مطمون الجزء الثاني

#مطمون_(قصة حقيقيه)

#الجزء_الثانى

الولد ابتسم لى و مد لى ايده بالعروسه و قالى بصوت هادى :

 

تلعبى معايا 🥺 ؟؟؟؟؟

هزيت دماغى بأيوه

و اخدت منه العروسه ...العروسه كانت حلوه بس كانت مبرقه و لون عينيها احمر و بينور .. شكلها مرعب جدا و كانت بتلف رأسها لفه كامله لوحدها 

بس انا برده مجاش فى دماغى دا ايه او بيكون معناه ايه 

اخدت العروسه و ابتديت اسرح لها شعرها و هو قاعد قدامى على السرير بيبص فى من غير ما ينطق كلمه واحده 

هو انت اسمك ايه ؟؟ 

هو انت ميتردش عليا ليه ؟؟ 

مش قلت عاوز تلعب معايا ؟؟

الولد هز دماغه ببطء و قالى ايوه 

طب نلعب ايه ؟؟ 

انا عندى العاب كتير لو تحبى اوريكى واحده منها 

ياريت ...انا معنديش اى العاب خالص غير عروسه قديمه كنت لقيتها مره واقعه فى الشارع و انا ماشيه مع ماما 

عارف 

عرفت منين ؟

شفتك و انتى بتاخديها 

بس انا مشفتكش 

مش مهم ...هتلعبى معايا و الا لا ؟؟

ايوه هلعب 

طيب عاوزك تغمضى عينك و تجيبي ايدك فى ايدى 

ليه ؟؟؟ هى دى لعبه ايه ؟؟ 

لعبه جميله علمهالى أبى

فين ابوك ده ؟؟ 

فى مكان بعيد 

هو انت بتحبه ؟؟ 

ايوه بحبه 

انا مبحبش بابا عشان بيضربنى 

عارف 

عارف ايه ؟؟ 

عارف أنه بيضربك و عشان كدا جيت العب معاكى 

انت طيب اوى ...اسمك ايه ؟؟ 

اختاريلى اسم ...تحبى يكون أسمى ايه ؟؟

اممممم ...ينفع اسميك اندرو ؟؟ 

ينفع بس جبتى الاسم ده منين ؟؟ 

كنت بلعب مع ولد ظريف اسمه أندرو لما رحنا لخالتو انا و ماما 

اه ...خلاص انا اندرو يلا بقى علشان نلعب سوا 

يلا ...اعمل ايه؟؟

غمضى عينك 

غمضت اهو 

هاتى ايدك 

اول ما ايدى لمست ايده حسيت بحراره شديده اوى خلتتى افتح عينى تانى 

انت عيان ؟؟ ايدك سخنه اوى 

لا مش عيان ...يلا غمضى تانى و متفتحيش الا اما اقولك فتحى 

حاضر 

اندرو مسك ايدى و انا مغمضه و فات وقت قصير و لقيته بيقولى فتحى عنيكى 

فتحت عينى لقيت نفسي فى جنينه مهجوره شجرها ناشف و أوراقها واقعه على الأرض و لونها اصفر و مفيهاش اى حد غيرنا احنا الاتنين 

 و لقيت مرجحتين حديد قدام جدا و مصديين 

اندرو قالى تعالى هركبك المرجيحه 

لقيت نفسي ماشيه وراه من غير ما انطق و لا أقوله اى شئ زى ما يكون مغيبه أو مش مستوعبه اللى انا فيه 

اندرو رفعنى على المرجيحه اللى كانت عباره عن كرسي حديد مصدى و سلسلتين متعلق فيهم الكرسي ده 

اندرو زق الكرسي او المرجيحه و كل ما كان يزقها كان يطلع منها صوت صرير عالى اوى زى ما يكون المرجيحه دى مشتغلتش من سنين 

كنت حاسه انى خايفه بس كنت مبسوطه انى خرجت من البيت و انى لقيت صديق العب معاه 

اندرو قعد على المرجيحه اللى جنبى و بدأ يتمرجح هو كمان 

الاول كان بيتحرك بهدوء بعد كدا المرجيحه بقت تطير فى الهوا و انا شايفاها و بضحك اوى

