أغادير الجزء الثامن عشر _ قصص رعب

#اغادير_ قصص رعب

#الجزء_الثامن_عشر

قصص رعب روايات جميلة روايات رومانسية روايات اون لاين روايات كاملة كتب وروايات

قمت جريت عليها و هوب لقيت نفسي بطير و ضربتها ضربه قويه برجليا 

أغادير طارت فى اخر الحلبه وقعت و اتخبط وشها فى الجانب المعدنى المربوط فيه الحبال 

وشها اتعور و نزل منه الدم ...حطت أيدها على وشها و شافت دمها مكنتش مصدقه نفسها 

قامت بسرعه وهجمت عليا مره تانيه 

هنا قفزت قفزه عاليه اتخطيتها و بقيت وراها و رحت سحباها من شعرها الطويل و لفه بيها حلبه القتال

و رميتها على الأرض بعد ما داخت 

افتكرت أن قواها خلاص ...لكن فوجئت بيها قامت و هجمت عليا وقعتنى على الأرض و بقت تضرب فيا 

من كتر ضربها فيا حسيت انى هغيب عن الوعى 

حسيت أن أصوات الناس حواليا بقى ملوش ملامح صوت عالى فى ودانى مش مميزاه و ابتدت الدنيا تسود فى عينى 

و خلاص كنت فعلا استسلمت لكنى شفت صوره حمزه ابنى قدام عينى و هو بيقولى

قومى يا ماما عشان خاطرى ...قومى علشان نروح بيتنا 

فتحت عينى بالعافيه و لقيت اغادير لسه بتضرب فيا و شعرى اتنكش و الدم بقا سايل من كل حته فى وشي 

و سبحان من امدنى بالقوه و لقيت نفسي قمت و زقيتها من فوقى نطرتها بعيد 

ووقفت بعد ما تمالكت نفسي و لقيت الشيخ ذاكر عمال يتمتم بكلام و سوفيرا بتشاورلى انى اتحمل 

أغادير عندها قوه هايله فعلا و بمقاييسنا احنا البشر مقدرش اغلبها ابدا 

بس كان جوايا يقين بالله انى على حق و أن هى اللى اعتدت عليا و على ابنى من غير ما اعملها اى شئ 

انا صاحبة حق و صاحب الحق عينه قويه 

رجعت اشتبكت باغادير تانى رفعتنى لفوق و رمتنى بره حلبه القتال وسط صرخات للناس الموجوده و تشجيع عالى 

ابتديت ازحف مره تانيه عشان اوصل لحلبه القتال و المره دى رجليا و اديا ابتدوا ينزفوا 

اول ما وصلت بالعافيه للحبال اغادير شالتنى من شعرى و كنت ساعتها عامله زى الريشه فى أيدها مفيش منى اى مقاومه 

أغادير رمتنى على الأرض و داست على شعرى و مكنتش قادره اتحرك نهائى 

هنا صفر حكم المباراه و حمدت ربنا أن الجوله انتهت 

هى اتغاظت جدا منه و بقت تشتم فيه 

ذاكر دخل الحلبه و اخدنى سندنى عشان اقعد فى ركن من أركانها 

و لقيت سوفيرا مستنيانى جنب الكرسي اللى هقعد عليه 

الحمد لله أن الحكم صفر يا شيخ ذاكر انا كنت هموت فى أيدها 

الحمد لله يا صفيه ...بس انتى كنتى قويه

قوية النيله دا انا اتبهدلت على الاخر ...شوف جسمى كله اتجرح و مبقتش شايفه من الدم اللى مغرق وشي 

متخافيش يا صفيه انا معايا حاجه بمجرد ما ارشها على جروحك هتلتئم 

صحيح ؟؟ هى فين دى يا سوفيرا ؟ اصل الجروح وجعانى اوى 

اهى يا ستى ...استنى لما اضمد جراحك و أرش لك الماده السحريه 

الله ..الله ..دا كلامك صحيح فعلا و مبقاش فى اى جروح فى اديا ولا رجليا 

ووشك كمان يا صفيه 

انا مش مصدقه عنيا 

يلا بقى عشان تستعدى للجوله التانيه و الاخيره ...الجوله دى اللى هتحسم مصيرك انتى و ابنك يا اما هتاخديه يا اما هتدفنى جنبيه 

