنا مرزقنيش بولد يساعدنى و يوسف بقى زى ابنى بالظبط ...بس يا خوفى لما ترجعله الذاكره و ساعتها ميعرفناش 😔

سيبها على الله يا ابا 

مر شهر على شغل يوسف مع عم سعد عزيزه كانت بتحبه كل يوم عن يوم من شهامته و أخلاقه العاليه 

و فى يوم بعد ما الشغل خلص يوسف كان تعبان اوى ...يوسف افتكر نمرة التليفون اللى عزيزه لقتها فى جيبه ...فقال لعزيزه

ما تجيبي الرقم بتاع الاستاذ علوى يا عزيزه نحاول نتصل بيه يمكن فتح تليفونه ؟؟؟

هنا قلب عزيزه ارتجف و خافت أن يوسف يمشي و يسبهم 

قالت له مش عارفه راحت فين يا يوسف ؟؟

هنا دخل عم سعد ...هى ايه دى يا عزيزه ؟؟

رد يوسف و قال نمرة تليفون استاذ علوى 

اااه معايا اهى كنت حفظتها على التليفون 

هنا عزيزه كزت على أسنانها و كانت متغاظه من ابوها اوى

طب رن كدا يا عم سعد

حاضر يا ابنى ......ايه دا دا بترن 😲

كويس يارب يرد يارب

الو ...استاذ علوى 

ايوه يا فندم اؤمرنى 

الأمر لله كنت عاوز اسالك عن واحد جالنا من فتره فاقد الذاكره و لما فتشنا فى جيبه لقينا رقم تليفون حضرتك دا 

طب و انا هعرف الشخص اللى بتتكلم عنه دا ازاى ؟؟

معلش انا عارف انها حاجه غريبه بس انت املنا الوحيد ....هل فى فى الحقيقه مجال معارفك تعرف حد اختفى من شهر كدا ؟؟

لأ ...و بعدين انا معارفى كتير اوى و مش معقوله هعرف كل حاجه عن كل الناس

طب معلش انا اسف هو حضرتك بتشتغل ايه ؟؟ 

انا موظف فى بنك 

طب ممكن اطلب منك طلب اخير ...و معلش سامحنى

اتفضل تحت امرك 

ممكن نيجى لحضرتك انا و الشخص دا يمكن تتعرف عليه و تقولنا مين دا ؟؟

تحت امرك ...انا شغال فى البنك العربى فرع الدقى اتفضل و هاته يمكن اعرف اساعد 

متشكر اوى يا استاذ علوى ربنا يجازيك خير يارب

قفل عم سعد و هو فرحان أنه هيقدر يساعد يوسف زى ما يوسف بيساعده و قاله بكرا يا ابنى بمشيئه الرحمن نروحله تانى يوم عم سعد اخد يوسف و عزيزه و راحوا البنك ....و دخلوا سألوا على الاستاذ علوى 

وصلوا مكتبه....و اول ما علوى شافهم قال

اهلا استاذ محمود عامل ايه ؟؟ و ايه اللى ملبسك جلابيه كدا 😂

يا ترى ايه اللى هيحصل بعد ما سعد و عزيزه  عرفوا اسم محمود الحقيقى 🤔🤔🤔

دا اللى هنعرفه فى الجزء الجاى باذن الله 

يتبع .....🤨

🌹🌹🌹🌹اسفه على التأخير عندى ظروف و يمكن اقصر شويه فى نشر الاجزاء ارجوكم سامحوني🌹🌹🌹🌹

#د.جيهان_عادل🥰

.#حكاية_محمود

#الجزء_الرابع

تانى يوم عم سعد اخد يوسف و عزيزه و راحوا البنك ....و دخلوا سألوا على الاستاذ علوى 

وصلوا مكتبه....و اول ما علوى شافهم قال

اهلا استاذ محمود عامل ايه ؟؟ و ايه اللى ملبسك جلابيه كدا 😂

هو انت تعرفني ؟؟

اه طبعا اعرفك...ليه هو انت مش استاذ محمود ناجى ؟؟

هنا رد عم سعد ...ما هو دا اللى جايين لحضرتك عشانه يا استاذ علوى ..احنا اللى كلمنا حضرتك امبارح و قلنا لك أن معانا جدع فاقد الذاكره ...و انت اهو بتقولنا أنه محمود يعنى تعرفه كويس 

ايوه اعرفه دا عميل عندنا فى البنك هنا بقاله سنين 

طب حضرتك ممكن تدلنا على اى بيانات من بياناته ...يعنى سكنه أهله اى حاجه ؟؟

لا انا معرفوش معرفه شخصيه ....هو مجرد عميل فى البنك كنت بشوفه و بتعامل معاه عادى 

يعنى ممكن نتطلع على حسابه ؟؟

اه طبعا بس لازم البطاقه 

ما احنا قلنالك يا ابنى احنا ممعناش اى ورق و لا حاجه تدل على شخصيته

طب يبقى انا مقدرش اخدمكم بأى حاجه و لا اطلع لكم اى بيانات انا اسف 

يا استاذ علوى دى حاله انسانيه ...من فضلك 

طيب انا ممكن اعمل لكم حاجه كدا بس بصفه وديه و ارجوكم متطلبوش منى اى حاجه تانيه 

رد محمود ...تمام ياريت  ؟؟؟ 

انا ممكن اجيب لك بيانات بطاقتك الشخصيه من الملف بتاعك عندى بس ارجوك محدش يعرف لانكم كدا ممكن تضرونى جدا 

لا متخافش و الله ...حضرتك بتساعدنى و عمرى فى حياتى ما احاول اضرك

طب ثوانى من فضلكم 

كل دا و عزيزه واقفه عينها فيها دموع ...طبعا كان نفسها محمود يعرف مين هو ....بس فى نفس الوقت هى بتحب يوسف و خايفه يبعد عنها ... خايفه يكون له زوجه و اولاد

هى كتير فكرت فى دا لكن عقلها دايما كان بيخليها تنسي أو بمعنى أصح تتناسي إنه اكيد له حياه تانيه 

كمان جه فى دماغها حاجه تانيه 

علوى دا بيقول أن محمود عميل فى البنك ...يعنى معاه فلوس ...و هى بنت فقيره غلبانه عايشه مع ابوها الحانوتى فى الترب ...يعنى من رابع المستحيلات أنه يبص لها و الا  حتى يفكر فيها 😔

طب هعيش ازاى من غير ما اشوفه ......بالرغم أنه عاش معانا شهر واحد بس خلاص حاسه أنه بقى من دمى ...حاسه انى هموت لو مشفتوش تانى ...ياريتنى ما كنت سمعتك و لا شفتك يا محمود 

ما هو انتى اللى غلطانه برده يا بت ..ازاى تتخيلى انك يا ام ثانويه عامه ...يعنى ممعكيش شهاده اصلا واحد زى محمود دا يبص لك .....شكله كان باين عليه أنه ابن ناس من الاول ....بس انا كدبت احساسي

كل دا عزيزه واقفه تفكر فيه ...قطع تفكيرها دا صوت الاستاذ علوى و هو بيقولهم بصوت واطي 

اتفضلوا البيانات اهى بس انا مدتكوش حاجه

طبعا طبعا اشكرك جدا  استاذ علوى

خرج محمود و عم سعد و عزيزه ...كل واحد منهم فى حال 

عزيزه عماله تفكر أن بعد ثوانى هيجى الفراق ..و معدتش هتشوف حبيبها

عم سعد عمال يفكر أنه هيرجع للشقى تانى بعد ما محمود كان  بيشتغل معاه ومريحه 

محمود كان فرحان أنه بعد ثوانى هيعرف مين هو و بيته فين و أهله مين ؟

اول ما طلعوا من باب البنك ...محمود فتح الورقه 

محمود ناجى ابراهيم 

مهندس مدنى

٥ شارع التحرير الدقى - الدور الثامن - شقه ٨٨

رقم التليفون 01234589679

طبعا اول ما محمود قرأ البيانات بصوت عالى عزيزه بقت الدموع تنزل من عنيها زى المطره

عم سعد شافها كدا و سألها بتعيطى ليه يا عزيزه يا بنتى 

دى دموع الفرح يا أبا ...محمود ابن حلال و يستاهل كل خير ...و انا فرحناله اوى يا أبا 🥺

طب يلا يا جماعه نروح على العنوان اللى مكتوب فى الورقه 

هنا صرخت عزيزه لااااا مش هينفع يا باشمهندس ...مش هينفع نروح معاك 

ليه يا عزيزه ؟؟ امال هتسوبونى لوحدى اروح هناك افرضى مطلعتش انا محمود ده ....

و افرض طلعت انت ؟؟؟ هيكون منظرنا احنا ايه يا بشمهندس ؟؟؟

فى ايه يا عزيزه ايه بشمهندس اللى مسكالى فيها دى ؟

هى مش دى الحقيقه يا بشمهندس و الا بقول حاجه غلط؟

بس يا عزيزه يا بنتى محمود عنده حق مفروض منسبوش لوحده 

خلاص يا أبا روح معاه انت انا هروح ...انا مليش لازمه اصلا فى المشوار ده 

طيب يا بنتى اتكلى على الله روحى انتى و انا هروح مع محمود اشوف الكلام اللى فى الورقه دا صح و الا غلط ؟

حاضر يا أبا 

محمود سلم على عزيزه و هى ماسكه نفسها بالعافيه من الدموع 

عزيزه مشيت و بقت تعيط مش قادره تسيطر على دموعها و عماله تلوم فى نفسها انها سمحت لروحها تحب حد مش من حقها 😔

محمود و عم سعد اتمشوا لغايه ما وصلوا المكان 

اول ما وصلوا عند البرج ..البواب عرف محمود 

و قاله حمدالله ع السلامه يا استاذ محمود كنت فين الفتره دى كلها ...دى الحاجه و المدام قلبوا على حضرتك الدنيا 

محمود ابتسم للبواب و طبطب على كتفه و طلع هو و عم سعد ركبوا الاسانسير سوا 

كل ما الاسانسير يطلع دور قلب محمود يدق بشده ...يا ترى هطلع انا محمود و الا انا واحد شبهه بس

بس انا حاسس انى شفت المكان ده قبل كدا ...

عم سعد بقا كان بيفكر فى حاجه تانيه خالص ...كان عمال يفكر فى الابهه اللى شايفها و العماره و الا البرج الفخم اوى دا ...و كان عمال يقول لنفسه اكيد محمود دا ابن ناس اوى ...يا سبحان الله و انا اللى كنت بشغله معايا تربى 😂

محمود و عم سعد وصلوا الدور الثامن و الشقه ٨٨ 

محمود حط ايده على الجرس و استنى 

سمع صوت اقدام بتقرب من الباب 

فتحت ست كبيره فى السن لابسه عبايه سمرا و طرحه سمرا 

اول ما شافت محمود صرخت و اخدته فى حضنها

محمووووود ابنى حبيبي حمدالله على سلامتك يا حبيبي....الحمد لله انى شفتك قبل ما اموت ....كنت متاكده أنى هشوفك و اخدك فى حضنى تانى.... حبيبي يا ابنى ....يا هنااااااء يا هناااء تعالى بسرعه محمود رجع 

خرجت شابه فى العشرينات من عمرها شعرها ناعم رابطاه ديل حصان لابسه بيجامه لونها لبنى حاطه مونيكير احمر فاتح ، روج خفيف ...اول ما جت و شافت محمود اغمى عليها

طبعا محمود كان واقف و مش عارف يعمل ايه و مش عارف دى تقربله ايه 

بيضرب بعينه كدا على الحيطه لقى صوره كبيره له و البنت دى عروسه و هو  عريس 

طبعا فهم أنها مراته ...صور تانيه على الحيطه له  لوحده و صور مع أمه و مراته و صور مع أصحابه

محمود اول ما شاف الصور بدأت الدنيا تلف بيه و بدا يشوف قدام عنيه صور و مواقف افتكرها و فجاه وقع مغمى عليه 

ام محمود مكنتش عارفه تفوق مين و تسيب مين🤔🙄🙄🥺🥺

يا ترى هيحصل ايه بعد كدا ؟؟ و هل محمود هيفتكر مين عمل فيه كدا ؟؟ دا اللى هنعرفه فى الجزء الجاى 😉

يتبع .......🥺

#د.جيهان_عادل🥰🌹🌹

#حكاية_محمود

#الجزء_الخامس

محمود اول ما شاف الصور بدأت الدنيا تلف بيه و بدا يشوف قدام عنيه صور و مواقف افتكرها و فجاه وقع مغمى عليه 

ام محمود مكنتش عارفه تفوق مين و تسيب مين🤔🙄🙄🥺🥺

عم سعد قعد يفوق فى محمود و الحاجه ام محمود دخلت جرى جابت برفان و قعدت ترش على هناء و محمود 

محمود فتح عينه و حس ان الدنيا بتلف لسه فى دماغه ...دوخه رهيبه مسك دماغه و حطها بين اديه 

هناء بقا اول ما فتحت عينها قالت 

انت مش محمود ...ايه اللى انت لابسه دا 

ام محمود بصت لها كدا باستغراب ...انتى بتقولى ايه يا بنتى ...انتى اتهبلتى 

انتى مش شايفه لبسه و شكله عامل ازاى ؟؟ دا اكيد نصاب 

هو انا يا هناء مش هعرف ابنى ؟؟ انتى بتقولى ايه ؟؟

اهو قدامك اهو ..طب اساليه عن اى حاجه اى تاريخ يعرفه ...و الا بلاش هساله انا ...فاكر تاريخ جوازنا ؟؟

محمود رفع دماغه و حاول يعصر تفكيره ...هو اه ابتدى يفتكر بس لسه مش كل المعلومات حاضره فى دماغه

هناء كررت السؤال تانى بس بشكل اكتر حده ...ما تنطق ايه هو تاريخ جوازنا ؟؟ طبعا مش عارف و لا هتعرف لانك اصلا مش محمود ....اتفضل اطلع بره لجيب لك البوليس دلوقتى 

كل ده و محمود بيبص لها و مش عارف ايه سر الهجوم الشديد ده عليه ...هى بتتكلم كدا ليه ؟؟

هنا ام محمود زعقت فيها و قالت لها اخرسى انتى ...دا ابنى ...انتى يدوب اتجوزتيه شهرين هتعرفيه منين ؟؟ انا عارفه جابك منين اصلا انا مكنتش موافقه على الجوازه السودا دى 

بقولك ايه يا حماتى ....انتى كبرتى و خرفتى ..بقولك دا مش ممكن يكون محمود ابدا ..انتى بس اللى نفسك تلاقى ابنك و عماله تنشرى صوره فى الجرايد و تعمليلى فى مكافئات طمعتى اللى يسوى و اللى ميسواش فينا و خلتينا كل شويه تحت رحمة النصابين و الحراميه

هو انتى مش شايفه شكله و شايفه الراجل اللى معاه عامل ازاى ؟؟

 هنا رد عم سعد و ليه الغلط بس يا استاذه هو انا عملت لكم ايه بس ...؟؟

 ‏ماانت من شلة الحراميه اللى جايه تنصب علينا 

 ‏اخرسى بقا ...متتكلميش خالص   ....كنت فين يا ابنى طول الفتره دى ؟؟و ايه اللبس الغريب اللى انت لابسه دا ؟

 ‏انا كنت عايش فى المقابر يا امى و الراجل الطيب دا هو اللى انقذ حياتى بعد ما خرجنى من المقبره اللى كنت مدفون حى فيها 

 ‏ايه ؟؟🥺🥺 مدفون ازاى يا ابنى و مين عمل فيك كدا ؟؟

 ‏منا فقدت الذاكره من الضربه اللى اخدتها على دماغى و مش قادر افتكر مين عمل فى كدا

 ‏يا حبيبي يا ابنى 

هنا ردت هناء بسرعه... ‏يا سلام فقدت الذاكره و مش فاكر اى حاجه و جيت هنا ازاى ؟؟

انا مش عارف انتى ليه مصره انى نصاب ؟؟ و ليه عماله تشككى فى كلامى 

عشان انت فعلا نصاب و كل كلامك كدب 

قلت اسكتى يا هناء ...كمل يا محمود يا ابنى 

انا بعد ما الراجل الطيب ده خرجنى من القبر اخدنى على المستشفى و هناك خيطولى الجرح و قالوا إن عندى فقدان ذاكره مؤقت نتيجه الضربه و بعد كدا البنطلون اللى كنت لابسه كان فاضى نهائى من اى حاجه الا نمرة تليفون كانت فى جيبي الصغير اخدناها و رنينا عليها لكن للاسف الرقم كان مقفول فتره كبيره...و لما الرقم فتح عرفنا أنه محاسب فى بنك رحناله و عرفنى على طول و ادانى ورقه بالبيانات بتاعتى بشكل ودى كدا 

هنا وقفت هناء و قالت اااااه زى ما قلت نصابين و انا بقا هودى المحاسب اللى اداك العنوان ده فى داهيه ....هو اى واحد يروحله يديله بيانات جوزى ...انت و لا معاك ورق و لا معاك بطاقه و لا اى حاجه تدلنا على أنك محمود 

هنا ردت الأم : قلبى هو اللى بيقولى أن ده ابنى حبيبي ضنايا ...كمل يا ابنى

مفيش يا امى انا فعلا لغايه ما جيت هنا مكنتش فاكر اى حاجه بس لما دخلت البيت ابتدت تيجى قدام نظرى صور و حاجات بس مشوشه برده 

حبيبي يا محمود انا هوديك لأكبر دكتور مخ و اعصاب و دكتور امراض نفسيه و عصبيه اكيد الفتره اللى عدت عليك دى كانت صعبه اوى

و انت يا ابنى كنت بتاكل و تشرب ازاى ؟ و ساكن فين ؟

الراجل الطيب دا يا امى شغلنى معاه و هو ميعرفنيش و سكنى جنبه فى اوضه بتاعته و كانت بنته بتعملى اكلى و تغسلى هدومى ...حتى هدومى اللى لابسها دى هدومه هو ادهالى استر بيها جسمى بعد ما هدومى اتقطعت 

هنا ردت هناء بصوت اكتر حده : يا سلام على الفيلم الهندى اللى المفروض نصدقه احنا بقا ؟؟ انا هبلغ البوليس يا لصوص يا نوّر 

قلت اخرسى يا اما تمشي بره مش عاوزه اسمع صوتك

بتطردينى عشان النصابين دول ..انا همشي و ان شالله يسرقوكى

غورى ...داهيه لا ترجعك ...انا عارفه انت جبتلنا البلوى دى منين  يا ابنى ؟؟؟

محمود بص لها و معرفش يرد عليها 

ام محمود بصت لهم سعد و قالت له متشكرين اوى يا حاج و الله ما عارفه نودى جمايلك دى فين ...اللى عملته مع ابنى ميعملوش حد

يا ستى دا واجب و اى حد مكانى هيعمل كدا و اكتر 

ربنا يجازيك خير يا رب 

طيب يا محمود يا ابنى استأذن انا 

لا و الله ما انت ماشي الا اما تتغدى معانا 

لا و الله يا حاجه مينفعش 

لأ انا حلفت هتتغدى معانا يعنى هتتغدى معانا ...بقا انت متسبش ابنى و انا اسيبك ؟ دقايق و هجيب الاكل 

ام محمود دخلت جهزت سفره طويله مكرونه بشاميل فراخ مشويه ملوخيه و بانيه طاجن باميه باللحمه الضانى

عم سعد لما شاف الاكل فرح فى نفسه اوى و بقا ياكل و هو فرحان 😋😋😋

الحاجه ام محمود قالت له لازم تجيب المحروسه بنتك الجمعه الجايه تتغدوا معانا علشان اشكرها بنفسي 

حاضر يا حاجه انا و بنتى تحت امرك 

استاذنكم بقا لانى اتاخرت على عزيزه زمانها قلقانه على و على محمود 

سلملى عليها اوى يا حاج لغايه ما اشوفها

من عنيا يا حاجه ...سلام عليكم

و عليكم السلام ورحمه الله وبركاته

خرج عم سعد و ام محمود قعدت جنب ابنها تحضن فيه و تبوسه و تقوله وحشتنى اوى يا حبيب قلبي....انت كنت بتشتغل ايه مع الراجل الطيب دا؟؟ 

محمود ضحك و قالها كنت بشتغل معاه تربى 😂

ايه ؟؟؟ تربى ازاى ؟؟ 

 و ايه يعنى يا امى دا دى اكتر شغلانه فيها عظه و قرب من ربنا ... الشغله دى صاحبها بيشوف الإنسان و هو فى أضعف حالاته لا بيقدر يشيل رجل و لا يحط ايد ...شغله فى امانه شديده لأن التربى دا بيبقى مؤتمن على جثمان لا حيلة له ...جثمان نزعت حياته و بقى عديم الحيله 

 ‏كمان التربى دا بيبقى قدامه فرص كتير أنه يتغنى جدا ببيع الجثث و قطع غيار الاعضاء و مساعدة السحره فى وضع  الاعمال و السحر ... لكن التربى الشريف اللى زى عم سعد ده عمره ما يعمل كدا و بيحافظ على جثه الميت كأنه واحد من أهله

 ‏عندك حق يا ابنى بس دى شغلانه مقبضه اوى 

 ‏و لا مقبضه و لا حاجه و خاصة لما بت ليله بحالها جوه تربه و حسيت اد ايه الانسان دا ضعيف و أن مفيش حاجه فى الدنيا تستاهل انسان يعمل كدا فى اخوه الإنسان 

 ‏عندك حق يا ابنى...قوم يلا غير هدومك و استحمى علشان تستريح و بكرا نروح للدكتور

 ‏حاضر يا امى 

 ‏قام محمود و أتوجه مباشرة لاوضته بالرغم أن فى تلات ابواب لغرف جنب بعض 

 ‏امه ابتسمت و قالت فى نفسها لا و مراته الهبله تقول مش هو ...جتها خيبه...دا ابنى و انا متاكده أنه ابنى 😍

 ‏عايزين تعرفوا حصل ايه بعد كدا ؟؟ استنونى فى الجزء الجاى باذن الله 😘😘😘

يتبع .....😍

#د.جيهان_عادل

#حكاية_محمود

#الجزء_السادس

محمود اول ما دخل اوضته ...لقى اوضه نوم فاخره جديده عليها مفرش عروسه لقى صوره بالحجم الكبير متعلقه فوق السرير 

محمود فتح دولابه لقى هدومه مكويه و مرصوصه اخد بيجامه علشان يستحمى و يغير هدومه

محمود دخل الحمام الملحق بالاوضه و ملى البانيو بالميه السخنه و قعد يفكر ....و يحاول يعصر تفكيره ....هو بيشوف قدام عينه صور و مواقف بس مش قادر يربطها ببعض أو مش قادر يرتبها ....تسلسل الأحداث عنده مش موجود ...كل ما يحاول يلاقى المواقف و الصور بتهرب منه ....تركيزه مش جايبه

محمود اخد نفس عميق و غمض عنيه و نزل تحت الميه 

جت قدام عينه لقطه أن اربعه واقفين حواليه و بيضربوا فيه بلا رحمه و هو متمسك بشنطه سودا حاضنها بأديه الاتنين ...لغايه ما اخد ضربه جامده على رأسه..و.....

