الدميه الجزء الثاني عشر

الدميه

الجزء الثانى عشر

قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي

صلوا على خير الأنام يا ساده يا كرام😍

امى نزلت تطمن على خالتى و اللى من يوم اللى حصل لها مبتخرجش من باب الشقه و لابسه الاسود ليل نهار و مبتفارقش سريرها الا للحمام 

 امى فتحت الباب بمفتاح معاها 

اول ما دخلت لقت حاجه اغرب من الخيال ...لقت روس الفراخ المتقطعه موجوده على التربيزه اللى فى مواجهه الباب و الدم مغرق التربيزه و نازل منها و ممتد لباب الاوضه اللى بتنام فيها خالتى 

امى اتخضت لان كميه الدم اللى موجوده دى لا يمكن تكون دم الفراخ دى اكيد حاجه تانيه 

امى جريت على الاوضه و رجليها بتدوس فى الدم و فتحت الباب على خالتى لقيتها واقعه من على سريرها على الأرض و الدم حواليها و بقايا شموع فى الارض و علامات شكلها غريب مرسومه بالدم على الأرض و الحيطه

امى قعدت تصرخ لحد ما البيت اتلم عليها و نقلوا خالتى للمستشفى و اللى كانت فى حاله وحشه اوى و جسمها كله متشرح بطريقه غريبه و كله بينزف 

و للاسف معرفناش خالتى حصل لها ايه ساعتها و ايه عمل فيها كدا لأنها مبقتش تنطق و لا تستجيب لاى حد يتكلم معاها 

الدكاتره فسروا ده انها حاله اكتئاب حاد أدت انها تأذى نفسها لدرجه انها كانت هتتخلص من حياتها و طبعا قالوا إنها خطر على روحها و يمكن تكون خطر على اللى حواليها و تم ايداعها مستشفى الامراض العقليه .

أما بسمه بقا فبعد الحادثه دى ابتدت ترجع لطبيعتها و تخرج من اوضتها و تتكلم معانا و مع امها و اخواتها 

الكل كان مبسوط انها رجعت تانى و أنها مبقتش تشيل العروسه المخيفه دى فى أيدها 

محدش كان يعرف سر التغيير ده بس اللى عرفته بعد كدا أن جوز خالتى بيرتب زياره للصعيد لأن والدته مريضه و كان لازم يروح يزورها هو و مراته و أولاده 

بسمه كانت مبسوطه بطريقه رهيبه كنت بقالى كتير مشفتهاش مبسوطه بالشكل ده 

سألتها انتى مبسوطه انك هتسبينا و تمشي ؟؟ 

بصت لى و قربت منى و همست فى ودنى

 

اوى يا هدى 

و ليه بقا ؟؟ 

عشان تعبت و عاوزه ارتاح 

مش فاهمه ...تعبتى ازاى ؟؟ و عاوزه ترتاحى من ايه ؟؟ 

بكرا تفهمى كل حاجه

قلبى اتقبض لما سمعتها بتقول كدا و قررت انى لازم اقول الكلام اللى قالته ده لخالتى 

رحت لخالتى فى المطبخ بعد ما عملت نفسي عاوزه اشرب و قلت لها 

عاوزه اقولك على حاجه يا خالتو

قولى يا هدى 

خلى بالك من بسمه 

ليه بتقولى كدا ؟؟ 

بسمه بتتكلم بطريقه غريبه و بتقول انها تعبت و عاوزه ترتاح 

هههههههه و دا اللى مخوفك ؟؟ ما كلنا تعبنا و عاوزين نرتاح و بعدين انتى مش واخده بالك أن بسمه اتحسنت اوى و مبقتش زى الاول ؟؟

ايوا ملاحظه 

يبقى خلاص هو مجرد كلام بتقوله متخافيش 

طب يا خالتى متعرفيش عروستها الغريبه اللى كانت جايباها معاها من الصعيد المره اللى فاتت راحت فين ؟؟ 

