مطمون الجزء الاول

#مطمون

#الجزء_الاول

اللى بيخاف ميقراش لان اللى هقوله مش طبيعى 

اللى هقوله حصل بحق و حقيقى مش متألف و لا هو خيال مؤلف 

حاجات كتير بتحصل حوالينا و مبنلاقيش لها اى تفسير 

و اللى حصلى مكنتش لاقياله اى تفسير و لا قادره اعرف لحد دلوقتى حصلى ليه 

و ليه انا من بين كل الناس اللى يحصلى كدا ؟

حكايتى بدأت من زمان اوى مش من قريب 

حاجات كتير كانت بتحصل و للاسف عشان كنت طفله مفهمتش ايه الحاجه اللى بشوفها دى 

انا اسفه معرفتكمش بنفسي انا شيماء بنت عاديه كان حلمى اعيش زى اى واحده فى الدنيا لكن للاسف مش كل ما يتمناه المرء يناله 

هحكيلكم حكايتى من و انا عمرى اربع سنين و من اول ما ظهر لى الكيان الغريب ده 

انا وعيت على الدنيا و انا شايفه العلاقه بين ابويا و امى زى الحرب العالميه الثانيه 

البيت كان حريقه بمعنى الكلمه 

الاتنين بيتلككوا لبعض على أقل كلمه 

مشاكل مشاكل.... مبتتنتهيش 

و كلها حاجات تافهه و هايفه يعنى مثلا امى ممكن تتخانق مع ابويا علشان نسي يجيب عيش و هو جاى 

و هو ممكن يتخانق معاها و يشتمها لو اتأخرت عليه فى عمايل الشاى 

لما كنت اشوفهم بيتخانقوا و اللى كان ساعات يوصل لمد الايد المتبادل ما بينهم ، و كنت اشوف امى بتتضرب قدامى و تتمسك من شعرها ، و مره تانيه اشوفها بتمسك السكينه لابويا 

كنت ادخل اوضتى و اقعد اعيط ...انا مش عاجبني اللى بيحصل بس مش عارفه اتصرف ازاى و اعمل ايه ؟

من الخناقات الدايمه برده بين ابويا و امى أنه كان دايما يقولها أنه عاوز طفل تانى و هى كانت تتخانق معاه و تقوله هو انت قادر على مصاريف العيله اللى عندك لما عاوز تجيب عيل تانى ؟؟ 

موضوع انى وحيده دا كان تعبنى اوى و مكنتش بلاقى حد يلعب معايا و كنت بتمنى امى تسمع كلام ابويا فى الموضوع ده علشان يكون ليا اخ او اخت العب معاه

خاصة انهم مكنوش بيسمحولى انزل العب فى الشارع زى بقية العيال 

و كنت على طول محبوسه فى البيت مع امى لان ابويا قليل اوى لما كان يخرجنا 

فى مره ابويا كان متخانق مع امى كالعاده و اليوم ده ابويا ضرب امى لدرجة أنه عورها و نزل منها دم كتير و هى من كتر الضرب اترمت فى الارض و مكنتش قادره تقوم

انا بقى اول ما شفت الدم و رميتها على البلاط افتكرت أنه موتها قعدت اصرخ  اصرخ و مش عارفه اسكت ...زى ما يكون حصل لى هلع شديد

ابويا بدل ما يطبطب عليا وياخدنى فى حضنه و يسكتنى  ..كان متنرفز اوى راح ماسكنى من كتفى و فضل يضربنى بالاقلام على وشي و يقولى 

 بتصرخى ليه يا بنت الكلب ...اخرسي مش عاوز اسمع صوتك ....عاوزه تفضحينى زى اللى جابتك ؟؟ 

بقيت اهز له راسى و مش عارفه انطق و أقوله حاضر 

ابويا رمانى على الأرض اتكفيت على وشي و هو بيشتمنى و يشتم فى امى  و بيلعن اليوم اللى شافنا فيه

و امى لما لقيته بيضربنى و رمانى على الأرض كدا راحت قائمه و ماسكه فيه و بقت تصرخ و تقوله حرام عليك يا مفترى ربنا ينتقم منك حتى البت الغلبانه مترحمتش من الافترا بتاعك ؟؟

لما لقيتهم مسكوا فى بعض تانى خفت وقمت من على الأرض بسرعه لابويا يضربنى تانى و دخلت على اوضتى 

دفنت راسي فى سريرى عشان صوتى ميطلعش و ابويا يسمعنى 

بعد شويه سمعت حركه فى الاوضه كأن حد ماشي أو صوت خطوات واضح جدا  افتكرت أنه دخل يكمل ضرب فيا 

اتعدلت بسرعه و انا بمسح دموعى 

بس ملقتوش

قلت اكيد بيتهيالى بس و انا بقوم شفت خيال مر من قدام السرير 

لكن كطفله مأدركتش دا إيه ؟؟؟؟؟؟

حطيت دماغى على المخده و حاولت انام 

غمضت عينى و استخبيت تحت بطانيتى فسمعت نفس الحركه فى الاوضه

فتحت عينى لقيت ولد صغير تقريبا قدى  فى السن شعره ناعم متسرح لقدام ووشه ابيض اوى زى ما يكون مفيهوش دم أو حد مغرقه بودره بيضا  و عنيه  سودا و متكحله كحل تقيل اوى ...و لابس هدوم شكلها غريب 

و ماسك فى ايده عروسه حلوه اوى كنت شفتها مره فى محل و طلبتها من ماما و مرضيتش تجبهالى و يومها زعقت لى و قالت لى ابقى اطلبيها من ابوكى يا اختى 

الولد ابتسم لى و مد لى ايده بالعروسه و قالى بصوت هادى :

 

تلعبى معايا 🥺 ؟؟؟؟؟

يتبع 

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..