مش قادر يفتكر ايه اللى حصل بعد كدا 

محمود خرج من تحت الميه و هو بيتنفس بصوت عالى 

ايه اللى حصل معايا ...مين دول صورهم مش واضحه قدام عنيا و ايه الشنطه اللى كانت معايا دى ؟؟

انا تعبت من التفكير و حاسس بصداع جامد 

محمود قام لبس هدومه و اترمى على سريره و كأنه بقاله سنه مشفش النوم 

فى نفس الوقت ده كان عم سعد وصل عند عزيزه و اول ما دخل عليها من غير محمود عرفت على طول أن محمود رجع لأهله ...بس كان نفسها تعرف اجابه سؤال واحد 

هل محمود متجوز ؟؟؟

عم سعد قعد يحكى لعزيزه و يقولها أن محمود ده طلع ابن ناس اوى و ساكن فى عماره ابهه و امه ست كدا شكلها هانم من بتوع زمان و اتغدى عندهم غدوه ملوكى ...أما مراته بقا اعوذ بالله عليها ست وحشه اوى

عزيزه همست لنفسها محمود طلع متجوز 😔

مالك يا عزيزه سرحانه فى ايه؟؟

مفيش يا أبا ...فرحناله اوى محمود يستاهل كل خير 

اه صحيح الست والدته عزمانا الجمعه الجايه انا و انتى على الغدا لأنها نفسها تشوفك و تشكرك بنفسها 

لا يا أبا انا مش رايحه فى حته ....و محمود ده لازم ننسي أننا عرفناه اصلا 

ليه كدا يا بنتى ؟؟ 

كدا و خلاص يا أبا الناس دى مش من توبنا و لا احنا من توبهم ...و احنا مش هنروح نشحت منهم يا أبا 😔

صحى محمود تانى يوم العصر لقى امه محضره له الغدا و قاعده مستنياه

انا مرضتش اصحيك و سبتك تنام براحتك باين عليك كنت تعبان اوى ... بس كل شويه كنت بدخل ابص عليك ...ملامحك وحشانى اوى 

حبيبتى يا امى 

انا اتصلت حجزت مع الدكتور و ميعادنا معاه الساعه سبعه مساءا 

كويس يا امى ...لان الصور و المواقف من لحظه ما دخلت الشقه بتيجى قدام عينى بس مش قادر اربطها ببعض و محتاج الدكتور يساعدنى 

بس كنت عاوز اعرف كل حاجه عن شغلى و ازاى اتجوزت مراتى دى  ؟؟؟

شغلك يا ابنى...انت عندك شركه مقاولات عملتها مع هشام صاحبك من خمس سنين ....كانت فى الاول شركه صغيره كدا و انت كان ليك ٧٠ ٪ من اسهم الشركه و هشام ٣٠ ٪

حتى بعد اختفائك رحت له و حبيت اعرف منه هنعمل ايه و احافظ على مالك لحد ما ترجع ...مرضيش يقابلنى و بقا يتهرب منى و يقول للسكرتيره تقولى انه مش موجود 

حاولت كتير يا ابنى بس معرفتش اخد منه حق و لا باطل خاصة أنه كان عامل معاك مشاكل فى الفتره الاخيره و كنت عرفت منك انك عاوز تفض الشراكه اللى ما بينكم بقالك سنه و هو عمال يماطل معاك و يتهرب منك 

بس قبل اختفائك بأيام اعرف انك كنت مقدم على قرض كبير علشان مناقصه وزاره الزراعه اللى رسيت عليك و ساعتها زادت الخلافات بينك و بين هشام اكتر لانك كنت عاوز تاخد القرض باسم الشركه و هو مكنش راضى و ساعتها انت اخدت القرض باسمك انت بضمان عماره الجيزه و بعدها اختفيت قعدت ارن عليك تليفونك اتقفل ...نزلت دورت فى المستشفيات و  و الاقسام والمشرحه ....بس كان قلبى بيقولى انى هشوفك تانى بالرغم أن مراتك كانت دايما تتكلم عليك بطريقه مش كويسه خالص بس انا كنت بزعق لها 

بطريقه مش كويسه ازاى يعنى ؟؟؟ 

يعنى كانت بتقول انك عينك زايغه و اكيد لقت لك واحده اخدت الفلوس و هربت بيها و سافرت معاها و انا اقولها انتى بتتكلمى ازاى ؟؟ ابنى انا عينه زايغه ؟؟ هو انتى مجنونه ؟؟

ترد تقولى يبقى انتى اكيد عارفه هو راح فين و مش عاوزه تقولى و عماله تعملى علينا افلام انتى و ابنك 

يا بنتى انتى مجنونه ؟؟ هعمل افلام ليه ؟؟ و هدور عليه ليه و انا عارفه مكانه ؟؟

ترد تقولى انا عارفالك اصلكم بتوع حوارات ...و عاوزين تخلعوا بالفلوس بصنعه رواقه

عيب عليكى تتكلمى بالاسلوب ده ؟؟ انا عارفه جابك لنا من أنهى حته ؟؟

اه صحيح يا امى ..انا عرفت هناء دى ازاى ؟؟

انا عارفه يا ابنى سحرت لك و الا عملت ايه ؟؟ قبل ما تختفى بتلات شهور لقيتك داخل على بيها و بتقولى عاوز اتجوزها و لما سالتك دى مين قلت لى انك قابلتها فى اسكندريه كانت نازله فى نفس الفندق اللى انت نازل فيه و انكم اتعرفتم هناك و هتتجوزوا معايا لحد ما توضب لها شقة مصر الجديده 

و لما سالتك عن أهلها قلت لى أن أهلها كلهم بره و هى كانت متجوزه و اتطلقت ...بس صراحه عمرى ما استريحت لها من اول ما دخلت على حسيت كدا انها بتلعب بالكوره و الحجر 

و فعلا اتجوزتها فى خلال أيام ....و بانت من اولها طباعها غير طباعنا و اخلاقها غير أخلاقنا ...ضحكتها دايما عاليه جريئة ووشها مكشوف كدا مبتختشيش و لا عندها حياء كدا زينا 

كانت دايما تضايقنى بكلامها بس مكنتش بقولك علشان بيتك ميتخربش و كنت بقول لنفسي هما كان شهر على ما توضب شقتك و تغور من عندى هنا 

لغايه ما سمعتها بتطلب منك انك نودينى دار مسنين لأنها حبت الشقه دى و نفسها تقعد فيها على طول و براحتها 

و سمعتك يومها بتتخانق معاها و بتقولها انك مش ممكن تعمل كدا فى 

و كان ساعتها هاين على ادخل اقولك خلاص يا ابنى متعملش مشكله مع مراتك ...انا هروح فى اى حته بس تكون مرتاح ...بس لاقيتها بمنتهى البجاحه بتطاول عليك و بتقولك طيب خلاص انا بقا هسيب البيت و تطلقنى مدام مش قادر تحقق لى رغبتى دى

و انت ساعتها قلت لها خلاص شوفى عاوزه ايه و انا هطلقك و هديكى كل حقوقك 

ساعتها قعدت تعيط و جرت ناعم معاك ...و انت سبتها و رحت على شغلك

الكلام دا كان امتى يا امى ؟؟

الكلام ده قبل ما تختفى بتلات ايام ...حتى ربنا يسامحنى شكيت انها تكون عملت فيك حاجه ....بس الحمد لله يا حبيبي انك رجعت لى بالف سلامه .

محمود قعد يفكر فى كل الكلام اللى والدته قالته له و حس من الكلام أن الخيانه جاياله من اقرب الناس منه 

محمود قام لبس هدومه و استعد علشان يروح للدكتور مع والدته ....علشان يفتكر اللى حصل معاه و يعرف مين اللى كان عاوز مش بس يسرقه لأ.. و يخفيه من على ضهر الأرض 😔

يا ترى هيحصل مع محمود ايه ؟؟ دا اللى هنعرفه فى الجزء الجاى 😉

يتبع.....🤔

#د.جيهان_عادل😍

#حكاية_محمود

#الجزء_السابع

محمود قعد يفكر فى كل الكلام اللى والدته قالته له و حس من الكلام أن الخيانه جاياله من اقرب الناس منه 

محمود قام لبس هدومه و استعد علشان يروح للدكتور مع والدته ....علشان يفتكر اللى حصل معاه و يعرف مين اللى كان عاوز مش بس يسرقه لأ.. و يخفيه من على ضهر الأرض 😔

محمود وصل عند الدكتور فى الميعاد و شرح للدكتور اللى حصل معاه ...و الدكتور اداله شويه ادويه و مكملات غذائيه و فيتامينات و طلب منه الراحه 

و طلب من والدته انها تفضل تحكيله عن اى ذكريات هى تعرفها عنه و كمان توريله الصور الخاصه بيه و هو صغير و تحكيله حكايه كل صوره علشان تساعده أنه يستعيد ذاكرته بسرعه 

و فعلا محمود مشي على العلاج و بدأ يستعيد ذاكرته و افتكر كل حاجه 

افتكر لما اتخانق مع هشام و راح قدم على قرض مع الاستاذ علوى و يومها طلب منه رقم التليفون علشان يتابع معاه إجراءات القرض لانه كان مستعجل عليه جدا 

بعدها الاستاذ علوى اتصل عليه و قاله أن القرض وصل 

محمود ركب عربيته و راح استلم القرض اللى قيمته اتنين مليون جنيه فى اربع شنط ..و طبعا كان معاه شنطة الاوراق الخاصه به فيها ورق المناقصه و الرسوم الهندسيه و عقود الشراكه بينه و بين هشام ...لانه كان ناوى يروح للمحامى علشان محمود يشوف طريقه قانونيه لفض الشراكه بينه و بين هشام..

محمود اخد الفلوس لانه كان متفق مع الناس أنه يدفع عرابين للحديد و الاسمنت و الطوب و الرمل و الزلط علشان يبدأ فى الشغل بسرعه ....لان موضوع المناقصه دا كان داخله تحدى بينه و بين نفسه لما هشام اتهمه أنه هيخرب الشركه بالمناقصه دى

بعد ما محمود ركب عربيته لاحظ أن فى عربيه سودا ماشيه وراه ....كل ما يدخل شارع تدخل وراه 

محمود بدأ يتوتر و يحس أن الناس دول عاوزينه و ماشيين وراه هو ...بدأ يزيد فى سرعته و يحاول الهروب منهم ...و هما كمان بداو يزيدوا سرعتهم لغايه ما بقت الأمور على المكشوف و بقوا يطاردوه و يشاوروله يقف و هو للاسف كان طلع على الطريق الصحراوى لانه كان فاكر أنه هيقدر يهرب منهم بشكل أفضل على الطريق ده

للاسف المجرمين دول بداو يزيدوا سرعتهم اكتر لحد ما عدوه و كسروا عليه و نزلوا مسلحين من العربيه اربع افراد شبه التيران و قالوله انزل من العربيه بهدوء 

محمود اول ما نزل من العربيه و كان معلق شنطه المستندات على كتفه حاول يجرى منهم لكنهم لحقوه و نزلوا فيه ضرب لحد ما اغمى عليه

طبعا بعدها اخدوا الأربع شنط معاهم و اخدوه على مخزن كبير و هناك فاق لقى نفسه متكتف و حواليه الأربع تيران دول واقفين بالرشاشات 

بيرفع دماغه لقى المفاجاه 😲😲

لقى شريكه المحترم المهندس هشام و مراته هناء 

انت يا هشام ؟؟؟ انتى يا هناء ؟؟ انا مش قادر اصدق عنيا 

رد هشام ..امال فاكر مين هيعمل فيك كدا ؟؟

و راح مقرب هناء له بدراعه كدا و قاله اقدم لك هناء مراتك و اللى ساعدتنى فى كل حاجه ...طبعا زمانك دلوقتى بتقول فى نفسك ايه اللى بيخلينى اكشف نفسي ليك بالشكل دا ؟؟

و انا هجاوبك انا كان ممكن اخد منك الفلوس و الورق و متعرفش مين عمل فيك كدا ...لكن انا عاوزك تعرف أنه انا علشان لما تموت تموت بقهرتك زى ما انت ياما قهرتنى ....انت مولود و فى بقك معلقه دهب لكن أنا ابن ناس غلابه علمونى بالعافيه و طفحت الدم و بيعت ابويا الدكان اللى حيلته علشان ابقى شريك لحضرتك ...كان لازم اقهرك لانك ياما قهرتنى لما كنت اشوف البنات واقفه حواليك علشان ابن ناس و من عيله و عندك عربيه و انت لسه طالب و انا باجى الكليه مشي ....كان لازم اقهرك لما حتى البنت الوحيده اللى حبتها و رحت اتكلم معاها لقتها بتقولى أننا اخوات و أن قلبها متعلق بحد تانى الا هو حضرتك طبعا ....كان لازم اقهرك و تعرف انى انا اللى خططت لده كله من ساعه ما ابتديت تهددنى بفض الشراكه ما بينا و كنت هترميلى شويه فلوس وتحتفظ انت بالشركه بعد ما بقالها اسم 

فكرت ساعتها اخد منك كل حاجه زى ما انت اخدت منى كل حاجه.....زقيت عليك هناء و طبعا مخدتش فى أيدها غلوه لانها عارفه بتعمل ايه كويس

و بقت هى عينى عندك فى بيتك اللى بتنقلى كل كبيره و صغيره 

و خلتها هى اللى تقنعك بحكايه القرض بضمان عمارتك دى علشان اخسرك كل حاجه حتى و انت ميت...... فى الوقت اللى اتخانقت معاك فيه و بقيت استفزك لانى عارف انك عنيد و بتنفذ اللى فى دماغك بس 

و فعلا نجحت خطتنا ....و لما اتخانقت معاها هى هدت اللعب لحد ما تعرف هتاخد فلوس القرض امتى و تقولى عليه ....و لما موظف البنك اتصل بيك هى سمعتك بتقول لامك انك رايح البنك تجيب فلوس القرض علشان تدفع بعض المستلزمات اللى عليك و أن معاك اوراق و مستندات المناقصه كامله ....ساعتها هناء اتصلت على و قالت لى 

و خليت رجالتى يستنوك قدام البنك و انت عارف الباقى بقا 

انت و هى أقذر ناس شفتها فى حياتى ....انت بتحاسبنى على حاجه مليش اى ذنب فيها ...قلبك اللى مليان غل و حقد ده ازاى مخدتش بالى منه ؟ ازاى معرفتكش ؟؟ ازاى صدقت انك صاحبى 

و الا انتى ...ليه تعملى كدا ؟؟ ايه الدافع عندك انك تعملى فى انسان لا تعرفيه و لا يعرفك كدا ؟؟ كل ده عشان  تطلعيلك بحبة فلوس ؟؟ 

هنا ردت هناء ببجاحتها المعتادة هههههههه لا و كمان هورثك لانى هكون حرم المرحوم محمود ناجى ههههههه

يعنى لا هسيبك و لا قبل و لا بعد موتك متقلقش 😂

و بعدها بقا اتجوز انا و حبيبي هشام و نستمتع بفلوسك و شركتك و حتى شقتك اللى استخسرتها فى ...دا بعد ما نتخلص من امك هى كمان 

انتوا كلاب ....كلاب ....منكم لله يا كلاب أن شاء الله مش هتلحقوا تتهنوا باللى عملتوا ...دمى هيبقى لعنه عليكم يا كلاب .....و فى اللحظه دى محمود اخد ضربه على دماغه بايد المسدس من واحد من التيران اللى واقفين جنبه و بعدها محسش بنفسه إلا و هو فى المقبره مش شايف اى حاجه حواليه

و فهم محمود ليه هناء لما هو وصل كانت بتهاجمه بالطريقه دى و انها استنتجت اكيد انه فاقد الذاكره لانه اول ما دخل مهجمهاش 

يا الله....اد كدا لفلوس ممكن تحول البنى ادم لوحش عديم الاخلاق ؟

اد كدا روح الإنسان رخيصه كدا عند بعض البشر ؟

يارب .. هما سرقوا فلوسي و كانوا عاوزين يموتونى من غير ما اعمل فيهم اى حاجه شر بل بالعكس عملت معاهم كل خير ....يارب ارنى فيهم عظائم قدرتك ...يارب انا مش عارف اثبت حقى و لا اخده....هات لى حقى يارب 

محمود قعد يدعى ربنا .....و يفكر ازاى يثبت على المجرمين دول جريمتهم 

محمود افتكر رقم العربيه اللى كانت بتطارده لانه كان رقم مميز جدا خمس ستات ٦٦٦٦٦

يا ترى محمود هيوصل لحاجه و الا كدا خلاص ضاع حقه ؟ و الكلاب دى هتنفد بعملتها ؟؟؟

دا اللى هنعرفه فى الجزء الجاى بمشيئه الله

يتبع ...😍

#د.جيهان_عادل🌹

#حكاية_محمود

#الجزء_الثامن

محمود قعد يدعى ربنا .....و يفكر ازاى يثبت على المجرمين دول جريمتهم 

محمود افتكر رقم العربيه اللى كانت بتطارده لانه كان رقم مميز جدا خمس ستات ٦٦٦٦٦

محمود افتكر كل حاجه ...بس متكلمش و لا قال إنه افتكر 

محمود خرج قعد مع أمه و طلب منها تكلم هناء فى التليفون 

ليه يا ابنى ؟؟ عاوز تكلمها ليه ؟؟ بعد ما قالت انك نصاب و مصدقتش انك محمود ؟؟

ايوه يا امى انا عاوزك تكلميها و تقوليلها أن محمود راجع مختلف خالص و أنه مش فاكر اى حاجه خالص و انه تعبان اوى و بقى عامل زى الطفل الصغير

و لما تقولك مش قلت لك أنه نصاب قوليلها انك بعد ما مشيتى شكيت فى كلامك فعلا من كتر ما لقيت مخه مش مخ ابنى لكن افتكرت الوحمه اللى فى صدره و قلت اكيد دى اللى هتأكد لى كلام هناء و الا لأ ...و فعلا خليته قلع وورانى الوحمه و اتاكدت أنه هو يا بنتى و  قوليها انك ودتينى للدكتور و قالك انى فاقد للذاكره و  انى بقيت زى الطفل  و  أن حالتى محتاجه وقت طويل جدا على ما تستقر و ارجع زى الاول ...و انها لازم تيجى علشان تشيل معاكى فى المصيبه دى 

طب و ليه كدا يا ابنى ؟؟؟ عاوزنى اقولها كدا ليه ؟؟ و عاوزها ترجع هنا ليه ؟؟ دا انا ما صدقت انها غارت ؟

معلش يا امى اعملى اللى قلت لك عليه بس

حاضر يا ابنى و لو انى مش فاهمه اى حاجه

ام محمود عملت اللى قالها عليه و هناء قالت لها حاضر يا ماما هجيلكم الصبح ان شاء الله 

ام محمود قفلت السكه و هى متغاظه و مش فاهمه محمود بيعمل كدا ليه 

محمود كان غرضه من كدا أنه يطمن هناء و هشام علشان ميفكروش يهربوا أو يعملوا اى رد فعل غير متوقع زى أنهم يفكروا مره تانيه فى التخلص منه 

و فعلا هناء اكلت الطعم واتصلت على هشام و هى بتضحك بعد ما كانت مرعوبه هى و هو من رجوع محمود غير المتوقع 

الو....اتش

الو ...نوءه حبيبتى

عندى لك خبر بمليون جنيه 

خير يارب بشرينى

مش صاحبك اتجنن 😂

صاحبى مين اللى اتجنن ؟؟

محمووود مش عارف محمود ؟؟

اتجنن ازاى ...قولى بسرعه 

امه لسه متصله بى و بتقول أنه بقا زى الطفل الصغير..يعنى من الاخر اتهبل ....و حالته صعبه اوى 

معقوله ....دا انا كنت هتجن لما قلتى أنه رجع و خفت بقا يجى يبهدلنا ...و من ساعتها عمال افكر طلع من التربه اللى دفناه فيها ازاى 

مش مهم ازاى ...المهم انه وقع و لا حد سمى عليه 

ازاى مش فاهم كلامك 

يعنى محمود دلوقتى بقا اسهل كتير فى التعامل ...واحد مبيعرفش اى حاجه ممكن نخليه يعمل لنا اى  حاجه احنا عاوزنها ...ممكن مثلا اقنعه أنه يعملى توكيل عام انى ادير الجزء بتاعه فى الشركه علشان حالته الصحيه و بعد كدا ابيع الجزء ده لنفسي و كل ممتلكاته من أراضى و عقارات

يا بنت اللذينه .....دا ابليس وقف يصقف لك 😂😂😂

اومال ؟؟؟دا ظهوره و هو فى الحال ده سهل لنا أمور كتير منها موضوع طلاقى اللى كان هياخد سنين على ما أثبت أنه مختفى و المحكمه ترضى تطلقنى .....دلوقتى بقا بعد ما ناخد منه كل حاجه قضيه صغيره ارفعها عليه و اجيب تقارير الدكتور أن حالته صعبه هيطلقنى منه من اول جلسه 

يخربيت دماغك ...دماغك سم 

انا من بكرا هكون عنده و انفذ خطتنا 

و هو كذلك يا حبى سلام دلوقتى

هناء قفلت السكه و هى حاسه انها هتضحك على محمود للمره التانيه و المره دى مش هتطلع من المولد بلا حمص لااا دى هتاكل الحمص كله 

فى الوقت ده محمود  اشترى موبيل جديد بدل اللى ضاع فى الحادثه و كان عنده نوته صغيره بيسجل فيها كل الارقام و حاططها فى دولابه ........محمود بدأ يعمل اتصالاته علشان يعرف صاحب العربيه اللى كانت ماشيه وراه و فعلا اتصل بواحد صاحبه اسمه سمير  بيشتغل فى المرور و طلب منه يعرف اسم و سكن صاحب العربيه سمير طلب منه مهله يومين على ما يجيب له البيانات اللى هو عايزها 

لكن محمود كان مستعجل اوى و قاله يومين كتير يا سمير ...انا عاوز اعرف الموضوع ده بسرعه دى مسأله حياه او موت 

طيب خلاص بكرا باذن الله هتكون بيانات العربيه دى عندك 

تمام اشكرك يا سمير اوى 

لا شكر على واجب و حمد الله على سلامتك يا حبيبي

تانى يوم محمود لقى سمير بيرن عليه و بيمليه بيانات صاحب العربيه 

اتفضل يا سيدى جبت لك البيانات اللى طلبتها منى 

متشكر اوى يا سمير ...العربيه باسم مين ؟؟

العربيه باسم صبرى ابراهيم مناع ....صاحب صاله جيم مناع ..بولاق الدكرور 

تمام ...متشكر اوى يا سمير انت متعرفش انت خدمتنى اد ايه ؟؟

لا شكر على واجب يا صاحبى ..سلام 

قفل محمود و بدأ يفكر هيعمل ايه بعد ما عرف مكان مناع ده ...و دا كان أول الخيط اللى هيوصل بيه لحقه

محمود لبس و نزل و راح لعم سعد فى المقابر 

محمود وصل لاوضه عم سعد و خبط على الباب 

عزيزه فتحت و اول ما عينها وقعت عليه اترسمت على شفايفها ابتسامه جميله لمده لحظات ...بعدها افتكرت أن مش دا يوسف اللى حبته و اتمنته ...دا دلوقتى البشمهندس محمود ابن الناس العليوى

اهلا يا باشمهندس 

اهلا بيكى يا عزيزه ....ازيك و ازاى عم سعد ..انتوا وحشتونا اوى 😍

الحمد لله بخير ...الله يكرمك يا باشمهندس

انا نسيت اشكرك على كل اللى عملتيه معايا 

مفيش شكر و لا حاجه يا باشمهندس الشكر لله وحده 

ايه مش هتقوليلى اتفضل ....هو عم سعد هنا الاول 

لا عمك سعد فى مقابر عبدالحميد شتا عارفها و الا نسيتها يا بشمهندس ؟؟

عارفها طبعا و عمرى ما انساها يا عزيزه ...طيب عن اذنك هروح له 

اتفضل 

بس اعملى حسابى ع الغدا انا هتغدى معاكم انهارده

هو احنا اد المقام يا بشمهندس ؟

ليه كدا يا عزيزه ؟؟؟ انتى بتكلمينى كدا ليه ؟؟ هو انا عملت لكى حاجه و انا مش واخد بالى ؟؟

لأ ابدا ..... بس خلاص انت عرفت اهلك و انتهينا

طيب يا عزيزه انا هروح دلوقتى لعم سعد علشان الحقه و لنا كلام تانى مع بعض بعد كدا

و لا كلام و لا سلام يا استاذ قلت لك خلاص خلصنا 

محمود بص لها كدا مش مصدق عزيزه جابت القسوة دى كلها منين ...هو عاش معاهم شهر بحاله و عارف أن طبيعتها غير كدا خالص 

محمود راح لعم سعد و لاقاه بيوضب فى المقبره لأن اهلها اتصلوا عليه و قالوا له يفتحها لان فى واحده ست من العيله هتدفن فيها 

اول ما عم سعد شاف محمود فرح اوى و اخده بالحضن 

ازيك يا محمود يا ابنى عامل ايه ؟؟ تعالى يا ابنى اقعد هنا

الحمد لله يا عم سعد انا بخير 

طمنى عليك ...رجعت لك الذاكره و الا لا 

الحمد لله يا عم سعد رجعت بس محدش يعرف انها رجعتلى 

ازاى يا ابنى ....مقلتش لأى حد حتى مراتك أو امك ؟؟

امى معرفتش غير انى بفتكر مجرد صور و مواقف ...إنما مراتى دى هى و شريكى هما سبب كل اللى حصلى

ازاى يا ابنى فهمنى ؟

هفهمك يا عم سعد على كل حاجه 

و ابتدى محمود يحكى لعم سعد على كل اللى حصل و عم سعد يسمع و يستغرب ...لغايه ما خلص محمود الحكايه 

يااااه يا محمود يا ابنى دى قصه و لا فى الحواديت 

ايوه يا عم سعد عندك حق 

بس انا عاوز منك خدمه يا عمى 

و ماله يا ابنى اللى تؤمر بيه

انا عاوزك متقولش لاى حد أن الذاكره رجعت لى حتى عزيزه 

حاضر يا ابنى و لو انى مش فاهم ليه 

هفهمك بعدين ....و عاوزك كمان تساعدنى انى ارجع حقى اللى اخدوه منى المجرمين دول 

انا تحت امرك يا ابنى ...بس ازاى 🤔🤔

يا ترى محمود عاوز عم سعد يساعده ازاى؟ و هل هتنجح خطته و الا لأ ؟؟ 

دا اللى هنعرفه فى الجزء الجاى باذن الله 😘

يتبع .......😍

#د.جيهان_عادل💐💐

#حكاية_محمود

#الجزء_التاسع

انا عاوزك متقولش لاى حد أن الذاكره رجعت لى حتى عزيزه 

حاضر يا ابنى و لو انى مش فاهم ليه 

هفهمك بعدين ....و عاوزك كمان تساعدنى انى ارجع حقى اللى اخدوه منى المجرمين دول 

انا تحت امرك يا ابنى ...بس ازاى 🤔🤔

انا يا عم سعد محتاج حد تكون تعرفه يساعدنا... راجل جدع كدا يكون قلبه جامد و بالنسبه للفلوس مفيش اى مشكله منها خالص

فهمنى اكتر يا ابنى انت عاوز ايه بالظبط 

انا هفهمك ... الناس اللى خطفونى دول زى ما حكيت لك بيشتغلوا تبع واحد اسمه مناع ....الناس دى انا عاوز واحد أشد منهم يقدر يساعدنا على اننا نجيبهم و نخليهم يعترفوا بكل اللى عملوه فى 

طيب يا ابنى انا هسأل لك و اعرف لك و ارد عليك كمان يومين كدا

لا يا عم سعد احنا عاوزين نخلص الموضوع ده باقصى سرعه 

خلاص يا ابنى هنزلك انهارده و مش هرجع الا اما اجيب لك طلبك ...بس هات رقم موبايلك علشان اول ما اعرف لك حاجه اتصل عليك على طول 

رقم موبيلى اهو ...هات موبيلك احفظه لك ...اهو حفظته باسم يوسف

الله و ليه يوسف بقا ؟؟ ما خلاص عرفنا أنك محمود ؟؟

انتوا عرفتونى يوسف و انا حبيت الاسم ده اوى يا عم سعد علشان عزيزه هى اللى سمته ليه

ماشي يا سي يوسف استنى منى تليفون

تمام انا ماشي دلوقتى زمان هناء جت و لازم اروح اقابلها علشان متشكش فى حاجه

ربنا معاك يا ابنى ...مع السلامه 

محمود روح البيت و فعلا لقى هناء قاعده مستنياه 

اول ما شافته اخدته بالاحضان وقعدت تعتذرله انها معرفتوش عشان اللبس اللى كان لابسه و عشان مش اى حد يجى يقول إنه جوزى هصدقه ...و أن ماما أكدت لها من الوحمه اللى فى صدرك 

محمود قالها و لا يهمك يا هناء انتى عندك حق طبعا و انا مش زعلان منك ...انا اصلا مش عارف تعبان كدا و مش مركز فى اى حاجه...امى قالت لى انى عندى شركه و عندى شريك بس انا مش فاكر اى حاجه و مش عارف هروح الشركه دى ازاى و هتعامل ازاى و لا انا فاكر اى شئ عنها

و لا يهمك يا حبيبي انا معاك و مش هسيبك ...اول حاجه بس لازم نعمل محضر أن بطاقتك ضاعت علشان نطلع بدل فاقد و بعد كدا كل الورق هيخلص

ايوه عندك حق و عايز اعمل محضر باللى حصل معايا برده يمكن نعرف مين عمل فى كدا 

لا لا ملوش لازمه المحضر ...هو انت عارف مين عمل فيك كدا أو فاكر اى حاجه حصلت معاك ؟

للاسف لا معرفش و لا فاكر اى حاجه خالص غير لما فقت لقيت نفسي مدفون جوه تربه 

طب خلاص هتروح تقول للشرطه ايه بس ...و لا هيعملوا لك حاجه اصلا ....احمد ربنا أنه نجاك و خلاص 

على رايك فعلا عندك حق هروح اقول للشرطه ايه و انا مش فاكر اى حاجه خالص ...خلاص ننزل سوا بكرا نعمل اللى قلتى عليه لأنى مش هعرف اعمل الكلام ده لوحدى

يا سلام تحت امرك يا حبيبي 

تانى يوم هناء اخدت محمود و عملوا محضر و راحوا السجل المدنى طلعوا بطاقه مستعجله

هناء و محمود رجعوا البيت و قالت له 

انهارده خلصنا ورق البطاقه بكرا بقا هاخدك و نروح الشركه نشوف حالنا 

حاضر يا هناء ...مش عارف من غيرك كنت هعمل ايه 

متقولش كدا يا حبيبي انا معاك لحد ما تخرج من الازمه دى خالص

ربنا يخليكى ليا يارب

و يخليك يا حبيبي انا هدخل اخد دش بقا اصل كلى تراب

اتفضلى يا حبيبتى

كل ده و ام محمود قاعده تبص لمحمود و مش فاهمه هو بيعمل كدا ليه ...و ليه مسلمها كدا كل حاجه و سايب لها نفسه بالشكل ده 

محمود بص لامه كدا و قام باسها فى جبينها و همس فى ودنها متخافيش على انا عارف بعمل ايه كويس

امه هزت راسها كدا أن الكلام مش عاجبها بس هتعمل ايه

هنا جرس تليفون محمود رن ....

محمود اخد التليفون و طلع البلكونه 

الو ...ايوا يا عم سعد 

ايوا يا محمود يا ابنى انا لقيت لك طلبك خلاص ...معلش اتاخرت عليك بس لقيت المطلوب بالظبط 

كويس اوى هيقدر يساعدنا يعنى ؟؟

امال ....دا راجل عتره و له كلمه مسموعه و اى حد هنا يبقى له حق بيروح له و هو بقا بيخلص الحق ده سواء بالتراضي أو بالعافيه 

حلو اوى يا عم سعد 

بس هو حراق شويه فى حكايه الفلوس ...بس ايه بيجيب من الاخر ...مبيسبش غلطه 

منا قلت لك يا عم سعد الفلوس متهمنيش اد ما يهمنى أن الكلاب دول ياخدوا جزائهم 

يبقى كدا تمام ....هنروح له امتى ؟؟

هو الراجل دا فين اصلا و اسمه ايه ؟

الراجل دا ياسيدى فى نزله السمان ....دا بيت أهله و عيلته بس هو عنده فيلا كبيره فى برج العرب ...و اسمه فتوح الوحش ...الناس هى اللى طلعوا عليه اسم الوحش دا لان قلبه جامد و يفوت فى الحديد

طيب يا عم سعد انا هفوت عليك اخر النهار نروحله سوا

ماشى يا ابنى و انا مستنيك 

هناء خرجت من الحمام و لقت محمود داخل من البلكونه و ماسك التليفون فى ايده 

ايه دا كنت بتكلم مين ؟

لا دا احمد ابن خالتى بيطمن على ...أصله جالى من يومين علشان يسلم على ...و لقيته دلوقتى بيكلمنى و بيقولى تعالى  اخر النهارنقعد فى اى كافيه شويه تخرج و تغير جو

كويس أخرج يا حبيبي و انبسط انا كمان عندى مشوار كدا هروح لواحده صاحبتى 

تمام ماشي يا حبيبتى

هنا دخلت ام محمود من المطبخ و قالت يلا يا محمود عشان تتغدوا ....و راحت رايحه تحط الاكل

هناء بصت لمحمود و قالت له شايف امك بتعاملنى ازاى 

عاملتك ازاى بس يا هناء هى كلمتك اصلا ؟

ما هى بتتجاهلنى و بتقولك تعالى اتغدا و معبرتنيش انا ....يعنى ايه يعنى ؟ مش عاوزانى اكل صح ؟؟

يا ستى هى اكيد مش قصدها 

لا ما انت ناسي كل حاجه ...امك دى ياما زلتنى و انت كنت بتشوف بعينك و كنت زهقت من افعالها معايا و قلت لى انك هتشوف لها اى سكن تانى بعيد عن بيتنا هنا ان شالله توديها دار مسنين 

انا قلت كدا يا هناء ؟؟

ايوا طبعا ..يعنى هكدب عليك يعنى ؟؟

طيب يا هناء انا هعمل كل اللى تقولى عليه و اللى يريحك يا حبيبتى ....قومى يلا علشان تتغدى و تفتحى نفسي على الاكل

لا يا اخويا مش هاكل

لا لا مينفعش ...عشان خاطر حوده حبيبيك

عشان خاطرك بس يا دوده هقوم 

محمود و امه و هناء قعدوا يتغدوا ...و امه طول الغدا شايفه اد ايه هناء عماله تدلع على محمود دلع بايخ و تعامله كأنه بيبي صغير و هى ساكته و مبتتكلمش خالص 

الغدا خلص ....و على اخر النهار محمود لبس و قال لهناء أنه نازل...و هى قالت له و انا كمان هروح المشوار اللى قلت لك عليه 

طبعا هناء راحت لهشام علشان تبلغه بكل حاجه بينها و بين محمود و تفهمه أن محمود بقا عجينه طريه فى أيدها و بقى يصدق اى كلام هى تقوله له ...و انها هتجيبه الشركه بكرا و انك يا هشام لازم تفهمه أن انتوا صحاب و مفيش اى مشاكل ما بينكم خالص 

هشام قعد يضحك على محمود اللى راجع عبيط بعد ما كان هشام بيترعب منه و بيعتبره البعبع اللى فى حياته

محمود راح لعم سعد اخده و راحوا للوحش

اول ما دخلوا عليه لقوا .......

