الدميه
الجزء الحادى عشر
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام😍
من اول دخول العروسه دى بيتنا و المصايب نازله علينا
بسمه جابت لبيتنا لعنه من البيت الملعون ده و الله اعلم اللعنه دى هتنتهى بايه 😔
بعد حادثه الحريق دى الكل بدأ يسأل و يلاحظ أن فى شئ غريب بيحصل ..كل الاحداث الغريبه اللى ملهاش تفسير
جوز خالتى رجع تانى لفكره الشيوخ و أن اكيد البيت ده فى حاجه مش طبيعيه
اسمعى يا سميه اللى بيحصل ده مش طبيعى و انتى عارفه كدا كويس بس بتأوحى
عندك حق يا اخويا انا فعلا مبقتش عارفه آخرة اللى احنا فيه دا ايه ؟؟؟ و كل يوم افتح عينى و انا بقول استر يارب
و عشان كدا لازم نشوف شيخ كويس يجى يشوف لنا الحال ده
بس يكون شيخ يا ابو بسمه مش دجال ...احنا مش ناقصين يا اخويا ...اللى بيدخل السكه دى بيلففوه حوالين نفسه و مبيخلصش ابدا
طبعا يا سميه ...و هو احنا هنجيب الهم لنفسنا ؟؟؟ احنا بس عاوزين نعرف فى ايه فى البيت ؟؟ خاصة أن الحاجات دى مكنتش بتحصل قبل كدا
اه و الله ...ابويا الله يرحمه كان دايما يقرأ فى البيت قران و كان اى حد يدخل عندنا يقول بيتكم مريح و ريحه حلو ....معرفش ايه حصل له ؟؟ بقينا كلنا فى حاله كسل رهيب و عندنا اكتئاب و بننام اكتر ما بنصحى
خلاص انا هتوكل على الله و اروح اشوف حد بيفهم فى الكلام ده
اسأل فى الجامع اكيد هيدلولك هناك
منا نويت اعمل كدا باذن الله
خالتى استسلمت لكلام جوزها خاصه انها لاحظت أن فى حاجات بتختفى من البيت و تفضل تدور عليها و بعد ما تغلب تدوير تلاقيها فى نفس المكان اللى كانت حاطاها فيه
جوز خالتى سأل عن شيخ دلوه على شيخ اسمه الشيخ عبدالحميد راجل كبير حافظ كلام الله و الكل بيشهد له أنه راجل مبروك و حل مشاكل زى دى كتير قبل كدا
جوز خالتى راح له و حكاله الحكايه من اول ما بنته اتبدل حالها و بقت تقعد لوحدها و متكلمش حد بعد ما كانت اجتماعيه و بتحب الناس كلها و حكاله كمان عن المشاكل اللى ظهرت فى البيت بعد كدا و اللى محدش قدر يفسرها زى الدم اللى كانوا بيلاقوه كل اول شهر عربى على السلالم و قدام بيوتهم
الشيخ سكت شويه و قال لجوز خالتى انا لازم اجى البيت علشان اشوفه و اشوف هل محتاج تحصين و الا لا و هل حد من اهل البيت ممسوس أو مسحور ؟؟
طب يعنى من خبرتك كدا و من اللى حكيته لك يا عم الشيخ ايه اللى ممكن يكون حصل للبيت و بدل حاله كدا ؟؟؟
ممكن يكون حد بيعمل لكم سحر و الله اعلم و خاصه انك بتقول بنلاقى دم على السلالم و العتب ...ممكن اوى حد يكون بيرش لكم الاسحار كل اول شهر عربى و بيجدد لكم على طول
سحر ازاى ؟؟ و هيدخل البيت ازاى ؟؟ دا البوابه مقفوله من تحت و محدش يقدر يدخل الا افراد البيت بس
و الله يا ابنى انا مش قادر احكم الا اما اجى و اشوف بنفسي
تشرف يا عم الشيخ طبعا ...شوف فاضى امتى و احنا هنستناك
ممكن يوم الجمعه بعد الصلاه
كويس اوى حتى يكون أهل البيت كلهم موجودين.....سلام عليكم
و عليكم السلام ورحمه الله وبركاته...بس على ما اجيلكم مش عاوز القران يتقطع من البيت
