#اغادير_ قصص رعب
#الجزء_الثالث_عشر
قصص رعب روايات جميلة روايات رومانسية روايات اون لاين روايات كاملة كتب وروايات
ابو العيون الملعون ...لو حابه تساعدينا فى التخلص منه يبقى كتر خيرك ، جميل مش هننساه لكى ابدا ، و لو محبتيش متخافيش مش هنزعل منك و لا نعيب عليكى
و انا مستعده اساعدكم زى ما ساعدتونى
و دا الرد اللى كنت متأكدة انى هسمعه منك
شوفى يا ستى ...ابو العيون ساحر ملعون و التخلص منه مش حاجه سهله دى حاجه عظيمه و عاوزه قلب من حديد ، اللى عاوزاه منك انك تدخلى عليه بنفس صوره زغدانه اللى هتكونى عليها و تقوليله أن اغادير جاهزه و جهزت لك المية طفل و جثة لارا و تطلبى منه أنه يروح معاكى المكان اللى فيه اغادير
هو ده اللى عاوزينه منك مش عاوزين اكتر من كدا و احنا بعد كدا هنتصرف معاه
طب ما دى حاجه سهله
لا مش سهله و لا حاجه ، ابو العيون لو شك فيكى أو عرف انك مش زغدانه مش بعيد يموتك و يمسخك مسخ ملوش ملامح علشان يعذبك طول عمرك
اعوذ بالله ربنا يستر
جاهزه يا صفيه ؟؟
باذن الله
سوفيرا طلعت عصايه من درج مكتبها و شاورت عليا بيها لقيت نفسي اتمسخت كائن شكله عجيب
واحده قصيره و ليا قرنين و شعرى طويل على ضهرى، سنانى بارزه لبره اديا و رجليا قصيرين و شكلهم غريب ، حتى صوتى بقى حاد جدا و عالى
ايه دا ؟؟
انتى كدا بقيتى زغدانه ...حاولى متتكلميش كتير علشان متتكشفيش
حاضر ...بس انا مستغربه نفسي اوى
دا طبيعى ...متخافيش هتتعودى
مسكت سوفيرا العروسه و بقت تتمتم بكلام غير مفهوم ....لحد ما قالت
أغادير فى الجهة الشرقيه فى قصر قديم اسمه قصر الزهور
ايوه عارفه
طيب خد زغدانه و روحله و متنساش تخطف زغدانه الحقيقيه قبل ما تدخل صفيه
طبعا طبعا من عنيه
و اخدنى الشيخ ذاكر و خطينا خطوه واحده بعد ما قلنا بسم الله و لقيت نفسي قدام قصر كبير مهجور
لما شفته قلبى بقى يدق جامد ، ابنى جوه و الله اعلم هعرف اطلع بيه و الا لا
استجمعت شجاعتى و طلبت العون من ربى
الشيخ ذاكر قالى استنى هنا شويه لما اشاور لك تدخلى القصر
و فى ثانيه لقيت يجى عشره معاه واقفين و مستنين قدام القصر
الشيخ ذاكر طلع بخور من جيبه وولعه ، اتارى زغدانه بتعشق البخور ده و بتنجذب إليه لو فى اى مكان فى الارض
بعد ثوانى لقيتها طالعه تشمشم بانفها الطويل و على وشها علامات التعجب ، مين اللى جاب البخور ده هنا ؟
اول ما خرجت خطفوها العشره اللى كانوا مع الشيخ ذاكر و كانت قويه جدا مكنوش قادرين عليها ،لكن فى النهايه مسكوها و سلسلوها و اخدوها و اختفوا
شاور لى الشيخ ذاكر انى اجى لانى كنت مستخبيه بعيد
يلا يا صفيه جه دورك توكلى على الله ، اوعى تغلطى فى حاجه
ربنا يستر يا شيخ ذاكر
معاكى الازازه اللى ادتهالك سوفيرا ؟
ايوه معايا ...اهيه
طيب توكلى على الله ربنا معاكى
قصص رعب روايات جميلة روايات رومانسية روايات اون لاين روايات كاملة كتب وروايات
ودخلت جوه القصر و انا بقدم رجل و بأخر رجل
القصر مكان مقبض جدا و تحس فيه بريحه غريبه قويه جدا ....المكان تقريبا مظلم الاضاءه اللى فيه ضعيفه اوى
القصر عباره عن دورين
طيب هروح فين ؟؟
انا معرفش اى معلومه عن زغدانه أو اغادير ...يادى الحيره يا ربى
سمعت صوت فى ودنى بيقولى متخافيش انا معاكى
