#ابو_رجل_مسلوخه
#الجزء_السابع
اسامه دخل قبل منى و يمكن شاف شكله كويس ..انا شفته من ضهره و شفت جلابيته ...بس برده مش لازم انطق زى ما امى قالت لى لياخدونا يحبسونا احنا ..ما هم اكيد هيسيبوا الحمار و يتشطروا على البردعه
مر يومين و كنت اسمع من ابويا أن حالة اسامه مبتتحسنش و الدكاتره محتارين فى حالته
ابويا كان حزين اوى و مبيتكلمش تقريبا. كان يحط لنا الاكل لما يجى من الغيط و يدخل اوضة الكنب ميطلعش الا تانى يوم
فى الفتره دى جوز ازهار خرج من تخشيبه المركز لأنهم اتاكدوا انه مش هو اللى قتل ازهار
الناس فى البلد بقت تقول أن ازهار اتقتلت و اتسرق منها يجى نص كيلو دهب و أن اكيد حد من اللى هى كانت بتغيظهم بدهبها هو اللى قتلها و سرق فلوسها
رحت لحامد بتاع بره عشان اشترى ابره وابور و سمعته بيتكلم عليها مع شويه ستات واقفين معاه
فينك يا ازهار و فين ايامك ؟؟ الله يرحمك يا غاليه
طبعا ما هى كانت بتنفعك بشئ و شويات
و حياتك يا ستوته كانت بتاخد منى يوميا حاجات تعدى السبعين قرش و ساعات جنيه كمان
خدت الشر و راحت ههههه
عارفكوا يا نسوان البلد كلكم كنتوا بتغيروا منها
و هنغير منها ليه بقا ....يلا اهى راحت للى خالقها و ميجوزش عليها إلا الرحمه
رحمة ؟؟؟ دا انتى غلبانه اوى يا بهانه
ليه يا ستوته ؟؟ قصدك ايه يا اختى ؟
بيقولوا اللى قتلها واحد كانت ماشيه معاه استغفر الله العظيم يارب
طب و لما هى كانت ماشيه معاه قتلها ليه بقا ؟
بيقولوا كانت بتصرف عليه فلوس جوزها و لما مرضيتش تديله قتلها
هما مين اللى بيقولوا دول يا ستوته ؟
الحكومه يا اختى ...هو انا هجيب الكلام من بره يعنى
استغفر الله العظيم ..ياما تحت السواهى دواهى
و هى دى كانت ساهيه ؟ دا هي الداهيه بذات نفسها
بقولكم ايه ؟ دا محل اكل عيش و مش عاوزين نجيب سيرة واحده ماتت و بقت عند ربها هنا.....و يلا يا اختى انتى و هى مش خدتوا حاجتكم يلا طرقونى ....و انت يا واد يا ابن عبدالحميد عاوز ايه يا واد ؟؟
عاوز ابره وابور
خد اهى ...هات مليم
المليم اهو
هنا جه غفير من غفر العمده و وقف قدام محل حامد و نادى بصوت عالى
حامد اسماعيل ابو الوفا الشهير بحامد بتاع بره
نعم يا شيخ الغفر
وكيل النيابه فى دوار العمده طالبك بالاسم و الهيئه
طالبنى انا ؟؟؟ ليه ؟ هو انا عملت ايه ؟؟
معرفش و يلا بلاش لكاعه
طب استنى هقفل المحل
مفيش وقت وكيل النيابه عاوزك فى التو و اللحظه
طب هنادى على مراتى تيجى تقف مكانى
حامد راح مع الغفير و انا كان عندى فضول اعرف وكيل النيابه عاوزه ليه ؟
مشيت وراهم من بعيد و رحت على دوار العمده
العمده كان له مكتب فى دواره و الشباك بتاعه طويل و عليه حديد علشان الحراميه
و لأجل حظى الحلو وكيل النيابه كان قاعد فى الاوضه دى
وقفت جنب الشباك مع كوشه عيال كانوا واقفين و بيتفرجوا على العمده و هو عمال يقدم لوكيل النيابه البط و الفطير و المحشي و الذى منه
بعدها خلى الغفير يصب عليه و يغسل ايده من غير ما وكيل النيابه يقوم من مكانه
حامد بتاع بره كان واقف دا كله قدام الباب و مكنش واقف لوحده دا كانوا جايبين كل اللى كان بيتعامل مع ازهار من جيران لسواقين ركبت معاهم
اخدت بالى أن عمى واقف معاهم ...الله ايه اللى جابه هنا ؟؟؟ دا سواق بس مش جوه البلد ...دا بينقل ركاب من عندنا لبلد جنبنا اسمها ميت يعيش و ميت ابو خالد
طب و ايه علاقته بازهار؟
لما شفت عمى استخبيت خفت ليشوفنى و يزعقلى
حامد دخل و سأله وكيل النيابه عن ازهار
حامد قاله على كل حاجه يعرفها عن ازهار و انها كانت كريمه الله يرحمها و انها كانت بتاخد سجاير و حاجات تانيه يوميا بخمسين قرش أو اكتر
