ام فاروق ٣
شوفتى يا اختى اللى حصل لعتريس جوز حسنيه ؟؟؟
لا مشوفتش يا اختى حصله ايه ؟؟؟
حصله اللى حصل
استنى استنى هلقم الشاى و اصبه و نشربه على رواقة كدا و انتى بتحكيلى
و ماله يا اختى لقمى ...احنا ورانا ايه ؟
خدى الشاى اهو ...قوليلى بقا حصله ايه ؟؟
بيقولك امبارح جت الإسعاف خدته
ليه كفا الله الشر ؟ دا زينة الجدعان و صحته تهد جبال
بيقولك طلع له عفريت امبارح
يا لهوى ...عفريت ؟؟؟ عفريت ايه يا سميره يا اختى ؟؟ هى حارتنا فيها عفاريت ؟؟
ايوا امال ايه ؟؟ بيقولك العفريت لبس حسنيه مراته و خلاه يتفطط مكانه
يا لهوى لبسها ازاى يا اختى ...محدش قالى
و لا حد هيقولك غيري ...محدش شاف زى ما انا شوفت
شوفتى ايه قوليلى بسرعه مش قادره اتلم على اعصابى
امال لو شفتى اللى شفته بقا كنتى عملتى ايه ؟؟ مش بعيد كانوا نقلوكى مع ابو فاروق فى عربيه اسعاف واحده
ياااا اد كدا الموضوع صعب ؟
صعب و صعب يا اوختشششي
طب قولى شوقتينى
انتى عارفه طبعا انى ساكنه جنب حسنيه الباب لزق فى الباب
عارفه عارفه كملى بسرعه
انا كنت واقفه فى البلكونه بتفرج ع الرايح و الجاى و شفت ابو فاروق طالع و ضارب بوز اعوذ بالله زى ما يكون رايح يدفن ميت
مفيش تلات دقايق و سمعته بيصرخ
يا لهوى بيصرخ ازاى ؟؟
بقا يقول ارحمنى يا عفريت ...الحقونى يا ناس العفريت هياكلنى
هياكله ؟؟ يا لهوى ...ها و بعدين ؟؟
انا بقا حطيت ودنى ع الحيطه عشان اتأكد أن اللى سمعته ده صحيح
اه ...و سمعتى ؟؟
ايوه سمعت حسنيه و هى عماله تقوله تعالى فى حضنى يا ريسوووو
ريسو مين يا اختى ؟ العفريت ؟؟
معرفش يا اختى انا سمعتها بتقول كدا و سمعت جوزها بيصرخ و هوب لقيته مره واحده اتهبد على الأرض
يا لهوى ...مات ؟؟
لا اغمن عليه
و عملتى ايه يا سميره
جريت يا اختى عليهم و قعدت اخبط ع الباب زى المخبرين لدرجة انى كنت هكسره على دماغها
طب و انتى مالك يا سميره ؟؟
مالى و مالى يا اختى مش عتريس ده الجو القديم بتاعى و لولا حسنيه شبشبت له و سحرت له كان زمانى انا اللى متجوزاه دلوقتى
طب و بعدين عملتى ايه ؟؟
لقيت حسنيه يا اختى طالعالى شكلها عجيب عامله شعرها زى عفركوش ابن بردكوش و دهنا وشها اتنين كيلو بويه
اول ما شفتها اتخضيت قامت مبرقالى و شخطت فيا
عاوزه ايه يا سمييييره
عاوزه سلامتك يا اختى
امال بتخبطى ليييييه ؟
حقك عليا يا اختى انا غلطانه بالاذن انا
اذنك معاكى يا اختى
و رزعت الباب ورايا
طب و انتى استفدتى ايه بقا لما رحت لها ؟
كنت عاوزه اعرف عملت فى الراجل ايه ؟
و عرفتى ؟؟
طبعا عرفت
عرفتى ايه بقا ؟
عرفت انها كانت بتسحرله.... طلع العفريت راح لابسها و هوب اول ما جوزها شافه طب ساكت
يا لهوى ...انتى متاكده يا سميره ؟
طبعا متأكده يا تفيده زى منا شايفاكى كدا
عينى عليك يا عتريس يا اخويا
سلامة عنيكى يا تفيده
مالك يا وليه ؟
مليش ...بس ملكيش دعوه بعتريس
جتك خيبه مش لما يقوم منها الاول ...دا تلاقيه عاوز له طاسه الخضه بعد اللى شافه ده 😂
و ماله أن شالله يكون العفريت لبسه سخصيا هاخده منها يعنى هاخده منها
تمت
#د.جيهان_عادل
تحفه تسلم الايادي
ردحذفايه الجو ده دى طلعت فظيعة وشنيعة 😂😂😂😂
ردحذفرائع جدا
ردحذف