اه تقريبا كدا هى حطتها فى صندوق اللعب اللى تحت سريرها  ...مش عارفه كانت متعلقه بيها ليه كدا؟ دى عروسه شكلها وحش و انا جايبالها عرايس اجمل  منها بكتير  ...بس انتى بتسألى عن العروسه دى ليه ؟؟ 

لا مفيش جت على دماغى كدا 

طيب يا هدى ....خدى يلا العصير ده و روحى اشربيه مع بسمه 

لا يا خالتو انا هروح لماما زمانها قلقت عليا 

و كمان عشان اسيبك تجهزى الحاجات اللى هتاخديها معاكى شايفاكى مشغوله 

اه و الله يا هدى ...امك دى متجيش تساعدنى ؟؟ 

هقولها يا خالتو 

و طلعت و قلت لماما تروح لخالتو تساعدها لكن ماما كانت مشغوله هى كمان و كانت قالبه الشقه و عماله تنضف فيها 

خالتى كان ميعاد القطر بتاعهم الساعه ٦ صباحا و للاسف اتأخروا عليه ووصلوا بعد ما اتحرك بخمس دقايق 

خالتى قالت لجوزها يلا نرجع بقا 

نرجع ازاى ؟؟ انا لازم اروح لامى انهارده دى حالتها وحشه اوى و يا الحقها يا ملحقهاش 

يعنى هنركب مواصلات ؟؟ 

ايوه مفيش قدامنا غير كدا 

ياادى النيله ....المواصلات متعبه جدا و هنفضل نطلع و ننزل فى كذا عربيه و معانا الشنط دى كلها 

معلش بقا هنعمل ايه بس 

و فعلا ركبوا مواصلات و بقوا يتنقلوا من عربيه للتانيه و كل واحد فيهم شايل شنطه كبيره حتى بسمه كانت شايله شنطتها و اللى عرفت بعد كدا إن كان فيها عروستها 

بسمه جه على دماغها فكره انها ليه متسبش شنطتها باللى فيها فى عربيه من العربيات و كأنها نسيتها عشان تتخلص من العروسه ؟؟؟ 

و فعلا عملت كدا و سابت الشنطه و كانت فرحانه اوى لما لقت العربيه اللى بعدها بتتحرك بيهم و أنهم خلاص بعدوا نهائى عن العربيه و الشنطه فيها 

وصلوا اخيرا للبلد بعد مشقه كبيره و خالتى اكتشفت أن شنطه بسمه مش موجوده 

ازاى الشنطه ضاعت منك يا بسمه ؟؟ 

معرفش يا ماما 

متعرفيش ازاى ؟؟ دا انتى كنتى شايلاها على ضهرك 

تلاقينى لما حطيتها جنبى نسيت اخدها 

طب اخر مره شفتيها معاكى كان فى انهى عربيه 

مش فاكره يا ماما 

و هتلبسي ايه دلوقتى ؟؟ 

هلبس اى حاجه من حاجات اخواتى أو ولاد عمى متقلقيش 

انتى دايما مهمله كدا ...ياريتنى ما خليتك تشيلى الشنطه دى 

يا ماما يا ماما 

عاوزه ايه يا سها 

بابا بيقولك تعالى بسرعه تيته ماتت 

خالتى جريت على اوضه حماتها لقت ولادها كلهم حواليها و زى ما يكون روحها كانت متعلقه و لما شافت جوز خالتى روحها طلعت 

الكل بقا يعيط و جوز خالتى انهار و بقا يقولها 

انا جيت لك اهو يااماى...طب كنتى كلمتينى كلمه واحده ....يا حبيبتى يااماى 

طبعا البيت اتقلب محزنه و خالتى مكنش معاها لبس اسود 

اخت جوزها اديتها جلابيه سودا و انقضى اليوم فى غسل و تكفين و دفن و عزا و دا كله مكنتش خالتى طلعت الهدوم من الشنط و لا ريحت جنبها من السفر 

خلص اليوم بصعوبه و دخلت خالتى ترتاح فى اوضتها و لسه بتفتح الشنطه الكبيره لقت .....

يتبع 

قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..