احنا على طول مشغلين اذاعه القران الكريم فى البيت مبنقطعهاش لا ليل و لا نهار
كويس ....ربنا يقدم اللى فيه الخير
اتفق جوز خالتى مع الشيخ عبدالحميد أنه هيجي البيت يوم الجمعه بعد الصلاه و كل البيت كان عارف الميعاد و مستنى الشيخ
لكن للاسف الشيخ مجاش
راح جوز خالتى يسأل عليه قالوا له أنه عمل حادثه ،و أن موتوسيكل خبطه و هو طالع من صلاة الجمعه
معقول دى صدفه ؟؟ و الا العروسه الملعونه طالته بشرها ؟؟؟ بس قبل ما جوز خالتى يجى يقولنا الخبر كنت رحت لبسمه عشان اعرف شعورها و الشيخ جاى
لقيتها عماله تغنى اغنيه غريبه كدا معرفش اتعلمتها منين و امتى
يا صايغ يا سمعان.. اعمل لي دبلتي
واكتب لي عليها.. أمي وخيّتي
وارسم لي عليها .. أوضة مضللة
وشجر مفرع.. بالعز يا وله»
شكلك رايقه ؟؟
و مروقش ليه ؟؟؟
مش خايفه من الشيخ اللى جاى ؟؟
مش لو جه ؟؟؟
يعنى ايه ؟ الشيخ مش هيجى ؟؟؟
هنا ضحكت بسمه ضحكه عاليه و سابتنى و مشيت
بعدها لقيت جوز خالتى جاى يقول إن الشيخ مش جاى
و فى يوم كنا قاعدين و لقينا الراجل بتاع الكتاكيت بينادى فى الشارع ، امى قالت لخالتى
ما تيجى نشترى كتاكيت و نربيها بدل الفراخ بقت اسعارها نار
خالتى قالت لها
و هو احنا هنعرف نربى الفراخ البيضا دى ؟؟ انا اسمع أن لهم طريقه خاصه فى تربيتهم
و لا طريقه و لا حاجه اهم حاجه تأكليهم علف و متخليهمش يبردوا منك
لا يا اختى مليش فى الكلام ده
خلاص هنزل انا اشترى ...يعنى معملش حسابك؟؟
لو لقيتى معاه كتاكيت بلدى هاتيلى عشرين
ماشي يا حبيبتى
و نزلت امى و اشترت عشرين كتكوت ابيض و عشرين بلدى و بداو يجهزوا لهم العشه فوق على السطح و يحطوا كل مجموعه لوحدها
كنا فرحانين بيهم اوى و كان كل عيال العيله بتتسابق على مين يطلع لهم الاكل
و فى يوم كانت الفراخ البيضا كبرت و امى كانت بتقول انها هتطلع تدبحها عشان خلاص كبروا
طلعت فوق عشان اذاكر فى الهوا لقيت العشرين فرخه بتوعنا مرمين و متقطم رقابيهم و مفيش و لا راس موجوده
انا شفت المنظر صرخت
امى طلعت جرى لقت الفراخ بالشكل ده
ايه دا ؟؟ مين عمل كدا ؟؟؟
الكل بقى مستغرب و خصوصا أن فراخ خالتى فى العشه اللى جنبهم و محصلش لهم اى حاجه
جوز خالتى قال اكيد دا ابوالحصين ( التعلب) هو اللى بيقطم رقاب الفراخ كدا و ياما عمل الحكايه دى عندنا فى الصعيد
بس السؤال ايه اللى هيجيب ابوالحصين هنا ؟؟ دا احنا فى مدينه و عمرنا ما شفناه و لا حد من جيرانا اشتكى أنه ظهر عنده
محدش عرف يجاوب على السؤال ده
و نزلنا كلنا و احنا مندهشين بس الكل قال مش نصيبنا و يمكن ربنا فدى بيهم حاجه وحشه كانت هتحصل
امى هزت راسها و قالت و نعم بالله ...الحمد لله على كل حال ....
امى افتكرت لحظتها خالتى صباح و أنها انشغلت عنها و مطلعتلهاش انهارده
امى نزلت تطمن على خالتى و اللى من يوم اللى حصل لها مبتخرجش من باب الشقه و لابسه الاسود ليل نهار و مبتفارقش سريرها الا للحمام
امى فتحت الباب بمفتاح معاها
اول ما دخلت لقت حاجه اغرب من الخيال .......
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق