هويدا
الجزء الخامس و العشرون
تركت هويدا الجميع و هم فى ذهول من حديثها فهى من وقت رجوعها خاضعه لا تستطيع الرد و تعمل فى صمت
اغتاظت زهيره بشده و دفعت ابنها بيدها قائله
متكونش ابنى و لا اعرفك الا لو شربت من دمها الليله البجحه دى
حاضر يا اما هقطع لك نفسها الليله
بس هات لى العيال منها الاول
حاضر يا اما
دخل صلاح و الشر يتطاير من عينيه ، امسك بعصا غليظه و دخل بها على هويدا ليجدها فى مشهد عجيب لم يراه من قبل
وجدها تقف على السرير ممسكه بسكين طويل تضعه تحت ذقنها... شعرها منكوش و عيناها تنظر إلى السماء و تهمس بكلمات غير مفهومه
واقفه كدا ليه يا بت انتى ؟؟ انزلى من على السرير ....هتعملى فيها مجنونه يا روح امك ؟؟
انزلت هويدا نظرها و صوبته ناحيه زوجها قائله بصوت أجش يشبه صوت الرجال
اوعى تقرب لها لاقتلك يا صلاح يا ابن زهيره
تقتلنى ؟؟ انت مين انت
انا اللى هجيب لها حقها منك و من امك
انتى اتجننتى يا هويدا و الا ايه ؟
هى متجننتش انا اللى هجننك و لو مطلعتش دلوقتى من الاوضه هدبح لك عيالك و هخليك تحصلهم
احصلهم دا ايه؟؟؟ انزلى يا بت بلاش هزار
انا مبهزرش ...عاوز تتأكد قرب و انت تشوف هعمل فيك ايه ؟
و هو انا هخاف من حتة عيله زيك ؟؟؟
انت مبتتشطرش الا عليها لكن سعيد لما ضربك عشان شافك بتبص لمراته كنت زى الكلب مقدرتش تنطق معاه
انتى عرفتى حكايه سعيد دى منين ؟
هى متعرفش بس انا اعرف عنك كل حاجه
يا خبر اسوح ....يا اما ...الحقينى يا اما
شعر صلاح بالخوف الشديد يتملك قلبه و تذكر حديث امه أن هويدا ملبوسه
خرج صلاح مسرعا و هو يرتعد و توجه إلى زهيره
الحقى يا اما ...البت بابنها اتجننت
اتجننت ازاى يا واد انت ؟؟
البت ماسكه سكينه و مبرقه للسما و صوتها زى الراجل و بتقولى هقتلك انت و عيالك
دى تلاقيها عامله عليك فيلم يا خايب ...اه يا عبيط و صدقتها ؟؟ دى تلاقيها عاوزه تنفد من العلقه اللى هتاخدها
لا يا اما لا دى قالت لى على حاجه محدش يعرفها ... و بعدين دى شكلها يرعب ...... هو انتى مش قلتى قبل كدا انها ملبوسه و بتعمل حاجات غريبه ؟؟
انا ؟؟
ايوا انتى ...انتى نسيتى و الا ايه ؟؟
لا لا منستش بس هى من يوم ما رجعت بقت حلوه...تلاقى اهلها عالجوها و بتعمل كدا تمثل عليك
لا يا اما ...باين رجعت تعبانه تانى ...انا خايف يا اما لتقوم بالليل تموتنى
بعد الشر عنك يا حبيبي انشاله هى و اهلها كلهم ...انا هدخل اشوفها بتمثل عليك و الا بصحيح ؟؟ تعالى معايا
لا مش داخل تانى
اه يا خواف ...متخافش يا واد انت
خدى ابويا معاكى
لا سيب ابوك ملوش فى لؤم الحريم دا ..انا هقوم لها انا و هوريك انها بتعمل كدا عشان متاخدش العلقه
دخلت زهيره على هويدا لتجدها تجلس فى الارض واضعه أمامها صنيه بها دجاجه مذبوحه .... تغرس بها بالسكين و ترفعها و تعيد غرسها مره اخرى دون أن تنظر اليها
تعجبت زهيره و دخل الخوف قلبها
بتعملى ايه ؟؟ انتى يا بت قومى
مش عارفه بعمل ايه يا زهيره ؟؟ بعمل اللى هعمله فيكى
انتى اتجننتى و الا جرا لعقلك ايه ؟؟؟
جن لما يلخبطك يا زهيره يا بنت عديله
انتى بتتكلمى كدا ليه ؟؟ و جايبه الفرخه دى تعملى بيها ايه ؟
بتعشي.....انتى مش طفحتى انتى و عيالك ؟
بتتعشي ازاى ؟ ....دى لحمه نيه
احنا بنحب اللحمه النيه و لو مخرجتيش هاكل لحمك زى الفرخه دى
تناولت هويدا قطعه من لحم الدجاجه النى و مضغتها فى فمها و هى تنظر لزهيره بعيون جاحظه
خرجت زهيره مسرعه
البت اتهبلت يا صلاح ....البت بتاكل فراخ نيه بدمها ....يا لهوى عليا و على سنينى
طب و بعدين يا اما هنعمل ايه دلوقتى ؟؟
تروح لامها احنا مش ناقصين قرف ...بس ناخد ولادنا منها لتخنقهم و الا تعمل فيهم حاجه
طب مجبتيش العيال ليه يا اما ؟؟
انا خفت يا ابنى ...دى شكلها وحش اوى ...خفت اقرب تموتنى
سمعت هويدا حديث صلاح و زهيره ...ضحكت كثيرا و هى تلقى بلحم الدجاج النى من فمها
هو انتوا لسه شوفتوا حاجه ؟؟ دا انا هطلع على جتتكم البلا باللى عملتوه فيا ....اصبروا عليا بس 😠
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
روعة يا جميل 💜
ردحذف