#اريد_حقى
# الجزء_الرابع
قصص رعب روايات جميلة روايات رومانسية روايات اون لاين روايات كاملة كتب وروايات
الكل مشي و جوزى خرج يودعهم و انا كنت عامله زى وابور الجاز المولع اللى النار خارجه من ودانه
اول ما دخل البيت قلت له
انا عاوزه افهم بقا امك و اخواتك قصدهم ايه باللى عملوه ده ؟؟؟؟😠
عملوا ايه يعنى ؟؟
عمالين يتغمزوا و يتلمزوا عليا
الناس و لا اتغمزت و لا حاجه انتى اللى حاطاهم فى دماغك
قولى يا فوزى البيت ده انت شاريه بكام ؟؟
و انتى مالك يا ندى ؟؟
بقا كدا يا فوزى ؟؟
البيت بخمسين ألف يا ندى
نعم ؟؟ فى بيت بالمساحه دى بالتمن ده ؟؟؟
و ماله يعنى ؟
ماله ايه انت عارف كويس إن بيوت اصغر من دا بكتير بتتباع بسعر أعلى من كده
يا ستى البيوت اللى بتتكلمى عليها دى بتبقى جوه البلد لكن عشان البيت ده بعيد شويه عن العمار فعشان كدا تلاقى سعره اقل
كلامك مش مريحنى و لا الحركات اللى عملتها امك و اخواتك مريحانى
مريحك بقا و الا مش مريحك انا داخل انام و هاخد العيال معايا على ما تلمى الليله دى و تغسلى المواعين
ماشي يا فوزى
اخدت موبيلى و دخلت المطبخ لقيت تل مواعين
حطيت السماعات فى ودانى و اتصلت على امى احكيلها اللى حصل
الو ...ازيك يا ماما
ازيك يا ندى ...ايه ضيوفك مشيوا ؟
ايوا يا ماما مشيوا بعد ما حرقوا دمى
ليه كدا عملوا ايه يعنى ؟؟
هى تقى مش حكت لك اللى حماتى قالته ؟؟
لا و الله يا بنتى اختك لما دخلت كانت داخله مبلمه لدرجة انى شكيت يكون جوزك قالها كلمه زعلتها ، دخلت وراها و سألتها قالت لى انها تعبانه و منمتش طول الليل و لما سألتها ليه منمتش قالت إنها مستريحتش و انها عمرها ما هتبات عندك تانى ...بس معرفش بقا مين زعلها ؟
مفيش حد زعلها يا ماما هى حلمت بكابوس و انا كمان كل يوم بحلم بكوابيس وحشه اوى
يمكن يا بنتى عشان البيت بقاله فتره مقفول ...بقولك ايه انتى لازم تمسحى البيت بميه و ملح و تبخرى البيت بمستكه و جاوه و كسبره
يا ماما ميه و ملح ايه بس ؟ و ابخر ايه ؟؟
اسمعى كلامى يا ندى ليكون فى البيت حاجه تأذيكى انتى و عيالك
و الله يا ماما انا شاكه فى كدا برده لان حماتى و اخوات جوزى كانوا عمالين يتغمزوا و يضحكوا طول ما هما قاعدين
شفتى ؟ زى ما قلت لك ...انتى لازم تعملى اللى قلت لك عليه
حاضر يا ماما هبعت بكره اجيب الحاجات اللى قلتى عليها
ايوا يا بنتى و متنسيش تشغلى القرآن فى البيت
حاضر يا ماما
خلصت مكالمه و شطبت باقى المطبخ و لسه خارجه من باب المطبخ شميت ريحة شياط رهيبه و حراره هبت ورى ضهرى لدرجة انى تخيلت انى اول ما التفت هلاقى كتلة نار فى ضهرى
بس الحقيقه أن مفيش اى نار و لا حاجه
قربت من البوتجاز يمكن فى حاجه سايحه و انا مش واخده بالى
بس برده ملقتش حاجه و ريحة الشياط ملت الدنيا لدرجه انى حسيت أن نفسي ضاق و مش قادره اخد نفسي و بدأت اتخنق رحت فاتحه الباب اللى مودى على الجنينه الورانيه
اول ما فتحت الباب حسيت بحد بيجرى وسط الضلمه
اتخضيت جدا و جريت بسرعه على فوزى
الحق يا فوزى ...الحق
فى ايه يا ندى ؟؟
فى حد فى الجنينه الورانيه
حد ؟ مين شفتيه ازاى ؟
فتحت الباب اهوى المطبخ لقيت حد بيجرى فى الجنينه
فوزى اخد شومه و طلع جرى يشوف مين اللى ورا و انا كنت خايفه عليه ليكون حرامى و يعملوا حاجه فيه
فتحت كل الانوار اللى بره عشان اشوف اى حاجه
فوزى قعد يجرى شمال و يمين و طلع بره سور البيت خالص و لف حوالين البيت ملقاش حد
فوزى دخل و هو بيبص لى بصة اتهام
مالك بتبص لى كدا ليه ؟؟
مفيش حد يا ندى
طب و الله سمعت حد بيجرى فى الجنينه
و انتى ايه اللى خلاكى فتحتى باب المطبخ اصلا ؟؟
اصل كان فى ريحة شياط جامده فى المطبخ
ريحة ايه ندى و انتى مخلصه طبيخ من بدرى .... بقولك ايه يا بنت الناس انتى كدا مش ناويه على عيشه
انت بتقول ايه ؟؟
بقول انك بتتلككى يا ندى و عماله تفتعلى فى خناقات من ساعة ما رجعت و جبتك هنا
و الله العظيم ابدا يا فوزى ...البيت هنا فى حاجه غريبه
و اشمعنا انتى اللى حاسه بالحاجه دى لوحدك ؟؟ منا كمان معاكى فى نفس البيت و مش حاسس بأى حاجه
مش عارفه
هنا سمعنا صوت واحد من الولاد بيصرخ
ادخلى شوفى الواد
طب مش هتيجى تنام
لا هقعد اشرب سيجاره هنا و بعدين ادخل
دخلت اشوف مين صحى من اولادى لقيت فخر الدين بس اللى فى السرير
ايه دا نور فين ؟؟؟
بصيت تحت السرير يمكن وقع مع أنه صغير و مبيعرفش يتقلب اصلا ملقتوش
الحقنى يا فوزى ؟؟؟
يا لهوى يا لهوى
فى ايه ؟؟؟
نور مش هنا ...نور راح فين ؟
انتى بتستهبلى ؟؟ هو ايه اللى راح فين ؟؟
مش لاقياه يا فوزى الحقنى
فوزى جرى على بره و انا اخدت فخر على أيدى و جريت وراه
كل اللى جه فى دماغى أن اكيد اللى كان بيجرى فى الجنينه ده كان حرامى و لما انا خرجت من الباب الرئيسي ورا فوزى هو دخل من باب المطبخ و سرق ابنى
بقيت اصرخ و اخبط على دماغى .....و فوزى كان زى المجنون بيجرى فى كل حته
و بعدين لقيته دخل جرى على البيت و دخل الاوضه اللى كانت نايمه فيها تقى لقى نور نايم فيها و رايح فى سابع نومه
فوزى قعد على الأرض لأن أعصابه كانت باظت خالص و انا اخدت ابنى فى حضنى و قعدت ابوس فيه
يا حبيبي يا ابنى
و الله حرام عليكى
حرام عليا ؟؟ حرام عليا ليه ؟؟
دى حركه تعمليها فيا ؟؟
انا ؟؟؟ انت ازاى تقول كدا ؟؟
امال مين اللى نقل الولد لهنا ؟
ليه متكونش انت ....مش انت اللى اخدتهم و دخلت بيهم ؟؟ ليه متكونش الست الوالده موصياك تجننى ؟؟
انتى فعلا بينك اتجننتى ...الله يخربيت الجواز على اللى شار بيه
فوزى خرج قعد قدام البيت و مدخلش
فضلت طول الليل بعيط من الخضه و من كلامه اللى دبحنى و استنيته يدخل يصالحنى ..
الفجر اذن و عينى ابتدت تروح فى النوم لقيته داخل عملت نفسي نايمه
راح قاعد جنبى على السرير و لقيته بيوطى عليا عشان يبوسنى
حسيت بحراره جسمه زى ما يكون عنده سخونيه بس مرضتش افتح عينى و قلت هسكت لما يصحينى
لكن فضل حاضنى حوالى دقيقه لحد ما كنت مش قادره اتحمل الحراره اللى خارجه من جسمه
فتحت عينى عشان اساله هو عيان و الا ايه ؟؟
ملقتش اى حد ؟؟؟؟
نعم ....ايه دا ؟؟ امال مين اللى كان واخدنى فى حضنه دلوقتى ؟؟؟؟؟
جسمى قعد يرتعش و كنت عاوزه اصوت بس خفت أن فوزى ميصدقنيش و يفتكرنى عامله لعبه عليه عشان يدخل و يكلمنى 😔
يتبع...
قصص رعب روايات جميلة روايات رومانسية روايات اون لاين روايات كاملة كتب وروايات
تعليقات
إرسال تعليق