وكيل النيابه استغرب لأن ازهار بعد تشريحها و حسب الطب الشرعى مكنتش بتدخن و فعلا هو لقى بقايا سجاير ملفوفه كتير اوى فى الطفايه
وكيل النيابه خلص مع حامد و طلب منه ميسافرش فى اى مكان
حامد وقف مطرطق ودانه و متنح لوكيل النيابه
عاوز ايه يا جدع انت ؟ واقف كدا ليه ؟
اصل انا كل يومين بروح المركز اجيب بضاعه و لامؤاخذه
متبعدش عن المركز بتاعكم ... بقولك اهو
خرج حامد و انا لقيت نفسي هتأخر اوى على اخواتى قمت راجع لقيت ابويا شايط فى البيت و كان لسه هيجيب الفلكه و يمدنى قلت له
معلش يا أبا ...اللى اخرنى انى شفت الغفير واخد عمى هشام و طالع على دوار العمده
مشيت وراه و عرفت أن وكيل النيابه طالبه
انت بتقول ايه يا واد يا سعد ؟؟
زى ما بقولك يا أبا
ابويا رمى الفلكه من ايده و جرى على دوار العمده
بعد شويه يجى ساعه كدا لقيته راجع هو و عمى
ابويا اخده و دخله اوضة الكنب و قفل عليهم الاتنين
كنت هموت و اسمع بيقولوا ايه ؟ رحت لافف الناحيه التانيه ووقفت جنب شباك الاوضه و سمعت ابويا بيقوله
انت ايه علاقتك بازهار ؟؟
مليش علاقه بيها
امال وكيل النيابه كان عاوزك ليه ؟
دهديه .... كان عاوزانى عشان يسألنى زى ما سأل عشرين واخد غيري
و اشمعى انت بالذات من ضمن البلد كلها ؟
معرفش روح أسأله
لا مسألوش هو أسألك انت
يوه يا عبحميد انت بتسألنى اسئله اكتر من وكيل النيابه نفسه
ايوه لازم أسألك و انت عارف ليه كويس
لا معرفش ...مكنتش دخلت جوه نافوخك انا
انا مش قابلتك بتجرى ناحيه بيت ازهار يوم ما اتقتلت بعد المغرب ؟؟
ايوه و دى فيها ايه يعنى ؟؟
انت اللى عملتها يا هشام ؟؟
انت اتجننت يا عبحميد لا طبعا مش انا
طب احلف كدا برحمة ابوك
لا محلفش و مش انا اللى عملتها ...انت عاوز تلبسنى تهمه و الا ايه ؟؟
اوعى يا هشام ...دا ابوك موصينى عليكى و كنت عاوزك تعيش معايا هنا وسط عيالى بس انت اللى صممت تعيش لوحدك فى دارنا القديمه
يوووو انت محسسنى انى قتال قتله ...انا همشي بدل ما الاقيك مبلغ عنى
اخص عليك انا ابلغ عنك ؟؟ انا خايف عليك
يا سيدى متخفش ...وكيل النيابه ذات نفسه حقق معايا و ملقاش عليا حاجه ...تفتكر لو هو شاكك فيا كان سابنى ؟
طب اقعد اقعد يا هشام
ادينا قعدنا
انت تبات معايا اليومين دول
و ليه يعنى ؟؟
مش عاوزك تظهر كتير فى البلد احسن حد يكون شافك و يروح يبلغ الحكومه عليك ...اتكن هنا يومين و خلاص
حاضر هتكن عشان اريحك بس
عمى قعد عندنا اسبوع و مكنش بيخرج نهائى من الأوضه و كان طول ما هو قاعد يدخن سجاير ....و كان يبعتنى اجيب له السجاير من حامد
لما عدى الاسبوع لقيت امى جايه و معاها اسامه و معاهم جارنا حكيم كدا فجأه
ابويا لما شافهم استغرب
ايه اللى جابك يا نرجس ؟؟ منا كنت عندكم من شويه ؟
الدكتور كتب لنا على خروج يا عبدالحميد و مكنتش عارفه هعمل ايه لولا حكيم الله يعمر بيته كان فى المستشفى روحنى معاه
متشكرين يا حكيم يا اخويا
بتشكرنى على ايه بس ؟ انا كنت واخد سلامه ابنى اكشف عليه كان عنده سخونيه شديده اوى
الله ...دا دور بقا و ماشي على العيال كلها ، اسامه برده كان عنده سخونيه جامده
الظاهر كدا صحيح
طب تعالى يلا نشرب الشاى سوا
لا يدوب اروح
عليا الطلاق لانت داخل... يلا يا نرجس اعمليلنا براد شاى بسرعه ...تعالى دا اخويا هشام جوه ...
اسامه اول ما سمع اسم عمى هشام صرخ
و قال
لا لاااا ...... ابعدوه عنى هيقتلنى زى ما قتل ازهار
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ..
تعليقات
إرسال تعليق