و كل ما اضحك اندرو يزود سرعة مرجيحته 

بعد ما خلصنا لعب بالمرجيحه اندرو قالى عاوزه تروحى ؟؟ 

لا عاوزه العب تانى

طيب تعالى نتزحلق على الزوحليقه دى ؟؟ 

هى فين الزوحليقه دى ؟؟ 

اهيه قدامك 

ببص لقيت زحليقه قديمه الوانها باهته من الشمس بس الغريب انى مشفتهاش قبل ما اندرو يشاور لى عليها مع انها فى مكان قريب جدا من المرجيحه 

برده انا كطفله مخدتش بالى اوى بس لما كبرت و استرجعت الأحداث عرفت أن كل اللى كان بيحصلى ده مش طبيعى 

رحت انا و اندرو اتزحلقنا و كنت فرحانه اوى 

كل ما اتزحلق ارجع تانى و فى مره و انا طالعه سلم الزوحليقه رجلى فلتت و كنت هقع 

كان اندرو لسه تحت و لسه نازل قدامى من الزوحليقه 

فجأه لقيته ورايا بيسندنى معرفش جه بالسرعه دى ازاى 

خلصت لعب و حسيت انى تعبت من كتر الجرى و الزحلقه

عاوزه اروح يا اندرو 

طيب غمضى عينك و هاتى ايدك

 

غمضت عينى و فجاه سمعت صوته بيقولى فتحى

 

فتحت لقيت نفسي فى الاوضه و اندرو مش معايا و لا العروسه موجوده 

نمت من كتر التعب و صحيت تانى يوم خرجت لقيت امى متعوره فى وشها و اثر الضرب معلم على جسمها وقاعده حزينه 

امى نادتنى و قالت لى 

شايفه يا شيماء ابوكى عمل فيا ايه ؟؟ 

هزيت راسي بأيوه 

انا زهقت يا بنتى و مبقتش قادره اتحمل اكتر من كدا ...انا بس مش عارفه لو اتطلقت منه هروح فين و هصرف عليكى منين ؟؟ ابويا و امى ميتين و مليش غير اخواتى و كل واحد فى حاله و مش ناقص حمل حد تانى ...و مقدرش اروح عند حد منهم بيكى.. كلهم غلابه و اللى فيهم مكفيهم 

طبعا انا كنت بسمع منها الكلام ده و مش فاهمه اوى هى بتقول ايه 

امى قعدت تندب حظها و حظى معاها انها اتجوزت راجل عديم النخوه و أن دى غلطه ابوها اللى جوزهاله من غير ما يسأل عليه 

و فجأه و انا قاعده شفت اندرو بيخرج رأسه من باب اوضتى و بيشاور لى 

قمت من جنب امى و هى عماله تكلم روحها و دخلت الاوضه 

لقيته بيهمس لى

 

تعالى يا شيماء ...تعالى 

كويس انك جيت يا اندرو 

يلا نلعب تانى زى امبارح ؟؟ 

و لسه هرد عليه لقيت امى فتحت الباب 

انتى يا بت مش كنت بكلمك ؟؟ بتاخدى بعضك و تمشي ليه ؟؟ هو دا الأدب اللى علمتهولك ؟؟ 

اندرو نادى عليا يا ماما 

اندرو مين يا بت ؟؟ 

اندرو صاحبى 

و هو فين سي اندرو دا كمان ؟

قاعد قدامى اهو على السرير ...انتى مش شايفاه ؟

شايفه مين يا بنت المخبوله ؟؟ هو انتى هتجبيه من بره ؟؟! ما اكيد مخبوله زى اللى جابك 

يلا يا اختى تعالى عشان تاكلى سلقت لك بيضه بره

 حاضر يا ماما جايه وراكى 

 ‏

 ‏خرجت ماما من الاوضه و بصيت لاندرو و قلت له 

 ‏

 ‏هو ازاى ماما بتقول انها مش شايفاك ؟؟ 

 ‏

 ‏لانها مش شايفانى فعلا 

 ‏

 ‏و ليه كدا ؟

 ‏

 ‏لان محدش يقدر يشوفنى الا انتى 

 ‏

 ‏و ليه محدش يقدر يشوفك الا انا ؟؟ 

 ‏

 ‏لانى صديقك انتى و بس 

يتبع 

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..