#اغادير_ قصص رعب
#الجزء_الثانى_عشر
قصص رعب روايات جميلة روايات رومانسية روايات اون لاين روايات كاملة كتب وروايات
و لقيت نفسي فجأه واقفه انا و الشيخ ذاكر فى وسط شارع فى مدينه شكلها غريب
زى ما اكون رحت بلد اجنبى ...الأرض من الرخام و الحوائط من الجرانيت ...كيانات و صور بتتحرك من بعيد مش قادره احدد ملامحها
الشيخ ذاكر بص لى و قالى
اهلا بيكى فى مدينتنا
اهلا بيك يا شيخ ذاكر
اهم حاجه يا صفيه اوعى تخافى من اى شئ تشوفيه هنا ، طاقة الخوف ممكن تكشفنا
حاضر
يلا بينا على سوفيرا هى اللى هتقولنا هنعمل ايه علشان نوصل لحمزه
يلا بينا ...هى مكانها بعيد ؟؟
بمقاييسكم انتوا اه بعيد جدا لكن انتى هنا بتخضعى لمقاييسنا احنا ...هتخطى خطوه و انتى مغمضه عينك هتلاقي نفسك قدام بيتها
تمام
يلا ...غمضى و قولى بسم الله
بسم الله
و خطيت خطوه لقيت نفسي فى مكان غير المكان ....حته صحرا مفيهاش اى شئ غير بيت قديم زى بيوت العصور الوسطى
البيت مكون من طابق واحد و له شباك واحد و زى ما يكون مفيهوش نور
الشيخ ذاكر خبط على الباب و استأذن فى الدخول
سمعت صوت جاى من جوه
ادخل يا ذاكر انت و ضيفتك
اول ما خطينا البيت لقيت النور نور و لقيت الفرش جوه البيت غير اللى انا متوقعاه نهائى
فرش جديد اوى زى اى بيت حديث و البيت من جوه واسع جدا ، و لقيت ست عجوزه جدا قاعده لابسه نضاره و قدامها آلاف الكتب العتيقه اللى ورقها اصفر و مهترئ ...جنبها ماكينة قهوه و مشغله موسيقى هاديه
اقعدى يا صفيه ..اقعد يا شيخ ذاكر
انتوا دلوقتى جايين علشان تنقذوا حمزه و الاطفال اللى معاه من ايد اغادير صح ؟
ايوه
يبقى لازم يا صفيه تدخلى فى مواجهه معاها
ادخل فى مواجهه معاها ازاى ؟
لا لا مواجهه لا يا سوفيرا ، صفيه مش هتقدر على اغادير
ايه رايك فى الكلام ده يا صفيه ؟؟ صحيح مش هتقدرى على اغادير ؟؟؟؟
انا عشان ابنى اواجهه اى شئ
و دا اللى كنت عاوزه اسمعه منك ، كنت بتأكد بس إن روحك روح مقاتل
خلاص مدام انت يا ذاكر مش عاوز المواجهه يبقى الحيله تشتغل
تمام يا سوفيرا بس متنسيش أننا عاوزين ننتقم من ابو العيون كمان
دى قضيه صفيه ملهاش فيها ...مشكلة صفيه مع اغادير
و الموضوع مش سهل ابدا ...الموضوع بالنسبه لاغادير حياه او موت ...هى عاوزه ترجع لارا بنتها بأى طريقه
طيب مفروض علينا نعمل ايه ؟؟
لارا بنتها هى محتفظه بجثتها جوه تلاجه علشان تحفظها لو تم دفنها خلاص يبقى كدا ابو العيون مش هيقدر يرجعها مره تانيه
حلو اوى ...طيب ما ندخل و نجيب لارا و ندفنها
مش بالسهولة دى يا ذاكر ....اغادير مستخبيه فى مكان محدش يعرفه
يعنى مش موجوده فى بيتها ؟؟؟
لا طبعا علشان الاطفال اللى خطفاهم لو حد عرف انها خاطفه اطفال للانس هتتحاكم
طيب ما كدا سهله ما نبلغ عنها
الكلام ده معدش ينفع يا صفيه الوقت محدود جدا و عقبال ما نبلغ عنها هيكون ابو العيون استلم الاطفال و اخدهم و نفذ عليهم التعويذه ...
