الخطيئه الجزء السادس

#الخطيئة

#الجزء_السادس

قصص رعب روايات جميلة روايات رومانسية روايات اون لاين روايات كاملة كتب وروايات

و فى يوم من الايام كنت قبل امتحانات الترم التانى فى تالته إعدادى بشهر صارحنى أنه خلاص مبقاش قادر يستغنى عنى لحظه و أنه عاوز يتجوزنى 

 ‏فرحت و قلت له طيب ما تيجى تطلبنى من امى 

 ‏اجى ازاى بس و انا مبشتغلش ؟؟ امك عمرها ما هترضى بيا 

 ‏طب و بعدين يا وائل ؟؟ انا كمان بحبك اوى و مبقتش اقدر استغنى عنك ابدا 

 ‏يبقى خلاص مش قدامنا غير حل واحد 

 ‏ايه هو ؟؟؟

أننا نهرب سوا 

نهرب سوا ازاى ؟؟

زى الناس ...انتى مش بتقولى انك بتحبينى ؟؟؟

ايوه بحبك اوى 

يبقى خلاص لازم تسمعى كلامى 

بس مينفعش يا وائل 

هو ايه اللى مينفعش ...انا كدا اتأكدت انك عمرك ما حبتينى صحيح 

لا و الله بحبك بس ليه نهرب ؟؟

انا قلت لك انى لو جيت اتقدمت والداتك مش هتوافق نهائى يبقى لازم نهرب و نحطها قدام الأمر الواقع دا لو بتحبينى يعنى 

و الله بحبك بس مش فاهمه 

بصى يا ستى انا هاخدك و نطلع يومين أو تلاته على اسكندريه نتفسح و نبلبط في الميه طبعا امك هتدور عليكى و لما ترجعى و تعرف انك كنتى معايا مش هتقدر تتكلم و هتوافق على جوازنا على طول 

فكره حلوه دى يا وائل ...انت بتجيب الافكار الحلوه دى منين ؟؟

من مخى ...هيكون منين يعنى يلا بقا روحى و نتكلم بالليل على الواتس 

و ابتدى الشيطان يزين لى الرحله و انها هتبقى أجمل ايام حياتى ووعدنى أنه هيكون ابويا و اخويا و سندى و حبيبي اللى اتسند عليه و اطمن و انا فى حضنه و ان الحكايه هتنتهى نهايه سعيده اللى هى الجواز 

و لما فعلا اقتنعت و بقيت احلم بيها و بجوازنا   بقيت انا اللى اطلب منه أننا نهرب فكان يقول معلش هنأجل شويه

ولما سألته هتأجل ليه ؟؟

اصل ممعييش فلوس و انا عاوز افسحك و اوريكى الدنيا اللى مشفتهاش

طب و بعدين يا وائل انا مش قادره اعيش من غيرك و امى مضيقه عليا الخروج لما لاحظت انى بقيت أخرج كتير ؟؟و صراحه انا مخنوقه اوى من البيت و مش قادره اعيش فيه اكتر من كدا 

يعنى خلاص قررتى تمشي ؟؟؟

ايوا 

يبقى مفيش حل  بقا غير انك تجيبي القرشين اللى امك عايناهم فى الدولاب نصرف منهم 

ايه ؟؟ لا مينفعش خالص 

يبقى انتى بقا كنتى بتضحكى عليا و امك معندهاش فلوس ؟

لا و الله ما ضحكت عليك 

يبقى  اكيد مش واثقه فيا ؟

ازاى تقول كدا ؟؟ لو مش واثقه فيك عمرى ما اكلمك ابدا 

يبقى خلاص تعملى اللى قلت لك عليه 

انا خايفه يا وائل 

خايفه ووائل حبيبك معاكى ؟؟ اوعى اسمع الكلمه دى ابدا منك مره تانيه 

و فعلا اقنعنى الشيطان انى أسرق امى و اهرب معاه و كنت فاكره انى رايحه للجنه برجليا .

حضرت غيارين و اخدتهم فى شنطه الدرس و اخدت الفلوس و رحت استنيت وائل على محطة القطر زى ما قالى

اخدنى وائل و سافرنا على اسكندريه

 اجر هناك شقه لمدة شهر من فلوس امى و بقى يفرتك الفلوس و يجيب كل يوم اكل حلو و ياخدنى يودينى الملاهى و المطاعم و انا كنت فرحانه و حاسه ان الدنيا ضحكت لى اخيرا و ربنا عوضنى عن ابويا

كانت سرقانى السكينه و كنت حاسه انى بحلم 

بعد الشهر ما خلص رجعنا تانى بس على بيت أهله 

بس مش اللى قدام سكنا 

فى الشهر ده امه و أخته نقلوا فى مكان شعبى جدا 

هو اخدنى و رحنا على هناك و كنت فاكره أنه هينفذ بقيه وعده ليا و يروح لامى و يطلبنى منها 

لكن للاسف ضحكوا عليا و قالولى أن امى و لا دورت عليا و لا عملت حاجه و كانت تقابل الناس و لما يسألوها عليا كانت تقول غارت فى داهيه انا مليش بنت اسمها اروى

و صدقت كلامهم وصدقت أن امى فعلا كرهتني و شطبتنى من حياتها 

قعدت اعيط و امه تطبطب عليا و للاسف ضحكت عليا للمره التانيه و قالت لى انى لازم احمل من ابنها علشان ميبقاش عليه مسؤليه جنائيه و امى تتبلى عليه و تقول خطفنى و وعدونى بعد ما احمل أنهم هيجوزونى لابنهم

و بالفعل حبسنى فى اوضه و مبقاش يخرجنى ابدا بحجه أنه خايف أن امى تعرف مكانى و تعمله مشاكل 

و ابتدا العذاب .....بقى يضربنى و يهينى و يقفل عليا بالايام ...بقى يجوعنى و يستخسر فيا اللقمه الحاف 

و للاسف حصل الحمل كنت فاكره أن معاملته هتتغير لكن محصلش أى تغيير بقى يضرب فيا و يعذبنى برده ...ورالى العذاب الوان 

قعدت على الحال ده خمس شهور 

خمس شهور تعذيب وذل و قله قيمه 

لحد ما فى يوم جاله تليفون و طلع جرى و نسي الباب مفتوح ومقفلش عليا زى كل مره 

اخدت بعضى و جريت ...كنت اول مره اشوف الشارع من اكتر من خمس شهور 

هدومى مش نضيفه و علامات الضرب على جسمى كله مفيش مكان مفيهوش علامه 

هربت و انا مش عارفه اروح فين ؟؟

المهم انى امشي و خلاص 

طب اروح لامى ؟؟؟ بس هى اتبرت منى خلاص و مبقتش عاوزانى 

طب اروح ادور على ابويا ؟؟

ابويا مين اللى مسألش علينا و لا يعرف عنا حاجه و بعدين مش بعيد يقتلنى بعد اللى حصل ده

طب امشي فى الشوارع و خلاص ؟

منا خايفه من الشارع و اللى فيه و يمكن وائل يدور عليا و يلاقينى و يحبسنى مره تانيه 😔

قصص رعب روايات جميلة روايات رومانسية روايات اون لاين روايات كاملة كتب وروايات

يتبع....

 ‏#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...