الخطيئه الجزء الاول

#الخطيئة

#الجزء_الاول 

قصص رعب روايات جميلة روايات رومانسية روايات اون لاين روايات كاملة كتب وروايات

تعبت يا ربى ...تعبت اوى ...لسه عندى ١٧ سنه بس شوفت اللى محدش شافه 

بعترف انى غلطت فى حق نفسي و فى حق امى و اخواتى البنات بس مكنش قصدى ...

انا افتقدت الاب القدوه.... و اول حد مد لى ايده رحت معاه و نسيت اللى امى عملته عشانى و عشان اخواتى 

هحكيلكم حكايتى و انتوا تحكموا عليا بس بالله عليكم متقسوش عليا انا فيا اللى مكفينى ....انا لسه عيله بس لو تشوفونى تقولوا ست عجوزه عندها ستين سنه ...نفسي مكسوره و عينى مش قادره ارفعها فى حد و لا قادره اواجه المجتمع

الحكايه بدأت لما كنا صغيرين مع اب عديم المسؤليه ... قاسي بمعنى الكلمه 

كنت اشوفه دايما بيضرب امى ضرب مبرح كان يخلى الدم ينزف من كل حته من جسمها 

و هى كانت تلم نفسها و تروح تغسل جروحها و تاخدنا فى حضنها انا و اخواتى و تبكى 

احنا تلات بنات انا كنت أكبرهم و ليا أختين توأم أصغر منى بسنتين

ابويا كان يدخل البيت يتطوح من القرف اللي كان بيشربه و يفضل يزعق بصوت عالى و ساعات يغنى و لو امى قالت له وطى صوتك عشان الجيران كان يطلع فى البلكونه و يشتم فى الجيران و يقول مفيش حد يهمنى انا قاعد فى بيتى

و عشان كدا الجيران كانوا بيتجنبوه تماما 

هو كان بيشتغل تباع على عربيه نقل و كان ساعات يغيب باليومين و التلاته و كنا بنبقى مرتاحين منه اخر راحه اما الايام اللى كان بيجى فيها البيت كانت بتبقى ايام نكد و هم.

كان ساعات يدخل علينا انا و اخواتى يضربنا بدون اى سبب ...هو مزاجه كدا 

كان عنيف عنف غير مبرر 

امى صبرت كتير لأنها مكنش ليها حد ...معاها تلات بنات فى رقبتها ...قليلة الحيله كانت تسكت علشان خاطر تعيش ..بس كنت اسمعها بتدعى عليه انها تخلص منه و أنه يخرج من حياتها و هى بتبكى و بتصلى....كانت تصعب عليا و اطبطب عليها بس مكنتش قادره اعملها حاجه.

كان يجيب صحابه ساعات يفضلوا يشربوا مخدرات و خمور و يخلى امى تخدم عليهم بالعافيه و يفضلوا يلعبوا كوتشينه على فلوس لحد ما الشمس تطلع يروح كل واحد فيهم و هو بيطوح 

امى كانت تخدم عليهم و تدخل اوضتها تقفلها على نفسها و علينا و  تبكى و مش قادره تقوله لا لأنها لو رفضت كان بيضربها ضرب باجرام 

 لحد ما فى يوم ابويا رجع البيت و معاه واحده من بتوع الشوراع

و راجع مش فى وعيه و مش مراعى وجود امى و لا وجودنا و لا حتى مراعى الجيران اللى حوالينا 

انا فاكره انى كنت نايمه  انا و اخواتى فى حضن امى و كان عمرى ساعتها حوالى خمس سنين 

و صحيت على صوته هو و الست اللى معاه بيغنوا و بيضحكوا ضحك عالى اوى 

و بيصحى امى و يقولها

قومى يا وليه اتخمدى فى الأوضه التانيه

امى فتحت عينيها لقت واحده لابسه عبايه سمرا مفتوحه و تحتها فستان بيلمع و حاطه كيلو مكياج فى خلقتها زى ما يكون واحد نقاش لسه مخلص وشها حالا

و حاطه تقريبا كدا ريحة الخنفرى اللى هى ريحه غريبه و زاعقه 

مين دى ؟؟ و ايه اللى مدخلها اوضتى ؟؟

اوضتك ايه يا وليه يا معفنه ...شايفه النسوان عامله ازاى ؟؟

نسوان مين ؟ هى دى نسوان ؟ هى حصلت كمان تجيبها لحد هنا ؟

انا اجيب اللى اجيبه دا بيتى و انا حر فيه 

هنا الست نطقت و قالت 

مالك يا اوخه ما تروقى يا عسل و تروحى تشوفيلنا حتتين تلج كدا 

اوخه دى تبقى خالتك يا روح خالتك  

و قامت امى جابت السنيوره من شعرها اللى كانت ضرباه اكسجين و لونه اصفر زى العدس بالظبط 

ابويا بقى يضرب فى امى  و امى تضرب فى الست و الست اتهرست تحت أيديهم  و بقت ترقع بالصوت و شعرها اتنتف حتت و العبايه المفتوحه اتقلعت و فضل الفستان اللى بيلمع و اللى بيظهر اكتر ما بيخفى و طبعا اتقطع حتت ..والست طلعت تجرى 

و فضل ابويا وامى يضربوا فى بعض ..ايوه زى ما قريتوا كدا ...اول مره اشوف امى ترد الضرب لابويا 

كانت كل مره تاخد الضرب و تسكت لكن المره دى بقا يضرب و هى تضرب و تصرررررخ 

لما الجيران اتلموا و بدأوا يحجزوا ما بينهم

و هو يقولها اطلعى بره بيتى هى تقوله لا يا حبيبي دا بيتى و بيت عيالى انا حاضره انت اللى تطلع بره 

طبعا بعد الموقف اللى حصل ده كان خلاص مستحيل امى ترجع لابويا مره تانيه

هى جابت آخرها فعلا و شتموا بعض و رسيت انها لمت له هدومه و رمتهومله قدام الباب فى وجود الجيران و هو بقا اخد هدومه و بقى يحلف و يستحلف لامى أنه هيوريها شغلها و أن اللى عملته ده مش هيمر بالساهل

اول مره كنت اشوف امى بالقوة دى طول عمرى اشوفها ضعيفه منكسرة الجناح ...تضرب و تسكت حتى متردش الكلمه.

و لما كنا نسألها بعد كدا جابت القوه دى منين فى الموقف ده ؟؟؟؟

 كانت تقول منكم انتوا ...ابوكوا طول عمره بيأذينى لكن لما توصل أنه يجيب واحده زى دى البيت و يأذيكم انتوا كمان يبقى لازم اتحول و اكون زى القطه اللى بتحاجى على اولادها لما يتعرضوا للخطر .

قصص رعب روايات جميلة روايات رومانسية روايات اون لاين روايات كاملة كتب وروايات

يتبع....

 ‏#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...