هويدا
الجزء العاشر
ذهب عبدالحميد و الشيخ عبدالعال إلى زهيره و زوجها ليقوموا بالصلح بينهم و بين زوجة ابنهم و لكن كان لزهيره رأى اخر ....
دق عبدالحميد الباب و كان الشيخ عبدالعال يقف خلفه بخطوات ممسكا بسبحته العاج منشغلا بالاستغفار و التسبيح
فتحت زهيره الباب لتجده أمامها
سلام عليكم يا حاجه
و عليكم السلام يا عبدالحميد
احنا جايين انا و الشيخ عبدالعال فى خير باذن الله
خير ان شاء الله يا الف مرحب
هو الحج موجود ؟؟
طب مش تقولى فيه ايه الاول ؟؟
جايين عشان موضوع مرات ابنك
اه .... مالها ؟؟
هو احنا هنقف على الباب نتكلم و الا ايه ؟؟ دا انتى ام الأصول كلها
ما هو عشان أنا بفهم فى الأصول مقدرش ادخلكم و راجل البيت مش فيه
هو أبو صلاح مش هنا ؟؟
لا مش هنا
و لا صلاح ؟؟
و لا صلاح هنا
طيب نستأذن احنا و نبقى نجيله بعد العشا
لا دول مسافرين و جايين بعد كام يوم
كدا ؟؟ طيب يا حاجه ...اسفين على ازعاجك ....كنا بس
شرفت يا عبدالحميد
الشرف لينا يا حاجه نستأذن احنا
انصرف عبدالحميد من أمام زهيره و هو يشعر بالخجل الشديد من الشيخ عبدالعال
معلش يا حج انى جبتك ع الفاضى
و لا يهمك يا ابنى ...مدام ماشيين فى خير يبقى مش فاضى و لا حاجه ...و اى وقت تعوزنى انا تحت امرك
الأمر لله وحده ...دا عشمنا برده يا حج
اغلقت زهيره الباب و هرولت للداخل لتجد صلاح و ابوه يجلسان أمام التلفاز
مين اللى كان بيخبط يا حاجه ؟؟
المخفى عبدالحميد
عبدالحميد مين دا ؟؟
الواد عبدالحميد ابو سويلم
و دا عاوز ايه ؟
ال ايه كان جايلك هو و شيخ البلد عشان يصلحوا مرات ابنك
و مدخلتهمش ليه يا اما ؟؟
اخرس يا واد انت ....ايه حنيت للسنيوره و الا ايه ؟؟
لا بس كنا نشوف عاوزين ايه و جايين يقولوا ايه
متخافش هيجوا تانى ...شكل الوقت طول على المحروسه عزه و مبقتش طايقه قعده بنتها عندها باعتالنا المراسيل ....
طب و ماله يا حاجه ...كنتى دخلتيهم و شوفتى هيقولوا ايه ؟
ادخلهم ازاى يا حج ...مش لما نرتب الكلام الاول مع بعض ...هو انت عاوزهم يغلطونا و يجيبوا الحق علينا ؟؟
و يغلطونا ليه بقا ؟؟ انتى مش بتقولى أن البت اللى قلت ادبها عليكى و شتمتك و انتى متكلمتيش و لا نطقتى معاها بكلمه ؟؟
ايوا دا اللى حصل بس تفتكر هما هيقولوا كدا ؟؟ اكيد هيقولوا انى أنا اللى ضرباها و طاردها من البيت
و دا محصلش طبعا يا اما ؟؟
ايوا امال .....انا لو ضربتها و الا مديت ايدى عليها كنت قلت هو انا هخاف منها و بعدين قدامك خالتك سعديه كان كل حاجه قدامها يدوب لسه بقولها خلى خالتك تكشف عليكى اشتغلت شتايم و نكشت شعرها و بقت تقطع فى هدومها انا قلت البت اتلبست...قلت لها روحى يا بنتى الله يسهل لك
اتلبست ازاى يا اما ؟؟
ايوا يا ابنى انا مكنتش عاوزه اقولك بس مدام بقا باعتين ناس يبقوا لازمن يعرفوا الحقيقه ....البت دى مش طبيعيه و اكيد امها كانت عارفه الكلام دا قبل ما تجوزها
مش طبيعيه ازاى ؟
البت كنت بشوفها بتعمل حاجات غريبه بس كنت بكدب نفسي
حاجات غريبه زى ايه كدا ؟؟
كنت بشوفها على طول تكلم نفسها و فى مره قمت قبل الفجر لقيتها واقفه على السطح باصه فى السما و مبرقه
قبل الفجر ؟ و انا كنت فين يا اما ؟؟
كنت نايم بتشخر يا عين امك ...ناديت عليها كذا مره و فى الاخر انتبهت و نزلت بقولها كنتى بتعملى ايه يا بت قالت لى كنت حرانه و بتهوى
و مقلتيش ليا من بدرى ليه يا اما؟؟
و الله يا ابنى انا قلت يمكن
صحيح حرانه بس لما بقى عملت كدا قدامى انا و خالتك سعديه و بقت مبرقه و عينيها شكلها يخوف اتاكدت انها مش طبيعيه و كمان كذا مره الاقى الفلوس ناقصه من الدولاب و مبرضاش اتكلم و الكلام دا محصلش الا من يوم ما البت دى دخلت البيت
ياادى المصيبه حراميه و كمان ملبوسه ....انا لازم اطلقها .... انا اخاف انام جنبها تانى لتقوم تخنقنى
زى ما تحب يا ابنى ...انا لا هقولك طلق و لا متطلقش عشان متقولش امى خربت عليا تانى ...اللى عاوزه اعمله و احنا معاك
ليه كدا يا حاجه ؟؟ ما الحاجات دى بتتعالج ...احنا نجيب لها شيخ و نعالجها
و نعالجها احنا ليه يا حج ؟؟ ما اهلها يروحوا يعالجوها و الا يغوروها فى ستين داهيه احنا مالنا
طب و الحل ايه دلوقتى ؟؟
الحل ؟؟؟؟ ...... شوف أما اقولك صلاة الجمعه كمان يومين تروح تصلى الجمعه فى الجامع اللى فى نص البلد اللى بيصلى فيه الحج عبدالعال ...تقابله و تفهمه بالمحسوس كدا أن البت ملبوسه و أن مفيش داعى لقعدات و إن احنا عاوزين نطلق عشان هما غشونا و ضحكوا علينا
طب ما نتروى شويه ...و الا نقولهم يشوفولها شيخ ...البت حلوه و جدعه و خساره برده
خلاص اللى تشوفه و حسب كلام شيخ البلد معاك اعمل
اللى فيه الخير يعمله ربنا يا حاجه
يا لكى من ظالمه يا زهيره...كثير من الحموات يدفعها حب السيطره و الغيره على اولادهم لاصطناع المشاكل و افتراء الكذب على زوجات ابنائهم
لا أحد يعلم ما تفكر به تلك الخبيثه و لماذا ادعت هذا الادعاء الكاذب على زوجة ابنها ؟؟؟؟
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق