عنبر خمسه الجزء الرابع

#عنبر_خمسه

#الجزء_الرابع

دخلت الشقه دخلتنى واحده تقريبا بتشتغل هناك  على اوضه الانتريه و لقيت صوره كبيره جدا لساره بالالوان 

اد ايه ضحكتها جميله و ملامحها عذبه ...معقوله بنت بالبراءه دى تعمل اللى عملته ده ؟؟؟ 

قطع تقكيرى صوت الست اعتدال و هى بتقول

اهلا يا ابنى 

اهلا بحضرتك يا حاجه 

( الست قاعده على كرسي متحرك و شكلها جميل  بيضا زى التراكوه اللى كانوا بيجوا فى افلام زمان و باين عليها العز ) 

شاورت الست اعتدال للبنت اللى كانت بتزق الكرسي انها تخرج 

ساره عامله ايه دلوقتى ؟؟

ساره حالتها زى ما هى ...

حضرتك مزرتهاش و لا مره ؟؟

ما انت شايف يا دكتور حالتى الصحيه عامله ازاى 

 الف سلامه على حضرتك ....بس كنت عاوز منك شويه معلومات تساعدنا فى العلاج

انا تحت امرك يا دكتور ...انا مستعده اعمل اى حاجه بس ساره تخف ....عاوز تعرف عنها ايه ؟؟

كل حاجه ...يا ريت تحكيلى من و هى صغيره ...اى معلومه و لو كانت بسيطه ممكن تنفعنا فى علاجها 

ساره كانت طفله عاديه جدا باستثناء انها كانت حساسه شويه 

حساسه ازاى ؟؟

يعنى كانت اى حاجه تزعلها و أحمد الله يرحمه الصراحه كان مشجعها اوى بدلعه ليها الزايد عن اللزوم 

ازاى يعنى ؟؟

يعنى كل طلباتها مجابه ....لو شاورت على اى حاجه لازم تيجى 

قصدك اللعب و كدا ؟؟

كل حاجه مش اللعب و بس .. يعنى لو ضربت في دماغها تروح اسكندريه الساعه اتنين بالليل كان احمد يأخذها و يروحوا 

ياااا اد كدا كانت مدلعه ؟؟

اوى 

حضرتك معندكيش اولاد غيرها 

انا ؟؟ للاسف لأ 

ممكن لو عند حضرتك البوم صور لساره اتفرج عليه ؟

اوى اوى ....يا عايده هاتى البوم الصور من اوضة ساره 

بعد دقيقه كانت عايده جايبه البوم صور ضخم جدا و حاطاه قدامى 

اعملى فنجان قهوه للدكتور يا عايده ....قهوتك ايه يا دكتور ؟؟

ساده 

اعملى فنجان قهوه ساده يا عايده 

حاضر يا هانم 

فتحت الالبوم و شفت ساره من و هى عمر سنتين تقريبا 

لاحظت حاجه غريبه اوى فى كل الصور ساره متصوره جنب باباها اللى كان شكله زى الأجانب ابيضانى و عنيه زرقا 

دايما شايلها أو متصور جنبها ...عدد قليل من الصور اللى كان فيه والدتها و كانت بتتصور دائما بعيد عنها 

ماشاء الله الصور جميله اوى بس معظمها مع والدها 

ايوه طبعا مش بقولك أنه كان دايما بيدلعها و كمان معظم الصور دى انا اللى مصورها لهم فطبيعى انى مكونش فيها 

ايوه ...طب ممكن حضرتك تحكيلى عن جوازها و ازاى اتجوزت جوزها ده ؟؟ 

( اول ما سألتها السؤال ده لقتها سرحت و بان عليها الحزن الشديد و اتنهدت تنهيده جامده )

انا اسف لو ضايقت حضرتك 

لا ابدا بس انا مكنتش موافقه على الجوازه دى من الاول 

ليه بقا احكيلى 

سامر كان صديقنا قصدى صديق العيله و كان اصغر من والدها بحوالى خمس سنين 

كان رجل اعمال عنده مجموعة شركات فى كذا بلد عربى و افريقى 

فى اخر يوم من امتحان الليسانس بتاعها كنا قاعدين انا والدها لقيناها داخله علينا كعادتها مبتسمه 

ازيكم 

الله يسلمك يا سمسم ....عملتى ايه فى الامتحان ؟؟ 

و دا سؤال برده يا سي بابا هطلع الاولى زى كل سنه أن شاء الله 

عظيم عظيم ...اطلعى انتى الاولى و سفريه فرنسا هتكون هديتك زى ما وعدتك 

لا انا خلاص صرفت نظر عن سفريه فرنسا 

و ليه بقا ؟؟

اصل انا عاوزه اسافر حته تانيه 

و ماله يا ستى انا تحت امرك عاوزه تروحي فين ؟؟ امريكا ...ايطاليا ....المانيا 

لا لا انا نفسي ازور افريقيا 

افريقيا ؟؟؟ و ايه الحلو فى أفريقيا ؟

لا ...دى افريقيا دى حاجه تانيه انت لو تعرف اللى عرفته عنها مكنتش قلت كدا خالص 

و عرفتى معلومات عنها منين بقا ؟؟

من سامر 

سامر مين ؟؟ سامر صديقنا ؟؟

ايوه 

قصدك اونكل سامر ؟

بابا انا عاوزه اقولك على حاجه 

قولى يا ساره 

انا و سامر عاوزين نرتبط ببعض 

انتى بتقولى ايه ؟ انتى اتجننتى ؟؟

لا يا ماما انا متجننتش و لا حاجه 

استنى يا اعتدال أما نفهم الاول 

نفهم ايه ؟ دى آخرة دلعك فيها ...كل حاجه مجابه بس الا دى يا ساره إلا دى على جثتى لو اتجوزتى الشخص ده 

أهدى يا اعتدال مالك فى ايه ؟؟

انت مش سامع بتخرف تقول ايه ؟؟؟ سامر ده ادك فى السن ...ايه اللى يغصبها على جوازه زى دى ؟؟

طب بالراحه ....كله بالهدوء 

يووووو ...اهى طريقتك دى اللى بتجننى كل حاجه سهله عندك

استنى بس 

ادينى مستنيه بس الجوازه دى لا يمكن تتم إلا و انا ميته 

فهمينى يا ساره ايه الكلام اللى بتقوليه ده يا بنتى ؟ و حصل امتى الكلام ده ؟؟

يا بابا انا معجبه بشخصيه سامر من زمان بس هو ابتدى يلمح لى من حوالى سنه كدا و ابتديت اخد بالى من نظراته و من حوالى ست شهور صارحني بحبه و طلب أنه يجى يتقدم لى بس انا قلت له لما اخلص دراستى الاول ...هى دى الحكايه كلها 

شفت يا احمد صاحبك اللى فاتحله بيتك بيخونك فى بنتك ازاى ؟؟

خانه فى ايه يا ماما ؟؟ سامر معلش اى حاجه غلط ... انا مش عارفه انتى مكبره الموضوع كدا ليه ؟

مش عارفه ليه ؟ لان الموضوع كبير فعلا و انا قلت مش هتتجوزيه يعنى مش هتتجوزيه 

لو سمحتى يا ماما دا مستقبلى و انا حره فيه 

شفت يا احمد البنت بتقول ايه يا خسارة تربيتى فيكى 

و قمت و سبتهم و انا متضايقه جدا ...بعد شويه جالى احمد و قالى أن ساره مصممه و أنه ميقدرش يقف قدام رغبتها فى الارتباط بسامر 

بقى كدا يا احمد ؟ حتة عيله هتمشي كلامها علينا ؟؟...انا بقا مش حاضرلها فرح و لا ليا دعوه بيها خالص 

هى مش عاوزه فرح يا اعتدال ..هى اتفقت مع سامر أنهم هيكتبوا الكتاب و تسافر معاه بفستان الفرح افريقيا و يمضوا هناك شهر العسل 

و كمان متفقه على كل حاجه ؟؟ ودورنا احنا فين بقا ؟؟ هنمسكلها ديل الفستان ؟ و الا هنسقف لهم و هما طالعين الطياره ؟

هى حره يا اعتدال و مدام سعادتها فى كدا منقدرش نقف قدام سعادتها 

انت هتجننى ؟ هى دى لعبه زى اللعب اللى كانت تشاور عليها تجيبهالها ....ما تتصل باللى اسمه سامر ده و تجيبه هنا و تشوف ايه الكلام الفارغ اللى بيحصل ده 

انا فعلا اتصلت بيه و هو هيجى الليله عشان يتفق على كل حاجه و السفر هيكون الاسبوع الجاى باذن الله 

لا و الله ....طب ايه رايك انى مش قاعدالك فى البيت ...و ابقى خلى بنتك تنفعك 

و سبت البيت فعلا فى محاوله منى انى اضغط عليهم انهم يتراجعوا عن اللى عاوزين يعملوه ...بس للاسف كل شيء تم فى عدم وجودى و كأنى مليش اى لازمه و سافرت ساره مع عريسها بفستان فرحها بعد اسبوع واحد و للاسف مشفتش بنتى و لافرحت باليوم اللى كل ام بتحلم بيه 😔

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب