#الخطيئة
#الجزء_الثانى
قصص رعب روايات جميلة روايات رومانسية روايات اون لاين روايات كاملة كتب وروايات
و لما كنا نسألها بعد كدا جابت القوه دى منين فى الموقف ده ؟؟؟؟
كانت تقول منكم انتوا ...ابوكوا طول عمره بيأذينى لكن لما توصل أنه يجيب واحده زى دى البيت و يأذيكم انتوا كمان يبقى لازم اتحول و اكون زى القطه اللى بتحاجى على اولادها لما يتعرضوا للخطر .
🌷🌷🌷🌷
مر كام يوم و لقينا صاحب البيت اللى ساكنين فيه جاى لامى
سلام عليكم يا ست ام اروى
و عليكم السلام يا حج
فين الايجار يا ام اروى ؟ هو ده يرضى ربنا يعنى؟
هو بيومى مدفعلكش الايجار ؟
لا مدفعليش و دا تالت شهر كمان
تالت شهر ازاى ؟؟
زى ما بقولك كدا ...هتدفعوا و لا تعزلوا و عوضى على الله فى الاجره ؟؟
لا نعزل نروح فين يا حج ؟؟؟ طب ادينى مهله اسبوع واحد اكون جهزت لك جزء من المبلغ
هديكى لآخر الشهر تكونى جهزتيلى المبلغ كله
دا اخر الشهر فاضل عليه اسبوعين يا حج
مليش دعوه يا ام اروى انا كدا عدانى العيب و لولا العيش و الملح و الله كنت حجزت على عفشكم
خلاص يا حج ربنا يسهل
امى دخلت و قفلت على نفسها و قعدت تعيط .. هعمل ايه يا ربى ؟ اجيب له فلوس منين ؟؟
قعدت اطبطب عليها
امى مسحت دموعها و بصت لى و قالت لى
تقدرى يا اروى تقعدى مع اخواتك الصغيرين ؟؟؟
منا بقعد معاهم يا ماما
لا يا حبيبتى مش كدا ...تقدرى تقعدى معاهم لوحدك على ما اروح الشغل و اجى ؟؟
لا يا ماما سها بتقعد تلعب فى الكهربا و نها بتقعد تكسر فى الحاجات
منا لازم أخرج يا اروى ابوكى من ساعة ما مشى نسي أنه له ولاد مفروض عليه يصرف عليهم حتى الايجار طلع مش دافعه و انا لازم اشتغل عشان اصرف عليكم و مخلكوش عاوزين حاجه ...انتى كبرتى دلوقتى و اكيد فاهمه كلامى كويس
حاضر يا ماما هقعد معاهم
شاطره يا حبيبتى ...ربنا يخليكى ليا
و ابتدت امى تخرج كل يوم علشان تدور على شغل و ترجع هلكانه من كتر اللف لدرجة أن جزمتها اتقطعت و بقت تمشي بيها مقطوعه
امى مكنتش عارفه تعمل ايه كل ما تروح تسال فى محل على شغل يقولولها عاوزين انسه حسنه المظهر
امى اخر ما زهقت باعت اوضة النوم بسعر قليل اوى عشان تعرف تأكلنا
و جه اخر الشهر و طالب صاحب البيت بالإيجار امى جت تديله باقى تمن اوضه النوم( بس طبعا مش اد تمن أيجار التلات شهور )...الراجل مرضيش و قعد يزعق
انا مش فاتحها سبيل يا اختى ...ما انتوا لو محتاجين كنت قلت معلش لكن جوزك هناك اهو مقضيها بالطول و العرض و اتجوز و مروق نفسه
انت بتقول ايه ؟؟ بيومى اتجوز ؟؟
لا هو انتى متعرفيش ؟؟ دا كان عاملها فرح الناس كلها اتكلمت عنه
فرح كمان ؟؟؟ انا مسمعتش و لا شفت حاجه
اه ما انتى قاعده فى القوقعه هنا ...بقولك ايه يا ست ام اروى انا عاوز الشقه تفضى بكرا
هروح فين يا حج بعيالى دول ؟؟
مليش فيه ...اللى اقدر عليه انى اسيبك من غير ما تدفعيلى الاجره المتأخره و كدا انا اكون عملت معاكى واجب كبير اوى
الشقه تفضى لاحسن و حياة ربنا لو جيت لقيتك فيها لارميلك عفشك فى الشارع
بقا كدا يا حج ؟؟ بقا دى اخرتها ؟؟؟
بقولك ايه بلاش جو الصعبانيات ده ...مش هياكل معايا خدى عيالك و امشي
لا اله الا الله معدش فيه رحمه يا ربى
الرحمه دى تروحى تسألى فيها المحروس جوزك مش انا و بالعربى كدا انا جايلى مستأجر هيدفع اد اللى بتدفعوه مرتين و انا و بيتى اولى بالقرش الزياده ده لمؤاخذه
عندك حق يا حج ...بكرا اخر النهار هسلمك شقتك
سامحيني يا اختى
على ايه ؟؟ عندك حق انت ملكش ذنب ..الذنب على اللى اتخلى عن مسؤوليته و مشي .
امى قفلت الباب و انهارت تماما ...بقت تصرخ زى المجنونه
بقا كدا يا بيومى الكلب ؟؟ تتجوز عليا ؟؟؟ و سايب عيالك مش لاقيين اللقمه ...و هيطردوا فى الشارع ؟ منك لله يا بعيد ...منك لله
امى فضلت تعيط لحد ما المغرب قرب يأذن و الدنيا ابتدت تليل
اروح فين يا ربى ...اروح فين ؟؟
امى قامت خطفت جلابيتها السمرا و نزلت على الشارع
راحت تدور على اوضه نقعد فيها
قعدت تسال و تلف فى منطقتنا ملقتش الا حاجات اسعارها عاليه اوى
السمسار بتاع المنطقه قالها مش هتلاقى هنا طلبك يا ام اروى انا ممكن ادلك على سمسار صاحبى هتلاقى عنده باذن الله
و فعلا وصف لامى مكان السمسار التانى ده و كانت حته شعبيه اوى
امى مكدبتش خبر و راحت للسمسار ده
سألها عن إمكانياتها
امى قالت له أن مش معاها فلوس بس هتشتغل قريب باذن الله و انها عاوزه حتى اوضه لها و لأولادها أن شاءالله تحت بير سلم
امى صعبت علي الراجل و قالها طيب انا هساعدك ..باين عليكى بنت ناس و مش وش بهدله
فى عماره بس مش فى المنطقه هنا ...شفتى الكوبرى اللى عديتى عليه عشان تجيلى ؟
ايوه
الناحيه التانيه من الكوبرى بقا فى عمارات عليوى اوى و اهلها ناس مستويات و كان فى واحد من أصحاب العمارات دى مكلمنى على بواب ممكن أقوله عليكى... منها تسكنى فى اوضه البواب و منها تشتغلى
اشتغل بوابه ؟؟؟
عارف انها مش شغلنتك بس ده المتاح ..و لو عاوزه اشوف لك اوضه فوق سطوح هنا يا اختى انا مستعد
لا خلاص انا موافقه ...ممكن تودينى للراجل دلوقتى ؟؟
لا دلوقتى الوقت أتأخر خليكى لبكرا
منا عاوزه اعرف راسي من رجليا عشان لازم اعزل بكرا ...صاحب البيت مش هيسبنى
خلاص بكرا تعاليلى من النجمه و انا اوديكى للراجل و لو المصلحه مقضيتش هجيب لك اوضه من تحت الارض متقلقيش خالص
خلاص يا حج متشكره اوى
امى رجعت لنا و كان الوقت متأخر اوى و قعدت طول الليل تدعى و تعيط ...لحد ما النهار طلع .
قصص رعب روايات جميلة روايات رومانسية روايات اون لاين روايات كاملة كتب وروايات
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ياخبر حرام عليه هايتعلقوا فى رقبته قدام ربنا 😔
ردحذفاللهم اقضى لكل محتاج حاجته
ردحذف