يا ترى لقوا ايه ؟؟ و يا ترى هيقدر يساعدهم و الا لا ؟

دا اللى هنعرفه فى الجزء الجاى باذن الله 😘

يتبع ....✋

#د.جيهان_عادل💐

#حكاية_محمود

#الجزء_العاشر

محمود راح لعم سعد اخده و راحوا للوحش

اول ما دخلوا عليه لقوا راجل فى الأربعينات من عمره طول بعرض أقرع ...عنده عضلات زى المصارعين اللى بنشوفهم فى المصارعه الحره لابس سلسله جنزير فى رقبته و لابس بدله كاجوال و قاعد حاطط الشيشه قدامه و جنب منه كلبين كبار جدا شكلهم يخوف مربوطين بسلاسل و محطوط على بقهم كمامه 

محمود و عم سعد دخلوا و سلموا عليه 

اهلا و سهلا يا حضرات اى خدمه

احنا جايين لك علشان موضوع كدا يخص الاستاذ محمود

خير يا استاذ محمود .. اتفضل احكى 

و بدأ محمود يحكى كل اللى حصله مع هناء و هشام و فتوح عمال يسمع له و يهز دماغه و هو ليشرب فى الشيشه و الدخان خارج من مناخيره زى النافوره ....لحد ما محمود خلص كلامه خالص و سكت 

فتوح قاله خلصت كلامك يا استاذ

ايوه 

طب و المطلوب منى ايه بالظبط ؟؟

احنا سألنا على حضرتك و عرفنا انك بتقف جنب اللى بيحتاج مساعده و بتجيب له حقه 

تمام ....بس لازم نتفق الاول 

انا تحت امرك فى اى حاجه تطلبها 

كدا بقى يبقى اتفقنا ....انا هاخد فى الحوار ده ١٥٠ الف جنيه ....خمسين مقدم و الباقى بعد العمليه ما تخلص

هنا رد سعد ...مش كتير كدا يا عمنا ؟؟؟

الله احنا هنفاصل و الا ايه ؟ انا مش عاوز وجع قلب انا كلمتى واحده 

خلاص يا معلم انا موافق و هجيب لك الخمسين الف بكره .... بس كنت عاوز اعرف هتعمل ايه بالظبط ؟

لأ ملكش فيه بقا ...دا شغلى ...و عايز اقولك أن اخد الحق حرفه ...مش مجرد كلام يعنى 

تمام يا معلم ...بكرا باذن الله هجيلك و معايا الفلوس 

و هو كذلك يا استاذ 

سلام عليكم 

و عليكم السلام و رحمة الله و بركاته

خرج محمود و عم سعد من عند فتوح...... و عم سعد كان ماشي مسهم 

مالك يا عم سعد ؟؟

انت صحيح يا ابنى هتدى للراجل دا  ١٥٠ الف جنيه ؟؟

طب و ماله ياعم سعد مش هيجيب لى حقى 

هو انت عارف هو هيعمل ايه ....دا حتى مفهمناش هيعمل فيهم ايه .....مش يمكن يرتكب جريمه و يتمسك و يوديك انت فى داهيه يا ابنى 

جريمه ازاى يا عم سعد مش بتقول أن اى حد بيروح له علشان يجيب له حقه 

ايوا قلت بس انا سمعت زيى زيك ...يعنى عمرى ما تعاملت معاه و لا اعرف بيعمل ايه 

طب يعنى ايه يا عم سعد. ...انت عاوزنى اسكت و اضيع حقى ؟؟

لا يا ابنى انا مقولتش كدا طبعا ...بس ليه متلجأش للبوليس و تحكيلهم عن كل حاجه تعرفها 

و ايه الدليل اللى معايا على الكلام اللى هقوله للبوليس؟

انا و بنتى هنروح نشهد معاك أننا طلعناك مضروب و مدفون حى فى تربه 

شهادتكم دى مش كفايه يا عم سعد ...طب و فين فلوسي اللى سرقوها منى و مطلوب منى دلوقتى اسددها ...... فين شركتى اللى راحت منى و معرفش ايه حصل فيها دلوقتى....فين شرفى اللى الكلاب دول داسوا عليه ؟؟

مش عارف اقولك ايه يا محمود يا ابنى بس اللى اعرفه ان الطريق ده اخرته وحشه ....انت كدا هتعمل زي ما هما عملوا بالظبط 

ازاى تقول كدا يا عم سعد انا بعمل زيهم ؟؟ هما جابوا بلطجيه علشان يسرقونى و يموتونى لكن أنا عاوز ارجع حقى و بس ...و لا انا عاوز اقتلهم و لا اسرقهم ....كل اللى عاوزه من فتوح أنه يساعدنى اجيب الأربع عيال اللى ضربونى و يخليهم يعترفوا قدام البوليس بجريمه هناء و هشام 

مش عارف اقولك ايه يا محمود .....طب ملكش اى حد من معارفك ظابط يساعدك ؟؟؟

و الله يا عم سعد انا كان لى صاحب اسمه احمد كان صديق عمرى لحد ما دخلنا الثانوى ...بس بعد كدا هو دخل شرطه و انا دخلت هندسه ...و كنت بشوفه على فترات كدا لانه ساكن جنبنا ...بس اول تعيينه كان فى الصعيد و سمعت مؤخرا أنه اتنقل هنا 

طب ما دا حلو يا ابنى ....احمد دا ممكن يساعدك 

تصدق مجتش فى دماغى الفكره دى خالص 

خلاص اتكل على الله و روحله و بلاش موضوع فتوح ده لتقلب بغم و احنا مش ناقصيين 

طب و افرض احمد قالى مليش دعوه أو مش هعرف اساعدك ساعتها اعمل ايه ؟؟

ساعتها امرك لله ابقى استعين بفتوح بقا 

طب منا قلت له هجيب لك الفلوس بكرا 

يا سيدى سهله اتصل عليه بكرا و قوله انك معرفتش تدبرله المبلغ و بعد كام يوم هتجهزهم له و تروحله 

صح انا هعمل كدا .... طب ما تيجى معايا لاحمد صاحبى 

لا يا محمود روح لوحدك يا ابنى

علشان بس لو حب يسالك عن اى حاجه 

لو حب يسالنى تليفونى معاك....و لو عاوزنى شخصيا ابقى اروحله ...بس دلوقتى لازم اروح لعزيزه زمانها قلقانه على و انا مقولتش لها انا رايح فين 

طب امانه تسلم لى عليها يا عم سعد 😍

حاضر يا ابنى هسلم لك عليها ...من عنيا .

محمود وصل عم سعد لاول المقابر و مشي راح لأحمد

                   🌹🌹🌹🌹🌹🌹

اهلا ازيك يا محمود ....وحشنى و الله بقالى فتره مشفتكش ؟

هو انت متعرفش اللى جرالى ؟؟؟

لا و الله ...كان عندنا دوره تدريبيه و كنت غايب بقالى شهرين ....بس انا مشفتكش من اكتر من ست شهور دلوقتى 

احمد انا محتاج مساعدتك 😔

تحت امرك يا محمود ...لو فى اى حاجه اقدر اعملهالك هعملهالك ...احكيلى 

و بدأ محمود يحكى لاحمد كل اللى حصله من اول شراكته مع هشام من خمس سنين لحد ما اتجوز هناء و اتفاقها مع هشام أنهم يقتلوه و ياخدوا كل حاجه و يسرقوا كمان فلوسه

كمان حكاله على الوحش و أنه كان عاوز يستعين بيه علشان يجيب له حقه و أنه طلب منه ١٥٠ الف جنيه عشان يرجعله حقه 

انت ازاى تفكر كدا يا محمود ...عيب عليك انت راجل متعلم 

انا مجاش فى دماغى الا كدا يا احمد ....لما افتكرت اللى حصلى تفكيرى اتشل و مبقتش افكر غير فى الانتقام منهم الاتنين و بقيت اتمنى انى ارميهم نفس رميتى جوه تربه علشان يدوقوا اللى دقته 

تفكيرك كدا غلط يا محمود ...الشخص اللى بيكون عاوز ينتقم اول ما بيحرق بيحرق نفسه ....الانتقام دا نار بتولع فى صاحبها قبل ما تولع فى اى شخص تانى 

عندك حق ....بس قلبى مولع بجد و مش قادر اسامح 

و انا مقلتلكش سامح و لا حاجه انا قلت لك عاقبهم بس بالقانون ....يعنى ياخدوا جزائهم بالقانون 

عندك حق يا احمد ....طب ازاى هنبدأ 

بص يا سيدى كويس اوى انك مقلتش لحد أن الذاكره رجعت لك تانى ....عاوزاك بقا تروح مع هناء الشركه بكرا و تقابل هشام زى ما كنت مخطط بالظبط ....و تنيمهم على الاخر ....انا بقا هجهز لك شويه كاميرات مراقبه جوه مكتبه و مكتبك ...دا غير هعمل شويه تحريات كدا 

و ربنا يسهل 

اشكرك يا احمد 

عيب عليك تشكرنى ايه.....و ملكش دعوه باللى اسمه فتوح دا خالص 

حاضر يا احمد 

يا ترى خطه احمد هتنفع و ترجع لمحمود حقه ؟؟ دا اللى هنعرفه فى الجزء الجاى باذن الله 😘

يتبع.......😍

#د.جيهان_عادل💐

#حكاية_محمود

#الجزء_الحادى_عشر

محمود روح البيت لقى امه قاعده مستنياه و حاطه أيدها على خدها 

ازيك يا امى ....مالك قاعده كدا ليه ؟

انا عاوزه افهم يا ابنى ...انت جبت البت دى تانى ليه ؟؟

يا امى صدقينى وجودها مهم اوى ....معلش استحمليها شويه و سبينى انا عارف بعمل ايه كويس اوى

طب ما تفهمنى ....ليه سايب نفسك ليها كدا و عماله تدلع عليك....و ايه حكايه انك هتسلملها شغلك دا ؟؟؟ هى دى هتفهم ايه فى شغلك ام دبلوم دى ؟؟

يا امى منا قلت لك انا عارف بعمل ايه كويس ....متقلقيش على .... بس انا عاوز اطلب منك طلب 

عنيا ليك يا ابنى 

انا مش عاوزك تزعلى من اى سخافه هناء تعملها معاكى و مهما تستفز فيكى متزعليش 

حاضر يا محمود 😏

بعد شويه دخلت هناء و هى متمكيجه على سنجة عشره

ايه يا حبيبي انت جيت من مشوارك انت و أحمد؟؟

اه جيت من بدرى 

طب كويس يلا ننام بقا علشان نصحى بدرى نروح الشركه

طب مش هتتعشي يا حبيبتى 

لأ انا اتعشيت بره مع صاحبتى اللى قلت لك عليها 

بالف هنا يا حبيبتى

تانى يوم هناء قامت من بدرى لبست بدله و عملت شعرها و رسمت نفسها اخر حاجه 

و اخدت محمود اللى عمل نفسه حتى ميعرفش طريق شركته فين 

اول ما دخلوا الشركه الموظفين و العمال اتلموا على محمود يسلموا عليه ....و هناء بقت تشخط فيهم و تقولهم يلا يلا كل واحد على مكتبه مش ناقصين تعطلوا الشغل

هناء دخلت مكتب محمود و قالت له 

اتفضل يا حبيبي على مكتبك 

محمود قعد دقيقه على الكرسي بتاعه و فتح ملفات كانت محطوطه على المكتب و عمل نفسه مش عارف اى حاجه خالص 

انا مش فاهم اى حاجه يا هناء 😔

يا حبيبي متقلقش انا معاك خطوه خطوه لحد ما تفتكر ....طب بقولك ايه ؟؟ مدام أنت تعبان كدا ايه رايك تعملى توكيل رسمى عام علشان متعبكش و كل شويه تيجى علشان تمضى ورقه ....انت برده المفروض ترتاح علشان ذاكرتك ترجع بسرعه 

فكره حلوه اوى يا هناء ...خلاص اول ما البطاقه تطلع بعد بكره اروح اعملك توكيل ....و اهو تريحينى من المجى كل يوم 