ربنا يسترها يا سوفيرا 

الجوله دى مش بالايدين زى اللى فاتت 

امال هتبقى ازاى ؟

بصى لنفسك يا صفيه 

ايه دا ؟؟ انا لبسي اتغير و ايه الاسلحه دى 

دى اللى هتقاتلى بيها اغادير 

يا صلاة النبى ...و انا هعرف استخدمها دى ازاى ؟

متقلقيش يا صفيه استخدامها سهل مفيهوش مشكله بمجرد ما تسحبى السلاح و تصوبيه هيشتغل 

يا خبر 

مالك بس ؟؟

انا خايفه يا شيخ ذاكر 

متخافيش انتى ربك معاكى و كمان احنا مش هنسيبك 

يعنى هتعملولى ايه ؟

اللى هنقدر عليه 

انا زودت لك الحمايه على الدرع اللى انتى لابساه يا صفيه بس خلى بالك من دماغك 

طب ما تلبسيها حاجه على دماغها يا سوفيرا 

عندى قناع للراس و الوش بس تقيل اوى معرفش صفيه هتقدر تتحمله و الا لا 

اه اقدر ...اديهولى يا سوفيرا 

القناع اهو يا ستى 

يااااا دا فعلا تقيل جدا 

متقلقيش بعد شويه هتتعودى عليه بس قولى يا معين 

يا معين 

و هنا صفر الحكم مره تانيه و لقيت نفسي فى الحلبه لوحدى انا و اغادير 

الحلبه شكلها اتغير مبقتش مفتوحه زى اللى فاتت 

الحلبه بقت أوسع و عباره عن قفص حديدي كبير و عالى جدا جدا 

اول ما الحكم صفر لقيت الباب اتقفل علينا انا و هى 

و لقيت بدلتها هى كمان اتغيرت و شفت أن معاها اسلحه شكلها غريب اوى 

بصت لى و ضحكت ضحكه عاليه

و انا قلبى بقا يدق زى الطبله 

عاوزه اهرب منها بس ههرب فين ؟؟ انا خلاص لازم أواجه مصيري 

يا اما هتطلعى منتصره يا صفيه يا اما هتطلعى على ضهرك 

أغادير خرجت من جنبها سيف و هجمت عليا 

رحت انا بحركه تلقائيه مطلعه السيف بتاعى 

بس السيوف مكنتش سيوف معدنيه لا دى سيوف شكلها غريب بتطلع نور زى الليزر 

أغادير هجمت عليا بالسيف و انا رديت الهجوم و لقيت نفسي بتحكم بخفه و سرعه كأنى متدربه عليه 

مش عارفه السيف ده كان بيشتغل ازاى بس اللى شوفته أن لون و قوة الضوء الخارج منه مختلفه 

انا السيف بتاعى كان لون الضوء فيه بالوان قوس قزح أما اغادير فكان لون الضوء بتاعها احمر 

اول ما تلاقى الضوئين لقيت الضوء بتاع سيفى بيأثر على الضوء الاحمر و يخليه يتراجع لحد ما خلى السيف ميخرجش منه ضوء نهائى و هنا وقع منها على الأرض

اول ما السيف وقع على الأرض اختفى و مبقاش معاها سيف 

أغادير بصت لى بغل و حقد شديد 

و خرجت من جنبها التانى خنجر فضه بيلمع ايده من الزمرد الاحمر 

هجمت بيه عليا و لقيت نفسي فى خفه بتسلق حيطان القفص اللى احنا فيه و اغادير ورايا مش سايبانى  😔

      ‏        ‏

قصص رعب روايات جميلة روايات رومانسية روايات اون لاين روايات كاملة كتب وروايات

يتبع....

 ‏#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...