طب و الحل ؟ هنعرف المكان اللى مخبيه فيه حمزه ازاى ؟؟؟
انتى معاكى العروسه ؟؟؟
ايوه معايا ...اهى
هاتيها
العروسه دى هى اللى هتدلنا على المكان اللى اغادير مخبيه فيه الاولاد ، و نقدر ساعتها نوصل لجثة لارا و ندفنها و بكدا ميقدروش يعملوا اى حاجه
يا رب
بس خلى بالك اى غلطه هتحصل اغادير مش هترحمك ...هتموتى فى لحظتها
و انا مستعده
طيب مبدأيا كدا انا هخليكى شبه زغدانه المساعده بتاعه ابو العيون
ايوا عارفاها ....هى السبب أن ابنى اتاخد منى
زغدانه دى جنيه مكاره و مكرها مفيش زيه ، بس لازم زغدانه الاصليه تختفى عشان اغادير متكشفش الحكايه
سيبي الحكايه دى عليا انا يا سوفيرا انا اقدر بمشيئه الله اخطف زغدانه و اخبيها فى مكان ميعرفوش الجن الازرق
عظيم .....انتى من دلوقتى يا صفيه هتكونى زغدانه ...و دى الوحيده اللى تقدر تدخل عند اغادير و تتجول فى بيتها من غير ما تشك فيها
حاضر هعمل اللى تقولى عليه
قصص رعب روايات جميلة روايات رومانسية روايات اون لاين روايات كاملة كتب وروايات
دلوقتى انتى قدامك اكتر من مهمه و كل مهمه تعمليها هيترتب عليها الخطوه اللى بعديها
و ايه اول مهمه ؟؟؟
اول مهمه هتاخدى الازازه دى و تحاولى تحطيها فى اى مشروب بتشربه اغادير علشان تنام و تقدرى تنفذى المهمه اللى بعديها
و ايه المهمه اللى بعديها
المهمه اللى بعديها انك تدورى على لارا و تدفنيها
ادفنها ؟؟؟؟ ادفنها فين ؟؟؟
لازم تدفنيها فى مكان بعيد جدا اغادير متعرفوش لأنها ممكن تطلعها و ساعتها و لا كأننا عملنا حاجه
طب و انا هروح مكان بعيد ازاى ؟
ذاكر يساعدك فى الحكايه دى
حاضر يا سوفيرا ...هساعدها و ندفن البنت فى الجبل الأحمر
عظيم جدا ...بعد كدا هتيجى المهمه التالته
و هى أن هيكون عليكى تدورى على المفتاح
مفتاح ايه ؟؟
اغادير مخبيه الاطفال فى سرداب تحت الارض فى مكان مظلم متشوفيش فيه كف ايدك
يا حبيبي يا ابنى
عليكى يا صفيه انك تدورى على مفتاح السرداب و تفتحى للاطفال.
و بعد ما افتح لهم هتصرف معاهم ازاى ؟؟
لا دى شغلانه ذاكر برده ...هو يكون محضر مساعدين له يستقبلوا الاطفال و ياخدوهم يرجعوهم لاهاليهم ...مش انت عارفهم يا ذاكر ؟؟؟
ايوه اعرفهم واحد واحد و اعرف عناوينهم
عظيم اوى ...خلى بالك يا صفيه اللى هتعمليه ده شئ مخيف ...لو حصل اى غلطه فى اى خطوه هتموتى فى لحظتها ،لو اغادير كشفتك أو معرفتيش تحطيلها المنوم مش هتعرفى تطلعى من عندها يا اما هتموتى أو هتتحبسي فى صورة زغدانه للابد
ربنا يسترها
هيفضل كدا مشكله تانيه بس انتى ملكيش فيها بس لو حبيتى تساعدينا فيها دى حاجه ترجع لك
مشكلة ايه دى ؟
ابو العيون الملعون ...لو حابه تساعدينا فى التخلص منه يبقى كتر خيرك ، جميل مش هننساه لكى ابدا ، و لو محبتيش متخافيش مش هنزعل منك و لا نعيب عليكى
و انا مستعده اساعدكم زى ما ساعدتونى
و دا الرد اللى كنت متأكدة انى هسمعه منك
شوفى يا ستى ...ابو العيون ساحر ملعون و التخلص منه مش حاجه سهله دى حاجه عظيمه و عاوزه قلب من حديد ، اللى عاوزاه منك انك ......
يا ترى صفيه هتنجح فى تنفيذ خطة سوفيرا ؟؟؟؟ و يا ترى سوفيرا عاوزه صفيه تساعدها ازاى فى التخلص من ابو العيون ؟ طبعا كلكم عاوزين تعرفوا 🤔..دا اللى هتعرفوه فى الجزء الجاى باذن الله تعالى
🏵️🏵️🏵️🏵️
قصص رعب روايات جميلة روايات رومانسية روايات اون لاين روايات كاملة كتب وروايات
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
جميلة اوى 😍 تسلم ايدك 👏 ان شاء الله تقدر تنتصر عليهم وتنقذ الاطفال ❤️
ردحذف