ايوا طبعا يا حبيبي انا يهمنى ايه بس الا مصلحتك 

هنا دخل هشام و سلم على محمود بحراره شديده و بالاحضان و البوس ....وحشتنى يا حوده

محمود بص له و عمل نفسه ميعرفوش 

هشام قاله هو انت مش عارف انا مين ؟؟

محمود هز رأسه بالنفى 

انا صاحبك و شريكك هشام .....مش فاكر إتش

اهلا يا هشام ...معلش يا هشام اصلى تعبان شويه

و لا يهمك يا حبيبي ...مدام هناء قالت لى على كل حاجه 

احنا مش عاوزين نتعبك ...انا و مدام هناء هنقوم بكل حاجه لغاية ما تسترد صحتك 

ربنا يخليكوا لى يارب

هنا هناء بدأت تتكلم.....لو سمحت يا استاذ هشام ممكن تجيب لنا كل حاجه عن نشاط الشركه و حساباتها فى اخر تلات شهور 

هشام بصلها كدا من تحت نضارته...بمعنى هو ايه اللى بتقوليه دا ؟؟

حاضر يا مدام هناء هخلى الاستاذ عبدالسلام يجهز لك الورق 

تمام بكرا هنيجى تكون جهزت الورق 

يلا بينا يا محمود كفايه عليك كدا انهارده 

يلا يا حبيبتى 

طب اسبقنى انت على العربيه ثوانى و جايه لك 

حاضر يا هناء 

خرج محمود ...هشام مسك هناء من دراعها و قالها 

ورق ايه اللى انتى عاوزاه ده ؟....احنا متفقناش على كدا

منا لازم اعمل كدا قدامه علشان ميحسش بحاجه 

اااه افتكرت انك هتلعبى بديلك ....يعنى بكرا اجيب كدا اى ورق قدامه تشوفيه و خلاص ؟؟

لأ طبعا انا عاوزه ورق اخر تلات شهور زى ما قلت لك ....هو انت ناسي أن بعد أيام كل حاجه هتبقى بتاعتى و من حقى اتطمن على مالى 

نعم نعم مالك ايه يا ام مال .....فيها لاخفيها

يعنى ايه مش فاهمه 🙄

يعنى لما تاخدى التوكيل من المغفل هنعيد الشراكه ما بينا و هتبقى النص بالنص 

ايه 😏؟؟ و ليه بقا أن شاء الله دى فلوسي و فلوس جوزى ليه اديلك ٢٠ ٪ بحالهم 

ما هو يا كدا يا اما ههد المعبد على دماغك 

لا يا حبيبي على دماغنا احنا الاتنين مش دماغى لوحدى ....انت اصلا متقدرش تعمل كدا 

طب يلا روحى لمحمود دلوقتى و يبقى لنا كلام تانى بعدين

خرجت هناء و جواها خوف من كلام هشام ...و بقت تقول لنفسها هو هيشتغلى فى الازرق و الا ايه ؟

محمود قالها اتاخرتى ليه يا حبيبتى 

قالت لأ ابدا دا انا كنت بوصى الاستاذ عبدالسلام يجهز الورق على بكرا باذن الله

هناء روحت مع محمود اتغدوا و دخلوا يناموا شويه

اول ما هناء نامت...محمود قام اتسحب من جنبها و دخل البلكونه يكلم احمد و حكاله على كل حاجه

احمد قاله أنه جهزله الكاميرات اللى هيزرعها فى مكتب هشام و مكتبه و طلب منه ينزلوا بالليل و هيجيب الفنى معاه علشان يركبهم فى مكان مش ظاهر

و لما محمود قاله بس احنا منقدرش نعمل حاجه بالتسجيلات دى يا احمد من غير إذن النيابه 

منا عارف و هحاول بالتحريات اللى قلت لك عليها اطلع إذن النيابه بالتسجيل .....و على اسوء تقدير لو معرفناش هتكون قرينه قويه نقدر نواجههم بيها علشان يعترفوا باللى عملوه

طب انا دورى هيبقى ايه بعد كدا يا احمد ؟

انت هتدنك على حالك قدامهم شخص بائس فاقد الذاكره...بس هتحاول توقع بين الاتنين ...عارف المثل اللى بيقولك مشفهومش و هما بيسرقوا شافوهم و هما بيتحاسبوا ...

ايوه عارفه 

هو دا دورك بقا عاوزك توقع بينهم علشان يتكلموا و يواجههوا بعض 

تمام ....يا رب اعرف اعمل كدا 

متخافش هتعرف ...اللى زى دول سهل اوى توقيعهم لأنهم طماعين و الطماع مبيشوفش قدامه و همه كله أنه ياخد اكتر و اكتر

طيب كنت عاوز اسالك على حاجه تانيه .....دلوقتى هناء مستنيه اطلع البطاقه علشان تاخدنى و اروح اعملها توكيل و انا مش عارف اتصرف ازاى فى الموضوع ده 

حاول تتهرب منها على اد ما تقدر ....مره تعبان ...مره نسيت البطاقه فى البيت ....مره مش لاقى البطاقه ...المهم تأجلها على اد ما تقدر 

و هو كذلك.....مش عارف من غيرك كنت عملت ايه يا احمد

يا جدع عيب عليك بقا .....المهم هتنزلى انهارده بالليل عشان المشوار اللى قلت لك عليه 

حاضر يا احمد ....الساعه عشره كدا هنزلك

تمام ...سلام يا صاحبى

سلام يا حودا 

يا ترى محمود هينجح أنه يوقع بين هناء و هشام ؟🤔🤔🤔🤔🤔 دا اللى هنعرفه فى الجزء الجاى باذن الله 😘

يتبع .........🥰

#د.جيهان_عادل💐

#حكاية_محمود

#الجزء_الثانى_عشر

نزل محمود بالليل لاحمد و راحوا الشركه ركبوا كاميرات فى مكتب هشام و محمود و مكتب السكرتاريه و حطوا ميكروفونات فى كل الاوض

تانى يوم هناء صحت محمود و قالت له أنت اتاخرت امبارح فين انا كنت مستنياك لغاية ما رحت فى النوم 

لا ابدا نزلت اتمشي شويه اصلى مخنوق من حكايه فقدان الذاكره دى 

معلش يا حبيبى بكرا الذاكره ترجع و تبقى زى الفل 

هناء خرجت لقت ام محمود مجهزه الفطار 

صباح الخير يا حماتى 

ام محمود مردتش عليها 

اصطبحنا ع الصبح بقا ....انا غلطانه انى بصبح عليكى و الا اعبرك 

احترمى نفسك يا هناء و ملكيش دعوه بى خالص 

لا حوش حوش انا ماسكه فيكى اوى ....دى حاجه بقت تقرف 

مالك بس يا هناء 

معرفش يا محمود امك حاطانى فى دماغها ليه ....هو انا عشان وحدانيه و مليش حد هتستفرد بى اهئ اهئ اهئ

متزعليش يا حبيبتى حقك على 

ام محمود بقت تبص لمحمود و مش مصدقه هو حصله ايه

يلا يا محمود عشان نلبس و نروح ع الشركه 

طب مش نفطر الاول 

لا هنجيب اى حاجه و احنا ماشيين فى السكه

امرك يا حبيبتى 

ام محمود كانت قاعده مذهوله مش دا محمود ابنى اللى اعرفه 

محمود و هناء راحوا على الشركه و طلبوا القهوه 

هناء رنت الجرس و طلبت الاستاذ عبدالسلام 

جهزت الورق اللى قالك عليه الاستاذ هشام ؟

ايوه يا فندم بس لسه فى شويه اوراق كدا فى الحسابات 

طب تعالى اقعد جنبى هنا و فهمنى كل حاجه فى الورق 

حاضر يا فندم 

هنا محمود قال لهناء هروح اشوف الشركه و أمر على الموظفين على ما تخلصى شغلك مع عبدالسلام

طيب يا حبيبي

محمود مشي بين المكاتب من غير ما يتكلم كلمه واحده لغاية ما وصل لمكتب هشام 

دخل عليه لقى معاه سكرتيره فرسه طول بعرض و لابسه جيب قصير شعر طويل بنى 

اول ما هشام شافه

اهلا محمود 

اهلا يا هشام الظاهر انى جيت فى وقت غير مناسب 

لا ابدا اتفضل....روحى انتى دلوقتى يا داليا 

حلوه داليا دى اوى يا هشام

متغلاش عليك يا حوده لو عايز انقلها مكتبك 

لا يا عم انت عاوز هناء تبهدلنى ....

اه صحيح هى هناء جت معاك ؟

ايوه طبعا هناء واخده الموضوع جد اوى و بتقول لازم نتحاسب على الجنيه و نشوف حق كل واحد فينا و خاصة فى الشهر الاخير اللى غبت فيه .....و كمان كانت بتتكلم عن فلوس و مناقصه مش عارف بتاعه وزاره الزراعه 

اااه اه ....ما احنا بدأنا فيها لما انت غبت و كله عال العال

طب تمام اروح بقا اشوف هناء خلصت و الا لسه اصلها مكهربه عبدالسلام هناك 😂😂 مش عارف عامله ليه كدا ....دا انا قلت لها هشام دا اكيد حد كويس و الا مكنتش شاركته من الاول ...بس هى مصممه تدور  ....غاويه تعب 

محمود خرج و هشام بقا يكلم نفسه :

بقا كدا يا هناء ؟؟ عماله تدورى ورايا و عايزه تحسسي محمود أن قلبك عليه يعنى ....ماشي ماشي يا هناء

محمود دخل على هناء و كان عبدالسلام خرج يجيب اوراق تانيه و قال لها 

تصدقى الواد هشام دا باين عليه دبور كبير الواد دخلت عليه لقيت السكرتيره تقريبا فى حضنه..... بس حتة بت ايه فرس يخربيتك يا هشام و يخربيت ذوقك

هنا هناء هاجت و ماجت انت بتقول ايه ؟ فرسة ايه و زفت ايه اللى بتتكلم عنه 

انا اسف يا حبيبتى مقصدتش بس بقولك على اللى شفته و دلع البنت عليه 

طب خلاص مش عاوزه اسمع الكلام ده 

هناء بقت تغلى فى نفسها و تقول : أن ما وريتك يا هشام ؟ مبقاش انا هناء ....صحيح رمرام.. ديل الكلب عمره ما يتعدل 

تانى يوم محمود راح جاب بطاقته و هناء طلبت منه يروح السجل المدنى عشان يعملها توكيل

محمود قالها خلينا فى الفتره المسائيه احسن بتكون اروق و الزحمه تكون خفت بعد كدا هناء و محمود راحوا الشركه سوا

هى قعدت مع عبدالسلام تشوف باقى الورق و محمود راح لهشام مره تانيه

و ذكر له فى وسط الكلام أنه هيعمل توكيل لهناء بالاداره 

هشام عمل نفسه متفاجئ 

طب و ليه تعمل كدا يا محمود ....هو انا مبشككش فى مدام هناء بس برده ليه تسلم لها شركتك ....و إن كان على الشغل منا ممشي الشغل زى ما تكون موجود بالظبط اهو متقلقش من حاجه

تصدق عندك حق يا اتش بس هقول لهناء ايه دا انا وعدتها ننزل اخر النهار اعملها التوكيل 

هقولك انا ....انت تروح تسيب البطاقه فى درج المكتب و توصل معاها للشهر العقارى و اول ما الموظف يطلب بطاقتك تعمل انك متفاجئ و انك نسيتها فى المكتب 

تصدق صح يخربيت دماغك دى ...انا هعمل كدا

و فعلا محمود عمل كدا و خرج من الموقف دا و هناء طبعا كانت متغاظه جدا و فضلت تبرطم و تلوم فيه و تقوله حرجتنا مع الناس 

محمود لما روح قال لهناء انا عاوز اعترف لك بحاجه بس متزعليش منى 

فى ايه اتكلم 

انا منستش البطاقه و لا حاجه انا سبتها بنفسي فى المكتب 

نعم ....و ليه عملت كدا ...اما انت مش عاوز تعملى توكيل وافقت ليه من الاول ؟؟

لا مين قالك انى مش عاوز بس هشام هو اللى نصحنى بكدا و قالى أنه هو هيشوف الشغل و مفيش داعى انى اعمل الخطوه دى