دا صوت سوفيرا ...انتى هنا ؟؟
ايوه انا معاكى فى كل خطوه تخطيها ...متخافيش ...اطلعى دلوقتى على الدور التانى هتلاقى سبع اوض
اوضتك انتى الاولى على اليمين و اوضة اغادير اخر اوضه فى السبع اوض ، هتلاقى بابها لونه اسود ...اطلعى دلوقتى اقعدى فى اوضتك و هى هتجيلك
و طلعت و انا ركبى بتخبط فى بعض و فتحت باب الاوضه هبت عليا ريحه زنخه قذره ...نفس ريحتى الجديده بس اقوى شويه
المكان مش نضيف بالمره عامل زى المزبله
قعدت على السرير القذر و انا خايفه مش عارفه اعمل ايه
سمعت سوفيرا بتقولى فى ودنى عندك فى الدرج اللى جنبك ابرتين تريكو هاتيهم و اتسلى فيهم ...دى هواية زغدانه المفضله و اظن انك بتعرفى تغزلى
ايوه بعرف
فتحت الكوميدينو و خرجت الخيط و الابر و بدأت اكمل على اللى زغدانه كانت بتعمله ، تقريبا كدا كانت بتعمل كوفيه
فى اللحظه دى دخلت اغادير ..اول مره اشوفها بشكلها الحقيقى
شكلها مخيف جدا ، طويله لابسه اسود ، وشها زى الهيكل العظمى بس بشعر ، عينيها مخيفه جدا ...كل اللى جه فى بالى لحظتها أن ابنى و الاطفال اللى معاه شافوا المنظر المخيف ده ، يا ترى حس بايه ؟؟ يا حبيبي يا حمزه ...دا انا مرعوبه يا ترى هو جراله ايه ؟
أغادير بصت لى و انا كنت سرحانه و سمعت صوتها القبيح جدا و هى بتقولى
سرحانه فى ايه يا زغدانه ؟
مفيش ...
لسه بتعملى الكوفيه لابو العيون ؟
اه ..ايوه
انا مش عارفه بتحبيه على ايه؟ هو ده شكل يتحب اصلا ؟
على العموم انتى حره ...متنسيش انهارده معيادنا معاه
منا عارفه ...و عشان كدا بجهز له الكوفيه
عينى عليا ....طيب يا اختى يا رومانسيه هسيبك مع كوفيتك شويه
بقولك ايه ؟ تشربى معايا حاجه ؟
أغادير بصت لى باستغراب اول ما قلت لها كدا ... حسيت انها كشفتنى ، قلبى بقى يدق جامد
و هتسيبي الكوفيه ؟؟؟
اه ...و ليه لأ اصلى عطشانه
و ماله اشرب ...انتى عارفه انا بحب ايه ...اعمليه و هاتيه
خرجت اغادير و انا فى حيره ...مشروب ايه اللى بتحبه ؟؟ دلينى يا سوفيرا
انزلى تحت فى المطبخ يا صفيه هتلاقى ازازتين خمر محطوطين جنب بعض حطي لها الاتنين فى كاس واحد و متنسيش تحطى اللى ادتهولك عليه و بعد كدا تطلعى بيه
و عملت زى ما الصوت قالى و طلعت بالمشروب فوق...خبطت على اغادير
دخلت لقيت اوضتها غير اوضة زغدانه خالص
الاوضه مترتبه جدا و صور لارا بنتها حواليها فى كل مكان و بأحجام مختلفه و جنب كل صوره شمعه
اتفضلى يا اغادير
ايه دا ؟؟؟
دا ايه ؟ دا المشروب اللى طلبتيه
و معملتيش لنفسك ليه ؟ مش بتقولى عطشانه ؟
منا شربت تحت و انا بعملك مقدرتش اصبر الصراحه
كنت عارفه انك هتعملى كدا ...معندكيش صبر ابدا وكل حاجه بتعمليها بسرعه
دى طبيعتى
انا بقى عكسك تماما ...مخطيش خطوه الا اما احسب لها الحسبه
طب اتفضلى
و اخدت اغادير المشروب و هى بتبص لى ...كنت حاسه انها سامعه دقات قلبى ..اه يا انا يا ربى
و اول ما قربت الكاس لبقها ........
قصص رعب روايات جميلة روايات رومانسية روايات اون لاين روايات كاملة كتب وروايات
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
أزال المؤلف هذا التعليق.
ردحذفلا وقفتى فى حتة مهمة يا دكتورة انا متشوقة اعرف الباقى 👏👌❤️
ردحذف