يا سلام ...و انت بقا بتسمع كلامه ....طييييب يا محمود انا بقا مليش دعوه بيك و لا بشغلك تانى و خليك مع سي هشام دا ينفعك 

لا يا حبيبتى انتى وعدتينى انك مش هتزعلى منى بس مش عارف هشام قالى اعمل كدا ليه ؟

هقولك انا هو قالك كدا ليه ....لأن الاستاذ فى اخر 

شهر....الشهر اللى انت غبته ساحب فلوس على المكشوف و فى مبالغ كبيره مسحوبه من رصيد الشركه مش مكتوب قدامها اى شئ و لا معروف اتسحبت ليه 

معقوله يا هناء ...طب ما نسأله ليه سحبها اكيد عنده سبب 

بطل السذاجه اللى انت فيها دى انت متعرفش أن المال السايب يعلم السرقه 

امال نعمل ايه ما احنا لازم نفهم ....انا بكرا هروح اتكلم معاه و افهم صرفها فى ايه

ملكش دعوه بالموضوع ده  يا محمود خلينى منى له و انا هعرف اجيب حقنا ازاى 

تانى يوم هناء و محمود راحوا الشركه و هناء طلبت من محمود يستناها فى المكتب و دخلت هى لهشام 

هناء دخلت و قفلت الباب و حطت أيدها فى وسطها 

هشام رفع نظره من الورق اللى قدامه و ابتسم ابتسامه فيها مكر و قالها اهلا اهلا هناء هانم 

انت عاوز منى ايه يا هشام ؟؟

منا قلت لك فيها لأخفيها 

و ان معملتش اللى انت عاوزه ؟؟

يبقى انتى اللى جنيتى على نفسك 

لا فوووق انا ممكن اوديك ورا الشمس 

ضحك هشام و قالها تودى مين يا ماما هو انتى متعرفيش أننا فى مركب واحده

اسمع يا هشام ...

لا اسمعى انتى يا ماما ....

يا ترى هشام و هناء هيوصلوا مع بعض فى الحوار لايه؟؟

دا اللى هنعرفه فى الجزء الجاى باذن الله

يتبع ......😘

#د.جيهان_عادل💐

#حكاية_محمود

#الجزء_الثالث_عشر_و الاخير

هناء دخلت و قفلت الباب و حطت أيدها فى وسطها 

هشام رفع نظره من الورق اللى قدامه و ابتسم ابتسامه فيها مكر و قالها اهلا اهلا هناء هانم 

انت عاوز منى ايه يا هشام ؟؟

منا قلت لك فيها لأخفيها 

و ان معملتش اللى انت عاوزه ؟؟

يبقى انتى اللى جنيتى على نفسك 

لا فوووق انا ممكن اوديك ورا الشمس 

ضحك هشام و قالها تودى مين يا ماما هو انتى متعرفيش أننا فى مركب واحده

اسمع يا هشام ...

لا اسمعى انتى يا ماما هتلعبى من ورايا هجيبك الارض ....و مش هخليه يعملك التوكيل اللى انتى هتموتى عليه ....محمود مبقاش زى الاول محمود راجع اهبل كلمه تجيبه و كلمه توديه

ايووه انت قلتها اهو كلمه تجيبه و كلمه توديه و طبعا هيكون تأثير مراته حبيبته عليه اقوى من تأثير صاحبه و بعدين لم نفسك لانك مفضوح و انا قلت له على المبالغ اللى سحبتها ع المكشوف

بقا كدا .....لا برافووو عليكى ....هى بقت كدا يعنى ؟؟

لا يا ماما انا لو غرقت مش هغرق لوحدى ...انا هشدك معايا 

لا اتكلم على ادك انا معايا ورق يوديك السجن 

يودى مين يا حلوه انتى نسيتى أننا مع بعض فى كل حاجه ....نسيتى أننا خططنا ازاى نتخلص من محمود بعد ما نسرق منه فلوس القرض ....نسيتى أننا سلطنا عليه رجاله مناع علشان يخطفوه و بعدها يقتلوه و يتووه فى اى داهيه ....نسيتى أننا اتقاسمنا الفلوس بالنص ...يعنى احنا مينفعش نبعد عن بعض و لا كل واحد مننا يتصرف بمزاجه 

انت عاوز ايه يا هشام ؟

عاوز النص فى كل حاجه .....اى حاجه هتاخديها من محمود أو تكتبيها باسمك هاخد نصها 

انت اتجننت اديك نصها ليه ؟؟

تدينى نصها علشان انا السبب فى النعيم اللى انتى فيه ده دلوقتى و انا السبب فى انك هتبقى مليونيره بعد أيام 

طيب يا هشام سبنى افكر 

لا يا حلوه ما انتى متنيمنيش لحد ما الاهبل يعملك التوكيل

يعنى عاوز ايه دلوقتى ؟؟

عاوز تمضيلى على بياض الورقه دى 

انت اكيد اتجننت ورقه ايه اللى امضيلك عليها على بياض ؟

خلاص نعمل عقود و تبعيلى نص أملاك محمود بتاريخ متأخر شويه 

يا هشام انت بتقول ايه؟؟ ازاى هكتب لك حاجه لسه مبقتش ملكى اصلا 

معرفش و الله بس انتى اللى بدأتى و اتحملى نتيجه أفعالك 

انا برده اللى بدأت و الا انت اللى رمرام ؟

رمرام ؟؟ مش فاهم رمرام ازاى يعنى ؟؟

خلاص مش مهم ....انا لما محمود يعملى التوكيل هعيد عقد الشراكه بينا و اخليه النص بالنص 

طب و باقى الحاجه ؟

لا ملكش فيه بقا .....لازم تبطل شغل العيال اللى بتعمله دا ياهشام محمود ممكن ترجع له الذاكره فى اى وقت و ساعتها احنا الاتنين هنخسر 

خلاص انا موافق بس على شرط 

ايه هو الشرط؟؟

ترجعيلى المليون جنيه اللى ادتهالك من فلوس القرض بتاع محمود 

الا صحيح يا هشام انا ملقتش فى الورق اللى جابهولى عبدالسلام اى حاجه عن مناقصه وزارة الزراعه دى ...انت عملت ايه فى المناقصه دى 

انا ..انا ....

قول يا هشام عملت فيها ايه ؟؟

انا عملت شركة صغيره كدا و اخدت العمليه من الباطن من شركه محمود 

و الله ؟؟؟ ايه الحلاوه دى ؟؟ و انا زى الهبله معرفش اى حاجه عن الكلام دا خالص ....انت مطلعتش سهل ابدا ...لا و بجح و بتطلب منى المليون جنيه كمان 

اسمع بقا لما اقولك ....انت هتجيب لى المليون اللى عندك و هاخد الاتنين مليون نعمل بيهم حساب مشترك بينى و بينك علشان اعرف كل جنيه بتصرفه فى ايه و تدخلنى شريكه معاك فى الشركه بتاعتك دى

و انا موافق بكرا هجيب لك المليون جنيه و انتى تجيبي فلوسك و نروح بنك تانى غير اللى بنتعامل معاه خالص و نعمل الحساب المشترك ده 

هناء خرجت من عند هشام و هى بتغلى و بتفكر له فى مصيبه تتخلص منه

نفس الشئ هشام فكر أنه ينتقم منها و يحرق قلبها على فلوسها 

هناء روحت البيت و دماغها عماله تفكر هتعمل ايه مع هشام الكلب ده .....محمود لاحظ انشغالها و سألها قالت له انها مشغوله بسبب الشغل و انها كلمت هشام و هيقعد معاها بكرا يفهمها على كل حاجه 

محمود قالها مش قلت لك هشام اكيد انسان كويس و انا بكرا لما نقعد ....

لا يا محمود خليك هنا ...اليوم هيبقى طويل عليك و هتتعب ..انا لما اخلص مع هشام هتصل و اقولك على كل حاجه 

امرك يا حبيبتى 

بالليل جه تليفون من أحمد لمحمود و قاله خلاص يا محمود بكرا هتبقى نهايتهم انا معايا تسجيلات باعترافاتهم 

أنهم سرقوك و كانوا عايزين يقتلوك

صحيح يا احمد طب و إذن النيابه ؟؟

متخافش يا سيدى انا طلعت إذن النيابه بناء على البلاغ اللى انت قدمته و التحريات اللى عملتها و التسجيل قانونى ميه فى الميه 

طب و ليه نستنى بكرا يا احمد ...ليه مقبضتش عليهم انهارده ؟؟

هقولك يا سيدى ..بكرا هما هيجيبوا فلوسك و انا نويت اقبض عليهم بفلوسك و احرزها علشان ارجعها لك

انا مش مصدق نفسي معقول اللى بتقوله دا يا احمد 

ايوا معقول ...بكرا هلملك العيال اللى نفذوا العمليه ....اه انا عاوز عم سعد بكرا و بنته علشان يشهدوا معاك أنهم خرجوك من التربه و اعمل مواجهه للمجرمين مع بعض 

حاضر يا احمد انا مش عارف اشكرك ازاى 

يا سيدى ابقى اشكرنى لما حقك يرجعلك...سلام دلوقتى 

تانى يوم احمد نفذ خطته و قبض على هشام و هناء و هما رايحين على البنك بالفلوس ...و طبعا هشام بقى يزعق و يقول بتقبضوا على ليه انا راجل مهندس محترم البلد فيها قانون 

احمد رد عليه ما هو عشان البلد فيها قانون انا بقبض عليك دلوقتى و اظن انت عارف عملت ايه فى محمود انت و الهانم اللى معاك 

هناء اول ما سمعت اسم محمود وشها اصفر و كأن روحها بتطلع 

طبعا هشام و هناء أنكروا كل حاجه لما وصلوا القسم لكن احمد واجههم بالتسجيلات اللى ما بينهم و برجاله مناع اللى خطفوا محمود و تم تحريز الاتنين مليون جنيه اللى معاهم 

احمد استجوب عزيزه و عم سعد و عم سليم اللى خرجوا محمود من الترب 

اتحول هشام و هناء  و رجاله مناع للمحاكمه بتهمه التعذيب و الشروع فى القتل و السرقه

و رجع لمحمود فلوسه 

محمود خرج من النيابه هو و عم سعد و عزيزه 

محمود بص لعزيزه و قالها انتى وحشتينى اوى يا عزيزه 

عزيزه اتحرجت و قالت له.... انا اسفه يا محمود على المعامله اللى كنت بعاملك بيها دى ....ابويا فهمنى على كل حاجه 

لا متتاسفيش و لا حاجه انا كنت متأكد أن اللى بتعمليه ده من ورا قلبك 

ممكن اطلب منك طلب يا عم سعد و متكسفنيش ؟

اتفضل يا ابنى 

انا طالب منك ايد عزيزه 

هو احنا اد المقام يا ابنى ؟؟

طبعا انتوا اد المقام يا عم سعد انتوا اطيب و أطهر ناس عرفتها فى حياتى ...انتوا احسن من ناس كتير راسمه نفسها و ملونه وشوشها و عامله روحها ولاد ناس

و انا موافق يا محمود .....الف مبروك يا اولاد 

محمود اتجوز عزيزه و عمل لها فرح كبير اوى و عاشوا فى سعاده و هنا. 💞💞💞💞

تمت 

🌹🌹🌹🌹🌹🌹🌹🌹🌹🌹🌹🌹🌹🌹🌹

انا عاوزه اقول كلمه اخيره ....الخيانه من اقرب الناس شيى صعب جدا و الطمع هو اصل الشرور ....الطمع فى محمود خلى اقرب الناس له يفكر يقتله علشان شويه فلوس ملهومش لازمه.

التكافؤ مهم  لكن يبقى الحب هو المحرك الأول فى حياتنا

#د.جيهان_عادل🌹

ارجوا أن تنال القصه اعجابكم ...و ارجو الدعاء لوالدى رحمه الله بالرحمه و المغفره و سائر موتى المسلمين